د ازربایجان د کډوالو دولتي ادارې د جمعې په ورځ وویل، ۶۱ اذري وګړي له جرمني څخه په یوه چارټر الوتکې کې بیرته باکو ته ستانه کړي دي.
تر دې مخکې په جرمني کې د غیرې قانوني کډوالو د موندلو لپاره د پولیسو د چاپو راپورونه ورکړل شوي وو.
د دې ادارې په وینا دا ستنېدنه د اذربایجان او اروپايي ټولنې ترمنځ د بې اسنادو افرادو د بېرته منلو په اړه له شته هوکړې سره سمه ترسره شوې ده.
د اذربایجان د کډوالو دولتي اداره وايي، په ستنو شویو کسانو کې ۲۲ نارینه، ۱۸ ښځې او ۲۱ ماشومان دي.
د جرمني شپیګل مجلې د نومبر په ۱۳مه نېټه راپور ورکړ چې د جرمني پولیسو په یو لړ چاپو کې ګن اذربایجاني وګړي موندلې چې ویل کیږي په قاچاقي توګه جرمني ته وروړل شوي.
