د عربي هېوادونو ټولنه [عرب لیګ] به په روانه اونۍ کې په قاهره کې د سعودي عرب په غوښتنه یوه مهمه غونډه کوي او پکې به په سیمه کې د ایران سرغړونو په اړه بحث کوي. دا خبر فرانس پرېس خبري اژانس د خپلو ترلاسه کړیو معلوماتو په حواله ورکړی.
په دا وروستيوو کې د ایران او سعودي عرب ترمنځ اړيکې ډېرې خرابې شوې دي.
په قاهره کې د عرب لېګ ټولنې د غونډې د ترسره کولو هدف پر ریاض د نومبر پر څلورمه د یمن د حوثي یاغیانو له خوا د راکټي حملې څېړل یاد شوي.
د سعودي ولي عهد محمد بن سلمان ایران تورنوي چې د یمن حوثي یاغیانو ته د بيليسټیک توغندیو په ورکولو سره د سعودي عرب ضد نېغ په نېغه پوځي تېری کوي. خو ايران دا تور بې بنياده بللی دی.