د ايران عدلي چارواکي وايي، امنيتي ځواکونو د مشهد ښار په شمال ختيځ کې د داعش ۲۱ مشکوک سخت دريځي نيولي دي.
د مشهد مرستيال لوی څارنوال حسن حيدري وايي، ځينې نیول شوي کسان ايرانیان دي او نور يې افغانان دي چې په جعلي اسنادو ايران ته ننوتلي وو.
ايراني رسنیو د حيدري له قوله لیکلي چې ځينې نيول شويو کسانو له ايرانه دباندې په ترهګرو فعاليتونو کې برخه اخېسته.
دا خبر وروسته له هغه دی چې یوه مياشت مخکې د ايران پر پارلمان او د ايران د اسلامي جمهوريت د بنسټ ايښودونکي ايت الله خامنه اي پر زيارت خونړي بريدونه وشول.
داعش ډلې د دغو بريدونو مسولیت ومانه. په دې وروستيو کې د ايران چارواکو ويلي چې له داعش او نورو ډلو سره اړوند ګڼ شمېر ترهګر يې نيولي دي.