د امریکا استازو جرګې یوې کمېټۍ بېګا په یوه رپورټ کې پر پخواني استخباراتي قراردادي اېډورډ سنوډن تور پورې کړی چې د رازونو په افشا کولو سره یې امریکايي امنیت ته لوی تاوان رسولی دی.
د جرګې د استخباراتي چارو کمېټۍ په رپورټ کې وویل، لکه څنګه چې سنوډن په مرکو کې دعوه کړې، هغه هسې ((مخبر)) نه دی او دا چې هغه چې د ملي امنیت له ادارې څخه کوم مواد غلا کړي هغه د استخباراتي او دفاعي پروګرامونو لپاره ول او د امریکا بهرنیو دښمنانو پکې ډېره دلچسپي لرله.
کمېټۍ یوازې د رپورټ څلور پاڼې لنډیز خپور کړی او وايي، بشپړ رپورټ ۳۶ پاڼې لري چې هغه پټ ساتل شوی دی.
په لنډیز کې د سنوډن په اړه سخت الفاظ کارول شوي دي.
نوموړی په روسیې کې د جلاوطنۍ ژوند تېروي.
دا رپورټ پر داسې وخت خپور شوی چې د سنوډن ژوند په اړه نن یو فلم خپرېږي چې پکې نوموړی د رازونو افشا کوونکي او اتل په توګه ښودل شوی دی.
د فلم جوړوونکی اولېور سټون او د بشري حقونو ډلو پر ولسمشر باراک اوباما ټینګار کړی چې د خپلې دندې تر پای مخکې دې سنوډن وبښي.
