د لاسرسي ځای

تازه خبر

خبرونه

په سپین بولدک کې چاودنې ۷ تنه ژوبل کړل

د کندهار په سپین بولدک ولسوالي کې پرون په یوه چاودنه کې لږترلږه ۷ تنه ټپیان شول.

د کندهار د پولیسو ویندوی جمال ناصر بارکزي ازادي راډیو ته وویل، په چارشنبه ماسپښین په یوه موټرسایکل کې د اېښودل شوي بم په چاودنه کې ۷ ولسي وګړي ژوبل شول.

ویل کېږي چې د حملې هدف د کندهار ښار د اتمې حوزې د پخواني امر جاجو ورور و، خو هغه ته زیان نه دی اوښتی.

تر اوسه د دې چاودنې مسوولیت کومې ډلې په غاړه نه دی اخیستی.

د نننۍ ورځې ټول خبرونه وګورئ

په خوست کې یو تن ماین لیږدونکی نیول شوی

په خوست کې نیول شوی تن (انځورله ارشیه)

خوست - د افغانستان د خوست ولایت د اسماعیل خېلو او مندوزیو ولسوالۍ اړوند سیمه کې د اګست پر ۱۵مه سهار د هوايي ډګر د پولیسو لخوا یو تن ماین لیږدونکی لاس په لاس نیول شوی دی.

د خوست امنیه قوماندانۍ ویاند عادل حیدر مشال راډیو ته وویل، یاد کس د هوايي ډګر د پولیسو لخوا داسې مهال نیول شوی چې په موټر سایکل يې دوه کړۍ د وسایطو ضد ماینونه لیږدول.

د نوموړي په وینا، نیول شوي کس غوښتل، ماینونه خوست ښار ته یوسي او هلته چاودنه ورکړي.

عادل حیدر زیاتو چې نیول شوي کس څخه پوښتنې ګرویږنې پیل شوي دي.

ملګرو ملتونو پر ایران د وسلو بندیزونو د مودې غځولو قرار داد رد کړ

پامپیو وايي، د ملګرو ملتونو امنیتي شورا له ایرانه د احتساب کولو په برخه کې ناکامه شوې ده.

ملګرو ملتونو د امریکا ملاتړ لرونکی هغه قرار داد رد کړی چې پکې پر ایران د وسلو د بندیز غځولو خبره شوې ده.

پر ایران د وسلو بندیز موده د روان کال په اکتوبر کې ختمېږي.

په ۱۵ کسیزه امنیتي شورا کې د اګست پر ۱۴مه رایې اچونې په اړه له وړاندی څخه داسې تمه کېده چې د روس او چین لخوا د سخت مخالفت له وجې به دا له ناکامۍ سره مخامخ شي.

د امریکا بهرنیو چارو وزیر مایک پامپیو د رایې اچونې وروسته وویل، د ملګرو ملتونو امنیتي شورا له ایرانه د احتساب کولو په برخه کې ناکامه شوې ده.

نوموړي زیاته کړه، دې شورا د نړی تر ټولو زیات د ترهګری ملاتړ کوونکی هیواد ایران د وسلو اخیستو او خرڅلاو جوګه کړ او د منځني ختیځ غوښتنې یې له پامه وغورځولې.

د اګست پر ۱۴مه دا قرارداد له هغې وروسته له ناکامۍ سره مخامخ شو چې په رایې اچونه کې دوو هیوادونو پر ایران د وسلو بندیز په حق کې او دوو په مخالفت کې رایې ورکړي او ۱۱ غړي پکې موجود نه وو.

دا په داسې حال کې ده مایک پامپیو د ملګرو ملتونو پر امنيت شورا ټينګار کړی چې پر ايران د وسلو بندیز وغځوي.

نوموړي د جون پر ۳۰مه خبرداری ورکړی و چې په اکتوبر کې د بندیز موده ختمېدل به په منځني ختيځ کې د بې ثباتۍ لامل شي.

امريکا په داسې حال کې د ملګرو ملتونو له امنيت شورا څخه په رسمي توګه دا غوښتنه کړې چې په ۲۰۱۵م کال کې د ايران او نړيوالو قوتونو تر منځ د شوي اټومي تړون له مخې د اکتوبر په پيل کې پر ايران د وسلو بندیز کې نرمي راځي.

امريکا د ۲۰۱۸م کال په مې کې له دې تړونونه ووتل او پر ايران يې بيا بندېزونه ولګول.

په دې غبرګون کې ايران په مرحله واره توګه د خپلو اټومي ژمنتياوو سرغړونه پيل کړه.

د شخصي سکولونو مالکان: د اګست له ۱۵مې ښوونځي پرانیزو

د شخصي سکولونو مالکانو ویلي چې سر له سبا (اګست ۱۵مې) ښوونځي بیا پرانیزي. (ارشيف)

د خیبر پښتونخوا د تعلیم وزارت خبرداری ورکړی دی چې که شخصي سکولونه د سېپټېمبر تر ۱۵مې مخکې خلاص شول نو د مالکانو پر ضد به یې کارروايي وکړي.

وزارت د اګست پر ۱۳مه مشال راډیو ته په استولي بیان کې ویلي چې ټول ښوونځي به د کورونا وایرس مخنیوي له احتیاطي لارښوونو سره سم خلاصېږي.

د شخصي سکولونو مالکانو ویلي چې سر له سبا (اګست ۱۵مې) ښوونځي بیا پرانیزي.

د هغوی په وینا، د ښوونځیو تړلو له وجې نه یوازې له مالي مشکلاتو سره مخامخ شوي بلکې د ماشومانو تعلیمي کال هم ضایع کېږي.

د شخصي سکولونو مالکانو دا څرګندونې پر داسې مهال کړې دي چې د پاکستان حکومت د رستورانونو، هوټلونو او سیلانیو سیمو په ګډون ټول کاروبارونه د اګست له ۱۰مې څخه بیا پرانیستل خو ویې ویل چې تعلیمي ادارې به د سېپټېمبر له ۱۵مې پرانیزي.

حکومت د مارچ په نیمايي کې د کورونا وایرس وبا مخنیوي لپاره ټولبند اعلان کړ چې د مې تر لومړۍ اوونۍ روان وو.

تر هغې وروسته د پاکستان حکومت د ټولبند پر ځای محدودیتونه اعلان کړل.

د خیبر پښتونخوا د تعلیم وزارت په بیان کې زیاته کړې چې د کورونا وایرس پېښو ته په کتو کېدای شي چې په ټاکلې نېټه کې بدلون وکړي.

امریکا او نړیوال پلټونکي یو ځای د لبنان چاودنې پلټنې کوي

بيروت تر چاودنې وروسته (انځور له ارشیف)

یوه لوړپوړي امریکايي ډېپلوماټ ویلي چې د امریکا پلټنو وفاقي اداره له لبنانیو او نړیوالو پلټونکو سره یو ځای کېږي چې په بيروت کې د تېرې اوونۍ د مرګونې چاودنې پلټنې وکړي.

د سیاسي چارو لپاره د بهرنیو چارو وزارت مرستیال ډېوېډ هېل د اګست پر ۱۳مه وویل، د امریکا د پلټنو وفاقي ادارې پلټونکي د لبنانیو چارواکو په بلنه په تحقیقاتو کې برخه اخلي.

دا خبره نوموړي د بيروت د هغې سیمې کتنې پر مهال کړې چې د اګست پر څلورمه پکې په چاودنه کې تر ۱۷۰ زیات کسان ووژل شول او تر ۶،۰۰۰ زیات ژوبل شول.

تر پېښې وروسته د لبنان ولسمشر ویلي وو، په بيروت کې د اګست د څلورمې نېټې د خونړیو چاودنو شاته کېدای شي بهرنی لاس وي.

د اګست پر اوومه د لبنان د ولسمشر مایکل اوون څرګندونې په داسې حال کې مخې ته راغلي چې د پېښې په اړه پلټنې روانې دي.

نوموړي ویلي، دوه خبرې امکان لري، یوه دا چې یا خو غفلت شوی دی او یا دا د توغندي یا بم له لارې له بهره مداخلت شوی دی.

د چاودنې له وجې لاکونه خلک بې کوره شوي.

لبناني چارواکي وايي، پېښه د بيروت له بندر سره نېږدې په یوه ګودام کې د کیمیاوي سرې د چاودېدو له وجې شوې.

تر پېښې وروسته خلکو پراخې مظاهرې وکړې چې کابینه یې استعفا ته اړ کړه.

پاکستان: ۲۴ ساعتونو کې د کورونا وایرس ۶۲۶ نوې پېښې ثبت شوي

د سیند په حیدر اباد کې د کورونا وایرس لپاره د ښځې معاینه کېږي

په پاکستان کې په تېرو ۲۴ ساعتونو کې د کورونا وایرس له ۶۲۶ تازه مثبتو پېښو ثبتېدو سره د رسمي پېښو شمېر ۲۸۷،۳۰۰ ته رسېدلی دی.

د کووېډ-۱۹ په اړه د حکومتي ووبپاڼې له وینا سره سم، د اګست تر ۱۴مې په هېواد کې له ناروغۍ ۲۶۵،۲۱۵ رغېدلي خو ورڅخه ۶،۱۵۳ مړه شوي دي.

د پاکستان حکومت د مارچ په نیمايي کې حکومت د کورونا وایرس مخنیوي لپاره ټولبند اعلان کړ.

وروسته حکومت په مې کې ځینې کاروبارونه بیا پرانیستل خو رستورانونه، هوټلونه او سیلانۍ سیمې یې تړلې پرېښودې.

بیا حکومت د اګست له اتمې څخه رستورانونو، هوټلونو، پارکونو او سینماګانو د پرانیستلو پرېکړه کړې وه.

خو تعلیمي ادارې به د سېپټېمبر له ۱۵مې بیا خلاصېږي.

د پاکستان هوايي چلند ادارې د اګست پر نهمه نړيوال پروازونه هم بحال کړل.

حکومت دا اقدامات تر هغې وروسته کړي چې په جولای کې د کورونا وایرس ورځنیو پېښو شمېر په کمېدو وو.

په نړۍ کې د کووېډ-۱۹ تازه شمېرې

په نړۍ کې د کورونا وایرس ناروغۍ (کووېډ-۱۹) له وجې د مړیو شمېر ۷۶۰،۰۲۲ ته رسېدلی دی.

د کووېډ-۱۹ ارقامو په اړه د امریکا جانز هاپکېنز پوهنتون د ځانګړې ووبپاڼې په وینا، د اګست تر ۱۴مې په نړۍ کې د رسمي مثبتو پېښو شمېر ۲۱ میلیونه ته لوړ شوی دی خو تر ۱۳ میلیونه زيات کسان له ناروغۍ جوړ شوي هم دي.

کورونا وایرس په نړۍ کې تر ټولو زیاته امریکا، ورپسې برازیل او بیا هند ځپلي دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

عمران خان قبایلو کې د خوړو له کمي سره د مخامخو ماشومانو د مرستې پروژه پرانیسته

د قبایلو په ګډون د پاکستان په نورو برخو کې هم ماشومان د خوړو له کمي سره مخامخ دي - د ارشیف په دې انځور کې ډاکتر ماشوم ته واکسین ورکوي

د پاکستان وزيراعظم د اګست پر ۱۳مه د قبايلي سيمو لپاره د "احساس نشوونما پروګرام" په نوم د يوې نوې پروژې پرانيسته وکړه.

عمران خان د خیبر پښتونخوا د سفر پر مهال په خیبر ضلع کې پروژه پرانيسته چې هدف يې د خوړو له کمي سره مخامخ کوچنیانو، حامله ښځو او ماشومانو ته له شیدې ورکوونکو میندو مرسته کول دي.

د ټولنيز تحفظ په اړه د وزیراعظم ځانګړې سلاکارې ثانيې نشتر عمران خان ته د دې پروګرام په اړه د معلوماتو ورکولو پر مهال وويل چې د پاکستان د نورو سيمو پرتله په قبايلي سيمو کې زيات ماشومان د خوړو له کمي سره مخامخ دي.

نوموړې زياته کړه چې د خیبر پښتونخوا په قبايلي ضلعو کې ۴۸ سلنه ماشومان د خوړو له کمي سره مخامخ دي.

ثانيې نشتر د احساس نشوونما پروګرام په دې اړه د اګست پر ۱۲مه په اسلام اباد کې يوې خبري غونډې ته وويل چې د خوړو نړيواله اداره (ورلډ فوډ پروګرام – ډبلیو اېف پي) په دې پروژه کې له حکومت سره مرسته کوي.

د نوموړې په وينا له دې پروژې سره سم به له حامله او ماشومانو ته شيدې (پۍ) ورکوونکو ښځو سره هم د خوړو لپاره مالي مرسته کېږي.

ځانګړې سلاکارې وويل چې د مستحقو کورنيو تر دوو کلونو کم عمر لرونکو ماشومانو ته به هر درې مياشتې وروسته پيسې ورکوي.

په دې لړ کې د ماشوم هلک لپاره د مياشتې پر سر ۱،۵۰۰ روپۍ او د ماشومې نجلۍ لپاره به د مياشتې پر سر ۲،۰۰۰ کلداري ورکول کېږي.

پر دې برسېره به حقداره کورنيو ته د سفر لپاره ۵۰۰ روپۍ هم ورکول کېږي.

کوټه کې پر دوکان د لاسي بم برید کې ماشوم وژل شوی

برید د کوټې پر برووري سړک شوی دی

په کوټه کې پر یوه دوکان د لاسي بم په برید کې یو ماشوم وژل شوی او پېنځه کسان ژوبل دي.

د پولیسو یوه چارواکي د اګست پر ۱۳مه د نوم نه ښودو په شرط مشال راډيو ته وویل، وسله والو د اګست ۱۲مې شپې ناوخته پر برووري سړک دوکان ته بم ورواچاوه چې له وجې یې چاودنه وشوه.

د کوټې د سېول روغتون چارواکي وايي، په ژوبلو کې د دوو کسانو روغتیايي حالت خراب دی.

د حملې ذمه واري چا نه ده منلې.

د بلوچستان اعلا وزیر جام کمال پر برید خواشیني ښوولې او له پولیسو یې د پلټنو رپورټ غوښتی.

د اعلا وزیر دفتر په بیان کې پولیسو ته امر کړی دی چې د اګست پر ۱۴مه دې د پاکستان د جوړېدو ورځې په مناسبت په کوټه کې امنیتي اقدامات وکړي.

پاکستان: په ۲۴ ساعتونو کې د کورونا وایرس ۷۵۳ پېښې ثبت شوي

کراچۍ یو روغتیايي کارکوونکی د کووېډ-۱۹ معاینې لپاره د ماشومې له پوزې مایع اخلي

په پاکستان کې په ۲۴ ساعتونو کې د کورونا وایرس ۷۵۳ پېښو له ثبتېدو سره د رسمي مثبتو پېښو شمېر تر ۲۸۶،۶۷۳ رسېدلی دی.

د کووېډ-۱۹ په اړه حکومتي ووبپاڼې له وینا سره سم، د اګست تر ۱۳مې په هغه هېواد کې له ناروغۍ د مړیو شمېر ۶،۱۳۹ او د رغېدلو شمېر ۲۶۴،۰۶۰ دی.

د پاکستان حکومت د مارچ په نیمايي کې حکومت د کورونا وایرس مخنیوي لپاره ټولبند اعلان کړ.

وروسته حکومت په مې کې ځینې کاروبارونه بیا پرانیستل خو رستورانونه، هوټلونه او سیلانۍ سیمې یې تړلې پرېښودې.

بیا حکومت د اګست له اتمې څخه رستورانونو، هوټلونو، پارکونو او سینماګانو د پرانیستلو پرېکړه کړې وه.

خو تعلیمي ادارې به د سېپټېمبر له ۱۵مې بیا خلاصېږي.

د پاکستان هوايي چلند ادارې د اګست پر نهمه نړيوال پروازونه هم بحال کړل.

حکومت دا اقدامات تر هغې وروسته کړي چې په جولای کې د کورونا وایرس ورځنیو پېښو شمېر په کمېدو وو.

په نړۍ کې د کووېډ-۱۹ تازه شمېرې

په نړۍ کې د کورونا وایرس ناروغۍ (کووېډ-۱۹) له وجې د مړیو شمېر ۷۴۹،۵۷۶ ته رسېدلی دی.

د کووېډ-۱۹ ارقامو په اړه د امریکا جانز هاپکېنز پوهنتون د ځانګړې ووبپاڼې په وینا، د اګست تر ۱۳مې په نړۍ کې د رسمي مثبتو پېښو شمېر ۲۰.۶ میلیونه ته لوړ شوی دی خو شاوخوا ۱۳ میلیونه کسان له ناروغۍ جوړ شوي هم دي.

کورونا وایرس په نړۍ کې تر ټولو زیاته امریکا، ورپسې برازیل او بیا هند ځپلي دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

قریشي: پاکستان د افغانستان سولې په بهیر کې رول لوبولو ته دوام ورکوي

قریشي د اګست پر ۱۲مه له افغان سفیر عاطف مشعل سره ولیدل - د ارشیف انځور

د پاکستان بهرنيو چارو وزير شاه محمود قريشي وايي، د افغانستان سولې بهیر ترڅنګ د سیمې په ثبات کې خپل رول لوبولو ته دوام ورکوي.

د پاکستان دولتي راډیو وايي، نوموړي دا څرګندونې د اګست پر ۱۲مه په اسلام اباد کې د افغانستان له سفير شکر الله عاطف مشعل سره د هغه د مخه ښې په کتنه کې وکړې.

مشعل په جولای کې د سفیر په توګه له دندې استعفا ورکړه او ویلي یې ول چې غواړي خپلو زده کړو ته دوام ورکړي.

قریشي وويل چې د سيمې دومداره امنیت او ثبات د افغانستان له سولې سره تړلی دی.

ده زیاته کړه چې بین الافغاني مذاکرات به په افغانستان کې تلپاتې سولې ته لاره هواره کړي.

مشعل پر ټوېټر په بیان کې لیکلي چې له قریشي سره یې د مخه ښې په غونډه کې د پاکستان د هلو ځلو او په کابل کې د مشورتي لویې جرګې د پرېکړه لیک ملاتړ مننه وکړه.

افغان سفیر د اګست پر ۱۲مه پر ټوېټر په بل بیان کې لیکلي چې د پاکستان د پوځ له مشر جنرال قمر جاوېد باجوه سره یې هم لیدلي او هغه ورسره په خبرو کې د بین الافغاني خبرو د ژر پیل هیله ښوولې.

دا په داسې حال کې ده چې د اګست پر نهمه په کابل کې د سولې مشورتي لویې جرګې پرېکړه وکړه چې پاتې ۴۰۰ طالب بندیان دې خوشي شي.

د سولي په چارو کې د افغانستان دولت وزارت وایي، بین الافغاني خبرې ښايي د اګست له ۱۸مې تر ۲۰مې نیټې پورې په قطر کې پیل شي.

په دوحې کې د طالبانو د سیاسي دفتر ویاند سهېل شاهین هم ويلي چې که ټول بندیان یې خوشې شي نو په یوه اوونۍ کې له افغان حکومت سره خبرې پيلوي.

افغان ولسمشر محمد اشرف غني د اګست پر ۱۱مه په ولسمشرۍ ماڼۍ کې د يو شمېر لوړپوړو افغان چارواکو په حضور کې د طالبانو لخوا د ورکړل شوي ۵،۰۰۰ کسيز نوملړ کې د شاملو بندیانو د بښنې فرمان لاسلیک کړ.

افغان حکومت د طالبانو ۴،۶۰۰ بنديان وار له مخه خوشې کړي ول خو پاتې ۴۰۰ يې د سولې مشورتي لويې جرګې تاييد ته ايسار کړي ول.

په جرګه کې د افغانستان له بېلا بېلو سيمو ۳،۴۰۰ کسانو ګډون کړی وو.

امریکا د کورونا وایرس واکسین جوړولو لپاره له ماډرنا شرکت سره تړون وکړ

د ماډرنا درمل جوړولو شرکت

امریکا د کورونا وایرس د ازمېیښتي واکسین د ۱۰۰ میلیونه ډوزونو د تولید لپاره د ماډرنا درمل جوړولو له شرکت سره د یو نیم میلیارد ډالرو په تړون موافقه کړې ده.

یو ډوز په طب کې یو خوراک ته ویل کېږي او که درملن د ستنې (پیچکارۍ) له لارې ورکول کېږي نو یو انجکشن یا پيچکاري یو ډوز بلل کېږي.

دا تړون د اګست پر ۱۱مه په سپینه ماڼۍ کې شوی دی.

تېره اوونۍ هم له ځینو نورو شرکتونو سره ورته تړونونه شوي ول.

د امریکا د ولسمشر ډانلډ ټرمپ اداره په هڅه کې ده چې د ۲۰۲۰ز کال تر پایه د کورونا وایرس واکسین کارول پیل کړي.

د روغتیا نړیوال سازمان له اعلان سره سم تر اوسه پورې په ټوله نړۍ کې د کورونا وایرس یا کوویډ-۱۹ وبا د ختمولو لپاره ۱۵۰ واکسینونه جوړ او ازمویل شوي دي.

امریکا داسې وخت د کال تر پایه د واکسین د جوړولو خبره کړې چې د اګست پر ۱۱مه، روسیې اعلان وکړ چې د کووېډ-۱۹ ناروغۍ واکسین یې جوړ او ثبت کړی دی.

جو بایډن کاملا هیرس خپله مرستیاله ټاکلې

ښي لور ته کاملا هیرس او چپ لور ته جو بایډن

د امریکا په ټاکنو کې د ډیموکراټ ګوند احتمالي نوماند جو بایډن اعلان کړی چې سېنېټره کاملا هیرس یې د خپلې مرستیالې په توګه ټاکلې ده.

سېنېټره هیرس ۵۵ کلنه ده او لومړۍ تورپوستې ښځه ده چې د امریکا په تاریخ کې پر یوه لوی ټاکنیز ټېکېټ غوره شوې ده.

جو بایډن د اګست پر ۱۱مه پر خپله ټوېټر پاڼه ولیکل: "ډېر ویاړ کوم چې هیرس د خپلې مرستیالې په توګه اعلانوم."

ده نومولې یوه زړه وره مبارزه بللې ده.

جو بایډن د امریکا له ولسمشر ډانلډ ټرمپ سره د نومبر میاشتې په ولسمشريزو ټاکنو کې سیالي کوي.

جنوبي وزیرستان کې ځانمرګی برید، د برېګېډییر په ګډون ۳ پوځیان ژوبل شوي

برید د وزیرستان په لدا سیمه کې شوی

په جنوبي وزیرستان کې په ځانمرګي برید کې د یو برېګېډییر په ګډون درې پوځیان ژوبل شوي دي.

د جنوبي وزیرستان د پولیسو مشر شوکت علي د اګست پر ۱۲مه مشال راډیو ته وویل، برید د اګست پر ۱۱مه ناوخته په لدا سیمه کې شوی.

د ده په خبره، د ژوبلو روغتیايي حالت ښه دی.

ده د پوځ د لوړپوړي افسر او سرتېرو نوم و نه ښود.

شوکت علي زیاتوي چې تر حملې وروسته پولیسو او پوځیانو په سیمه کې پلټنیز عملیات پیل کړي.

د حملې ذمه واري تحریک طالبان پاکستان منلې.

دا حمله پر داسې مهال شوې چې په شمالي او جنوبي وزیرستان کې ځايي مشران له مودې راهیسې هلته د وسله والو د فعالیتونو بیا پیلېدو اندېښنې ښوولي خو پولیس او انتظامیه وايي، د امنیت ټینګښت ته ژمن دي.

د پاکستان پوځ د بین الافغاني خبرو د ژر پیل هیله ښوولې

د پوځ مشر د افغانستان سولې په بهیر کې د پرمختګ ستاینه کړې - د ارشیف انځور

د پاکستان پوځ د افغان حکومت او طالبانو ترمنځ د سولې د خبرو ژر پیلېدو هیله څرګنده کړې.

د پوځ د عامه اړیکو څانګې (ای اېس پي ار) د اګست پر ۱۱مه ویلي چې په راولپېنډۍ کې د پوځ مشر جنرال قمر جاوېد په مشرۍ د لوړپوړو چارواکو غونډه وشوه.

بیان وايي، پوځي مشرانو د افغانستان د سولې په عمل کې د پرمختګ ستاینه او هرکلی وکړ.

د سولي په چارو کې د افغانستان د دولت وزارت وایي، بین الافغاني خبرې ښايي د اګست له ۱۸مې تر ۲۰مې نیټې پورې په قطر کې پیل شي.

په دوحې کې د طالبانو د سیاسي دفتر ویاند سهېل شاهین هم ويلي چې که ټول بندیان یې خوشې شي نو په یوه اوونۍ کې له افغان حکومت سره خبرې پيلوي.

افغان ولسمشر محمد اشرف غني د اګست پر ۱۰مه په ولسمشرۍ ماڼۍ کې د يو شمېر لوړپوړو افغان چارواکو په حضور کې د طالبانو لخوا د ورکړل شوي ۵،۰۰۰ کسيز نوملړ کې د شاملو بندیانو د بښنې فرمان لاسلیک کړ.

افغان حکومت د طالبانو ۴،۶۰۰ بنديان وار له مخه خوشې کړي ول خو پاتې ۴۰۰ يې د سولې مشورتي لويې جرګې تاييد ته ايسار کړي ول.

په کابل کې د اګست له شپږمې تر نهمې نېټې تر سره شوې دغې درې ورځنۍ جرګې د ۴۰۰ طالب بنديانو د خوشې کولو پرېکړه تاييد کړه.

په جرګه کې د افغانستان له بېلا بېلو سيمو ۳،۴۰۰ کسانو ګډون کړی وو.

پوتین روسیه کې د کورونا وایرس جوړ شوی واکسین تایید کړ

پوتین وايي، د روسیې واکسین د تجربې پر مهال اغېزناکه ثابت شوی

د روسیې ولسمشر وايي، په هېواد کې یې د کورونا وایرس نوی جوړ کړی واکسین د کارونې لپاره رجسټر کړی دی.

دا اقدام پر دې سربېره شوی چې یاد واکیسن په پراخه کچه نه دی تجربه شوی او په اړه یې هېڅ معلومات نه دي خپاره شوي.

ولادیمیر پوتین دا اعلان د اګست پر ۱۱مه په یوه حکومتي غونډه کې وکړ.

ده وویل چې د روسیې جوړ د کورونا وایرس واکسین د تجربې پر مهال اغېزناکه ثابت شوی او د کورونا وایرس ضد په بدن کې اوږدمهاله مقاومت پیدا کولای شي.

روسیه لومړی هېواد دی چې واکسین یې ثبت کړی، خو په هغه هېواد کې دننه او ورڅخه بهر ساینسپوهانو ورباندي انتقاد کړی دی.

دوی پر انسانانو د درېیم پړاو تجربې تر بشپړېدو او د خپلواکو روغتیاپوهانو تر څار او بیاکتنې مخکې د واکسین ثبت پر پرېکړه پوښتنې پورته کړي دي.

د روغتیا نړیوال سازمان (ډبلیو اېچ او) له معلوماتو سره سم، درېيم پړاو کې عموماً زرګونه کسان شامل وي او ازموینې چې څو میاشتې دوام کوي.

ویل کېږي روسی واکسین پر څه کم ۱۰۰ کسانو تجربه شوی دی.

شمالي وزیرستان جرګه: حکومت دې د شوال اوسېدونکي ستانه کړي

شوال د شمالي وزیرستان غرییزه سیمه ده

د شمالي وزیرستان د شوال مشرانو او ځوانانو جرګې له حکومته غوښتي چې خلک دې خپلو کورونو ته ستانه کړي.

د ۲۰۱۴ز کال په جون کې پوځ په شمالي وزیرستان کې عملیات پیل کړل چې له وجې یې شاوخوا یو میلیون خلک بې کوره شول.

په ۲۰۱۶ز کال کې د عملیاتو تر پای وروسته زیاتره خلک خپلو کلیو ته ستانه شول خو اوس هم د بنو په بکه خېلو کیمپ او د پولې هغې خوا ته په خوست کې زرګونه کورنۍ کډوالې دي.

د اګست پر ۱۲مه په بنو کې د دته خېلو تحصیل مشرانو او ځوانانو د جرګې په پای کې بیان خپور کړ چې پکې یې له حکومته غوښتي چې له شپږو کلونو راهیسې بې کوره خلک دې ژر ستانه کړي، د ړنګو یا زیانمنو کورونو او کاروبارونو تاوان دې ورکړي او د شوال اوسېدونکو ته دې ډومیسایلونه او شناختي کارډونه جوړ کړي.

شوال د شمالي وزیرستان غرییزه او سیلانۍ سیمه ده چې اوسېدونکي یې هر کال د ځڼغوزو حاصل اخیستو غوښتنه کوي او حکومت ورته هر کال د څو ورځو لپاره د تګ اجازه ورکوي.

جرګې همداراز له حکومته وغوښتل چې د سیلګرۍ ودې لپاره دې هلته اسانتیاوې برابرې کړي.

په شمالي وزیرستان کې یوه پوځي چارواکي د نوم نه ښودو په شرط مشال راډیو ته وویل، د دته خېلو ځینې سیمې یې له وسله والو پاکې کړې دي او په ځینو نورو برخو کې یې د امنیت ټینګښت هڅې کوي نو ځکه کډوال لا نشي ستنولای.

د شمالي وزیرستان انتظامیه همداراز وايي، د خلکو د تاوانونو ورکولو ته ژمنه ده.

د پاکستان حکومت په وروستیو کې په شمالي او جنوبي وزیرستان کې د سیلګرۍ ودې لپاره د اقداماتو اعلان کړی.

افغان ځواکونو په خوست کې ۹ وسله وال وژلي، وسلې یې نيولي

افغان ځواکونه په خوست کې د ګزمې پر مهال

د افغانستان خوست ولايت چارواکي وايي‌ د افغان پوځ په توپچي بریدونو کې ۹ وسله وال وژل شوي دي.

په خوست کې د افغان پوځ د رسنيوو دفتر د اګست پر ۱۱مه يوه خبرپاڼه کې ويلي‌ چې دا بريدونه د اګست په لسمه د شپې ناوخته په موساخيلو ولسوالۍ کې وشول او ۳ وسله وال یې زخميان کړي‌هم دي.

​د خبرپاڼې تر مخه وسله والو د افغان پوځ پر پوستو د بريد پلان درلود خو دوی پرې توپچي ډزې وکړي او دا پلان یې شنډ کړ.

تر اوسه کومې وسله والې ډلې په دې اړه څه نه دې ويلي.

بلخوا د افغانستان استخباراتو ادارې يا اين ډي ايس د خوست دفتر له خوا مشال راډيو ته ورکړل شوي معلومات ښيي‌ چې تېره ورځ یې د ګربزو ولسوالۍ د مشې کنډو کلي کې د وسلو او مهماتو یو زیرمتون کشف او ترلاسه کړی دی.

په خوست کې د وسلې او مهماتو یو زیرمتون نیول شوي
په خوست کې د وسلې او مهماتو یو زیرمتون نیول شوي

په دې زیرمتون کې (۷۲) فیره د راکټ انداز مرمۍ (۷۲) د راکټ انداز باروت، یو میل راکټ انداز او (۲۲) لاسی ماینونهد ملي امنیت منسوبینو لاسته لویدلي دي.

دا نه دې ويل شوي چې دا وسلې د کومې وسله والې ډلې دي. په دې تړاو څوک نيول شوي هم نه دي.

پامپیو: په روس کې د بهرنیو رسنیو په پر نښه کېدو اندېښمن يو

مايک پامپیو

د امریکا بهرینو چارو وزیر وایي واشنګټن د روسی لخوا په دغه هیواد کې د بهرنیو رسنیو په نښه کولو د نویو هڅو له کبله ژوره اندېښنه لري.

مايک پامپيو په هغې خبرپاڼه کې چې د اګست پر ۱۰مه خپره شوې ویلي، د روس لخوا د رسنیو د تنظیم تګلاره چې مسوده یې په دې وروستیو کې خپره شوه، پر ازادې اروپا راډیو او امریکا غږ چې له وړاندې له غېرعادلانه محدودیتونو سره مخامخ دي، نوي او درانه مقررات وضع کوي.

پامپیو ویلي په روس کې د خپلواکو رسنیو له پرله پسې ځپلو څخه ناخوښ دی او پر دغه هېواد یې غږ وکړ چې د بیان د ازادۍ په برخه کې خپل فرايض او د بيان ازادۍ ته خپلې ژمنتياوې پر ځای کړي.

د روس د رسنیو د تنظیم فيډرالي ادارې په جولای میاشت کې د یوه فرمان مسوده خپره کړه چې پر اساس یې هغه ټولې رسنۍ چې د بهرنیو رسنیو د استازو په توګه ثبت شوي، څه چې چاپوي یا خپروي باید څرګند کړي.

له نوو سپارښتنې څخه سرغړونه کېدای شي د افرادو لپاره ۱۰۰ زره روبله چې۱۴۰۰ ډالره کېږي، جریمه ولري او یا به سرغړونکي ۱۵ ورځې زنداني کېږي. لویې ادارې به د سرغړونې په صورت کې پينځه میلیونه روبله چې د ۷۰ زره ډالرو معادل کېږي، جریمه ورکوي.

د ازادې اروپا راډیو سرپرستې او مشرې مديرې ډېزي سيندلر د جولای پر ۲۳مه ویلي و چې دا نوې سپارښتنه پر رسنیو لا ډېر محدودیت او د اورېدونکو ترمنځ د ویرې خپرولو په هدف کېږي.

وایټ‌هاوس په خوا کې تر ډزو وروسته، ټرمپ له خبري غونډې وویستل شو

ټرمپ هغه وخت له غونډې وویستل شو کله چې نوموړي په امريکا کې د کورونا وايرس سره د مبارزې په اړه معلومات شريکول.

د امریکا ولسمشر د اګست پر ۱۰ مازيګر په وايټ هاوس يا سپينه ماڼۍ کې هغه وخت له خبري غونډې په بيړه توګه وویستل شو چې د دې ماڼۍ له کټارو سره ډزې وشوې.

د امريکا د پټو خدمت يو مامور يوازې څو دقيقې وروسته ټرمپ ته هغه وخت په غوږ کې څه وويل چې نوموړي په امريکا کې کورونا وايرس ته د غبرګون په اړه معلومات شريکول.

له دې سره سمدستي هغه له خبرې خونې ووت خو څو دقيقې وروسته يې بېرته خبرې غونډه پيل کړ او وې ويل چې حالات په کنټرول کې دي.

ټرمپ زياته کړه چې يو کس روغتون ته رسول شوی او دی نه دی خبر چې د هغه حالت څنګه دی.

بلخوا پټ خدمت څانګې وروسته تاييد کړه چې ډزې شوي او يو کس او د پټ خدمت مامور روغتون ته وړل شوي دي. د دې ډزو په اړه نور معلومات نه دې ورکړل شوي.

انتخاباتي کمېشن: ولسمشر لوکاشېنکا انتخابات ګټلي دي

پولیسو د مظاهره کوونکو د کنټرولولو پر مهال یو شمېر کسان ونیول

د بېلاروس د انتخاباتو مرکزي کمېشن وايي، لومړنۍ پایلې ښيي چې اوسمهاله ولسمشر الېکساندر لوکاشېنکا په غوڅ اکثریت بری ترلاسه کړی دی.

د نوموړي مهمې مخالفې نوماندې سوېتلانا څېکانوسکایا د نظرپوښتنو د پایلو له منلو انکار کړی.

انتخاباتي کمېشن لومړنۍ پایلې د اګست پر ۱۰مه تر هغې وروسته اعلان کړې چې د اتوار پر شپه په پلازمېنه په مېنسک او نورو ښارونو کې د امنیتي سرتېرو او مظاهره کوونکو ترمنځ نښتې وشوې ځکه چې چې د ولسمشرۍ انتخاباتو په پای کې نظر پوښتنو د لوکاشېنکا د زیاتو رایو اخیستو خبر ورکړ.

د اګست پر نهمه په هېواد کې ولسمشریز انتخابات وشول او تر دې یوه ورځ وروسته انتخاباتي کمېشن وویل چې لومړنۍ پایلې ښيي چې لوکاشېنکا تر ۸۰ فیصده زیات ووټونه ګټلي او څېکانوسکایا تر ۱۰ سلنه کمې رایې ګټلې دي.

تر دې مخکې چې شپې مهال دولتي ټېلېوېژن د نظرپوښتنو نتیجې اعلان کړې نو ورسره سم، زرګونه خلک د پلازمېنې مېنسک لارو کوڅو ته ووتل.

څېکانوسکایا د اګست پر ۱۰مه وویل، ځان د ولسمشریزو انتخاباتو ګټونکې بولي.

د توت په نوم یوې خپلواکۍ رسنۍ پر ټوېټر د تاوتریخوالي ویډیوګانې خپرې کړې چې پکې لیدل کېږي چې پولیسان احتجاج کوونکي وهي.

په ویډیوګانو کې ښکاري چې مظاهره کوونکي نعرې وهي چې بېلاروس "زموږ هېواد دی."

د لومړنیو رپورټونو پر اساس پولیسو یو شمېر کسان ونیول.

د بشري حقونو مېنسک مېشته ادارې ویاسنا په وینا، په هېواد کې لږ تر لږه ۱۲۶ کسان نیول شوي چې پکې یې ۵۵ له پلازمېنې ګرفتار شول.

د دې ادارې په خبره، په نیولیو کې دوه ژوبل ول.

په ګرفتارو کسانو کې ۱۶ خبریالان او ۴۰ انتخاباتي څاروني هم شامل دي.

دولتي خبري اژانس بېلتا د اګست ۱۰مې پر سهار د کورنیو چارو وزارت په حواله وویل چې پولیسو "له اجازې پرته د خلکو تر غونډېدو" وروسته حالات کنټرول کړي دي.

پاکستان کې اورښتونو او سېلاوونو تر ۵۰ زیات کسان وژلي

یوه ښځه له کوره د بارانه اوبه باسي

په پاکستان کې د اګست له شپږمې څخه تر نهمې پورې په اورښتونو او سېلاوونو کې تر۵۰ زیات کسان مړه شوي دي.

د پشکال باران او سېلاوونو په یو شمېر سیمو کې کورونو او بېخبنا (انفراسټرکچر) ته زیان رسولی دی.

سېلاوونو تر ټولو زیات تاوان په خیبر پښتونخوا کې اړولی دی.

په پاکستان کې د طبیعي ناورینونو پر وړاندې د مبارزې اداره (اېن ډي اېم اې) وايي، سېلاوونو په خیبر پښتونخوا کې ۱۹، سیند کې ۱۲، ګېلګېت بلتستان کې ۱۰، پنجاب کې اته او بلوچستان کې یې درې کسان وژلي دي.

د طبیعي ناورینونو پر وړاندې د مبارزې صوبايي ادارې وايي، په بېلا بېلو سیمو کې یې له خلکو سره مرستې کړې دي.

د سلیمان لایق جنازه له جرمني کابل ته ورسېده

سلیمان لایق د جولای پر ۳۱مه ومړ

د افغانستان د نومیالي شاعر او پخواني سیاستوال اکاډمیسین سلیمان لایق جنازه د اګست پر ۱۰مه له جرمني څخه کابل ته ورسېده.

۹۰ کلن غلام مجدد سلیمان لایق د جولای پر ۳۱مه د جرمني په یو روغتون کې ومړ.

د نوموړي زوی غرزی لایق وايي، پلار یې په ۲۰۱۹ز کال کې په کابل کې په برید کې ژوبل شوی وو او له اوږدې مودې راهیسې یې درملنه روانه وه.

د افغانستان د علومو اکاډمۍ سرپرست څېړنوال عبدالظاهر شکېب مشال راډيو ته وویل تمه وه چې د اګست پر نهمه د ارواښاد لایق جنازه کابل ته ورسېږي، خو په پروازونو کې د ستونزو له امله دا کار وځنډېد.

د اکاډمیسین سلیمان لایق د اعزاز او تدفین کمېسیون او علومو اکاډمۍ په کابل ښار کې د نوموړي تصویرونه او ملي اشعار د کابل په واټونو کې نصب کړي دي.

اکاډمیسین لایق د افغانستان یو مطرح شاعر، لیکوال او څېړونکی وو چې په پښتو او دري ژبو یې ګڼ اثار چاپ شوي.

پاکستان: ۲۴ ساعتونو کې د کورونا وایرس ۵۳۹ نوې پېښې ثبت شوي

په اسلام اباد کې یو روغتیاپال د وایرس لپاره د یوه کس معاینه کوي

په پاکستان کې په تېرو ۲۴ د کورونا وایرس د ۵۳۹ نویو پېښو له ثبتېدو سره د رسمي پېښو شمېر ۲۸۴،۶۶۰ ته رسېدلی دی.

د کووېډ-۱۹ په اړه حکومتي ووبپاڼې د اګست پر ۱۰مه ویلي چې په هغه هېواد کې ۶،۰۹۷ کسان ناروغۍ وژلي خو ۲۶۰،۷۶۴ ورڅخه رغېدلي دي.

په پاکستان کې د کورونا وایرس تر ټولو زیاتې پېښې په سیند او بیا په پنجاب کې ثبت شوې دي.

په خیبر پښتونخوا کې د کورونا وایرس د رسمي مثبتو ېښو شمېر ۳۴،۶۹۲ ته رسېدلی چې پکې له کووېډ-۱۹ ناروغۍ ۱،۲۳۱ کسان مړه کړي خو ۳۱،۶۱۲ ورڅخه رغېدلي دي.

د پاکستان حکومت د پېښو کمېدو ته په کتو په هېواد کې د وایرس خپرېدو مخنیوي په موخه محدودیتونه ختم کړي دي خو ټولو کاروباریانو ته یې د احتیاطي لارښوونو د عملي کولو امر کړی.

په ننګرهار کې چاودنې درې کسان ژوبل کړي

چاودنه په مومندرې ولسوالۍ کې شوې

د ننګرهار په مومندرې ولسوالۍ کې په چاودنه کې درې کسان ژوبل شوي دي.

د والي ویاند عطا الله خوږیاڼی وايي، بم د سرحدي ځواکونو د پخواني ویاند ادریس مومند په موټر پورې نښلول شوی وو چې د ولسوالۍ له اته ویشتمې ویالې په سیمه کې وچاودېد.

دی وايي، د مومند روغتیايي حالت د ډاډ وړ دی خو د هغه ورور او ډرېور سخت ژوبل دي.

د حملې ذمه واري چا نه ده منلې.

کابل کې چاودنې دوه کسان وژلي

چاودنه د ښار په کمپنۍ بازار کې شوې

د افغان پلازمېنې کابل امنیه قومانداني وايي، د ښار په کمپنۍ سیمه کې یوې بمي چاودنې د یوې ښځې په ګډون دوه کسان وژلي دي.

د کابل د امنیه قوماندانۍ ویاند فردوس فرامرز د اګست پر نهمه په بیان کې وویل، د یکشنبې (اتوار) ورځې په چاودنه کې پېنځه امنیتي سرتېري هم ژوبل شوي.

د ده په خبره، بم په کمپنۍ بازار کې په یوه کراچۍ (رېړه) کې ايښوول شوی وو او سرتېرو موندلی وو خو چې کله یې سیمه کلابندوله او بم یې شنډاوه نو چاودنه وشوه.

د حملې ذمه واري چا نه ده منلې.

د خیبر منډۍ کڅ کې خلکو د حکومت لګولي بوټي له بېخه وویستل

 د خیبر نقشه

نن (د اګست نهمه) د خیبر ضلعې په باړه منډۍ کڅ کې د شجرکارۍ د مهم په وخت هلته لګول شوي په سلګونه بوټي ځایی وګړو له بېخه راوویستل.

د مشال راډيو ځايي‌خبريال ترمخه، خلکو دا بوټي ځکه وویستل چې دوی ويل دا ځمکه د دوی ده او حکومت ترې مخکې له مخکې د بوټو کښېنولو پوښتنه نه وه کړې.

تر دې وروسته خلکو مظاهره هم کړې ده. دوی تورې جنډې پورته کړې وي او په خپلو ویناوو کې یی وویل چې مونږ پر خپل ځمکې سرکاري قبضه نه منو.

د خیبر ضلعي انتظامیې ویلي دوی د باړې ځينې مشرانو په خوښه پکې دا بوټي لګولي وو او هر چا چې دا بوټي راويستلي د هغوی پر ضد به کاروايي‌کوي.

نور پورته کړئ

ځانګړې پاڼې

له موږ سره اړیکي

XS
SM
MD
LG