د پاکستان پوځي چارواکي وايي چې یوه جګپوړي افغان پوځي پلاوي په پېښور کې د پاکستان له جګپوړیو پوځي افسرانو سره کتلي او د ترهګرۍ پرضد جګړې په ګډون یې په یو لړ مساېلو خبرې کړي دي.
د پاکستان پوځ ویاند جنرال اصف غفور د جمعې په ورځ په دې اړه په خپور کړي بیان کې ویلي چې د دغه ۷ کسیز افغان پوځي پلاوي چې مشري یې د ۲۰۱ قول اردو قوماندان جنرال محمد زمان وزیري کوله، د خېبرپښتونخوا د قول اردو له قوماندان جنرال نذیر احمد بټ او د ملېشه ځواک له مشر سره لیدلي.
ښاغلی غفور کاږي چې دواړو لورو د پولي د تنظیم په ګډون په یو لړ امنیتي مساېلو خبرې کړي او همدا شان د ترهګرۍ پرضد د جګړې پر جاري ساتلو هم سلا شوې.
د پاکستاني پوځ د ویاند په خبره:
"په دغه لیدنه کې دواړه پوځي خواوې چې د دواړو هېوادونو د پوځ د اوپراسیون مشران هم په کې وو، په دې همغږي شوي چې سوله او ثبات یوازې د بشبړو هڅو او پرمختللې همکارۍ له لارې په ښه توګه ترلاسه کېدای شي."
د افغانستان د پوځ دغه جګپوړي پلاوي تر هغې وروسته په پېښور کې له پاکستانیو پوځي چارواکو سره کتلي چې په اسلام اباد کې د افغانستان سفیر حضرت عمر زاخېلوال هم د تيرې چارشنبې په ورځ په راولپېنډۍ کې د پاکستان پوځ له مشر جنرال قمر جاوید باجوه سره کتلي وو.
د پاکستان د پوځ د رسنیو دفتر تر دې ناستې وروسته په خبرپاڼه کې ویلي وو چې دواړه لوري پر امنیتي موضوعاتو او د سرحد د امنیت د تنظیم پر مسئلې غږېدلي دي.
راپور : ذبیح مومند
