د لاسرسي ځای

تازه خبر

خبرونه

د حقونو فعالې ګلالۍ پلار له جېله خوشې شو

پروفیسر اسماعیل د خپلې لور ګلالۍ اسماعیل تصویر ښيي

د بشري حقونو فعالې ګلالۍ اسماعيل پلار پروفيسر اسماعيل د نومبر پر۲۶مه له جېله خوشي شو.

نوموړی د اکتوبر پر ۲۴مه امنيتي ادارو په اسلام اباد کې د ریاست پرضد د بيانونو ورکولو په تور نيولی وو.

د هغه لور سبا اسماعيل د نومبر پر۲۶مه مشال راډيو ته وويل چې پلار يې په ضمانت خوشي شوی دی.

ګلالۍ اسماعيل هم د رياست پرضد د بيانونو ورکولو په تور کې حکومت ته مطلوبه ده.

هغه پر ځان لګيدلي تورونه ردوي او اوسمهال په امريکا کې اوسېږي.

د نننۍ ورځې ټول خبرونه وګورئ

د اورکزیو اوسېدونکو د بجلۍ لوډشېډېنګ ضد مظاهره کړې

د اورکزیو د څپرمېشتي سیمې خلکو د بجلۍ لوډشېډېنګ (برېښنايي پارچاو) ضد مظاهره کړې.

د سیمې لسګونه اوسېدونکي د اګست پر درېیمه هنګو ته ورغلي ول او هلته یې د اورکزیو انتظامي دفتر مخې ته نعرې وهلې او تر څه وخت پورې یې د ټل او کواټ ترمنځ لاره هم تړلې وه.

په احتجاج کې شامل یوه سیمه ییز مشر ملک حاجي امیر باچا مشال راډيو ته وویل، بجلي یې د اختر له ورځې قطع ده.

د ده په وینا، په سیمه کې یې ګرمي ده، اوبه نه لري او د قربانۍ غوښې ورڅخه خرابېږي.

په صوبايي اسمبلۍ کې د سیمې استازي سید غازي غزن جمال د اورکزیو له انتظامي مشرانو او د اوبو او برېښنا ادارې (واپډا) له چارواکو سره ولیدل او بیا یې د څپرمېشتو اوسېدونکو سره خبرې وکړې.

جمال مظاهره کوونکو ته د برېښنا بحالۍ ډاډ ورکړ چې تر هغې وروسته د اورکزیو اوسېدونکو احتجاج ختم کړ.

پاکستان له څه د پاسه یوې لسیزې راهیسې د برېښنا له کمښت سره مخامخ دی او په اوړي کې په زیاتره لویو ښارونو او کلیوالو سیمو کې د بجلۍ لوډشېډېنګ کېږي.

دوه امریکايي ستورمزلي د میکسیکو په خلیج کې کوز شول

ستورمزلي په پیراشوټ کې ښکته شول

امریکایي ستورمزلي ډګ هرلي او باب بېنکېن د اګست پر دویمه له نړیوال خلايي مرکزه د میکسیکو په خلیج کې کوز شول.

امریکايي ولسمشر ډانلډ ټرمپ پر ټوېټر ولیکل، دا په ۴۵ کلونو کې لومړی ځل وو چې ستورمزلو په اوبو کې په بریالي توګه د پیراشوټ له لارې ناسته وکړه.

د امریکا د خلايي څېړنو ادارې (ناسا) د مې پر ۳۱مه د اېلن مسک د شخصي کمپنۍ (سپېس اېکس) د پروژې په همکارۍ دوه ستورمزلي نړیوال خلايي مرکز ته ولېږدول.

دا هم لومړی ځل وو چې ناسا د یوې شخصي کمپنۍ راکټ وکاراوه.

ناسا وايي، تر دې وروسته د خلايي سفرونو لپاره د سپېس اېکس په څېر د شخصي کمپنیو مرسته اخلي.

د سږني حج مناسک پای ته ورسېدل

د حج پر مهال خلکو له یو بله فاصله ساتلې وه

په سعودي عرب کې محدود شمېر حاجیانو د سږني حج مناسک د اګست پر دویمه بشپړ کړل.

سږکال د کورونا وایرس وبا خپرېدو مخنیوي په موخه، له اټکل سره سم، له ۱،۰۰۰ څخه تر ۱۰،۰۰۰ خلکو ته د حج ادا کولو اجازه وه، خو نورو کلونو کې به له ۱۸۰ هېوادونو څخه څه باندې دوه میلیونه مسلمانان حج ته تلل.

دا ځل یوازې په سعودي عرب کې مېشتو مسلمانانو حج وکړ.

د اګست پر دویمه د حج پر وروستۍ ورځ حاجیانو ماسکونه په مخ کړي ول او مکې ته یې نېږدې په منا کې د جمرات یا شیطان ویشتلو رکن بشپړ کړ.

تر دې وروسته حاجیان مسجد الحرام ته ورغلل او هلته یې د وداع طواف وکړ.

سږکال په حج کې زیارت کوونکو له یو بله فاصله ساتلې وه او منتظمینو ورته اسانتیاوې برابرې کړې وې.

د سعودي عرب روغتیايي چارواکي وايي، په حاجیانو کې د کورونا وایرس د هېڅ مثبتې پېښې رپورټ نه دی ورکړل شوی.

روسیه: د حکومت ضد مظاهرو پر مهال لسګونه کسان نیول شوي

په خبروفسک ښار کې د اګست لومړۍ مظاهرې منظر

رپورټونه وايي، د اګست پر لومړۍ نېټه د روسیې په بېلا بېلو برخو کې د کرېملېن ضد مظاهرو پر مهال لسګونه کسان نیول شوي دي.

دا احتجاجونه تر هغې وروسته دوام لري چې د هېواد په شرقي سیمه کې یو ګورنر له څوکۍ لیرې او بیا یې ګرفتار کړ.

د اګست پر لومړۍ نېټه پر باراني موسم سربېره، زرګونه خلکو په خبروفسک کې د پرله پسې څلورمې اوونۍ په پای کې هم مظاهرې وکړې چې د وفاقي حکومت له خوا د ګورنر سېرګې فورګل د نیولو ضد خپله غوسه ښکاره کړي.

په خبروفسک کې د چا د نیولو رپورټونه نشته البته په روسیې کې د سیاسي ګرفتاریو د څار یوه ډله وايي، د پلازمېنې مسکو په ګډون په ۱۴ ښارونو کې په مظاهرو کې ۷۰ کسان نیول شوي.

فورګل د جولای پر نهمه تر ګرفتارۍ وروسته پلازمېنې مسکو ته انتقال شو.

چارواکي وايي، نوموړی یې په ۲۰۰۴ز او ۲۰۰۵ کې په یو شمېر وژنو کې د ککړتیا په شک نیولی دی.

د ملي لېبرل ډېموکراټ ګوند فورګل د ۲۰۱۸ز کال په انتخاباتو کې د ولسمشر ولادمیر پوتین د متحدې روسیې ګوند امېدوار ته د ووټونو په لوی توپیر ماته ورکړې وه.

متحده عربي اماراتو د ایټمي انرژۍ د فعالیتونو پیلولو اعلان وکړ

دا په عربي نړی کې دا ډول لومړنی ځای دی

متحده عربي اماراتو په براکه ایټمي پلانټ کې د فعالیتونو پیلولو اعلان کړی دی.

دا په عربي نړۍ کې دا ډول لومړنۍ ځای دی.

د متحده عربي اماراتو مرستیال ولسمشر او وزیراعظم شېخ محمد بن راشد المکتوم چې د دوبۍ واکمن هم دی، دا اعلان د اګست پر لومړۍ نېټه پر ټویټر کړی دی.

نوموړي لیکلي، نن په عربي نړی کې د لومړنۍ پرامنه ایټمي انرژۍ د فعالیتونو پیلولو اعلان کوي.

هغه وړاندې وویل، ایټمي سونګ مواد یې په کامیابۍ سره د پلانټ څلورو ریکټر یونټو ته اچولي.

نوموړي دا هم وویل چې د دې څلورو ایټمي پاور پلانټونو د فعالولو موخه د هېواد د انرژۍ په څلورو کې یوه برخه ضرورتونه په خوندي، باوري او د اب و هوا لپاره د خرابو ګېسو بغیر پوره کول دي.

د جنوبي کوریا د (الیکټرک پاور کارپوریشن) په نامه کمپنۍ د براکه پروژې مهمه قراردادي ده.

دا پلانټ شاوخوا ۹۴ فيصده مکمل شوی دی.

ننګرهار کې توپان او سېلاب لږ تر لږه ۱۲ کسان وژلي

چارواکي وایي، دا موندنې یې لومړنۍ دي او ممکن وروسته معلوماتو کې بدلون راشي

د ننګرهار په ښېوې ولسوالۍ کې باران او ورسره توپان او سېلاب لږ تر لږه ۱۲ کسان وژلي او یو شمېر کورونه‌ یې ویجاړ کړي دي.

د والي ویاند عطاالله خوږیاڼي رسنیو ته ویلي، دغه سېلابونه د اګست د لومړۍ نېټې په سهار د ښېوې په شامل او کلټک کلیو کې راوتلي دي.

د خوږیاڼي په خبره، وژل شوي ۱۰ کسان تر خاورو او ویجاړیو لاندې وو چې مړي ‌یې موندل شوي دي.

دې طبیعي پېښه کې کرنیزو ځمکو او فصلونو ته هم زیان اوښتی دی.

د ننګرهار چارواکي وایي، دا موندنې یې لومړنۍ دي او ممکن وروسته معلوماتو کې بدلون راشي.

بریتانیا د ټولبند نرمولو پرېکړه وځنډوله

د برتانیې وزیراعظم بورس جانسن

د برتانيا وزيراعظم بورس جانسن د جولای پر ۳۱مه د کورونا وايرس وبا له وجې په ټولبند کې د نرمي لپاره پلان شویو ځينې ګامونوعملي کول ځنډولي دي.

نوموړي دا پرېکړه د جولای پر ۳۱مه څو ساعته مخکې په داسې حال کې وکړه چې په بريتانيا کې په ټولبند کې نرمي راوستل ټاکل شوي وو.

د ده په خبره په هېواد کې تر مې مياشتې وروسته د کورونا وايرس زیات مثبت کېسونه راروان دي.

حکومت مخکې پلان لرلو چې د اګست تر درېیمې پورې د ځینو تفريحي ځايونه د بېرته پرانېستلو اجازت ورکړي. خو اوس یې نه کوي.

بلخوا په محدود شمېر کې لوبغالو یا سپورټس سټيډیمو ته د لوبو مینه والو پریښودلو په اړه حتمي پرېکړه لا نه ده شوی.

بريتانيا په نړۍ کې یو له هغو هېوادونو دی چې کورونا وايرس تر ټولو زیات ځپلی دي.

رسمي شمېرې ښيي چې په هغه هېواد کې شاوخوا درې ۳۰۴،۰۰۰ کسان پر کورونا وايرس اخته شوي او تر ۴۶،۰۰۰ زیات کسان مړه شوي دي.

دا د امريکا او برازيل وروسته د کورونا وايرس له وجې د مړیو شویو تر ټولو زياته شمېره ده.

سیګار: د جهاني وبا له وجې میلیونه افغانان د بېوزلۍ ښکار کېدای شي

د وبا مخنیوي لپاره په لویو ښارونو کې تر ټولبند وروسته محدودیتونه دوام لري

د افغانستان د بیارغونې لپاره د امریکا ځانګړې څارونکې ادارې (سیګار) ویلي دي چې د کورونا وایرس وبا افغانستان له سخت اقتصادي ځوړ سره مخامخ دی.

د جولای پر ۳۰مه، رپورټ خبرداری ورکړی چې د کورونا وایرس وبا د اقتصادي تاوان په خاطر میلیونونه افغانان له لوږې سره مخامخېدای شي.

سیګار دا رپورټ د امریکا کانګرس ته یې وړاندې کړی دی.

په رپورټ کې اټکل شوی چې د افغانستان اقتصادي وده سږکال (۲۰۲۰ز) ۱۰ فیصده ټېټېدای شي چې له کبله یې، د پوهانو په وینا، اته میلیونه نور وګړي د بېوزلۍ ښکار کېدای شي.

د دوی په وینا، له دې اضافې سره ښايي د بېوزلۍ کچ له ۵۵ سلنې څخه ۸۸ فیصده ته لوړ شي.

سیګار وايي، د وبا له امله بېکاري زیاته شوي، د پولو تړلو له وجې د خوړو کمښت او د بیو لوړوالی هغه لوی لاملونه دي چې د افغانانو غذایي مصوونیت (امنیت) ګواښي.

دا رپورټ پر داسې مهال خپور شوی چې په افغانستان کې څه باندې ۳۶،۵۰۰ کسان په کورونا وایرس اخته شوي چې له ډلې یې ۱،۲۷۲ تنه مړه خو د امریکا جانز هاپکېنز پوهنتون په وینا، څه باندې ۲۵،۵۰۰ رغېدلي دي.

حکومت له بېوزلو سره د وچې ډوډۍ او د مرستو پروګرامونه پیل کړي خو عام خلک وايي چې کارونه یې له لاسه ورکړي او له سخت حالت سره مخامخ دي.

بې پولې خبریالانو سازمان: پاکستان دې د بلوڅ خبریال د وژنې پلټنې وکړي

کېتراڼ د جولای پر ۲۳مه ووژل شو

د بې پولې خبریالانو سازمان (ار اېس اېف) په پاکستان کې د خبریال انور جان کېتراڼ د وژنې د بې پرې څېړنو غوښتنه کړې.

د بې پولې خبریالانو سازمان د جولای پر ۳۰مه وویل، دغه خبریال چې په بلوچستان کې يې د درغليوو په اړه راپورونه ورکړي ول، د جولای پر ۲۳مه خپل کور ته د ستنېدو پر مهال دوه وسله والو وویشت.

د خبریال انور جان کورنۍ د بلوچستان د خوراک صوباي وزیر عبدالرحمان کېتراڼ تورن کړی، چې د دې وژنې حکم یې ورکړی دی.

د دوی په خبره، وزیر خبریال اته خبرداری ورکړی وو، چې د اداري فساد په اړه د راپورونو ورکولو له کبله دې له صحافته ځان لیرې وساتي.

وزیر د دې تورونو په اړه څه نه دي ویلي.

خو د بلوچستان حکومت وايي، د کېتراڼ د وژنې پلټنې کوي.

د افغانستان په ګډون د نړۍ په زیاتره برخو کې لوی اختر دی

په لوی اختر کې خلک څاروي قربانوي

د افغانستان او سعودي عرب په ګډون د نړۍ په زیاتره هېوادونو کې د جولای پر ۳۱مه لوی اختر لمانځل کېږي.

د شمالي او جنوبي وزیرستانونو په ځینو برخو کې هم د جمعې پر ورځ اختر دی.

خو د پاکستان له حکومتي اعلان سره سم، د خیبر پښتونخوا او بلوچستان په ګډون د هېواد په زیاتره برخو کې اختر د اګست پر لومړۍ لمانځل کېږي.

لوی اختر د اسلامي جنترۍ د اخري میاشتې ذوالحجې پر ۱۰مه لمانځل کېږي.

په لوی اختر کې مسلمانان څاروي قربانوي.

دا ځل کوچنی او لوی اختر دواړه پر داسې مهال لمانځل کېږي چې د کورونا وایرس جهاني وبا نړۍ ځپلې.

په نړۍ کې د کووېډ-۱۹ تازه شمېرې

همداراز، د جهاني وبا له وجې یوازې په سعودي عرب کې مېشتو خلکو حج وکړ.

دا ځل د تېرو کلونو پرتله خورا کمو خلکو حج کړی او له اټکل سره سم، له ۱،۰۰۰ څخه تر ۱۰،۰۰۰ کسانو په مکې کې د حج مناسک ادا کړي.

له حکومتي ارقامو سره سم، پاکستان کې د کورونا وایرس مثبتو پېښو شمېر ۲۷۶،۲۸۸ او په افغانستان کې ۳۶،۴۷۱ ته رسېدلی دی او د نړۍ په ګڼو هېوادونو کې د وایرس خپراوي مخنیوي لپاره محدودیتونه لا هم موجود دي.

د امریکا جانز هاپکېنز پوهنتون په وینا، د جولای تر ۳۱مې، په نړۍ کې د کورونا وایرس د مثبتو رسمي پېښو شمېر تر ۱۷ میلیونه اوښتی دی.

له کووېډ-۱۹ ناروغۍ څخه په نړۍ کې تر اوسه، ۶۷۳،۸۲۲ کسان مړه شوي خو تر ۱۰ لاکه زیات ورڅخه رغېدلي دي.

اروپايي ټولنې په لومړي ځل پر مشکوکه انټرنېټي بریدګرو بندیزونه لګولي

له بیان سره سم، پر کسانو سفري بندیزونه لګي، د دوی او د ډلو شتمنۍ کنګلېږي

اروپايي ټولنې په لومړی ځل پر مشکوکه انټرنېټي بریدګرو بنديزونه لګولي دي.

ټولنې په بندیزونو کې څلور روسي وګړې او په مسکو کې د پوځې استخباراتي ادارې (جي ار یو) یو څانګه په نښه کړې.

د اروپايي ټولنې بنديزونو په فهرست کې په چين او شمالي کوریا کې مېشت دوه نورې ډلې او دوه چینايي وګړې هم شامل شوي دي.

د جولای پر ۳۰مه د اروپايي شورا په بیان کې ويل شوي چې د بندیزونو اقدام د هغو درو ډلو او شپږو کسانو ضد اخلي کېږي چې په یو شمېر انټرنېټي بریدونو کې ککړ دي.

د بیان له مخه په دې کې هغه کسان هم شامل دي چې په ۲۰۱۸ز کال کې يې د کیمياوي وسلو مخنیوي پر سازمان انټرنېټي برید کړی وو.

له بیان سره سم، پر کسانو سفري بندیزونه لګي، د دوی او د ډلو شتمنۍ کنګلېږي او د اروپايي ټولنې وګړي او ادارې ورسره کاروباري اړیکي نشي ساتلای.

واشنګټن: اسلام اباد دې د طاهر نسیم د وژنې پلټنې وکړي

د نسیم تر وژنې وروسته د پېښور پولیس د عدالت په دروازه کې ولاړ دي

د امریکا د بهرنیو چارو وزارت د پېښور په یوه عدالت کې د مذهب سپکاوي په تور د مقدمې اورېدنې پر مهال د یوه پاکستاني توکمه امریکايي وګړي وژنې د پلټنو غوښتنه کړې.

پر طاهر نسیم احمد دوه کاله مخکې د مذهب سپکاوي تور پورې شوی وو او د جولای پر ۲۹مه چې د قضیې اورېدنې لپاره د پېښور عدالت ته ورغلی وو نو یو کس ورباندې ډزې وکړې.

اسوشيېټېډ پرېس اژانس د چارواکو له خولې ویلي چې د نسیم په وژنه تورن کس خالد خان نومېږي او پولیسو نیولی دی.

د امریکا د بهرنیو چارو وزارت د جولای ۳۰مې شپې ناوخته په یوه بیان کې ویلي دي چې نسیم امریکايي وګړی وو او واشنګټن پر اسلام اباد د هغه د حفاظت ټینګار کړی وو.

نسیم امریکا ته تر تګ مخکې د پېښور اچیني بالا اوسېدونکی وو.

د بهرنیو چارو وزارت د نسیم وژنه شرمناکه پېښه بللې
د بهرنیو چارو وزارت د نسیم وژنه شرمناکه پېښه بللې

د امریکا د بهرنیو چارو وزارت بیان وايي، "د طاهر نسیم وژنې" ورته "صدمه او خپګان رسولی او غوسه کړي یې دي."

بیان وايي، نوموړی په اېلېنای ایالت کې اوسېده او ځینو کسانو په دوکه پاکستان ته وروغوښت او هلته یې د مذهب سپکاوي د سزاګانو قانون له لارې ګېر کړ.

په بیان کې راغلي چې واشنګټن په ۲۰۱۸ز کال کې د نسیم تر حراست وروسته د لوړپوړو چارواکو توجه د هغه قضیې ته ګرځولې وه چې مقصد یې "د دغې شرمناکې پېښې مخنیوی وو" چې د هغې د وژنې په بڼه "بالاخره وشوه."

تر اوسه معلومه نه ده چې د خالد خان په نوم مشکوک کس څنګه له وسلې سره د عدالت ودانۍ ته ننوت.

د امریکا د بهرنیو چارو وزارت پر پاکستان غږ کړی چې سمدستي دې د مذهب سپکاوي د سزاګانو په قانون کې اصلاحات وکړي ځکه چې په وینا یې دا قانون اکثر ناسم کارېږي.

په بیان کې زیاته شوې چې مشکوک کس دې "له قانون سره سم" مقدمه شي.

پاکستان د امریکا د بهرنیو چارو وزارت څرګندونو په اړه لا څه نه دي ویلي خو د پېښور پولیس او د خیبر پښتونخوا حکومت وايي، د طاهر نسیم د وژنې پلټنې کوي.

ملګري ملتونه: د شخړې له وجې یو لاک افغانان کډوال شوي

مزار شریف کې یوه کډواله د مرستې تر اخیستو وروسته روانه ده - د ۲۰۲۰ز کال د مې درېیمه.

ملګري ملتونه وايي، د امریکا او طالبانو ترمنځ د سولې پر موافقې سربېره، سږ کال (۲۰۲۰ز) په افغانستان کې تاوتریخوالي دوام لرلی او تر یو لاک زیات کسان د شخړې له وجې کډوال شوي دي.

امریکا په افغانستان کې د سولې په موخه د فبرورۍ پر ۲۹مه له طالبانو سره هوکړه لاسلیک کړه.

د ملګرو ملتونو د بشري چارو د همغږۍ ادارې (یو اېن اوچا) د جولای پر ۳۰مه، په یوه رپورټ کې وویل، شاوخوا ۱۰،۰۰۰ کسان یوازې تېره اوونۍ د افغانستان په شمال ختیځ کې د حکومتي ځواکونو او طالبانو د جګړې له وجې بې کوره شوي.

افغان ولسمشر اشرف غني د جولای پر ۲۸مه وویل چې د طالبانو او امریکا د هوکړې له لاسلیکېدو راهیسې، تر ۱۰،۰۰۰ زیات حکومتي سرتېري وژل یا ژوبل شوي دي.

ملګري ملتونه وايي، د ۲۰۲۰ز کال په لومړیو شپږو میاشتو کې په افغانستان کې تر ۱،۲۰۰ زیات ولسي وګړي وژل شوي دي.

روانه اوونۍ طالبانو وویل چې د جولای له ۳۱مې څخه د اختر په مناسبت درې ورځنی اوربند پېلوي.

تر طالبانو وروسته افغان حکومت هم په اختر کې اوربند اعلان کړ.

د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد پر ټوېټر په بیان کې اوربند د دوامداره سولې پر لور یو بل ګام بللی دی.

امریکا: کووېډ-۱۹ ناروغۍ پر یوه ورځ ۱،۲۶۷ کسان وژلي

امریکا کې د مړینې کچ له مې میاشت راهیسې لوړ شوی

په امریکا کې د جولای پر ۲۹مه له کووېډ-۱۹ ناروغۍ څخه ۱،۲۶۷ نور کسان مړه شوي دي.

دا په داسې حال کې ده چې د هیواد په جنوبي او غربي برخو کې تېره میاشت د کووېډ-۱۹ ناروغانو شمېر زیات شو او تر اوسه پکې د کمي نښې نشته.

د امریکا جانز هاپکنز پوهنتون له شمېر سره سم، په امریکا کې له کووېډ-۱۹ ناروغۍ د وژلیو شمېر تر یو نیم لاکو اوښتی او د مړینې کچ له مې میاشت راهیسې لوړ شوی دی.

په اېریزونا، کیليفورنیا، فلورېډا او ټیکسس ریاستونو کې د کورونا وایرس پېښې له پرله پسې درو اوونیو راهیسې زیاتېږي.

په نړۍ کې د کورونا وایرس کېسونو شمېر شاو خوا ۱۷ میلیونه ته رسېدلی دې.

بلخوا د امریکا د کانګرس یو بل غړی کورونا وایرس وهلی.

تر هغې وروسته، د امریکا استازو جرګې مشرې نینسي پلوسي د ټولو غړو لپاره د کانګرس ودانۍ دننه د ماسکونو په مخ کول لازمي وګرځول چې د جولای له ۳۰مې سهار اتو بجو څخه عملي کېږي.

پلوسي دا اعلان د جولای پر ۲۹مه تر هغې وروسته وکړ چې په استازو جرګه کې د ټېکسس استازي او د رېپبلکن ګوند په غړي لوي ګومرټ کې د کورونا وایرس تصدیق وشو.

پر نوموړي همکارانو د ماسک یا تمبوزک نه په مخ کولو له وجې تنقید کاوه.

کورمه کې ټرافیکي پېښه کې ۱۳ کسان ژوبل شوي

د روغتون چارواکې وايي، په ټپيانو کې د دوو کسانو حالت ښه نه دی. 

په کورمه کې د جولای پر ۳۰مه په یوه ټرافيکي پېښه کې د یوې کورنۍ ۱۳ غړي ټپیان شوي دي.

چارواکي وایي، له ډرېوره ګاډې بې قابو شو او پر لاره له دېوال سره وجنګېد.

دوی وايي، د سپرلیو دا ګاډې له غازي پټۍ څخه اکاخېلو ته روان وو.

ټپیان د پاړه چينار روغتون ته رسول شوي دي چې پکې ښځې او ماشومان هم شامل دي.

د روغتون یو چارواکی وايي، په ټپيانو کې د دوو کسانو حالت ښه نه دی.

ټرمپ وايي له پوتین سره طالبانو ته د پیسو ورکولو په اړه نه دی غږېدلی

ټرمپ وايي، له پوتین سره د اټومي وسلو د نه پراختیا په څېر د مهمو موضوعاتو په اړه خبرې کړې.

د امریکا ولسمشر ويلي چې هغه له خپل روسي سيال ولاديمير پوتين سره هېڅکله د رسنيو د هغو راپورونو په اړه خبره نه ده کړې چې روسیې په افغانستان کې د امریکایي سرتېرو د وژلو لپاره طالبانو ته پیسې ورکړي دي.

ډانلډ ټرمپ دا خبره له اکسييس (Axios) خبري ووبپاڼې سره د مرکې پر مهال کړې چې د جولای پر ۲۸مه خپره شوې.

تر دې وروسته نوموړي له اېچ بي او ټېلېويژن سره په مرکه کې، چې د جولای پر ۲۹مه خپره شوه، وويل، که د استخباراتو دا راپورونه ریښتیا وای چې روسیې په افغانستان کې د امریکایي سرتېرو د وژلو لپاره طالبانو ته پیسې ورکړي، نو دی به ډېر په قهر شوی وای.

نوموړي د روسيې له ولسمشر ولادیمیر پوتین سره د جولای د ۲۳مې ټېليفوني مکالمې ته اشاره وکړه او ویې ویل چې دوی د اټومي وسلو د نه پراختیا په څېر د مهمو موضوعاتو په اړه خبرې کړې دي او له طالبانو سره د مرستې مسله یې نه ده یاده کړې.

د ټرمپ په وينا، د ډېرو خلکو په باور دا يو "جعلي خبر" وو.

نیویارک ټایمز ورځپاڼې د جون پر ۲۶مه د لومړي ځل لپاره راپور ورکړ چې د روسیې استخباراتو په افغانستان کې طالبانو ته پیسې ورکړي چې امریکایي پوځیان ووژني.

روسيې دا تورونه رد کړي دي.

دا موضوع په نومبر کې د امريکا د ولسمشرۍ تر هغو انتخاباتو وړاندې توده شوې چې ټرمپ غواړي د دویم ځل لپاره ولسمشر شي.

پاکستان کې د کورونا وایرس ۱،۱۱۴ تازه پېښې ثبت شوې دي

اسلام اباد: یو روغتیايي کارکوونکی د کورونا وایرس معاینې لپاره د ماشوم وینه اخلي

په پاکستان کې په ۲۴ ساعتونو کې د کورونا وایرس د ۱،۱۱۴ مثبتو پېښو له ثبتېدو سره ټول شمېر ۲۷۷،۴۰۷ ته رسېدلی دی.

د کووېډ-۱۹ ناروغۍ په اړه د حکومتي ووبپاڼې له وینا سره سم، د جولای تر ۳۰مې ناروغۍ ۵،۹۲۴ کسان وژلي خو تر ۲۴۶،۰۰۰ بېرته ورڅخه رغېدلي هم دي.

حکومت وايي، د جون پرتله، په جولای کې په پاکستان کې د کورونا وایرس پېښې په کمېدو دي.

خو په عین وخت کې چارواکي او روغتیاپالان خبرداری ورکوي چې که په اختر کې خلکو احتیاطي لارښوونې عملي نه کړې نو د کووېډ-۱۹ ناروغانو شمېر بیا لوړېدای شي.

په نړۍ کې د کووېډ-۱۹ تازه شمېرې

کورونا وایرس د ۲۰۱۹ز کال په ډېسېمبر کې د چين په ووهان ښار کې خلک وړجن کړل چې د روغتيا نړيوال سازمان په وينا، د نړۍ تقريباً ټولو هېوادونو ته خپور شوی دی.

د روغتیا نړیوال سازمان په مارچ کې جهاني وبايي حالت اعلان کړ.

د امریکا جانز هاپکېنز پوهنتون په وینا، د جولای تر ۳۰مې، په نړۍ کې د کورونا وایرس د مثبتو رسمي پېښو شمېر تر ۱۷ میلیونه واوښت.

له کووېډ-۱۹ ناروغۍ څخه په نړۍ کې تر اوسه، ۶۶۷،۰۸۴ کسان مړه شوي خو شاوخوا ۱۰ میلیونه ورڅخه رغېدلي هم دي.

په پاکستان کې په ۲۴ ساعتونو کې د کورونا وایرس ۱۰۶۳ نوې پېښې

د کورونا وایرس ټيسټ‌کېږي

په پاکستان کې په تېرو ۲۴ ساعتونو کې د کورونا وایرس ۱۰۶۳ نوې پېښې ثبت شوې دي.

حکومتي ووبپاڼه وايي، له دې سره د جولای تر ۲۹مې په پاکستان کې د کورونا وایرس د رسمي مثبتو پېښو شمېر ۲۷۶۲۸۷ ته لوړ شوی دی.

کووېډ-۱۹ ناروغۍ په هغه هېواد کې تر اوسه ۵۸۹۲ کسان وژلي خو ورڅخه شاوخوا ۲۴۵۰۰۰ رغېدلي هم دي.

حکومت وايي د جون په پرتله، په جولای کې په پاکستان کې د کورونا وایرس پېښې په کمېدو دي. خو په عین وخت کې چارواکي او روغتیاپالان خبرداری ورکوي چې که په اختر کې خلکو احتیاطي لارښوونې عملي نه کړې نو د کووېډ-۱۹ ناروغانو شمېر بیا لوړېدای شي.

د امریکا د جانز هاپکېنز پوهنتون له وینا سره سم، تر اوسه په نړۍ کې د کورونا وایرس ټولې ۱۶.۷ میلیونه مثبتې پېښې ثبت شوې دي.

خو د پوهنتون په وینا، د نړۍ پر کچ له ناروغۍ تر ۹.۹ میلیونه زیات کسان رغېدلي هم دي.

"درې روسۍ ووبپاڼې" د کورونا وبا په اړه "ناسم معلومات" خپروي

په مسکو کې د ریسټورنټ يوې کارکوونې ماسک اغوستی

امریکايي چارواکو د انګرېزي ژبې درې داسې ووبپاڼې موندلې چې په وېنا یې د کورونا وایرس په اړه د ناسمو معلوماتو خپراوي لپاره کاروي.

اسوشیېټيډ پريس اژانس د جولای په ۲۸مه د امریکايي چارواکو له خولې وویل چې روس دا کار د کورونا وایرس وبا مخنیوي په موخه د امریکا له هڅو د ناوړه ګټې اخیستو لپاره کوي.

دې چارواکو ویلي دي چې د ووبپاڼو فعالیت له روسي استخباراتو سره تړلی دی.

دوی د نوم نه ښودو په شرط اژانس ته ویلي چې د دوو روسانو پېژندګلوي یې کړې چې د هغه هېواد د پوځي استخباراتو په هغه څانګه کې یې پر لوړو څوکیو کار کړی چې د امریکا او غرب اوسېدونکو ته د ناسمو معلوماتو رسولو دنده پرمخ وړي.

امریکايي چارواکو ته وار له مخه، د جهاني وبا په تړاو د ناسمو او ناکره معلوماتو د خپراوي خبرداری ورکړل شوی وو.

دې چارواکو په روسیه کې د ثبت معلوماتي اژانس انفو روس نوم اخیستی او وايي، دا اژانس انفو روس ټکی رو، انفوبرېکس ټکی اورګ او "ون ورلډ ټکی پريس" په نوم ووبپاڼې چلوي.

یو چارواکی وايي دې ووبپاڼو داسې لیکنې خپرې کړې دي چې د کورونا وایرس په اړه د روس غبرګون مثبت ښيي او یاپر امریکا انتقادونه کوي.

دې چارواکو دا څرګندونې پر داسې مهال کړې دي چې په نومبر کې په امریکا کې د ولسمشرۍ انتخابات کېدونکي دي او د ناسمو معلوماتو خپراوي ته د یوې سملاسي اندېښنې په سترګه لیدل کېږي.

روس تر اوسه د امریکايي چارواکو څرګندونو په اړه څه نه دي ویلي.

پاکستان، چین، افغانستان او نیپال د کورونا ضد ګډ کار کوي

پاکستان، چین، افغانستان او نیپال د کورونا ناروغۍ د مخنیوي او د اقتصادي بحالۍ لپاره په شریکه پر کار کولو رضا شوي دي.

د پاکستان سرکاري راډیو د جولايي پر ۲۸مه پر خپلې ویبپاڼې لیکلي چې د څلورو واړو هیوادونو د وزیرانو ترمنځ دا غونډه پر لیکه یا ان لاین ترسره شوې چې د غونډې کوربتوب د چین د بهرنیو چارو د وزیر وانګ یي پر غاړه وو.

د پاکستان له غاړې د اقتصادي چارو وزیر خسرو بختیار په غونډه کې برخه واخېسته.

د چین د بهرنیو چارو وزیر په دې موقع وویل، هیواد یې د افغانستان، پاکستان او نیپال سره د خلکو د صحت، د معیشت د ښه کېدو، د کار د بحالۍ او پر کویډ ـ ۱۹ ناروغۍ د قابو موندل کېدو پورې کار کولو ته ژمن دی.

جرمني وايي، "جي اووه" کې د روس بیا شاملېدو امکان نه ویني

په "جي ـ اووه" ډله کې د روسیې بیا شاملېدو تجویز شو.

جرمني د نړۍ اوو ځواکمنو هیوادو "جي- اووه" په ډله کې د روس بیا ورګډولو تجویز رد کړی دی.

روس په ۲۰۱۴ز کال کې له هغه وروسته له دې ډلې و اېستل شوه چې کله يې د کرایمیا سیمه له ځان سره یو ځای کړه او په مشرقي اوکراین کې يې مداخلت وکړ.

د امریکا ولسمشر ډونلډ ټرمپ د مې په میاشت کې په "جي ـ اووه" ډله کې د روس د بیا شاملېدو تجویز ورکړی وو.

د جرمني بهرنیو چارو وزیر هیکو ماس د جولای پر ۲۷مه له ددو جرمن ورځپاڼو سره په مرکه کې ویلي، د کرایمیا او له اوکراین سره د معاملو هواري بغیر په دې ډله کې د روس د بیا شاملېدو امکان نه ویني.

په دې ډله کې امریکا، کاناډا، جرمني، جاپان، فرانس، بریتانیا او اټالیا شامل دي.

په عراق کې د احتجاج پر مهال دوه کسان وژل شوي

تر دې مخکې په نومبر کې هم بغداد کې حکومت ضد مظاهرې شوې وې

د بشري حقونو څارونکي او چارواکي وايي چې د عراق په پلازمېنه بغداد کې دوه حکومت مخالف احتجاج کوونکي وژل شوي او ۲۱ ټپیان دي.

دا پېښه د احتجاج کوونکو او امنیتي ځواکونو ترمنځ په تازه نښتو کې شوې ده.

دا تاوتریخوالی د هغه احتجاج بیا پیلېدو خطر پیدا کړی چې د ۲۰۱۹ز په اکتوبر کې په بغداد او د هېواد په جنوب کې روان وو.

د کورونا وایرس له کبله ارام شويو هغو احتجاجونو کې تر ۶۰۰ زیات کسان وژل شوي ول.

هغه احتجاجونه د حکومتي درغلیو او بې صلاحیتیو پرضد پیل شوي ول.

اورکزیو کې د کمر نړېدو په پېښه کې درې ماشومانې وژل شوي

د خیبر پښتونخوا په اورکزیو کې د کمر نړېدو په پېښه کې درې ماشومانې وژل شوي او بله ژوبله ده.

د سیمې یوه ځايي مشر ملک یاسین مشال راډيو ته وویل، دا پېښه د جولای پر ۲۷مه په فېروزخېلو کې هغه مهال شوې چې ماشومانو د کور بیاودانۍ لپاره له هغه ځایه خاوره وړله.

د اورکزیو پولیس وايي، د ماشومانو عمرونه له اتو کلونو څخه تر ۱۶ کلونو پورې دي.

د خیبر پښتونخوا په کليوالو سیمو کې کله نا کله د کمرونو نړېدو پېښې کېږي.

په هغو سیمو کې زیاتره کورونه خام وي او مالکان یې وخت په وخت مرمتوي.

نړیوالې روغتیايي ادارې د کووېډ-۱۹ مخنیوي کې له ستونزو سره مخامخ دي

په مېساچوسېټس ایالت کې یو کس کووېډ-۱۹ ټېسټ ته انتظار باسي

په داسې حال کې چې په ځینو هېوادونو کې د کووېډ-۱۹ مثبتې پېښې بیا په لوړېدو دي، د روغتیايي څانګو چارواکي د وایرس په مخنیوي کې له ستونزو سره مخامخ دي.

دا د یوه داسې وایرس په مخنیوي کې مشکلات په ډاګه کوي چې په لومړیو کې یې د خپرېدو رفتار ورو شو خو بیا یې هم تر اوسه په نړۍ کې تر ۶۵۰،۰۰۰ زیات کسان وژلي دي.

د چین په ګډون په هسپانیې، فرانسې او جرمني کې د کورونا وایرس نوې پېښې یو ځل بیا په لوړېدو دي.

کووېډ-۱۹ ناروغۍ په نړۍ کې تر ټولو زیاته امریکا ځپلې چې پکې د رسمي مثبتو پېښو شمېر ۴،۲۰۰،۰۰۰ (دوه څلوېښت لاکه) ته رسېدلی دی.

د امریکا د جانز هاپکېنز پوهنتون له وینا سره سم، تر اوسه په نړۍ کې د کورونا وایرس ټولې ۱۶.۲ میلیونه مثبتې پېښې ثبت شوې دي.

خو د پوهنتون په وینا، د نړۍ پر کچ له ناروغۍ تر ۹.۴ میلیونه زیات کسان رغېدلي هم دي.

پاکستان: ۲۴ ساعتونو کې ۲۰ کسان له کووېډ-۱۹ ناروغۍ مړه شوي

کراچۍ یو روغتیايي کارکوونکی د کووېډ-۱۹ معاینې لپاره د ماشومې له پوزې مایع اخلي

په پاکستان کې په تېرو ۲۴ ساعتونو کې کووېډ-۱۹ ناروغۍ ۲۰ نور کسان وژلي دي.

د کورونا وایرس په اړه د پاکستان سرکاري ووبپاڼې د جولای پر ۲۷مه وویل، له دې سره په هغه هېواد کې له کووېډ-۱۹ ناروغۍ څخه د مړو شمېر ۵،۸۴۲ ته لوړ شوی دی.

د ووبپاڼې په وینا، په تېرو ۲۴ ساعتونو کې په پاکستان کې د کورونا وایرس ۱،۱۷۴ پېښې ثبت شوې دي چې ورسره ټولې رسمۍ مثبتې پېښې ۲۷۴،۲۸۸ ته رسېدلې دي.

خو په عین وخت کې په پاکستان کې د کورونا وایرس له ناروغۍ څخه تر ۲۴۱،۰۰۰ زیات کسان جوړ شوي هم دي.

د پاکستان حکومت وايي، په جولای کې په هېواد کې د کورونا وایرس ورځنۍ مثبتې پېښې کمې شوې دي خو د جولای پر ۲۶مه د روغتیايي چارو لپاره د وزیراعظم سلاکار ډاکتر ظفر مرزا پر ولس غږ وکړ چې په اختر کې له وایرسه د ځان ساتلو لپاره پوره احتیاطي لارښوونې عملي کړي.

نور پورته کړئ

ځانګړې پاڼې

له موږ سره اړیکي

XS
SM
MD
LG