د مصر سرکاري تلویزون خبر ورکوي چې نن د یکشنبې په ورځ، په طنطا ښار کې، په یوې کلیسا کې د یوې بمې چاودنې له کبله لږ تر لږه ۲۱ کسان وژل شوي او پنځوس نور ژوبل شوي دي.
چاودنه په داسې وخت کې شوې چې زیات شمېر عیسویان د یکشنبې د ورځې د عبادت لپاره په کلیسا کې موجود وو. عیسوي مذهبه کسان د ایسټر څخه یوه اونۍ وړاندې د یکشنبې ورځ په ځانګړو مراسمو سره لمانځي چې ورته Palm Sunday وايي.
د کورنیو چارو وزارت وايي چې په سم لاسي ډول چا د پېښې ذمه واري قبوله کړې نه ده. امنیتي ځواکونو د پېښې په خای کې پلټنې پیل کړي او د دې خبرې د معلومولو هڅه کوي چې هلته د نورو چاودنو امکان خو به نه وي.
په مصر کې لس په سلو کې عیسوي مذهبه خلک ژوند کوي چې په پرله پسې توګه د سختدریځو اسلام پالو ډلو لخوا په نښه کېږي.
د تېر کال په دسمبر کې په قاهره کې پر یوې کلیسا د ورته چاودنې له کبله ۲۵ کسان وژل شوي او ۴۹ نور ژوبل شوي وو.