د امریکا د بهرنیو چارو وزیر مایک پامپېو د سېپټېمبر پر ۱۹مه ویلي، حکومت یې د افغانستان "د انرژۍ د بېخبنا یا انفراسټرکچر د یوې لویې پروژې" لپاره ځانګړي شوي "۱۰۰ میلیونه ډالره مرسته ورڅخه ګرځوي."
نوموړي په یوه بیان کې ویلي دي چې دا د غزني او کندهار او د کجکي او کندهار ترمنځ د برېښنا د پېنځو سټېشنو او تارونو غځولو پروژه ده.
بیان وايي، امریکا به دا پروژه افغان حکومت ته له پیسو ورکولو پرته بشپړه کړي.
د بهرنیو چارو وزارت په بیان کې د افغانستان د ملي تدارکاتو ادارې په چارو کې د "شفافیت پر نشتوالي اندېښنه" ښودلې او ویلي یې دي چې امریکا به د شفافیت او محاسبې په اړه د ټاکلو معیارونو په پوره کولو کې "د حکومت د پاتې راتلو" له وجې پلان شوې ۶۰ میلیونه ډالره مرسته هم دروي.
افغان حکومت د امریکا د بهرنیو چارو وزارت تازه بیان په غبرګون لا څه نه دي ویلي خو په تېرو وختونو کې یې په بیا بیا ویلي چې د درغلۍ پر وړاندې مبارزې ته ژمن دی.
