د پاکستان په پارلېمان کې د قبایلو ځېنو استازو ګواښ کړی که حکومت د فاټا اصلاحاتو بهیر ژر پیل نه کړ نو دوی به احتجاج پیل کړي.
د کورمې استازي ساجد حسین توري بېګا ماښام (زیارت شپه) له مشال راډیو سره په خبرو کې پر حکومت غږ وکړ چې د قامي اسمبلۍ په راتلونکې غونډه کې دې د قبایلو اصلاحاتو پر مسودې بحث پیل کړي.
د واکمن مسلم لیګ (ن) یوه پارلېماني استازي عباد الله خان وویل، دوی د اصلاحاتو پر بهیر کار روان کړی دی او ژر به یې اسمبلۍ ته هم وړاندې کړي.
