د افغانستان دفاع وزارت د طالبانو د وروستۍ خبرپانې په اړه ویلي چې د طالبانو او داعش ډلې تر منځ اختلاف د دوی د ترورویستي ګټو په خاطر دی او افغان امنیتي ځواکونه به د دې دواړو ډلو په وړاندې مبارزه کوي.
د دفاع وزارت مرستیال ویاند محمد رادمنش پر یکشنبه (اتوار) مشال راډیو ته وویل، مخالفین چې په هر ځای کې د هیواد د نا امنه کولو هڅه وکړي د افغان ځواکونو له خوا به وځپل شي.
ښاغلی رادمنش وايي چې د یادو ډلو د ځپلو لپاره په بیلابیلو ولایتونو کې عملیات روان دي.
وسلوالو طالبانو په دې ورستیو کې په یوه خبرپاڼه کې ویلي چې داعش ډله د ننګرهار ولایت په یو شمېر سرحدي سیمو کې فعالیت لري چې دوی به یې په وړاندې مبارزه وکړي.
