د شمالي کوریا مشر کیم جونګ د جوهري وسلو او بالسټک توغندو د ازموینو د ودرولو اعلان کړی دی.
د جنوبي کوریا یونهاف خبري اژانس د راپور تر مخه د شمالي کوریا سرکاري خبري اژانس ویلي چې شمالي کوریا به د جوهري ازموینو ودرولو ته د ژمن پاتې کیدو لپاره د جوهري ازموینو یو مرکز هم تړي.
د امریکا ولسمشر ډونلډ ټرمپ د پیانګ یانګ اعلان یو لوی پرمختګ بللې دی.
نوموړي د جمعې په ورځ په خپله ټویټر پاڼه لیکلي چې دا د شمالي کوریا او نړۍ لپاره یو ډېر ښه خبر دی.
خو جاپان ویلي، د شمالي کوریا له اعلانه مطمین نه دی او تر هغه به پرې فشار جاري ساتي تر کومه چې يې د جوهري وسلو او توغندیو پروګرام تړلي نه وي.
دا وخت په شمالي کوریا د امریکا ، اروپايي ټولنې او د ملګرو ملتونو د امنیتي کونسل لخوا اقتصادي بندیزونه عملي شوي دي.
