د لاسرسي ځای

تازه خبر

خبرونه

په سیند کې د ګاډو ټکر ۲۰ تنه وژلي

چارواکي وایي، د پاکستان په جنوب کې د یوه میني بس او په سکرو [کویلې] بار لارۍ مخامخ ټکر خوړلی چې لږ تر لږه ۲۰ تنه پکې وژل شوي او یو شمېر نور ټپیان شوي دي.

پولیسو وویل، دا پېښه نن دوشنبه د سند صوبې د خیرپور سیمې په یوه لار کې شوې ده.

د رب نواز په نوم د پولیسو یوه افسر وویل، د مړیو شمېر ښایي تر دې زیات شي، ځکه د یو شمېر ټپیانو وضعیت خطرناک دی.

نواز وویل، لومړنۍ څېړنې ښیي چې دغه پېښه د سهارني ګړځ یا لړو له کبله شوې چې ښايي د ډریورانو لید یې خراب کړی وي.

په پاکستان کې د لارو او موټرو د خراب وضعیت او د خونديتوب د نورمونو او د ډرېورانو له‌خوا ټرافیکي اصولو ته د نه‌ پاملرنې له امله، اکثره وختونه ټرافیکي پېښې کېږي چې له امله‌ یې په کال کې له ۵ زرو زیات کسان خپل ژوند له لاسه ورکوي.

د نننۍ ورځې ټول خبرونه وګورئ

نومیالی سندرغاړی عبدالله مقری ومړ

چارواکي وايي، مقری د کورونا وایرس په ناروغۍ اخته شوی وو - انځور له ارشیفه

د افغانستان د اطلاعاتو او فرهنګ وزارت د پېژندل شوي سندرغاړي عبدالله مقري مړینه یوه "لویه ضایعه"بللې ده.

عبدالله مقري چې په کووېډ-۱۹ ناروغۍ تر اخته کېدو وروسته د کوما په حالت کې وو، د جون پر ۲۰مه د کابل په یوه روغتون کې ومړ.

د اطلاعاتو او فرهنګ وزارت ویاند صابر مومند مشال راډیو ته وویل، "عبدالله مقري څو لسیزې د افغانستان د فرهنګ او هنر د ودې لپاره حماسي سندرې وویلې او د ځوانانو په ویښولو کې یې د هنر په ژبه رغنده رول لوبولی دی. د ده مړینه د هنر او موسیقۍ په برخه کې یوه لویه ضایعه ده."

مقري سلګونه سندرې او ملي ترانې ویلي او هنر یې ډېر مینه وال لري.

په وروستیو کې د کورونا وایرس وبا له کبله په افغانستان کې د مړینو شمېر په بې ساري ډول زیات شوی دی.

د دې ناروغۍ له وجې په تېره یوه اوونۍ کې یو شمېر نومیالي کسان مړه شوي دي.

د جون پر ۱۴مه، د افغانستان د حزب اسلامي د شوراګانو د اتحاد غړی قاضي محمد امین وقاد ومړ.

پر هم هغه ورځ د ولسمشر سلاکار او لیکوال محمد نبي مصداق هم مړ شو. مصداق کلونه په رسنیو کې کار کړی وو.

تر دې مخکې د جون پر ۱۲مه د اطلاعاتو او کلتور وزارت پخوانی مرستیال او لرغونپوه پروفیسر رسول باوري هم د کووېډ-۱۹ ناروغۍ له وجې مړ شو.

د ايران او نړۍ شپږو هېوادونو ترمنځ پر شوي ايټمي تړون خبرې بیا پیلېږي

د سږکال د مې پر لومړۍ نېټه د ايران او نړۍ شپږو هېوادونو ترمنځ په ويانا کې خبرې شوې وې.عکس-ارشېف

مرکچیان د جون پر ۲۰مه نېټه د ایران او نړۍ د شپږو هېوادونو ترمنځ د ۲۰۱۵ز کال د تړون په اړه په ویانا کې خبرې بیا پیلوي.

په داسې وخت کې چې په مهمو مسلو د اختلافاتو راپورونه دي، مرکچیان د تړون د بیا بحالۍ لپاره یو وار بیا د خبرو يو بل پړاو پیلوي. دا خبرې له اپریل راهیسې روانې دي.

د فرانس بهرنیو چارو وزارت د جون پر ۱۶مه ویلي چې په مهو مسلو اختلافات لا هم پر ځای پاته دي. امریکا په ۲۰۱۸ز کال کې له تړونه وتلې وه خو ایران، روسیه، چین، فرانس، برتانیا، جرمني او اروپايي ټولنه اوس هم د تړون برخه دي.

د تړون له مخې ایران په دې سلا شوی وو چې د اقتصادي بندیزونو د لیرې کېدو په بدل کې به خپل ایټمي پروګرام محدودوي. د امریکا ولسمشر جو بایډن داسې اشارې ورکړې چې که واشنګټن د تهران لخوا د تړون د ژمنو احترام په اړه باوري شو نو امریکا په تړون کې په بیا شاملېدو کې دلچسپي لري.

سيند صوبه کې د کووېډ-۱۹ واکسيني مرکزونه تړل شوي دي

په پنجاب او سيند صوبو کې د کووېډ-۱۹ واکسين کم شوي دي - د ارشیف انځور.

د سيند صوبې چارواکي وايي چې د پاکستان تر ټولو لوی ښار کراچۍ کې يې د جون پر ۲۰مه د کووېډ-۱۹ واکسينو د کمي له وجې ټول مرکزونه تړلي دي.

د سيند وزیراعلی مراد علي شاه د جون پر ۱۹مه په يوه خبري غونډه کې د واکسينو د کمي پړه پر وفاقي حکومت واچوله او و یې ويل چې صوبايي حکومت یې په خپله خوښه له نړيوال بازاره د واکسين اخیستو ته پرېنښود.

په پنجاب کې هم د واکسينو د کمي خبر ورکړل شوی دی. خو د پاکستاني وزیراعظم د صحت د چارو سلاکار ډاکټر فېصل سلطان پر ټوېټر ليکلي چې د جون پر ۲۰مه له چين څخه نور واکسین ورسېږي.

پاکستان کې د کورونا وبا زور کمېدل

د صحت وزارت پر خپله ووبپاڼه ليکلي چې د جون تر ۲۰مې پورې ۳،۳ ميليونه وګړي په بشپړ ډول واکسین شوي او ۶،۸ ميليونو ته یې یوه ستن لګول شوې ده.

په پاکستان کې د کورونا وایرس د کنټرول قامي ادارې د جون په ۱۹مه تر يوې غونډې وروسته په بیان کې ويلي چې په هغه ملک کې د وبا زور په کمېدو دی او د پخوا په پرتله ناروغان کم شوي دي.

د کمېدو وجه د خلکو احتياطي تدابير باندې عمل کول ښودل شوي چې پکې له يوه بله فاصله، د ماسک کارول او ځانونو پاک ساتل شامل دي.

ادارې ويلي چې د جون تر ۲۰مې پورې په ټول پاکستان کې ۹۴۷،۲۱۸ (نهه لکه، ۴۷ زره او ۲۱۸) کسان په کورونا وايرس اخته، ۲۱،۹۴۰ (۲۱ زره، ۹۴۰) ورڅخه مړه او ۸۸۹،۰۰۰ (اته لکه، ۸۹ زره) رغېدلي دي.

د هند او نيو زيلينډ کرکټ لوبډلو ترمنځ ټېسټ ميچ روان دی

د نيو زيلينډ لوبډلې يو بالر - عکس ارشېف

د هند او نيو زيلینډ کرکټ ټیمونو ترمنځ د نړيوال ټېسټ چيمپين شپ پایلوبه د جون پر ۲۰مه پر درېيمه ورځ د برتانيا په ساوت اېمپټن کې روانه ده.

هند د لومړي بېټينګ په کولو د لوبې د دویمې ورځې تر پايه ۱۴۶ رنز کړي او درې لوبغاړي یې سوځېدلي ول.

د جون پر ۱۹مه د ټېسټ کرکټ په يوه بله سيالۍ کې د هند او کوربه هېواد انګلېنډ د ښځو ملي ټیمونو ترمنځ لوبه مساوي پای ته ورسېده.

امريکا وايي، ايرانيانو ته د خپل ولسمشر د ټاکلو پوره حق نه دی ورکړل شوی

په واشنګټن کې د امريکا د بهرنيو چارو وزارت ودانۍ. عکس له ارشيفه

د جون پر ۱۹مه د ایران د ولسمشرۍ په ټاکنو کې د سختدريځه کانديد ابراهيم رییسي د بريا تر اعلان وروسته امريکا ويلي چې ايرانيانو ته په خپلواک او شفاف ډول د خپلو مشرانو د ټاکلو حق نه دی ورکړل شوی.

د امريکا د بهرنيو چارو وزارت يوه وياند ويلي، سره له دې به هم له ايران سره د ۲۰۱۵ ز د ايټمي موافقې په اړه مذاکراتو ته دوام ورکړي.

رييسي د ايران په انتخاباتو کې د ۶۲ فیصده رايو په اخیستو ګټونکی اعلان شوی.

نوموړی ۶۰ کلن قاضي او ملا دی چې څو لسیزې پخوا د بېلا بېلو مقدمو پر مهال په انسانيت ضد جرمونو تورن شوی دی.

مستونګ: د وسله والو پر ډزو څلور ښوونکې ژوبلې شوي

د بلوچستان چارواکي وايي، د ناپیژندل شویو وسله والو په برید کې د یو سکول څلور ښوونکې ژوبلې شوې دي.

دا پېښه د جون پر ۱۹مه ماسپښین مهال، له کوټې څخه ۶۰ کلومیټره سوهېل لور ته د مستونګ ضلعې په پړينګ اباد سیمه کې رامنځ ته شوې ده. وسله وال له برید کولو وروسته، په تیښته کې بریالي شوي دي.

د چارواکو په وینا، د سکول په سوزوکي وین هغه مهال ډزې وشوې چې استادانې د سکول له رخصتېدو وروسته، د کور په لور روانې وې.

ژوبل شوې ښوونکې د مستونګ روغتون ته وړل شوې دي او درملنه یې روانه ده.

د مستونګ د نواب غوث بخش ريیساني روغتون ډاکټران وايي چې مرمۍ د استادانو پر پښو لګېدلې دي او حالت یې له خطرې بهر دی.

د مستونګ ضلعې ډېپټي کمېشنر مشال راډیو ته ویلي چې امنیتي ځواکونه د پېښې ځای ته رسېدلي او په دغه اړه یې پلټنې پیل کړې دي.

ژوبلې ښوونکې د کوټې دي خو هره ورځ به یې د مستونګ بېلا بېلو سکولونو ته سفر کاوه.

تر اوسه د برید ذمه واري چا نه ده منلې.

سختدریځه عالم ابراهیم ريیسي د ايران د ولسمشريزو انتخاباتو ګټونکی اعلان شو

د سږنیو انتخاباتو په ارزونه کې د ګڼو کاندیدانو د لرې کولو نه پس اټکل کېده چې ابراهیم ريیسي به د انتخاباتو ګټونکی وي.

د ايران انتخاباتي چارواکو د جون پر ۱۹مه اعلان وکړ چې ابراهيم رييسي د څه باندې ۶۲ سلنه رايو په تر لاسه کولو سره ولسمشريز انتخابات ګټلي دي.

دا په داسې حال کې ده چې د جون پر ۱۸مه، په ایران کې په ولسمشریزو انتخاباتو کې خلکو خپلې رایې واچولې او د جون د ۱۹مې نېټې تر ماسپښینه پورې یې شمېره روانه وه.

انتخاباتي چارواکو او سرکاري میډیا د جون پر۱۹مه وویل چې په ۲۸,۶ میلیونه رایو کې د ۱۷،۶ میلیونه رایې شمېرل شوې دي چې ابراهیم ريیسي پکې ۶۲ فیصده رایې خپلې کړې دي.

د انتخاباتي دفتر مشر جمال عرف ویلي، ريیسي ته په خپل مخالف محسن رضايي باندې د ۱۴ میلیونه رایو برتري حاصله ده.

۶۰ کلن ابراهیم ريیسي پخوانی قاضي دی چې په ۱۹۸۸ز کال کې د هغو مقدمو له مشرانو څخه یو و چې په چټکۍ یې زرګونو سیاسي بندیانو ته د مرګ سزاګانې اورولې وې.

د بشري حقونو د دفاع سازمانونه تور پورې کوي چې ريیسي د بشریت ضد جرمونه کړي دي. امریکا پر هغه بندیزونه هم لګولي دي.

په ایران کې د انتخاباتو حتمي نتیجې ډېرې ورځې اخېستلې شي. له انتخاباتو وړاندې چارواکیو د سلګونو کاندیدانو څخه یوازې اووه کسان غوره کړي وو چې بیا د انتخاباتو په ورځ درې نور کاندیدان هم له مقابلې په شا شول. له دغه کبله له وړاندې ویل کیدل چې انتخابات به ريیسي ګټي.

په ایران کې انتخابات په داسې حال کې ترسره کېږي چې دغه هیواد د نړیوالو بندیزونه له کبله د اقتصادي ستونزو سره مخ دی.

ننګرهار کې ګڼو طالبانو ته مرګ ژوبله اړول شوې: خوږیاڼی

په ننګرهار کې د افغان ځواکونو عملیات. انځور- ارشیف

د ننګرهار چارواکي ادعا کوي چې په تېرو ۲۴ ساعتونو کې د دې ولایت په خوږیاڼو او هسکې مېنې ولسوالیو کې د امنیتي ځواکونو په ځوابي بریدونو کې ۱۵ تنه وسله وال طالبان وژل شوي او نهه نور یې ټپیان شوي دي.

د ننګرهار ولایت مطبوعاتي مسوول عطاالله خوږیاڼي د جون پر ۱۹مه مشال راډیو ته وویل:

"د هسکې مېنې ولسوالۍ په چونګۍ او ګورګورۍ سیمو کې د امنیتي ځواکونو په ځوابي بریدونو کې ۱۰ تنه وسله وال طالبان وژل شوي او شپږ تنه نور یې ټپيان دي."

خوږیاڼي همدا راز دعوه وکړه چې د خوږیاڼو ولسوالۍ په ادوړ سیمه کې د ملي امنیت صفر دوه ځواکونو د عملیاتو پر مهال پينځه وسله وال طالبان وژل شوي چې دوه پکې پاکستاني وګړي دي. په یاد برید کې درې نور وسله وال ژوبل شوي هم دي.

خوږیاڼی زیاتوي چې په تر سره شویو بریدونو او عملیاتو کې امنیتي او ملکي وګړو ته کوم زیان نه دی اوښتی. وسله والو طالبانو د یادو بریدونو په اړه رسنیو ته څه نه دي ویلي.

انتونیو ګوتېرش یو وار بیا د ملګرو ملتونو عمومي سيکرتر وګمارل شو

ګوتېرش به د راتلوونکو پنځو کلونو لپاره د ملګرو ملتونو مشري کوي.

د جون پر ۱۸مه، د ملګرو ملتونو عمومي اسمبلۍ انتونیو ګوتېرش د دوهم ځل لپاره د ملګرو ملتونو سېکرټري جنرل وټاکه.

ګوتېرش به د راروانو پينځو کالونو لپاره د ملګرو ملتونو مشري کوي. تر دې وړاندې د جون پر ۱۵مه د ملګرو ملتونو پر ۱۵ غړو مشتملې امنیتي شورا د دوهم ځل انتخاب لپاره د ګوتېرش ملاتړ کړی وو.

د ملګرو ملتونو د منشور له مخې د امنیتي شورا پر سپارښتنه عمومي اسمبلۍ د دغې ادارې د عمومي منشي يا سېکرټري جنرل انتخاب کوي.

د ۷۲ کلن پرتګالي سفارتکار انتونیو ګوتېرش د دویم وار د واک موده د ۲۰۲۲ز کال د جنورۍ پر لومړۍ نېټه پیلېږي.

اسراییلي الوتکو په دوهم ځل پر غزه بمبار وکړ

اسراییلو دا ګام وروسته له هغې پورته کړی چې فلسطینیو وسله والو، په جنوبي اسراییلو اورلګوونکي بالونونه وغورځول.

اسراییلي جنګي الوتکو په روانه اوونۍ کې په دوهم ځل په غزه بمباري وکړه.

اسراییلو دا ګام تر هغه وروسته پورته کړی چې فلسطینیو وسله والو، د اسراییلو جنوب لور ته اورلګوونکي پوکاڼۍ وراېله کړې.

د جون پر ۱۷مه شپه د اورلګوونکو غبارو او بمبارۍ د اسراییلو او حماس ترمنځ کمزوری اوربند یو وارې بیا د خطر سره مخ کړی دی.

دا اوربند تېره مې میاشت د دواړو خواوو ترمینځ د ۱۱ ورځو تر سختې جګړې پس شوی و.

اسراییلو ویلي، د هغوی غاړې ته چې حماس کومې اورلګوونکې پوکاڼۍ ورپرې اېښې وې هغو فصلونو ته تاوان رسولی او په ځوابي بمبارۍ کې دوی د حماس یو مرکز او د توغندیو د توغولو یوه دستګا ویجاړه کړې ده.

په سملاسي ډول په غزه د اسراییلي جیټ الوتکو په بمبارۍ کې د ځاني تاوان په اړه معلومات نه دي ورکړل شوي.

په ایران کې د نوي ولسمشر ټاکلو لپاره رایه اچول کېږي

ګومان کېږي چې په انتخاباتو کې به د خلکو د رایه ورکونکې فیصدي ډېره تېټه وي.

په ایران کې د جون پر ۱۸مه خلک د نوي ولسمشر د ټاکلو لپاره رایې اچوي. ډېری خلک په دې باور دي چې د نوماندانو د ارزونې ( جانچ پړتال) په ترڅ کې وار له مخې کس ټاکل شوی دی.

په پراخ ډول انګېرل کېږي چې سختدریځه عالم او د قضايي چارو مشر ۶۰ کلن ابراهیم رییسي به د حسن روحاني ځای ونیسي.

روحاني چې د ولسمشرۍ دوه دورې یې پوره کړي په درېیم ځل د ولسمشرۍ په انتخاباتو کې د برخه اخېستو جوګه نه دی.

د ابراهیم رییسي مهم مخالف نوماند عبدالناصر همتي دی چې تر نوماندېدو وړاندې یې د ایران د مرکزي بانک د مشر په توګه کار کړی دی.

ګومان کېږي چې په انتخاباتو کې به د خلکو د رایه ورکونکې فیصدي ډېره تېټه وي ځکه چې خلک د اقتصادي ستونزو، حکومتي بندیزونو او له سیاسي څهرو په دې خپه او ناهیلې دي چې بدلون مخې ته نه شي راوړلی.

سږنۍ ټاکنې پر داسې مهال کېږي چې د امریکا د بندیزونو له وجې د ایران اقتصاد تر اغېز لاندې راغلی، حکومت د ناسم مدیریت ښکار دی او د کورونا وبا له وجې خلک کړېږي.

ولسمشر غني د برتانیا له وزیراعظم سره پر افغان سوله غږېدلی

د افغانستان ولسمشر محمد اشرف غني

د افغانستان ولسمشر محمد اشرف غني او د بریتانیې وزیراعظم بورېس جانسن د جون پر ۱۷مه د ټیلېفوني خبرو له لارې د افغانستان د سولې او ثبات په اړه خبرې کړي دي.

د بریتانیا د بهرنیو چارو وزارت او د افغانستان د ولسمشرۍ ماڼۍ ارګ وايي، په دې خبرو کې دواړو مشرانو د سولې ترڅنګ په یو شمېر نورو مهمو مسایلو هم خبرې کړې دي.

د برتانیا وزیراعظم بوریس جانسن افغان ولسمشر اشرف غني ته ویلي چې هیواد یې په افغانستان کې د سولې لپاره د خبرو له لارې د سیاسي جوړجاړي ملاتړ کوي.

د بریتانیا د بهرنیو چارو وزارت په یوه اعلامیه کې ویلي چې وزیراعظم جانسن د افغانستان د یوې باثباته او ډیموکراتیکې راتلونکې د ملاتړ لپاره د خپل هېواد په ژمنو ټینګار کړی.

بل لور ته د افغانستان ولسمشرۍ ماڼۍ وایي چې محمد اشرف غني په دې ټیلېفوني خبرو کې د سولې په ټینګښت کې د بریتانیا ونډه مهمه بللې ده.

د ارګ په اعلامیه کې دغه ‌راز راغلي چې د بریتانیا وزیراعظم د افغان امنیتي او دفاعي ځواکونو او د سولې پروسې د ملاتړ ډاډ هم ورکړی دی.

د چین درې ستورمزلي خلايي تمځي ته ورسېدل

دا تر اوسه د چین د ستورمزلو وړونکو بېړۍ تر ټولو اوږد ماموریت دی. انځور- ارشیف

د چین خلايي ادارې ویلي دي چې د جون پر ۱۷مه یې په بریا په یوه فضايي بېړۍ کې درې ستورمزلي خلايي تمځي ته لېږدولي دي.

ادارې دا خبره د راکټ تر لېږدولو اووه ساعته وروسته کړې او په بیان کې یې ویلي چې د شېنژو -۱۲ په نوم بېړۍ په بریا تر تیانګانګ تمځي رسېدلې.

دا تر اوسه د چین د ستورمزلو وړونکو بېړۍ تر ټولو اوږد ماموریت دی. درېواړو ستورمزلو د هېواد په شمال لوېدیځ کې د راکټونو د لېږد له مرکزه پرواز وکړ او د تیانګانګ تمځي له یوې برخې سره یوځای شول.

دا ماموریت د چین لپاره د ویاړ خبره بلل کېږي ځکه چې بیجنګ د جولای پر لومړۍ نېټه د واکمن کمیونسټ ګوند د ۱۰۰مې کلیزې تیاری کوي.

ستورمزلو د دې درې میاشتني فضايي ماموریت لپاره د چمتووالي په موخه، تر ۶،۰۰۰ زیاتو ساعتونو روزنه تر لاسه کړې چې پکې په یوه خلايي ماشین کې تر اوبو لاندې تمرین هم شامل وو.

۵۶ کلن ني هایشېنګ د ماموریت او د ستورمزلو د ډلې مشر دی چې په درېیم ځل خلا ته ورغی.

ننګرهار کې قومي مشرانو او دیني عالمانو د اوربند غوښتنه وکړه

دیني عالمان وايي، په کار دې لوموړی اوربند وشي او بیا د سولې خبرو لپاره اجنډا جوړه شي. انځور- ارشیف

د افغانستان په ننګرهار ولایت کې دیني عالمانو په یوه غونډه کې په جګړه کې پر ښکېلو غاړو غږ وکړ چې اوربند وکړي او د سولې ځنډېدلې خبرې پیل کړي .

د جون پر ۱۶مه په دغه غونډه کې چې دیني عالمانو، مشرانو، ځوانانو او مېرمنو پکې ګډون لرلو، غوښته وشوه چې سولې ته لار برابر کړي او د ولس د ژوند تحفظ باوري کړل شي.

په غونډه کې دیني عالمانو په بریدونو کې پر ولسي مرګ ژوبلې اندېښنه و ښودله او ویې ویل چې باید دا کار ودرول شي.

دوی روانه اوونۍ په جلا جلا پېښو کې د وېکسینېټرانو د وژل کېدو غندنه هم وکړه.

د جون پر ۱۵مه په ننګرهار کې په دریو پېښو کې وسله والو پنځه واکسین ورکوونکي ووژل او څلور نور یې ټپیان کړل .

د دغه برید ذمه واري لا چا نه ده منلې. خو افغان حکومت یې د وسله والو طالبانو کار بولي.

نن په خبیر پښتونخوا کې تعلیمي ادارې بیا پرانېستل کېږي

چارواکي وايي، له نهمه تر ۱۲م جماعت پورې زده کوونکو ته یوازې هغه مضمونونه ور ښيي چې پکې به ترې ازموینه اخیستل کېږي.

په خېبرپښتونخوا کې له پینځم څخه تر ۱۴م ټولګي ټولې سرکاري او شخصي تعلیمي ادارې د جون له ۱۷مې څخه د پرانیستو امر شوی دی.

د صوبې د تعلیم محکمې لخوا د جون پر ۱۶مه په خپره شوې اعلامیه کې ویل شوي چې په ګرمو سیمو کې د کورونا وایرس د مخنیوي احتیاطي تدابیرو له مخه سکولونه به د سهار له اووه بجو څخه تر ۱۰ بجو پورې خلاص وي. خو په یخو سیمو کې به سکولونه له معمول سره سم خلاصې وي.

د تعلیم محکمې د تعلیم ټولو ضلعي افسرانو ته امر کړی چې د ګرمي له زیاتېدو سره سم دې اقدامات وکړي او له نهمه تر ۱۲م جماعت پورې زده کوونکو ته یوازې هغه مضمونونه ورښيي چې پکې به ترې ازموینه اخیستل کېږي.

مخکې د ګرمي زیاتېدو له امله په صوبه کې پرایمري او مډل سکولونه د جون پر ۱۰مه بند کړل شوي ول.

بایډن او پوتین د وسلو کنټرول په ګډون پر یو شمېر موضوعاتو خبرې کوي

روسی ولسمشر پوتین د ۲۰۲۱ز کال د جون پر ۱۶مه جینیوا ته ورسېد

امریکايي ولسمشر جو بایډن د جون پر ۱۶مه د سوېټزرلینډ په جینیوا کې له خپل روسي سیال ولادیمیر پوتین سره ګوري.

د دواړو سرمشریزه پر داسې مهال کېږي چې په ۱۹۹۰ز لسیزه کې د سړې جګړې له پای راهیسې د واشنګټن او مسکو تعلقات دومره ټیټې سطحې ته نه دي رسېدلي.

څو میاشتې مخکې بایډن، پوتین "وژونکی" بللی وو.

پوتین د خپل هېواد پر سیاسي نظام غلبې، د الېکسیې نوالني په څېر د مخالفانو ځپلو او د خپلواکه او نادولتي رسنیو غلي کولو هڅو ته دوام ورکړی.

د بایډن یوه ویانده وايي، سپینه ماڼۍ له روسیې سره د خپلو تعلقاتو "د عادي کولو یا لا خرابولو په تکل نه ده." خو د روسیې په اړه د بایډن رویه د امریکا د پخواني ولسمشر ډانلډ ټرمپ پرتله ډېره سخته ده.

بایډن د ۲۰۲۱ز کال په جنورۍ کې د ولسمشرۍ دندې له پیل راهیسې دوه ځلې پر روسیې اقتصادي بندیزونه لګولي دي.

د دواړو مشرانو د غونډې په اجنډا کې د وسلو کنټرول، انټرنېټي جرمونو او جاسوسۍ، د اقلیم یا اب و هوا بدلون او د کورونا وایرس جهاني وبا موضوعات شامل دي.

امریکا او اروپايي ټولنه د روسیې په اړه د لوړ کچ مذاکراتو پر پیلولو سلا شول

بایډن د ۲۰۲۱ز کال د جون پر ۱۵مه په برسلز کې د اروپايي ټولنې له مشرانو سره ولیدل.

امريکا او اروپايي ټولنه په بهتر ډول د تګلارو او اقداماتو همغږي کولو لپاره د "روسیې په اړه د لوړ کچ مذاکراتو پر پیلولو" سلا شوي دي.

دا ژمنه د جون پر ۱۵مه په برسلز (بروکسل) د ولسمشر جو بایډن، د اروپايي کمېشن د مشرې اورسولا فن دېر لېین او د اروپايي شورا د مشر شارل مېشل تر سرمشریزې وروسته اعلان شوې.

تر غونډې وروسته په بیان کې راغلي، "موږ د روسیې په اړه په خپل اصولي برخورد کې يو موټی يو او موږ د روسیې له خوا تکرارېدونکي منفي چلند او زیان رسوونکو اقداماتو ته د پرېکنده غبرګون ښوولو ته چمتو یو."

اعلاميه زياتوي روسيه باید د تش په نوم غیر دوستانه هېوادونو د نوملړ" په ګډون له نورو هېوادونو سره "د اړيکو د لا نور خرابېدو مخنیوي" په موخه له خپل چلنده لاس واخلي.

روسي حکومت په مې میاشت کې د "غیر دوستانه" هېوادونو په نوم يو لسټ منظور کړ چې پکې امريکا او چېک جمهوریت هم شامل دي.

په وروستیو کې، چېک جمهوریت او روسیې د يو بل ډېپلوماټان هم وشړل او دا ځکه چې پراګ وویل داسې ثبوتونه یې تر لاسه کړي چې روسي استخباراتي کارکوونکي په ۲۰۱۴ز کال کې د چېک جمهوریت د وسلو په يوه ګودام کې په خونړۍ چاودنه کې ککړ ول.

بایډن په تېرو پینځه ورځو کې د لوی اقتصاد لرونکو هېوادونو ټولنې یا جي اووه، په برسلز کې د ناټو له مشرانو او د اروپايي ټولنې له مشرانو سره درې جلا، جلا غونډې درلودې. د غونډو پر مهال بایډن هڅه وکړه چې د جون پر ۱۶مه په جینیوا کې له خپل روسي سیال ولادیمیر پوتین سره تر لیدو مخکې د روسیې د اقداماتو پر وړاندې د اروپایانو ملاتړ تر لاسه کړي.

افغانستان کې د مخابراتي شبکو ۵۱ ستنې ړنګې شوي

افغان چارواکي وايي، دا ټاورونه د جګړو، ناامنیو او امنیتي ګواښونو له امله زيانمن شوي - د ارشیف انځور.

د افغانستان د مخابراتو او معلوماتي ټېکنالوژۍ وزارت وايي، په تېرو درو میاشتو کې د مخابراتي شبکو ۵۱ ټاورونه يا ستنې په بشپړ یا نسبي ډول تخریب شوې دي.

په دغه وزارت کې د مخابراتي خدماتو د تنظیم ادارې ویاند سعید شینواري د جون پر ۱۵مه مشال راډيو ته وویل چې دا ستنې د جګړو، ناامنیو او امنیتي ګواښونو له امله زيانمنې شوي يا ورانې شوي دي.

د وزارت په خبره په تېر لمریز کال کې ۳۰۸ مخابراتي ټاورونه په بشپړ یا نسبي ډول ړنګ شوي چې له کبله يې دغې څانګې ته تر ۱۷ میلیونه ډالرو پورې زیان اوښتی دی.

په افغانستان کې په وروستيو کې د وسله والو طالبانو د بریدونو د زياتېدو له وجې د برېښنا او موبايل ټېلېفونونو د ستنو په ګډون يو شمېر ملکي ځايونو ته هم زيانونه اوښتي دي.

د افغانستان د بشري حقونو خپلواک کمېشن دا کړنې غندلي او پر وسله والو طالبانو يې غږ کړی چې د عام المنفعه تاسيساتو له ورانولو لاس واخلي.

د پاکستان حکومت د تېلو بیې لوړې کړې

حکومت وايي، دا پرېکړه يې په نړيوال بازار کې د تېلو په بيو کې تر زياتوالي وروسته کړې ده. انځور- ارشیف

د پاکستان حکومت د جون له ۱۶مې څخه د تېلو په بیو کې د څه باندې دوو روپيو اضافه کړې ده.

د پاکستاني وزيراعظم ځانګړي سلاکار شهباز ګېل د جون پر ۱۵مه پر خپله ټوېټر پاڼه د يوې اعلاميې په خپرولو وويل چې دا پرېکړه يې په نړيوال بازار کې د تېلو په بيو کې تر زياتوالي وروسته کړې ده.

نوموړي ويلي چې د پېټرولو په بیو کې د دوو روپيو او ۱۳ پيسو اضافه شوې چې ورسره د یو ليټر پېټرولو نوی قيمت ۱۱۰ روپۍ او ۶۹ پيسې شوی دی.

حکومت همداراز، د لایټ یا سپکو ډيزلو بیه دوه روپۍ لوړه کړې چې ورسره د یو لیټر ډیزلو نوی قيمت ۷۹ روپۍ او ۶۸ پيسې شوی.

بلخوا د يو ليټر هاي سپيډ ډيزلو قیمت یوه روپۍ او ۸۹ پیسې لوړ شوی چې ورسره يې نوې بيه ۱۱۲ روپۍ او ۵۵ پيسو ته رسېدلې.

حکومت د یو لیټر خاورو تېلو په بيه کې هم د يوې روپۍ او ۸۹ پيسو اضافه کړې او نوی قيمت يې ۸۱ روپۍ او ۸۹ پيسې ټاکل شوی دی.

بایډن د اروپايي شورا له مشرانو سره د روس او چین په اړه غږېدلي

د امریکا ولسمشر جو بایډن

د امریکا ولسمشر جو بایډن د جون پر ۱۵مه د اروپايي شورا مشر چارلس مایکل او د اروپايي کمیشن مشرې اورسلا ون دیر لیین سره د ملاقات پر مهال د تجارت، اب و هوا بدلون او د روسیې او چین د مخ په زیاتېدونکی سخت دریځ پر وړاندې د ګډ ایتلاف په اړه خبرې کوي.

امکان دی چې دواړه لوري د خپلو اړیکو د بیا ښه کولو لپاره کار وکړي ځکه چې د دوی ترمینځ له تېرو څو کلونو راهیسې اړیکې د پخواني ولسمشر ډونلډ ټرمپ د انتظامیې په موده کې سړې شوې وې.

د اروپايي ټولنې او امریکا ترمینځ تر ټولو زیاته مسله په سټیلو ۲۵ او پر ایلومینیم ۱۰ فيصده ټیکس دی چې ډونلډ ټرمپ په ۲۰۱۸ز کال کې په اروپا او نورو نېږدې ملګرو هېوادونو لګولی وو.

ولسمشر بایډن له روسي ولسمشر ولادمیر پوتین سره تر ملاقات وړاندې د ماسکو د اثر زیاتېدو د مخنیوي لپاره د اروپايي هېوادونو د ملاتړ ترلاسه کولو په هڅه کې دی.

دا ملاقات به د جون پر ۱۶مه په جینوا کې کېږي. په ۲۷ هېوادونو مشتملې اروپايي ټولنې کې دا مهال د روسیې په حواله سره په تګلارو کې اختلافات موجود دي.

اروپايي ټولنې ته تر ټولو زیات قدرتي ګیس له روسیې ترلاسه کېږي او روسیه بیا په نړیوالو معاملو لکه د شام او لیبیا په شخړو او د ایران ایټمي تړون کې مهم رول لري.

ناټو د کابل هوایي ډګر د فعالیت د تمویلولو لپاره موافقه وکړه

کابل کې د حامد کرزي نړیوال هوايي ډګر

د ناټو مشرانو له افغانستانه د نړیوالو ځواکونو تر وتلو وروسته د کابل هوایي ډګر د فعالیت تمویلولو لپاره موافقه وکړه.

د ناټو سرمنشي ینس سټولټنبرګ د جون پر ۱۴مه د دې تړون د ۳۰ غړیو هېوادونو د سرمشریزې په پای کې په یوه خبري کنفرانس کې وویل: " ناټو او متحدان یې په اوس وخت کې پردې کار کوي چې په څه ډول د کابل د نړیوال هوایي ډګر د فعالیت دوام یقیني کولای شي.

د نن ورځې د سرمشریزې ترڅنګ لیدنې کتنې ترسره شوې، بې له شکه چې ترکیه په دغو هڅو کې اساسي ونډه لري. موږ دقیقاً د دې چارې د بشپړولو پر لارو چارو غور کوو، خو د کابل د نړیوال هوایي ډګر د فعالیت د دوام لپاره د ناټو او د متحدانو له خوا یې یوه قوي ژمنه شته. دا د ناټو او زموږ د غیر نظامي حضور د دوام او هم د نړیوالې ټولنې لپاره مهم دی. د همدې لپاره د دې کار د بشپړولو لپاره ریښتینې هڅې کوو."

په بروکسل کې د ناټو د سرمشریزې د پای په اعلامیه کې ویل شوي چې ناټو د ډیپلوماتیک او نړیوال حضور او هم له نړۍ سره د افغانستان د اړیکو لپاره د کابل د هوایي ډګر اهمیت درکوي او د فعالیت د دوام لپاره به یې بودجه تامین کړې.

ناټو همدارنګه ويلي چې د افغان امنیتي ځواکونو روزنې او تمویل ته به دوام ورکړي او د ډيپلوماتیک حضور د دوام لپاره به په کابل کې د ملکي استازولی دفتر وساتي.

په اعلامیه کې همدا شان د افغانانو په مشرۍ او مالکیت د سولې له پروسې د ناټو په ملاتړ ټینګار شوی دی.

د ناټو د ۳۰ غړیو هېوادونو دغه سرمشریزه چې د لومړي ځل لپاره د امریکا ولسمشر جو بایډن هم په کې ګډون کړی داسې مهال ترسره شوه چې ټول نړیوال ځواکونه به د روان کال د سېپټمبر میاشتې تر ۱۱مې له افغانستانه ووځي.

چین د سینکیانګ مسلمانانو او هانګ کانګ په اړه د جي اووه ټولنې بیان رد کړ

د جي اووه ټولنې هېوادونو مشران د جون پر ۱۱مه په برتانیا کې تر غونډې مخکې د انځور اخیستو پر مهال.

په لندن کې د چین سفارت د لوی اقتصاد لرونکو هېوادونو ټولنې (جي اووه) تازه اعلامیه رد کړې او دا یې د چین په کورنیو چارو کې لاسوهنه بللې.

بیجنګ د جون پر ۱۴مه جي اووه ټولنه په داسې حال کې په "سیاسي مداخلې" تورنه کړې چې د اتوار (یکشنبې) پر ورځ یې په برتانیا کې تر سرمشریزې وروسته، په اعلامیه کې چین په سینکیانګ او هانګ کانګ کې د بشري حقونو په سرغړونو تورن کړ.

چین اوسمهال په سینکیانګ ولایت کې د خپلې تګلارې له وجې له نړیوال فشار سره مخامخ دی.

هلته امریکا په سینکیانګ کې له یوغور او نورو مسلمانانو سره د چین چلند ته د "توکموژنې یا نسل کشۍ" لفظ کاروي.

د جي اووه هېوادونو په ګډ بیان کې راغلي چې "موږ به خپل ارزښتونه (اقدار) پر مخ وړو" او پر چین یې غږ کړی دی چې "په ځانګړي ډول د سینکیانګ په معامله کې دې بنیادي ازادیو او بشري حقونو ته درناوی وکړي" او "هانګ کانګ ته دې هم حقونه، ازادۍ او کورواکي ورکړي."

د دې بیان په غبرګون کې په لندن کې چینايي سفارت ویلي چې جي اووه ټولنه دې د مخالفتونو او ستونزو پیدا کولو پر ځای د نړیوالې همکارۍ د دودولو هڅو ته پام وکړي.

په جي اووه ټولنه کې برتانیا، فرانسه، جرمني، جاپان، اېټالیا، کاناډا او امریکا شامل دي.

قاضي محمد امین وقاد مړ شو

قاضي محمد وقاد د افغانستان د سولې عالي شورا غړی هم پاتې شوی وو - د ارشیف انځور.

د افغانستان د حزب اسلامي د شوراګانو د اتحاد غړی قاضي محمد امین وقاد ومړ.

د نوموړي زوی صهیب وقاد مشال راډیو ته وویل چې پلار یې له دوو کلونو راهیسې ناروغ وو او په وروستیو کې د زړه او سږو د ناروغۍ له وجې یې صحت لا خراب شو او دوه اوونۍ مخکې په کورونا وایرس اخته شو چې د جون پر ۱۴مه د اکسیجن کمښت له وجې ومړ.

قاضي محمد وقاد د افغانستان د سولې عالي شورا غړی هم پاتې شوی وو.

دا په داسې حال کې ده چې د کورونا وایرس وبا له وجې په افغانستان کې یو شمېر نومیالي کسان مړه شوي.

د جون پر ۱۴مه د ولسمشر سلاکار او لیکوال محمد نبي مصداق هم ومړ. مصداق کلونه په رسنیو کې کار کړی وو.

تر دې مخکې د جون پر ۱۲مه د اطلاعاتو او کلتور وزارت پخوانی مرستیال او لرغونپوه پروفیسر رسول باوري هم د کووېډ-۱۹ ناروغۍ له وجې مړ شو.

په بنو کې وسله والو یو وکیل وژلی دی

پولیس وايي، وسله والو په بنو ښار کې پر وکیل بشیر رحمان برکي برید وکړ.

د بنو پولیس وايي، وسله والو په ښار کې یو وکیل ویشتلی دی.

د پولیسو ویاند اصف حسن مشال راډیو ته وویل چې د جون پر ۱۴مه ماسپښین مهال پر موټرسایکل سپرو "ناپېژانده وسله والو" د بنو تاڼې په حدودو کې پر وکیل بشیر رحمان برکي ډزې وکړې او هغه یې وواژه.

د ده په خبره، وسله وال د پېښې له ځایه تښتېدلي دي.

د برکي ورور کامرېډ سلیم برکي مشال راډیو ته وویل، له هېچا سره دښمني نه لري.

تر اوسه دا روښانه نه ده چې پر وکیل ولې حمله شوې او د برید ذمه واري هم چا نه ده منلې خو پولیس زیاتوي چې د پېښې پلټنې کوي.

د افغان سولې او ثبات د ټینګښت لپاره کار کوو: د م.م ځانګړی استازی ژان ارنو

د افغانستان لپاره د ملګرو ملتونو د مشر نوی ځانګړی استازی ژان ارنو - د ارشیف انځور.

د افغانستان لپاره د ملګرو ملتونو د سرمنشي نوي ځانګړي استازي ویلي، د ټولو په همغږۍ د سولې او ثبات د ټینګښت لپاره کار کوي.

دا خبره ژان ارنو د جون پر ۱۴مه د افغانستان د ملي مصالحې عالي شورا له رییس عبدالله عبدالله سره په لیدنه کې کړي.

د شورا په اعلامیه کې د ارنو په حواله زیاته شوې چې د خبرو له لارې د روانې جګړې پای ته رسول د ملګرو ملتونو له‌ خوا یوازینۍ کارنده لار بلل کېږي او باید ټولې خواوې له جګړو لاس واخلي او سولې ته د رسېدو ملاتړ وکړي.

په بیان کې د ډاکتر عبدالله په حواله لیکل شوي چې د ملي مصالحې عالي شورا له ملګرو ملتونو او نورو ټولو اړوندو ادارو سره د سولې د راتلو په خاطر هر ډول همکارۍ ته تیاره ده.

نور وښیئ

ځانګړې پاڼې

له موږ سره اړیکي

XS
SM
MD
LG