د لاسرسي ځای

تازه خبر

خبرونه

د افغانستان ولسمشرۍ انتخاباتو کمپاین پیل شو

په افغانستان کې د ولسمشرۍ ټاکنو لپاره کمپاین د جولای پر ۲۸مه، په رسمي ډول پېل شو.

دا کمپاین به دوه میاشتې دوام وکړي.

د افغان ولسمشر د ټاکلو لپاره انتخابات په سېپټېمبر مياشت کې کېږي چې ورته د ولسمشر محمد اشرف غني په شمول ۱۸ کسان ولاړ دي.

نور مخکښ امېدواران د ملي امنيت پخوانی سلاکار حنيف اتمر او اوسنی اجرايیه رييس ډاکټر عبدالله عبدالله دي.

د انتخاباتو د خپلواک کمېشن د اصولو تر مخه هېڅ نوماند حق نه لري چې د خپل کمپاین لپاره دولتي امکانات په کار راولي.

د نننۍ ورځې ټول خبرونه وګورئ

سټولټنبرګ: ناټو د افغانستان د امنیتي ځواکونو مرستې ته دوام ورکوي

سټولټنبرګ داسې مهال دا خبرې وکړې چې کې په داسې حال کې چې د امریکا د بهرنیوچارو وزیر مایک پومپیو په څنګ کې ولاړ و.

د ناټو عمومي منشي وايي، دغه تړون د افغانستان له دفاعي او امنیتي ځواکونو سره مرسته کوي او روزي یې، ترڅو دا خبره یقیني کړي چې د اسلامي دولت (داعش) ډله بیا هېڅکله په افغانستان کې ځاله نه کوي.

یینس سټولټنبرګ پرون (نومبر ۱۴مه) د داعش ډلې پرضد ایتلاف کې د شاملو ۳۰ هېوادونو د چارواکو په ګډون په واشنګټن کې په یوه غونډه کې وویل، ناټو او متحده ایالاتو موافقه کړې چې د دوستو هېوادونو د پوځي ځواکونو د وړتیا لوړولو لپاره به هڅو ته دوام ورکوي، ترڅو د تروریزم پرضد مبارزه کې پیاوړي شي.

د ناټو عمومي منشي د داعش ډلې د مشر ابوبکرالبغدادي وژل کېدل یو مهم پرمختګ وباله او زیاته یې کړه چې دا ډله به هغه ځای بیا هېڅکله ترلاسه نه کړي چې په سوریه او عراق کې له ماتې وروسته یې په افغانستان کې ځان ته موندلی و.

کرکټ: افغانستان ویسټ انډیز ته لومړۍ شل اووریزه لوبه وبایلله

ارشیف

د افغانستان د کرکټ ملي لوبډلې د ویسټ انډیز پر وړاندې د درېیو شل اووریزو سیالیو د لړۍ لومړۍ لوبه د ۳۰ منډو په توپیر وبایلله.

دا لوبه پرون د نومبر په ۱۴مه د هندوستان د لکنوو ښار په لوبغالي کې وشوه. ویسټ انډیز لوبه پیل کړه او افغانستان ته یې د ۵ لوبغاړو په سوځېدو د ۱۶۵ منډو هدف وټاکه.

افغان لوبغاړو د پام وړ لوبه ونه کړه. حضرت الله ځاځي په ۲۹ بالونو ۲۳، اصغر افغان په ۲۱ بالونو ۲۵، نجیب الله ځدراڼ په ۲۲ بالونو ۲۷ او فرید احمد په ۱۵ بالونو ۲۴ منډې وکړې.

افغان لوبډلې مخکې له ویسټ انډیز سره درې یو ورځنۍ لوبې هم کړي چې درې واړه یې بایللې دي. د دواړو لوبډلو ترمنځ دوهمه او دریمه شل اووریزه لوبه به د شنبې او یکشنبې په ورځو وي.

جرمني لسګونه اذربایجاني وګړي بیرته خپل هېواد ته استولي

د ازربایجان د کډوالو دولتي ادارې د جمعې په ورځ وویل، ۶۱ اذري وګړي له جرمني څخه په یوه چارټر الوتکې کې بیرته باکو ته ستانه کړي دي.

تر دې مخکې په جرمني کې د غیرې قانوني کډوالو د موندلو لپاره د پولیسو د چاپو راپورونه ورکړل شوي وو.

د دې ادارې په وینا دا ستنېدنه د اذربایجان او اروپايي ټولنې ترمنځ د بې اسنادو افرادو د بېرته منلو په اړه له شته هوکړې سره سمه ترسره شوې ده.

د اذربایجان د کډوالو دولتي اداره وايي، په ستنو شویو کسانو کې ۲۲ نارینه، ۱۸ ښځې او ۲۱ ماشومان دي.

د جرمني شپیګل مجلې د نومبر په ۱۳مه نېټه راپور ورکړ چې د جرمني پولیسو په یو لړ چاپو کې ګن اذربایجاني وګړي موندلې چې ویل کیږي په قاچاقي توګه جرمني ته وروړل شوي.

اپوزېشن له قاسم سوري، حکومت له صدارتي فرمانونو تېر شو

پاکستانی پارلمان

د پاکستان حکومت هغه ۱۱ صدراتي فرمانونه منسوخ کړل چې په قامي اسمبلۍ کې یې بې له بحثه منظور کړي ول. دا پرېکړه نن د قامي اسمبلۍ په غونډه کې وشوه.

دا صدراتي فرمانونه يا ارډيننسونه د نومبر پر اوومه د قامي اسمبلۍ په هغه غونډه کې منظور شوي ول چې مشري يې ډپټي سپيکر قاسم سوري کوله.

اپوزيشن ډلو دا اقدام ناسم بللی وو او ټينګار يې کړی وو چې هره قانوني مسوده بايد له پارلمانه تر بحث وروسته قانون وګرځول شي. اپوزيشن ګوندونو د حکومت د دې اقدام په غبرګون کې د اسمبلۍ د نننۍ غونډې پر مهال د ډپټي سپيکر پرضد د عدم اعتماد تحريک وړاندې کولو پرېکړه وه خو په پنجشنبه د دواړو لوريو ترمنځ تر مذاکراتو وروسته د عدم اعتماد باور اخېستو په بدل کې د صدارتي فرمانونو منسوخولو پرېکړه وشوه.

نن د اسمبلۍ غونډې ته د وينا پر مهال د حکومتي ګوند پاکستان تحريک انصاف غړي اسد عمر وويل دوی نه غواړي چې د سپيکر او ډپټي سپيکر چوکۍ دې لانجمنې شي.

پاکستان کې تندر او بارانونو ۲۷ کسان وژلي

پاکستان کې تندر او برېښنا

پاکستاني چارواکي وايي د هېواد د سيند صوبې په بېلا بېلو برخو کې په تندر او تیزو بارانونو کې لږ تر لږه ۲۷ کسان وژل شوي دي.

د سيند صوبايي حکومت ویاند سعید غني نن [د نومبر پر ۱۵مه] وویل چې انتظامیې په سیمه کې بېړنی حالت اعلان کړی او ژغورونکې ډلې تهر ريګستان سيمې ته رسېدلي دي.

غني وویل د ښځو او ماشومانو په ګډون لسګونه کسان د تندر او ودانیو پریوتو په پېښو کې ژوبل شوي او په روغتونونو کې یې درملنه روانه ده.

د ایدي فانډېشن په نوم د خېر ښېګړي ادارې ویاند انور کاظمي ويلي چې د مرګ ژوبلې شمېر ښايي تر دې هم زیات شي. نوموړي وویل ژغورونکې ډلې لېرې پرتو کلیوالو سیمو ته رسېدلي دي.

اخوا د پاکستان ډان ورځپاڼې خبر ورکړی چې د تندر پریوتو په پېښو کې په سلګونو څاروي هم وژل شوي دي.

پېښور: ډي اېس پي غني الرحمان ووژل شو

په پیښور کې ناپېژندلیو وسله والو د پولیسو د ترهه ګرۍ ضد څانګې یو چارواکې په ډزو ویشتی او وژلی دی.

پولیس وايي، نن د ښار په دله زاک سیمه کې وسله والو د پولیسو د ترهه ګرۍ ضد څانګې ډي اېس پي غني الرحمان پر ګاډې ډزې وکړې چې په نتیجه کې يي هغه ووژل شو او د هغه ساتونکی او د ګاډي ډرایور ټپیان شول.

د پولیسو وړومبۍ پلټنې ښيي چې د وژل شوي پولیس چارواکي له یو چا سره د ځمکې پر سر لانجه وه خو پولیس وايي په دغه اړه نورې پلټنې هم کوي.

د خیبر پښتونخوا وزیر اعلا محمود خان هم په دغه اړه د صوبې د پولیسو مشر ته د پلټنو ویلي دي.

ټرمپ پر ترکیې د روسيو توغندیو پلورل جدي ستونزه وبلله

ټرمپ او اردوغان په یوه خبري کنفرانس کې راڅرګند شول

د امریکا ولسمشر ډونالډ ټرمپ وایې، د ترکیې له خوا د روسې "اس ۴۰۰" د توغندیو دفاعي سیستم پیرل یوه جدي ستونزه رامنځته کوي او هیله یې وښوده چې دا ستونزه هواره شي.

ولسمشر ټرمپ پرون (نومبر ۱۳مه) له خپل ترکي سیال رجب طیب اردوغان سره د لیدو پر مهال دا موضوع یاده کړه. ښاغلي ټرمپ دا لیدنه ډېره عالي او رغوونکې وبلله.

د ترکیې او امریکا ولسمشران داسې مهال په واشنګټن کې سره ګوري چې د دواړو هېوادونو اړیکي چې پخوا ښې وې، اوس ترینګلې شوې دي.

دا اړیکي هغه مهال لا خرابي شوې چې انقرې د سوریې په شمال ختیځ کې د کردانو پر وړاندي پراخ پوځي عملیات پیل کړل. امریکا په سوریه کې د کرد ملېشو ملاتړ کوي.

ولسمشر ټرمپ هغه مهال له خپل ترکي سیال څخه په یوه غیرډیپلوماتیک لیک کې غوښتي وو چې د ډېرې وینې توییدنې مخه ونیسي.

واشنګټن وایې اس ۴۰۰ توغندویې دفاعي سیستم د ناټو د دفاعي وسایلو سره مطابقت نه لري.

د ترکیې ولسمشر هم د اس ۴۰۰ راکټونو د پېرلو موضوع د هواري لپاره له امریکا سره د خبرو پر اړتیا ټینګار وکړ او ویې ویل چې انقره چمتو ده امریکایې پټرویټ راکټونه هم وپیري، خو که مطلوب شرایط ورته وړاندې شي.

"د لومړنیو پایلو په اعلان کې ځنډ د ټاکنو کمېسیون نیمګړتیا نه‌ده"

د ټاکنو کمېسیون یوه ویاند ذبیح الله سادات

د افغانستان د انتخاباتو خپلواک کمېسیون د ولسمشرۍ انتخاباتو د لومړنیو پایلو د ځنډ پړه د یو شمېر نوماندانو، له کمېسیون سره پر همکارو کمپنیو او ځینو نورو بنسټونو اچوي.

د دغه کمېسیون یوه ویاند ذبیح‌الله سادات نن (عقرب ۲۳مه) ازادي راډیو ته وویل: "د خلکو اندېښنې پر ځای دي او حق لري چې انتقاد وکړي، خو بل اړخ ته که وګورئ، موږ په دې انتخاباتو کې ټکنالوژي وکاروله د دې لپاره اړونده کمپنۍ معرفي شوې وه. که هغه کمپنۍ خپل مسؤلیتونه پر وخت نه‌شي ترسره کولای، یا هم د کاندیدانو له لوري پوره همکاري نه‌کېږي او د پروسې پر وړاندې خنډ جوړېږي؛ نو دا د کمېسیون نیمګړتیا نه، بلکې د هغو نهادونو نیمګړتیا ده چې په لوی لاس غواړي دا پروسه نوره هم وځنډېږي."

یو شمېر کابل ښاریانو اندېښنه وښوده چې د انتخاباتو کمېسیون ورځ تر بلې د پایلو ځنډولو سره د خلکو باور زیانمنوي.

دا دوهم ځل دی چې د ولسمشرۍ انتخاباتو د لومړنیو پایلو اعلان ځنډېږي .

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

دغه کمېسیون پرون ناوخته وویل چې د تخنیکي ستونزو او نورو مسایلو له کبله نه‌شي کولای پر ټاکلي وخت دا پایلې اعلان کړي.

په خوست کې چاودنې یو ماشوم وژلی او دوه تنه ژوبل

د افغانستان په جنوب ختیځ ولایت خوست کې سیمه‌ییز چارواکي وايي، د صبریو او یعقوبیو ولسوالۍ کې د ماین چاودنې یو ماشوم وژلی او دوه کسان‌یې ټپیان کړي دي.

د خوست د صبریو او یعقوبیو ولسوال عبدالحی ځاځي ازادي راډیو ته وویل چې چاودنه نن سهار (عقرب ۲۳مه) د دې ولسوالۍ په یوه بازار کې شوې ده.

هغه وویل: "د سهار لسو بجو شااوخوا یو بم چې په موټرسایکل کې ځای پر ځای شوی وو، د ملکي خلکو له موټر سره چاودلی دی. په دې پېښه کې دوه ملکيان ټپیان دي چې د درملنې لپاره روغتون ته لېږل شوي او یو نهه کلن ماشوم وژل شوی دی."

تر اوسه چا د دې چاودنې مسؤلیت نه‌دی منلی.​

د ولسمشرۍ ټاکنو لومړنۍ پایلې ښايي وځنډوو: افغان ټاکنو کمېسیون

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

د ترکیې او امریکا ولسمشران واشنګټن کې سره ګوري

ارشیف

د ترکیې ولسمشر رجب طیب اردوغان نن په واشنګټن کې د امریکا د متحده ایالاتو له ولسمشر ډونالد ټرمپ سره وګوري.

رجب طیب اردوغان پرون واشنګټن ته ولاړ.

د ترکیې ولسمشر تر دې مخکې په ۲۰۱۶ میلادي کال کې واشنګټن ته تللی و چې بیا د ده ساتونکو د کردي مظاهره کوونکو پر یوې ډلې د ترکیې د سفیر کور ته نږدې حمله وکړه.

اردوغان په داسې وخت کې د امریکا متحده ایالاتو ته سفر کړی دی چې د ناټو د دغو دوو غړو هېوادونو اړیکې چې له ۷۰ کلونو راهیسې ښې وې، کړکېچن شوې دي.

رجب طیب اردوغان واشنګټن ته تر تګ مخکې د دې سفر په اړه د دوشنبې په ورځ په انقره کې ویلي و چې دا سفر په داسې وخت کې کوي چې د ترکیې او د امریکا د متحده ایالاتو اړیکې ښې نه‌دي.

د ولسمشرۍ ټاکنو لومړنۍ پایلې نه ځنډوو. افغان ټاکنو کمېسیون

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

په لوګر کې پر بهرنیو ځواکونو موټر بم برید شوی

د نومبر پر۱۲مه له غرمې مخکې په لوګر کې د ملي اردو لواء ته څېرمه د کابل-ګردیز پر لویه لاره د بهرنیو ځواکونو پر موټریز کاروان برید ترسره شوی.

د لوګر د والي ویاند دیدار لونګ مشال راډیو ته وویل، تر اوسه نه ده مالومه چې دا موټر بم برید وو، که ماین چاودنه وه.

د ده په وینا، چې بهرنیو ځواکونو سیمه کلابند کړې او چاته د ورتګ اجازه نه ورکوي.

دیدار لونګ وویل، تر اوسه د دې برید د زیانونو په اړه هم مالومات نه لري.

نوموړي زیاته کړه: "نن د څلورمې پلې لواء قوماندانۍ ته څېرمه د بهرنیو ځواکونو پر موټریز کاروان برید ترسره شوی، تر اوسه نه ده مالومه چې دا موټر بم برید وو که ماین چاودنه ده، د تلفاتو په اړه يې هم تر اوسه راسره مالومات نشته، بهرنیو ځواکونو هغه سیمه چې برید په کې شوی کلابنده کړې او چاته د ورتګ اجازه نه ورکوي."

د ایران پلوي اسلامي جهاد ډلې یو مشر مو وژلی: اسرایل

د بها ابو العطا ښځه هم په حمله کې وژل شوې ده.

اسرايلي چارواکي وايي، د نومبر پر ۱۲مه يې د ايران ملاتړ لرونکې اسلامپالې وسله والې ډلې اسلامي جهاد يو مشر قوماندان یې وژلی دی.

دا سړی بها ابو العطا نومېده چې په غزه پټۍ کې په هوايي بمبار کې په نښه شوی دی.

په غبرګون کې يې دغه وسله والې ډلې پر تله بيب راکټونو ويشتلي دي.

اسرايلو ويلي چې دغه سړی په ګڼو بريدونو کې ښکېل وو او په هوايي عملياتو کې د نوموړي مېرمن هم وژل شوې ده.

عراق: د وژل شویو مظاهره چیانو شمېر ۳۲۰ تنو ته ورسېد

د عراق د مظاهره کوونکو یو انځور

په عراق کې د بشري حقونو څار ډلې ویلي چې د امنیتي ځواکونو او مظاهره چیانو ترمنځ له نوې ترینګلتیا څلور لاریونوال وژل شوي او نېږدې ۱۳۰ نور ټپیان دي.

دا مرګژوبله هغه مهال وشوه چې د دغه هېواد د پوهنې ادارې مخته د دواړو لورو ترمنځ شخړه وشوه او امنیتي ځواکونو اوښلن ګیس وکارولو.

په عراق کې د بشري حقونو نیمه رسمي کمېسیون چې د دې مرګژوبلې راپور یې ورکړی دا نښتې د خواشینۍ وړ بولي او وایي، د ځینو ټپیانو وضعیت نازک دی.

په همدې حال کې د عراق د پوځ یوه ویاند جنرال عبدالکریم خلف د نومبر په ۱۱مه په بغداد کې یوې خبري غونډي ته وویل: "د مظاهره کوونکو یوه لویه برخه، ۹۹ سلنه‌ یې دا تاوتریخوالی نه‌ دی کړی، دوی په بشپړه ازاده توګه خپلې نظریې وړاندې کوي، یوه وړه برخه‌ یې غله او جنایتکاران دي چې زموږ پر ځواکونو بریدونه کوي."

له تېرې میاشتې راهیسې په عراق کې د درغلیو او ګرانیو خلاف په راوتیو لاریونونو کې لږ تر لږه ۳۲۰ تنه مظاهره چیان وژل شوي دي.

امریکا وايي سرتېري به یې د څو نورو کلونو لپاره هم په افغانستان کې وي

جنرال مارک میلي له اې بي سي نیوز تلویزون سره په مرکه کې ویلي په افغانستان کې د امریکا مشن لا نه دی پوره شوی.

د امریکا د پوځ مشر وړاندوینه کړې چې ځواکونو به یې ښايي د څو نورو کلونو لپاره هم په افغانستان کې پاتې شي.

جنرال مارک میلي له اې بي سي نیوز تلویزون سره په مرکه کې چې د نومبر پر ۱۰مه خپره شوه وویل، د ۱۱م سېپټمبر له پېښې وروسته یې افغانستان ته سرتیري د دې لپاره لیږلي وو چې د هغه هیواد خاوره د هغو ترهګرو پر پناه ځای بدل نه شي چا چې پر امریکا حمله کړې وه خو د نوموړي په وینا هغه مشن لا مکمل شوی نه دی.

نوموړي وویل دا مشن به هله کامیاب شي چې افغان حکومت او امنیتي سرتیري یې د دې جوګه شي چې خپله خاوره پر نورو هیوادونو او په تېره بیا د امریکا پر ضد د حملو لپاره له کارولو وژغوري.

امریکا په افغانستان کې ۱۴زره سرتیري لري. همدا راز د ناټو د غوڅ ماموریت لاندې زرګونه اروپایي عسکر هم هلته موظف دي.

امریکایي ولسمشر ډونلډ ټرمپ په بیا بیا ویلي،اوس د دې وخت رارسیدلی دی چې د نړۍ د کړکیچ له سیمو خپل سرتیري وباسي.

د رومانیا ولسمشریزو ټاکنو کې کلاوس یوهانېس زیاتې رایې وړي

د رومانیا د ولسمشریزو انتخاباتو په لومړي پړاو کې د اروپایې ټولنې ملاتړکونکي نوماند زیاتی رایي ګټلي دي.

د ٩٠ فيصده مرکزونو د شمېرل شويو رايو د رسمي نتيجو پر اساس، ولسمشر کلاوس يوهانيس تر ټولو مخکې دی.

يوهانيس به د سوشل ډيموکراتيک ګوند له مشر یویوریکا ډانسیلا سره په دويم ځلي انتخاباتو کې مخامخ شي.

نوموړې په ورستیو کې د وزیراعظمۍ له څوکۍ ایسته کړل شوې ده. ډانسیلا ۲۴ فیصده رایې ګټلې دي.

د رومانيا د ټاکنو مرکزي دفتر ترمخه په انتخاباتو کې ٤٨ فيصده خلکو برخه لرله.

که کوم کانديد د ولسمشرۍ ټاکنو په لومړي پړاو کې تر ٥٠ فيصدو زياتې رايې ونه ګټي، نو د نومبر پر ۲۴مه به دويم ځلي انتخابات کیږي.

چارواکي: په لوګر کې څلور طالبان ووژل شول

د لوګر چارواکي وايي چې د نومبر د نهمې نېټې په ماښام د محمداغې ولسوالۍ په سلطان باغ سیمه کې د طالبانو د یو مشهور قوماندان ویس الدین په ګډون ۴ وسلوال د افغان هوايي ځواکونو په برید کې وژل شوي دي.

د نومبر د لسمې نېټې پر سهار د لوګر د امنیه قوماندانۍ ویاند شاپور احمدزي مشال راډیو ته وویل، یاد وسلوال داسې مهال تر هوايي برید لاندې راغلل، چې عملاً د دولتضد فعالیت باندې بوخت ول.

نوموړي زیاته کړه، دا هغه وسلوال وو، چې د تیرې پنجشنبې په ورځ يې په همدې سیمه کې د پکتیا درې قاضیان او د محکمې یو مامور وژلي ول.

تر اوسه وسلوالو طالبانو پدې اړه رسنیو ته څه نه دي ویلي.

ولسمشر ټرمپ پر پوځي لګښت د ناټو چارواکو سره بحث کوي

د ارشیف انځور

سپینه ماڼۍ وايي، د امریکا ولسمشر ډونلډ ټرمپ به راتلونکې اوونۍ د ناټو سیکرټري جنرل ینز ستولتنبرګ سره پر پوځي لګښتونو بحث وکړي.

دا په داسې حال کې ده چې ولسمشر ټرمپ د ناټو غړي دې ته هڅوي چې پر خپلو دفاعي چارو لګښتونه زیات کړي.

سپینې ماڼۍ د نومبر پر نهمه نېټه وویل چې ولسمشر ټرمپ او ینز ستولتنبرګ به د نومبر پر ۱۴مه لیده کاته وکړي.

دا تر هغه وړاندې ده چې د ناټو راتلونکې سرمشریزه به د ډسمبر پر دریمه او څلورمه نېټه په لندن کې ترسره کېږي.

بغداد کې پر مظاهره کونکو د پولیسو ډزې، څلور مړه، لسګونه ژوبل

مظاهره کونکي یو ژوبل تن لېږدوي

په بغداد کې د پولیسو او د روغتیا د ادارې کارکونکي وايي، عراقي امنیتي ځواکونو د نومبر په نهمه لږ تر لږه څلور مظاهرچيان د خلکو د خورولو او د سرکونو د خوشې کولو پرمهال په ډزو وژلي دي.

دا پيښه هغه وخت رامنځ ته شوه کله چې مظاهرچيانو په امنيتي ځواکونو د پيټرول بمونو ګوزارونه وکړل.

د راپورونو ترمخه تر ۱۰۰ زيات مظاهرچیان ژوبل شوي هم دي. له ډزو وروسته امنیتی ځواکونو د یو مهم پل پرته د ټولې سيمي کنټرول ترلاسه کړی دی.

بلخوا د عراق حکومت د روان بحران پای ته رسولو لپاره د اصلاحاتو ژمنه کړې ده.

وزیراعظم عادل عبدل مهدي د نومبر پر نهمه وويل چې سیاسي ګوندونو په هیواد کې د حکومت چلولو په لاره کې تېروتنې کړې دي. نوموړي د انتخاباتي اصلاحاتو ژمنه هم وکړه.

په عراق کې د اکتوبر له لومړۍ نيټې راهيسې مظاهرې رواني دي چې تراوسه پکې تر ۳۰۰ زيات مظاهرچيان وژل شوي دي.

مظاهره کوونکي د هېواد په فرقه یيز سياسي نظام کې د بدلون غوښتنه کوي.

افغان ځواکونه په پکتیکا کې د شپږ وسله والو وژلو ادعا کوي

په پکتیکا کې د افغان ځواکونو عملیات.

د پکتیکا امنیتي چارواکي وايي، چې نن د شنبې ورځې له غرمې وروسته د یاد ولایت د مټاخان ولسوالۍ د خواجه رم په کلي کې د افغان هوايي ځواکونو په برید کې ۶ وسله وال مخالفین وژل شوي دي.

د پکتیکا د امنیه قوماندانۍ ویاند شاه محمد ارین مشال راډیو ته وویل، چې په وژل شویو وسله والو کې د برهان په نوم د هغوی یو مشهور قوماندان هم شامل دی.

د ده په وینا چې په دې برید کې د دې وسله والو وسلې او پوځي تجهیزات له منځه تللي دي.

شاه محمد ارین وايي، چې د افغان هوايي ځواکونو په دې برید کې ولسي وګړو ته کوم ځاني او مالي زیان نه دی رسیدلی.

تر اوسه هېڅ یوې وسله والې ډلې د یاد برید په اړه رسنیو ته څه نه دي ویلي.

د داعش وسله والو برید کې د تاجکستان اووه سرتېري وژل شوي

تاجکستاني چارواکو د نومبر په شپږمه وویل، د شپې ناوخته د داعش اورپکو پر یوې امنیتي پوستې برید وکړ چې په وینا یې ۱۵ جګړه مار ووژل شول او پنخه ژوندي ونیول شول.

په تاجکستان کې سرچینو د مشال راډيو ځايي څانګې ته ویلي چې د نومبر پر شپږمه له ازبکستان سره پر پوله د تاجکستاني سرتېرو او داعش اورپکو ترمنځ جګړه کې اووه امنیتي افسران وژل شوي دي.

په پلازمېنه دوشنبه کې چارواکو په رسمي توګه اعلان کړی چې یوازي دوه افسران يې وژل شوي.

د تاجکستان د ملي امنیت دولتي کمیټې مخکې ویلي وو چې د پولیسو یو افسر بهرام قاسمزاده او یو سرحدي ساتونکی عزت الله لطیفوف د نومبر په شپږمه هغه مهال ووژل شول چې د داعش سخت دريځې ډلې شلو کسانو ازبکستان ته نيږدې پر پوله پر یوه پوسته حمله وکړه.

دا سیمه د تاجکستان په رودکي کې د پلازمېنې دوشنبې په شپېته کیلومترۍ کې پرته ده.

چارواکو لومړی وویل چې حمله کوونکي له افغانستانه ورغلي وو. دوی وویل چې پنځلس سخت دريځي وژل شوي او پنځه نور يې ژوندي نيولي دي.

خو په پلازمېنه کې ځايي حکومتي سرچینو ازادي راډیو ته پرون (نومبر ۸مه) وویل، لږ تر لږه پنځه نور پوله ساتونکي په دې حمله کې وژل شوي دي.

په همدې حال کې د داعش سخت دريځې ډلې د جمعې په ورځ په یوه انټرنټي اعلامیه کې د دې حملې مسئولیت ومانه او وبې ویل چې داعش غړیو د تاجکستان لس پوله ساتونکي وژلي دي.

د تاجکستان د کورنيو چارو وزارت د نومبر پر اتمه سهار وویل چې حمله د داعش غړیو کړې وه چې ډېری یې تاجکستانیان وو او له افغانستانه دې هېواد ته اووښتي وو.

د افغانستان دفاع وزارت ویلي، د دې حملې او افغانستان ترمنځ هېڅ تړاو نشته.

پاکستان له هند سره پر کړکېچ سربېره کرتارپور لاره پرانېزي

د ارشیف انځور

په داسې حال کې چې د نومبر پر نهمه د هند او پاکستان ترمنځ د کرتارپور د لارې رسمي پرانېسته کېږي، زرګونه سیک زیارت کوونکي چې پکې پخوانی وزیر اعظم من موهن سینګ هم شامل دی، پاکستان ته رسېدلي دي.

اسلام اباد سیک زیارت کوونکو ته بې له ویزو پاکستان ته د داخلېدو اجازه ورکړې ده.

من موهن سنګ په کرتار پور کې رسنیو ته وویل: "نن د سیک ورورولۍ لپاره مهمه ورځ ده. هغه هیله څرګنده کړه چې له دې سره به د دواړو هیوادونو ترمنځ اړیکې د رغېدو لوري ته لاړې شي."

په کرتار پور کې د نومبر پر ۱۲مه د بابا ګورو نانک د زیږون۵۵۰مه کلیزه لمانځل کېږي.

کرتار پور د راوي دریاب پر غاړه د هند پولې ته نېږدې د پاکستان په خاوره کې پروت کلی دی چې پکې د سیک مذهب یوه مذهبي ګوردواره ده چې پکې د سیکانو مذهبي پېشوا بابا ګورو نانک د خپل ژوند وروستي ۱۸ کلونه تېر کړي ول.

پاکستان تېر کال د نومبر پر ۲۸مه د کرتار پور لارې د بنسټ ډبره اېښې وه چې په هغو مراسمو کې د پاکستان وزیر اعظم عمران خان او هندي کانګرس غړي نوجوت سینګ سیدهو برخه اخېستې وه.

د ایران زلزله کې د ژوبل شوو شمېر ۵۲۰ تنو ته ورسېد

په ایران کې د زلزلې وروسته ویجاړ شوي ودانۍ

د ايران سرکاري ټېلېويژن وايي چې د نومبر پر اتمه د راغلې زلزلې له کبله د ژوبل شوو کسانو شمېر۵۲۰ ته ورسېده.

ویل کېږي د زلزلې کچه ۵،۹ او ژوروالې یې ۱۰ کلومیټره وه.

د نومبر پر نهمه راپور وروسته له هغې خپور شو چې د لرې پرتو۸۰ کليو کې امدادي کاروايي سرته ورسېدې چې دې زلزلې شمال مشرقي ازربایجان صوبه یې ډېره ځپلې ده.

د راپور له مخه ۲۸ کسان په روغتونونو کې د درملنې لپاره بستر شوي او نور معمولي ژوبل شوي ول چې د ابتدايي طبي مرستو وروسته کورونو ته استول شوي دي.

دې زلزلې پنځه کسان وژلي هم دي.

ایران کې زلزلې پنځه کسان وژلي او ۱۲۰ژوبل کړي

په ایران کې د زلزلې وروسته ویجاړ شوي ودانۍ.

د ایران سرکاري میډیا وايي چې د هیواد په شمال مشرقي ازربایجان صوبه کې د۵،۹ کچې زلزله کې لږ تر لږه پنځه کسان وژل شوي دي.

ابتدايي راپورونه وايي چې د نومبر پر اتمه شپې مهال راغلي زلزله کې۱۲۰ نور کسان ټپیان شوي هم دي.

انتظامي چارواکي وايي، په سیمه کې د تېزو بارانونو له امله د ژغورنې عملیات متاثره شوي دي او نور معلومات لا په ډاګه نه دي.

د امریکا جیولاجیکل سروې د زلزلې کچه ۵،۸ او ژوروالې یې ۱۰ کلومیټره ښودلی.

د زلزلې مرکز له اسب فروشان ښارګوټي سره نېږدې بلل شوی.

نور پورته کړئ

ځانګړې پاڼې

له موږ سره اړیکي

XS
SM
MD
LG