د لاسرسي ځای

تازه خبر

خبرونه

کوټه: د هېلیکاپټر پرېوتو یو اېف سي سرتېری وژلی

د بلوچستان نقشه

د جون پر اوومه د بلوچستان د سرښار کوټې پر شرقي باي پاس د پاکستاني پوځ هغه هېلیکاپټر غورځېدلی دی چې دوه زخمي اېف سي سرتېري يې انتقالول.

د پوځ د عامه اړيکو څانګې په بيان کې ويلي چې په دې پېښه کې يو اېف سي سرتېری وژل شوی او د هېليکاپټر له عملې درې سرتېري ټپیان دي.

په پېښه کې دوه ولسي وګړي هم ټپيان شوي دي. د هېليکاپټر د غورځېدو لامل په اړه څه نه دې ويل شوي.

د نننۍ ورځې ټول خبرونه وګورئ

د هلمند پخوانی والي جنرال عبدالنبي الهام ومړ

د هلمند پخوانی والي جنرال عبدالنبي الهام

د هلمند پخوانی والي جنرال عبدالنبي الهام د کرونا ناروغۍ له کبله ومړ.

دا خبره د هلمند د قبایلو د چارو رییس نوید نظري په خپل فیسبوک لیکلې ده.

ځینو نورو چارواکو او خبریالانو هم د جنرال الهام د مړینې خبر خپور کړی دی.

جنرال عبدالنبي الهام چې پینځه ورځې دمخه د هلمند له ولایته ګواښه کړای شوی وو په کابل کې د کرونا ناروغۍ په خاطر په یوه روغتون کې بستر و.

د سیمه ییزو ارګانونو خپلواکې ادارې د جنرال الهام پر ځای محمد ولي علیزی د هلمند والي ټاکلی دی.

ولس دې په اختر کې د کورونا وایرس مخنیوي لارښوونې عملي کړي: عمران خان

دواړو مشرانو دا خبره د مې پر ۱۳مه د اختر مبارکۍ په جلا جلا پیغامونو کې کړې. ارشیف- انځور

د پاکستان وزیراعظم عمران خان او ولسمشر عارف علوي پر ولس غږ کړی دی چې د اختر په ورځو کې دې د کورونا وایرس ناروغۍ مخنیوي لپاره پر احتیاطي لارښوونو کلک عمل وکړي.

دواړو مشرانو دا خبره د مې پر ۱۳مه د اختر مبارکۍ په جلا جلا پیغامونو کې کړې.

په عین حال کې د وبا په اړه د ارقامو حکومتي ووبپاڼې مې پر ۱۴مه ویلي چې په تېرو ۲۴ ساعتونو کې په پاکستان کې د کورونا وایرس ۲،۵۱۷ تازه پېښې ثبت شوي چې ورسره له تېر کال راهیسې د ټولو پېښو رسمي شمېر ۸۷۳،۲۲۰ ته رسېدلی دی.

ووبپاڼه وايي، کووېډ-۱۹ ناروغۍ په هغه هېواد کې ټول ۱۹،۳۸۴ کسان مړه کړي خو ورڅخه ۷۸۰،۴۳۸ کسان رغېدلي هم دي.

د امریکا د تېلو لویه نللیکه بیا فعاله شوې

دا نللیکه شاوخوا ۹،۰۰۰ کیلیومیټره اوږده ده او په ټیکسس کې د خلیج د تېلو پاکولو له کارخانو څخه نیویارک ته پېټرول، ډیزل او د تېلو نور قسمونه لېږدوي.

دا نللیکه د انټرنېټي برید له وجې له شپږو ورځو راهیسې بنده وه. د نللیکې د بندېدو له وجې د هېواد په ختیځ کې د تېلو رسولو په اړه اندېښنې پیدا شوې وې.

د کلونییل نللیکې چارواکو د مې پر ۱۲مه د فعالیت تر پیلېدو وروسته وویل، لا هم وخت ته اړتیا لري چې د تېلو د رسولو نظام پخواني حالت ته ستون کړي.

دا نللیکه شاوخوا ۹،۰۰۰ کیلیومیټره اوږده ده او په ټیکسس کې د خلیج د تېلو پاکولو له کارخانو څخه نیویارک ته پېټرول، ډیزل او د تېلو نور قسمونه لېږدوي.

امریکايي ولسمشر جو بایډن د مې پر ۱۰مه په مستقیمه توګه پر کرېملېن له تور پورې کولو ډډه وکړه خو ویې ویل چې روسیه یې پر نللیکې د انټرنېټي حملې لپاره تر یوه حده پورې مسووله ده.

وسله والو د کابل ولایت په کلکان ولسوالۍ کې د برېښنا ستن الوځولې

د کابل کلکان ولسوالۍ کې الوځول شوې د برېښنا ستن

افغان چارواکي وايي، وسله والو د کابل ولایت په کلکان ولسوالۍ کې له ازبکستانه د درامدېدونکې برېښنا یوه ستن په بم الوځولې ده چې له وجې یې کابل ښار ته د بجلۍ رسد ټکنی شوی.

د افغانستان د برېښنا شرکت د پروان حوزې مشر روح الله ساجد مشال راډیو ته وویل، تېر ماښام شاوخوا اته نیمې بجې وسله والو ستنې ته بارود ایښي ول.

د ده په خبره، د چاودنې له وجې د پلازمېنې په ګډون د اووه ولایتونو برېښنا پرې شوې. د حملې ذمه واري چا نه ده منلې.

روانه اوونۍ هم په کلکان ولسوالۍ کې وسله والو د برېښنا دوه ستنې الوځولې وې چې لا یې هم د رغونې چارې په بشپړه ټوګه پای ته نه دي رسېدلې.

د افغانستان او ایران ولسمشرانو پر افغان سوله او وروستیو پېښو غږېدلي

د افغانستان ولسمشر اشرف غني او یوشمېر نور افغان چارواکي د ایران له ولسمشر حسن روحاني سره د ټیلیفوني خبرو پر مهال

د افغانستان او ایران ولسمشرانو پر افغان سوله او په دې هېواد کې د وروستیو ترهګريزه پېښو په اړه ټیلېفوني خبرې وکړې.

د ارګ په یوه اعلامیه کې چې بېګا خپره شوه راغلي چې د ایران ولسمشر د خپل حکومت او خلکو په استازیتوب د وروستیو ترهګریزو پېښو په اړه خپله غمرازي او خواخوږي وښوده.

د ارګ اعلامیه زیاتوي چې محمد اشرف غني او حسن روحاني په افغانستان کې د سولې پر هڅو، سیمه‌ییزې همکارۍ او د افغانستان او ایران ترمنځ د اړیکو د پراختیا په اړه بحث وکړ.

افغانستان په تېرو څو وروستیو ورځو کې د خونړیو پېښو شاهد و.

تېره شنبه د کابل دشت برچي سیمه کې پر سیدالشهدا ښوونځي موټر بم او پرله‌پسې چاودنو شاوخوا ۸۵ نجونې زده‌کوونکې ووژلې او له ۱۰۰ زیات ټپيان دي.

د کابل د سید الشهدا د ښوونځي د بیارغونې چارې پیل شوي

د کابل د سید الشهدا ښوونځی

د افغانستان د ملي پراختیا شرکت وایي، د افغان ولسمشر محمد اشرف غني د ځانګړي حکم پر بنسټ یې د کابل د سید الشهدا د ښوونځي د بیارغونې چارې پیل کړي.

دغه شرکت پر خپل فیسبوک پاڼه کې لیکلي دي چې د ښوونځي د بیارغونې چارې به ژر بشپړې او د زده کوونکو پر مخ به یو وار بیا پرانیستل شي.

سید الشهدا ښوونځی چې د کابل په دشت برچي سیمه کې موقعیت لري، د روانې شنبې په ورځ پرې موټر بم خونړي حمله وشوه چې له امله یې د ښوونځي له سلو ډېرو زده کوونکو ته مرګ ژوبله واوښته.

د ملي پراختیا شرکت وایي چې اوس مهال د دغه ښوونځي په اتو بلاکونو کار روان دی او ډېر ژر به بشپړ شي.

افغان چارواکي وايي، وسله والو د میدان وردګ نرخ ولسوالۍ نیولې

د هېواد مرکزي او جنوبي ولايتونو ته يو شمېر مهمې لويې لارې له نرخ ولسوالۍ تيرېږي.

افغان چارواکي وايي چې طالبانو له کابله په ۴۰ کلومېټرۍ کې پراته له ستراتژيکي پلوه مهمه ولسوالۍ په داسې حال کې نيولې چې تېره اوونۍ طالبان د اختر لپاره د دريو ورځو په اوربند سلا شول.

د افغانستان کورنيو چارو وزارت وياند طارق ارین نن (د مې پر ۱۲ مه) ویلي دي چې امنيتي او دفاعي ځواکونو د نرخ ولسوالۍ له پوليسو هېډاکواټرو تاکتکي شاتګ وکړ.

دا په داسې حال کې ده چې له جنګ ځپلي افغانستانه امريکايي او نړيوال ځواکونه روان دي.

د دفاع وزارت يو وياند فواد امان ویلي دي:"د کمانډو ځواکونو بيا ځای پر ځای کېدل پر لاره دي چې دارنګ ولسوالۍ بېرته خپلو لاسو ته راوړي."

د هېواد مرکزي او جنوبي ولايتونو ته يو شمېر مهمې لويې لارې له نرخ ولسوالۍ تيرېږي.

میدان وردګ چې پکې ياده ولسوالۍ ده، د دې او د ګاوندي ولايت لوګر غټې پټۍ يې د کلونو پورې د طالبانو په کنټرول کې وې يا يې د دې لپاره جګړه کوله او وسله والو به کابل ته د رسېدو او بريدونو لپاره دا لارې کارولې.

نرخ ولسوالۍ پر داسې وخت نيول شوی چې طالبانو او افغان حکومت د وړوکي اختر لپاره درې ورځنی اوربند اعلان کړی.

اروپایي ټولنه د ازاد تګ راتګ لپاره د کورونا وایرس تصدیق پاڼه جوړوي

ارشیف، د کورونا یو شمېر ناروغان

اروپایي ټولنه تمه لري چې تر یوې میاشتې به د کورونا داسې تصدیق پاڼه راوباسي چې لرونکي یې د اي یو ترمنځ ازاد تګ راتګ وکړای شي.

دا تصدیق پاڼې هغو کسانو ته ورکول کېږي چې د کورونا واکسین یې بشپړ کړی وی، مخکې له دې وبا رغېدلی وي او یا یې هم د کورونا معاینه منفي وي.

دې تصدیق پاڼې ته د هغو هېوادونو له خوا هڅې ډېرې شوي چې پر سېلګرۍ صنعت ولاړ دي.

دا کار به وکړای شي چې د اوړي رخصتیو پرمهال د سېلانیانو تګ را تګ اسانه او هغه ملي بندیزونه لېرې کړي چې سفرونه یې سخت کړي دي.

د اروپایي کمېسیون مرستیال ماروس سفچوویچ په سې شنبه د دغې ټولنې د بهرنیو چارو وزیرانو له غونډې وروسته وویل، دا کار یې خپلو وګړو ته یو لومړیتوب دی او د اوړي له رخصتیو مخکې به یې پيل کړي.

د اسراییلو او فلسطينيانو ترمنځ نښتو کې سلګونه کسانو ته مرکژوبله اړولې

اسرایيلو په غزه کې د حماس ځايونه په نښه کړل او دغه وسله والې ډلې پر اسرایيل راکټونه وويشتل.

د فلسطینیانو او اسرايلو ترمنځ نښتې بېګا زیاتې شوې دي.

اسرایيلو په غزه کې د حماس ځايونه په نښه کړل او دغه وسله والې ډلې پر اسرایيلو راکټونه وويشتل.

په غزه کې روغتيايي چارواکو د مې پر ۱۲مه وويل چې دوه ورځې مخکې د شخړې تر زیاتېدو وروسته د ۱۰ ماشومانو په ګډون لږ تر لږه ۳۰ فلسطينيان وژل شوي او ۲۰۰ ټپیان شوي دي.

بلخوا د اسرایيلو پوځ ويلي چې په غزه کې يې د ۱۴۰ هدفونو په نښه کولو سره یې ۲۰ وسله وال وژلي.

په همدې حال کې د غزې وسله والو ډلو حماس او اسلامي جهاد پر اسرايیلو د سلګونو راکټونو په توغولو سره اووه اسرايليان وژلي او ګڼ نور یې ټپیان کړي دي.

وسله والې ډلې، حماس ويلي چې دوی د اسرایيلو له جارحيته د الاقصی جومات ساتنه کوي چې پکې له تېرو څو ورځو راهیسې د اسرایيلي پوليسو او فلسطينيانو ترمنځ په نښتو کې په سلګونو کسان ټپیان شوي.

د پکتیا پخوانی امنیه قوماندان اخترمحمد شاهین ووژل شو

د پکتیا پخوانی امنیه قوماندان اختر محمد شاهین

د پکتیا پخوانی امنیه قوماندان اختر محمد شاهین له درېیو نورو کسانو سره د خوست تڼیو ولسوالۍ اړوند سیمه کې د وسله والو په یوه کمين کې ووژل شو.

د خوست امنیه قوماندان پاسوال محمد داود امین مشال راډیو ته وویل، چې پېښه د تڼیو ولسوالۍ په یوه لیرې پرته سیمه د للمي کوټکي په ژۍ کلي کې شوې ده.

نوموړي وویل، اخترمحمد شاهین سره ناست کسان په کرولا ډوله موټر کې وو، چې د وسله والو له کمین سره مخامخ شوي او په وژل شویو کسانو کې د قومندان شاهین تره او یو ۹ کلن زوی شامل دي.

د محمد داود امین په وینا، چې د وژل شویو جسدونه عدلي طب ته لیږدول شوي او پېښه تر څیړنې لاندې ده.

اخترمحمد شاهین څو کاله په خوست کې د ولایتي ځواکونو قومندان وو، چې بیا وروسته د پکتیا امنیه قوماندان شو.

نوموړي په پکتیا کې د څو میاشتنۍ قوماندانۍ وروسته په خپله له دندې استعفاء ورکړې وه.

لنډمهاله اوربند د ستونزې حل نه دی: افغان ملي مصالحې عالي شورا

دا تر هغې وروسته ده چې په افغانستان کې طالبانو اعلان کړی چې د اختر په درېیو ورځو کې خپل بریدونه ودروي.

د افغانستان د ملي مصالحې عالي شورا وایي، لنډ مهاله اوربند د دغه هېواد ستونزو هواري بنیادي او دایمي حل لاره نه ‌ده.

دغه شورا د مې پر ۱۰مه په یوه خبرپاڼه کې ویلي، له اوسني ناورین څخه د وتلو لار د سولې خبرې، دایمي اوربند او د تل لپاره د جګړې درول دي.

دا تر هغې وروسته ده چې په افغانستان کې طالبانو اعلان کړی چې د اختر په درېیو ورځو کې خپل بریدونه دروي.

د دغه ډلې له ‌خوا د تېر یکشنبې په ورځ ناوخته د اختر درېیو ورځو د اوربند په عنوان یوه اعلامیه خپره شوې وه.

په اعلامیه کې د طالبانو مشرتابه په خپلو جنګیالیو غږ کړی وو چې د وړوکي اختر په شپو ورځو کې افغان ولس ته د امن او ډاډ فضا برابره کړي او د اختر له لومړۍ تر درېیمې دې پر افغان ځواکونو هر ډول عملیات ودروي.

افغان حکومت هم په غبرګون کې له خپله اړخه د اختر په ورځو کې اوربند اعلان کړی دی.

امريکا د طالبانو له خوا د درې ورځو لپاره د اوربند د اعلانولو هرکلی کړی او له دې ډلې یې وغوښتي چې ‌‌ډزبندي وغځوي.

اوربند ته د امريکا غبرګون

د امریکا د بهرنیو چارو د وزارت ویاند نېډ پرایس د مې پر ۱۰مه په واشنګټن کې وویل، له طالبانو او له افغان مشرانو غواړي چې په جدي توګه د سولې په پروسه کې ښکېل شي، څو دا مسئله یقیني شي چې د افغانستان خلک په راتلونکي کې د ترهګرۍ له شره خلاص او له بې مفهومه تاوتریخوالي پرته ژوند وکړي.

افغانستان کې ماتم

دا په داسې حال کې ده چې افغان ولسمشر په کابل او لوګر کې د خونړیو بریدونو په غبرګون نن د مې پر ۱۱مه ملي ویر اعلان کړی دی.

په دغو بریدونو کې ګڼ شمېر کسانو ته مرګ ژوبله اوښتې. د مې پر ۱۱مه (نن) په دولتي ادارو او بهر کې د افغانستان په ډیپلوماتیکو نمایندګیو کې د افغانستان بیړغ نیم ځوړند وي.

ننګرهار کې ځانمرګی بریدګر موخې ته له رسېدو مخکې نیول شوی

جلال اباد ښار

د ننکرهار چارواکي وایي چې د جلال اباد ښار اتمې ناحیې اړوند د ملي امنیت ځواکونو یو تن ځانمرګی بریدګر موخې ته تر رسېدو مخکې نیولی دی.

د ننګرهار د والي ویاند عطاالله خوږیاڼي د مې په لسمه نېټه مشال راډیو ته په خبرو کې ادعا کړې، چې نیول شوی کس عزیز الرحمن نومېږي او د پاکستان د کراچۍ ښار اوسېدونکی دی او اعتراف یې کړی چې هلته د وسله والو طالبانو په لیکو کې جذب شوی او په جلال اباد ښار کې ځانمرګي برید ته چمتو شوی و.

خوږیاڼی زیاتوي چې نیول شوي کس په خپل اعتراف کې ویلي چې پلان یې لرلو چې په ملي امنیتي ځواکونو یا هم د ګڼې ګوڼې ځای کې ځانمرګی برید وکړي.

عراق کې مظاهره کوونکو ایرانۍ کونسلګرۍ ته د اور اچولو هڅه کړې

مظاهره کوونکو د ایران کونسلګرۍ احاطې ته اور اچولی - د ۲۰۲۱ز د مې نهمې انځور.

په عراق کې مظاهرچيانو د مې پر نهمه په کربلا کې د ايران کونسلګرۍ ته د اور اچولو هڅه کړې.

دوی دا هڅه د يوه نومیالي فعال د وژنې په غبرګون کې کړې ده.

ايهاب وزني د هغو حکومت ضد مظاهرو له منتظمانو وو چې په ۲۰۱۹ز کال کې یې عراق لړزولی وو. هغه د اداري فساد، له ايران سره د تړاو لرونکو ملېشو د نفوذ او په عراق کې د تهران د اثر ونفوذ ښکاره مخالف وو.

د مې پر اتمه شپې ناوخته پر موټر سايکل سپرو وسله والو نوموړی له خپل کور دباندې وواژه.

د عراق د بشري حقونو کمېشن غړی علي البياتي وايي، د ۲۰۱۹ز کال اکتوبر مياشتې راهیسې تر ۳۰ زيات فعالان په هدفي بریدونو کې په نښه شوي دي.

د وزني د وژنې ضد پر یکشنبه (اتوار) ټوله ورځ په کربلا کې مظاهرې روانې وې، خلکو سړکونه او پلونه تړلي ول او ټايرونو ته يې اور اچولی وو.

په سلګونو ويرجنو په کربلا کې د وزني جسد اخیستي وو او شعارونه يې ورکول چې "ايرانه ووځه او خلک د رژيم ړنګېدل غواړي."

ایران پر دې موضوع لا څه نه دي ویلي.

د افغانستان پروان کې دوو چاودنو پینځه تنه وژلي،۲۰ ژوبل

ارشیف، پروان کې د یوې چاودنې په سیمه کې راټول شوي پولیس

د افغانستان په پروان کې ځايي چارواکي وايي، په دوو چاودنو کې لږ تر لږه پینځه تنه وژل شوي او شاوخوا ۲۰ ټپیان دي.

لومړنۍ چاودنه د مې پر ۱۰مه تر غرمې مخکې د شیخ علي ولسوالۍ د اوسېدونکو د سپرلۍ پر کوسټر موټر شوې چې درې تنه پکې وژل شوي او یوه مور او زوی د چاودنې له وجې سیند ته پرېوتي دي.

د مشال راډیو خبریال د چارواکو په حواله وایي، سیند څپانده دی او تر اوسه د مور او ماشوم مړي هم نه‌ دي پيدا شوي.

پر کوسټر دې چاودنې ۱۱ تنه ټپیان کړي هم دي. د سپرلۍ دا موټر له چارېکاره غوربند درې ته پر لاره وو چې د سیند یوه پله ته په رسېدو پر ښخ شوي ماین وخوت.

د پروان د امنیه قوماندانۍ د جنایي جرمونو په وړاندې د مبارزې مشر محمد صادق هاشمي وایي، کله چې خلک د لومړنۍ چاودنې ځای ته نېږدې شول، بله چاودنه شوې چې نهه تنه‌ یې ټپي کړي دي.

تر اوسه د دغو ماین چاودنو انګېزه نه‌ده معلومه او ذمه واري هم چا نه ده منلې.

دا په داسې حال کې ده چې په زابل کې تېره شپه (د مې پر نهمه) د سپرلۍ پر ۴۰۴ موټر دوه غبرګې چاودنې وشوې چې لږ تر لږه ۱۱ تنه‌ یې ووژل او ۲۵ نور یې ټپیان کړل.

بل پلو د افغانستان د غور ولایت چارواکي وایي، یوه پولیس خپل څلور همکاران ویشتلي دي.

دا پېښه د مې پر نهمه شپې مهال د فېروزکوه ښار شمال ته په تیلک کاسي امنیتي پوسته کې شوې.

د غور د والي ویاند زلمي کریمي مشال راډیو ته ویلي چې پولیس سرتېري د پهرې پر مهال پر خپلو ملګرو باندې ډزې کړي او تښتېدلی دی.

کریمي برید کوونکی د طالبانو نفوذي کس یادوي، خو طالبانو په دې اړه څه نه ‌دي ویلي.

په غور کې پولیس سرتېري خپل څلور ملګري وژلي

چارواکي وايي، پولیس سرتېري په فېروزکوه کې خپل ملګري ویشتلي

د افغانستان د غور ولایت چارواکي وایي، یوه پولیس خپل څلور همکاران ویشتلي دي.

دا پېښه د مې پر نهمه شپې مهال د فېروزکوه ښار شمال ته په تیلک کاسي امنیتي پوسته کې شوې.

د غور د والي ویاند زلمي کریمي مشال راډیو ته ویلي چې پولیس سرتېري د پهرې پر مهال پر خپلو ملګرو باندې ډزې کړي او تښتېدلی دی.

کریمي برید کوونکی د طالبانو نفوذي کس یادوي، خو طالبانو په دې اړه څه نه ‌دي ویلي.

د اسرايلي پولیسو او فلسطینيانو ترمنځ نښتې

یو فلسطینی د اسرايلي پولیسو په پېره کې لمونځ کوي

د فلسطینیانو او اسراییلي پولیس ترمنځ د مې پر اتمه تازه نښتې شوي دي چې د فلسطینیو ډاکترانو په وینا، پکې ۶۴ کسان زخمیان شوي دي.

دا ترینګلتیا د مسلمانانو د درېیم تر ټولو سپیڅلي ځای او پر هغه ځمکه د فلسطینیانو د کورونو خالي کولو پر سر پیدا شوې چې یهودان یې د ملکیت دعوه کوي.

پولیسو د زرګونه فلسطینیانو پر ضد د ربړ مرمۍ، اوښکې بهوونکی ګیس او ګنګسوونکي لاسي بمونه کارولي دي.

د مې په ۷مه هم په شوو نښتو کې لږ تر لږه ۲۰۵ فلسطینیان او ۱۸ اسراییلي سرتېري زخمیان شول.

دا نښنې پس له هغې پیل شوې چې شاوخوا ۹۰۰۰۰ فلسطینیان د قدر شپې لمونځ لپاره الاقصا جومات ته ورغونډ شوي وو.

بلخوا ټاکل شوې چې د می پر نهمه ماښام یهودان د بیت المقدس د ختیځې برخې له ځان سره د تړلو کلیزې په مناسبت جشن پیلوي.

د کورونا وایرس مخنيوي لپاره ټولې تعلیمي ادارې وتړل شوې

د پېښور يو خالي سکول

د پاکستان چارواکو د مې تر ۲۳مې پورې د ټولو تعلیمي ادارو د تړلو اعلان کړی.

دا پرېکړه د مې په اتمه په اسلام اباد کې د کورونا وایرس د څار مرکزي ادارې یا نېشنل کمانډ اینډ اپرېشن سېنټر په غونډه کې شوې ده. تر دې مخکې تعليمي ادارې د مې تر ۱۷مې پورې تړلې وي.

یادې ادارې پر خپله ټوېټرپاڼه لیکلي چې د کورونا وایرس وبا ته په کتو یې دا پرېکړه کړې خو دې موضوع ته به د مې پر ۱۸مه په راتلونکې غونډه کې بیا کتنه کېږي.

په پاکستان کې د کورونا وبا له وجې په تېرو ۲۴ ساعتونو کې نور ۱۱۸ کسان مړه شوي دي.

په دې اړه د معلوماتو ورکولو حکومتي ویبپاڼې د می پر نهمه لیکلي چې په تېرو ۲۴ ساعتونو کې د کورونا وایرس نور ۳۷۸۵ کیسونه ثبت شوي دي. په تېرو شواروز کې د دې ناروغۍ څخه ۴۵۶۹ کسان بیرته ښه شوي هم دي.

روس په تاجکستان کې خپله پوځي اډه قوي کوي

د تاجکستان او روس ولسمشران

په داسې حال کې چې په افغانستان کې امنيتي حالات په خرابېدو دي د روس ولسمشر ولاديمير پوتين وايي د سيمه ييز امنيت ټينګښت لپاره په تاجکستان کې د خپلې پوځي اډې په پياوړې کولو کار کوي.

نوموړي د مې په اتمه له خپل تاجک سيال امام علي رحمان سره د ملاقات پرمهال دا هم وويل چې روس به د تاجکستان د پوځ په مضبوطولو کې هم مرسته وکړي.

تاجک ولسمشر د سپتمبر تر ۱۱مې له ګاونډې هېواد افغانستانه د ټولو امريکايي ځواکونو د ایستل کېدو تر اعلان وروسته پر زياتېدونکې تاوتريخوالي اندېښنه وښوده. د دې په ځواب کې پوتين رحمان ته وويل چې له حالاتو خبر دی او هره ممکنه مرسته به ورسره وکړي.

په تاجکستان کې د روس پوځ ۲۱م موټور رايفل ډويژن ۷،۰۰۰ سرتېري په دريوو ځايونو کې پراته دي.

تاجکستان چې د پخواني شوروي اتحاد يو له غريبو هېوادونه وو، له روس سره نېزدې اقتصادي اړيکې لري او په سلګونه زره تاجکان په روس کې کار کوي.

مومندو کې د ټینکۍ پرېوتو پېښه کې اووه ماشومان وژل شوي

په مومند ضلع کې د اوبو یو سیمټي ټېنکۍ ماتېدو اووه ماشومان وژلي او یو یې ټپي کړی دی.


د پولیسو مرستندویه څانګې ۱۱۲۲ مشال راډیو ته ویلي چې دا پېښه نن غرمه د مومند قبایلي ضلعې د امبار تحصیل په ګمبتي نومي سیمه کې شوې ده.

د یادې ادارې د چارواکو په وینا د کلي ماشومانو د اوبو د ټینکۍ په خوا کې لوبې کولې چې هغه ماته شوه او لاندې پر ماشومانو راپرېوته.

په وژل شوو کې څلور نجونه او درې هلکان دي چې عمرونه یې شاوخوا اته کاله وو. په وژلو شوو نجونو کې یې درې خویندې، د سیمې د یو اوسیدونکي حکیم خان لوڼې دي. په هلکانو کې هم دوه وروڼه دي چې د قومندان په نوم د یو کس بچي دي.

له نریندرا مودي د ټولبند سختولو غوښتنې کېږي

په هند کې له تېرو ۱۰ ورځو راهیسې هره ورځ تر درو زره زیات کسان له دې ناروغۍ مري.

په داسې حال کې چې په هند کې د کورونا وبا له وجې د مړینې کچه په بې سارې ډول لوړه شوې، د کورونا د مخنیوي لپاره وزیراعظم نریندرا مودي باندې فشار مخ په زیاتېدو دی او ترې غوښتنه کېږي چې ټولبند دې سخت کړي.

د صحت ډېر پوهان، د اپوزېشن مشران او د سپریم کورټ ججان غوښتنه کوي چې په ملک کې دې سخت ټولبند ولګول شي.

دا په داسې حال کې ده چې د هند حکومت په وینا، په دې ملک کې په تېرو اوو ورځو کې تر ۳۰ لکه زیات کسان په کورونا وایرس ناروغۍ اخته شوي دي.

په دې ملک کې له تېرو ۱۰ ورځو راهېسې هره ورځ تر درو زره زیات کسان له دې ناروغۍ مري.

اوس د نړۍ د هر هیواد پرتله په هند کې زیات کسان په کورونا اخته کېږي او مړه کېږي. په هغه هیواد کې روغتونونه د کټونو، درملو، اکسیجن او نورو طبي سهولتونو د کمبوت سره مخ دي. هند که څه هم پخپله د کورونا د مخنیوي لپاره واکسین جوړ کړي خو اوس هلته د واکسینو کمی هم لیدل کېږي.

که طالبان سوله نه کوي، موږ جمهوریت سره درېږو: خلیلزاد

خلیلزاد وايي، په افغانستان کې د سولې ټینګښت لپاره او د زور له لارې د واک نیولو د هڅو پرضد په نړۍ کې بېسارې همغږي رامنځ ته شوې.

د افغانستان د سولې لپاره د امریکا ځانګړي استازي زلمي خلیلزاد خبرداری ورکړی چې که طالبان د سولې لاره غوره نه کړي نو امریکا به د جمهوریت په څنګ کې ودرېږي.

زلمي خلیلزاد دا خبره سیمې ته د خپل سفر په پای کې په برلین کې د څو لویدیځو هېوادونو له استازو سره د مې پر اوومه په غونډه کې له ګډونه وروسته پر ټویټر لیکلې ده.


نوموړي لیکلي چې که طالبان د سولې او روغې لاره خپله نه کړي نو امریکا به د هغو افغانانو ترڅنګ ودرېږي چې غواړي جمهوریت پرځای پاتې وي.

خلیلزاد زیاتوي چې په افغانستان کې د سولې د ټینګښت لپاره او د زور له لارې د واک نیولو د هڅو پرضد په نړۍ کې بېسارې همغږي رامنځ ته شوې ده.

خلیلزاد د ټولو اړخونو پر سیاستوالو غږ کړی چې له دې فرصته ګټه پورته کړي.

پاکستان کې کورونا وايرس۱۲۰ نور کسان وژلي

پاکستاني چارواکي وايي چې په ملک کې روغتونونه د اکسیجن او نورو اسانتیاو له کمي سره مخامخ شوي دي.

په پاکستان کې په تېرو ۲۴ ساعتونو کې د کووېډ-۱۹ ناروغۍ له وجې ۱۲۰ نور کسان مړه شوي.

له دې سره له کورونا وايرسه د مړو شویو ۱۸،۷۹۷ ته ورسېد.

د کورونا وايرس په اړه د معلوماتو خپروونکې حکومتي ويبپاڼې ترمخه د مې تر اتمې، د کورونا وايرس مثبتو کيسونو شمېر له اته نيمو لکو زيات شوی.

په تېرو ۲۴ ساعتونو کې له ۴۰۰۰ زيات کسان په کورونا وايرس اخته شوي دي. خو له کووېډ-۱۹ ناورغۍ اووه لکه ۴۷ زرو زيات کسان بېرته رغېدلي هم دي.

په پاکستان کې د کورونا وايرس د فعالو کېسونه شمېره له ۸۳ زرو زيات ده.

د ويبپاڼې ترمخه د مې پر شپږمه تر يو لک ۷۰ زرو زياتو کسانو ته د کورونا وايرس واکسين هم ورکړل شوي.

ايران له نړیوال قدرتونو سره د اټومي خبرو اترو څلورم پړاو ترسره کړ

د دغو خبرو اترو هدف دا دی چې ایران د ۲۰۱۵ کال جوهري تړون ته بیا راستون کړل شي.

ايران د مې پر اوومه د نړۍ له سترو قدرتونو سره د لوړي کچې خبرو اترو څلورم پړاو ترسره کړ چې هدف يې د ۲۰۱۵ز کال اټومي تړون ته امريکا بيرته راستنول دي.

دغه خبرې اترې د اپرېل پر لومړيو کې په ويانا کې پيل شوې وي.

د خبرو تمرکز واشنګټن لپاره داسې تګلاره جوړول دي چې پر تهران لګول شوي بنديزونه لرې کړي او د تړون له مخې تهران د اټومي پروګرام په اړه محدويتونه بحال کړي.

د اټومي موافقې ترمخه ايران ژمنه کړې وه چې د نړيوالو بنديزونو نرمولو په بدل کې به اټومي فعالايتونه ودروي.

خو د امريکا پخواني ولسمشر ډونلډ ټرمپ د ۲۰۱۸ز کال په مې مياشت کې امريکا له دې تړونه ووېسته او ویې ویل چې خبرو ته اړتيا ده او له سره بيا پرې خبرې وشي. د دې ترڅنګ پر ايران يې بنديزونه لګول هم پيل کړل.

ايران د دې په ځواب کې د يورانیموغني کولو سره له دغه تړونه سرغړونه پیل کړه.

د پاکستان وزیراعظم عمران خان د سعودي په سفر دی

نوموړي ته د دې سفر بلنه سعودي وليعهد محمد بن سلمان ورکړې ده.

د پاکستان وزيراعظم عمران خان د مې پر اوومه (نن) د سعودي عرب په درې ورځني سفر رياض ته روانيږي.

نوموړي ته د دې سفر بلنه سعودي وليعهد محمد بن سلمان ورکړې ده.

د پاکستان سرکاري راډيو خبر ورکوي چې عمران خان به له سعودي مشرانو سره پر اقتصاد، تجارت، پانګونې، توانايي او د پاکستانيو کارګرانو لپاره د روزګار پر مواقعو خبرې کوي.

پر دې سربېره به دواړې خواوې پر سيمه ييزو او نړيوالو چارو هم بحث کوي.

د پاکستان د پوځ مشر جنرل قمر جاوېد باجوه هم د مې له پينځمې په سعودي کې دی.

د پاکستاني پوځ د عامه اړيکو دفتر ويلي چې د جنرل باجوه او د سعودي ځواکونو د مشر جنرل فياض الرووېلي تر منځ ليدنه کې پر دوه اړخيزه دفاعي چارو او سيمه ييز امنيت سربېره د افغان سولې پروسې په اړه هم خبرې شوې دي.

پاکستان کې د بورډ امتحانونه له ۱۵م جون وروسته پیلېږي

شفقت محمود دا پرېکړه يې د ټولو صوبو د تعليم وزيرانو په غونډه کې کړې ده.

د پاکستان د تعليم وزير ويلي چې په ټول هېواد کې به د بورډ امتحانونه له ۱۵م جون وروسته پيلېږي.

شفقت محمود د مې پر شپږمه پر خپله ټويټر پاڼه ليکلي چې دا پرېکړه يې د ټولو صوبو د تعليم وزيرانو په غونډه کې کړې ده.

نوموړي زياته کړې چې دوی له نهم جماعت څخه بيا تر ۱۲م جماعت پورې د زده کوونکو ازموينو ته لومړيتوب ورکوي چې دا ډول هغوی په پوهنتونونو کې پر وخت داخلې واخلي.

د پاکستان تعليم وزارت له دې وړاندې د اپرېل پر ۲۷مه په دې هېواد کې د کورونا وايرس په پېښو کې زياتوالي ته په کتو د کېمرج تعليمي نظام په ګډون د ټولو امتحانونو ځنډولو پرېکړه کړې وه.

نور وښیئ

ځانګړې پاڼې

له موږ سره اړیکي

XS
SM
MD
LG