د لاسرسي ځای

تازه خبر

خبرونه

په رمادي کې عراقي ځواکونو پرمختګ کړی

عراقي چارواکي وایي، د دوی ځواکونو د رمادي په جنوب لوېدیځ کې د اسلامي دولت له ډلې څخه ځیني سیمي نیولي دي.

عراقي ځواکونو تر سېشنبې تر ماښام پورې هڅه کوله چې د التمیم سیمه د داعش وسله والو له خوا د ځای پرځای شویو بمونو پاکه کړي.

د الانبار ولایت د پولیسو مشر تورن جنرال هادي د سېشنبې پر ورځ ویلي چې عراقي ځواکونه د ښار مرکز ته د ننوتلو لپاره چمتو دي او دغه ځای ته نژدې شوي دي.

د داعش ډلې وسله وال په مې میاشت کې د انبار مرکز رمادي ته ننوتل چې د موصل ښار تر سقوط وروسته دا د عراق په شمال کې عراقي ځواکونو ته تر ټولو لوی ګوزار ګڼل کېده.

د عراق حکومت متقابلې حملې اعلان کړې، خو په دې برخه کې یې پرمختګ ډېر ټکنی وو.

د نننۍ ورځې ټول خبرونه وګورئ

پي ټي اېم په پېښور کې د عالمزېب مسود ګرفتارۍ پرضد مظاهره وکړه

په پېښور کې د سپين جومات مخ ته د پښتون ژغورنې غورځنګ سلګونه پلويانو په کراچۍ کې د عالمزېب مسود د نيولو او د شمالي وزيرستان په خيسور کې د امنيتي ځواکونو لخوا په مبينه توګه کورونو ته د ننوتلو پر ضد مظاهره کړې ده.

دوی غوښتنه کوي چې عالمزېب مسود دې خوشې کړل شي او په خيسور کې د ماشوم حيات الله وزير کور ته ننوتونکي امنيتي ځواکونو د ننوتلو په اړه دې پلټنې وشي او عاملينو ته دې سزا ورکړل شي. د پښتون ژغورنې غورځنګ د کراچۍ مشر نورالله ترین تېر ماښام مشال راډیو ته وویل عالمزېب مسود په دوشنبه له خپلو ملګرو سره د کراچۍ ښار کليفټن سيمې ته روان و چې پولیسو په زور له ګاډي راکښته کړ او له ځانه سره یېبوتلی.

بلخوا د بښنې نړیوال سازمان (اېمنسټي انټرنېشنل) تېره ورځ د ټویټر له لارې پر پاکستانیو چارواکو غږ کړی دی چې سمدستي دې د پښتون ژغورنې غورځنګ د غړي عالمزېب مسود درک ولګوي

پوتین د جاپان له وزیر اعظم سره پر لانجمنو ټاپوګانو غږېږي

د پوتین د جاپان له وزیر اعظم شینزو ابې سره د غږېدلو په مهال.

د روسیې ولسمشر ولادیمیر پوتین د جنورۍ پر۲۲مه په مسکو کې د جاپان له وزير اعظم شینزو ابې سره د کوریل د لانجمنو ټاپوګانو په اړه خبرې کوي.

دې څلورو لانجمنو ټاپوګانو د دواړو هېوادونو لخوا د سولې د هغه تړون لاسلیک له خنډ سره مخامخ کړی چې دويمه نړیواله جګړه په رسمي توګه پای ته رسوي.

د کريملېن ویاند ديمیتري پسکوف د جنورۍ پر ۲۱مه وویل، روسیه او جاپان یو هم نه‌ غواړي چې له خپلو ملي ګټو تېر شي.

هغه زیاته کړه چې خبرې په لومړي پړاو کې دي او نتیجه ‌یې ښايي د دواړو خواوو لپاره یو شان وي.

پسکوف د جاپاني رسنیو د هغو راپورونو په اړه له تبصرې ډډه وکړه چې د ناڅرګندو چارواکو له قوله ورکړل شوي دي او وايي، که مسکو له دې لانجمنو ټاپوګانو څخه دوه جاپان ته ورکړي، نو ښاغلی ابې به له روسیې سره د سولې تړون لاسلیک کړي.

کوریل ټاپوګان چې په ارام سمندر کې پراته دي د پخواني شوروي اتحاد ځواکونو د دويمې نړیوالې جګړې په وروستیو ورځو کې ونيول.

کابل: ناکامو نوماندانو لارې تړلې

د کابل نقشه.

کابل کې د ولسي جرګې د ناکامو کانديدانو ملاتړو دغه ښار ته د ننوتلو لارې تړلې دي.

د راپورونو له مخې د دغو څلورو داخلېدونکو دروازو بندولو مساپر له ستونزو سره مخامخ کړي دي.

احتجاج کوونکي غوښتنه کوي چې د کابل ولایت لپاره دې د پارلماني انتخاباتو اعلان شوي لومړۍ پايلې باطلې وګرځول شي.

د افغانستان د انتخاباتي شکاياتو کمېسیون د جنورۍ پر ۲۱مه وويل چې د کابل حوزې پر شکایتونو مقدماتي مراحل پېل شوي دي.

د کمېسیون په وينا، د کابل په حوزه کې د شکايتونو شمېر زیات دی او دغو شکايتونو ته د رسېدو لپاره د دې کمېسیون ولايتي کميشنران کابل ته غوښتل شوي دي.

د راپورونو له مخې د کابل د پارلېماني انتخاباتو اړوند ژر شکايتونه ثبت شوي دي.

په مېکسیکو د مړیو شمېر ۹۱ ته ورسېد

په هيدالګو کې د تېلو نلليکې چاودېدو ځای.

د مېکسيکو لوی څارنوال ویلي چې د تېرې اوونۍ د ګېس پایپ لاین د چاودنې پلټنې یې پېل کړي دي چې پکې به د چارواکو ممکنه غفلت ته هم ګوري.

په دغه پېښه کې ۹۱ کسان وژل شوي وو.

دا لا نه ده معلومه چې د جنورۍ پر ۱۸مه دغه پېښه څنګه مخې ته راغله خو چاودنه له مېکسيکو ښاره ۸۵ کلومیټره لرې شمال اړخ ته په تلاهولیپن سیمه کې هغه وخت وشوه چې کله خلکو د یو غېر قانوني سوري شوي پایپ لاین څخه تېل وړل.

لوی څارنوال الېجېندرو ګيرټز مانېرو د جنورۍ پر ۲۱ وویل پلټونکي د دې معلومولو هڅه کوي چې دغه پایپ لاین ځایي خلکو مات کړی و او یا که د کومو جنایي ډلو کار وو.

د هډالګو صوبې ګورنر عمر فیاد پرون وويل د پېښې د وژل شوو شمېر ۹۱ ته رسېدلی او تر ۵۲ نور په روغتون کې دي چې د ډېرو حالت لا هم ښه نه دی.

بلوچستان: ترافیکي پېښه ۲۵ کسان وژل شوي

د پاکستان سيند صوبې ته نېږدې د بلوچستان په لسبېله کې د جنورۍ پر ۲۱مه ماښام د سپرلیو یو بس او د تیلو د لارۍ ترمنځ د ټکر په نتیجه کې ۲۵ کسان وژل شوي او۱۶ نور ټپیان دي.

چارواکي وایي د ګڼو نورو حالت هم خراب دی او زیاتره ژوبل کسان د لسبېلې او حب روغتونونو ته وړل شوي دي.

د لسبیله ډپټي کمشنر شبیر مینګل د جنورۍ پر ۲۱مه ماښام مشال راډیو ته وویل چې بس له کراچۍ د پنجګور پر لور روان وو چې په لسبېله کې چمن هوټل ته نېږدې د تیلو له یوې لارۍ سره وجنګېدلو او اور یې واخیست.

په وژل شوو او ژوبلو کې ښځې او ماشومان هم شامل دي.

د بلوچستان وزیر اعلی جام کمال له ځايي انتظامي چارواکو د پېښې تفصیل غوښتی او د ټپیانو د علاج لپاره یې د ضروري ګامونو پورته کولو امر کړی دی.

د سي ای اې نومیاتی کارمند ټوني منډيز ومړ

د امريکا استخباراتي ادارې هغه پخوانی کارکوونکی مړ شوی چې په ۱۹۸۰ م کال کې يې د ايران له خوا د يرغمال امريکايانو قاچاقولو پلان جوړ کړی وو.

ټوني منډيز د پارکنسن له ناروغی ومړ.

پر هغه هاليووډ ارګو نومي فلم جوړ کړی دی.

د هغه کورنۍ د جنورۍ پر ۲۰ مه نېټه ويلي، منډيز د جنورۍ پر ۱۹مه د ۷۸ کلونو په عمر کې مړ شو.

کله چې په ۱۹۷۹ کې د ايران انقلابيانو په تهران کې د امريکا پر سفارت قبضه وکړه نو پر دې مهال ځينې ډپلوماټان د شا له دروازې په وتو کې بريالي شول او د کنېډاپه سفارت کې يې پناه واخیستله. د دوی د ژغورلو لپاره ميڼډز په هالي ووډ کې د ارګو په نوم د جعلي ساينس فکشن فلم جوړولو پلان جوړ کړ او د فلمبندۍ د ځای په تکل يې ايران ته سفر وکړ.

هغه د فلم د عملې په جامه کې شپږ ډپلوټان له تهرانه را واېستل.

ډپلوماټان چې ورسره د کېنېډا جعلي پاسپورټونه ول له ايرانه د ۱۹۸۰ م کال د جنورۍ پر ۲۷ مه نېټه په خوندي توګه راووتل.

دوکۍ: د سکرو کان کې چاودنې درې کانکیندونکي وژلي

له کوټې ۱۵۰ سل کلومیټره لیرې شمال ختیځ لور ته په د بلوچستان په پښتون مېشته سیمه دوکۍ ولسوالۍ کې بېګا شپه د سکرو په یوه کان له چاودنې درې کانکیندونکي وژل شوي دي.

يوه ځايي پوليس چارواکي ابرار حسين د جنورۍ پر ۲۱ مه مشال راډيو ته ويلي، پېښه بيګاه شوې ده. د ده په خبره، د چاودنې پر مهال په کان کې څلور کانکیندونکي ول چې پکې د يوه مړی را اېستل شوی او د نورو د را اېستلو لپاره هڅې روانې دي. هغه زياته کړه، د مرستو پر مهال دوه مرستندويان هم مړه شوي او ۱۴ بې هوشه شوي دي.

د بلوچستان سکرو په کانونو کې د کانکیندونکیو د وژل کېدو پېښې زياتې رامنځ ته کېږي چې لویه وجه یې د کانونو د ناسم خوندیتوب دی.

د لېنډزي ګراهم په مشرۍ امریکايي پلاوي له پاکستانیو چارواکو سره لیدلي

امریکايي سېنېټر لېنډزي ګراهم (له کېڼې خوا لومړی) له پلاوي سره اسلام اباد ته تللی

اسلام اباد ـ د پاکستان د بهرنیو چارو وزارت وايی، د جنورۍ پر ۲۰مه د امریکا د سېنېټ د عدلیې د کمېټۍ مشر لېنډزي ګراهم او د پاکستان د بهرنیو چارو وزیر شا محمود قریشي ترمنځ په لیدنه کې پر دوه اړخیزه معاملاتو، پر سیمه ییزو او نړیوالو حالاتو او د افغانستان په چارو خبرې وشوې.

د پاکستان د بهرنیو چارو وزارت وايي، له سېنېټر ګراهم سره په دې سفر کې یو پلاوی هم ملګری دی. دواړو خواوو د تجارتي اړیکو په غښتلي کولو هم خبرې کړې دي.

تر دې وړاندې د افغانستان د سولې لپاره د امریکا ځانګړی استازی زلمی خلیلزاد هم د جنورۍ پر ۱۷مه اسلام اباد ته تللی وو او په دغه سفر کې یې د پاکستان له وزیراعظم عمران خان، د بهرنیو چارو له وزیر شا محمود قریشي او د پوځ له مشر جنرال قمرجاوید باجوه سره کتلي وو.

ټاکل شوې چې ګراهم د جنورۍ پر ۲۰مه له وزیراعظم عمران خان سره هم وویني.

د پاکستان وزیراعظم د ساهیوال د وژنو پلټنو امر کړی

عمران خان وايي، د ساهیوال پېښې ټکان ورکړی دی

د پاکستان وزیراعظم عمران خان د ساهیوال د وژنو د پېښې پلټنو امر کړی دی او ژمنه یې کړې چې د ککړو کسانو ضد به سمدستي کارروايي کوي.

نوموړي د جنورۍ پر ۲۰مه پر ټوېټر پاڼه په بیان کې ویلي دي چې د پولیسو د ترهګرۍ ضد څانګه لاسته راوړنې لري، خو هېڅوک له قانونه پورته نه وي.

د جنورۍ پر ۱۹مه، د پنجاب پولیسو وویل چې د ترهګرۍ ضد څانګې کارکوونکو په ساهیوال کې په یوه نښته کې څلور مشکوک وسله وال وژلي چې پکې د یوې کورنۍ درې کسان شامل ول.

خو تر پېښې وروسته د هغې کورنۍ یوه ماشوم پر ټولنیزو رسنیو ویډیو خپره کړه چې پکې یې وویل چې پولیسو یې مور و پلار او خور وژلي چې وسله وال نه ول.

د پاکستان دولتي راډیو وايي، د پنجاب اعلا وزیر په امر، په مشکوکه پولیس مقابله کې ککړ کارکوونکي نیول شوي دي.

هلته ډان ورځپاڼه وايي چې په ساهیوال کې د وژل شویو کسانو کورنۍ د پېښې ضد احتجاجي ناسته پیل کړې ده.

د پاکستان وزیراعظم پر ټوېټر په بیان کې ژمنه کړې ده چې حکومت به د کورنۍ د پاتې ماشومانو پالنه کوي.

عمران خان ویلي دي چې د وژنو پېښې ټکان یا صدمه وررسولې ده.

د کانګرېس غړو د سفر مخه نيول غېرمسول حرکت دی: پېلوسي

د امریکا د استازو جرګې مشره نېنسي پېلوسي.

د امریکا د استازو جرګې مشرې نېنسي پېلوسي ويلي، د ولسمشر ډولنډ ټرمپ له خوا افغانستان ته د کانګرس غړو د سفر مخه نیول یو غیر ذمه وارانه کار دی.

د مېرمن پېلوسي په وينا له دې سره په افغانستان کې د دوی لپاره وضعیت نور هم خطرناکه کېږي.

د ټرمپ ادارې د امریکا د کانګرېس پر غړيو بندیز ولګاوه چې د ځېنو حکومتي ادارو په ټپه درېدو پر مهال د حکومت په الوتکو کې سفر نشي کولای.

د سپينې ماڼۍ لخوا د بوديجې په اړه خپره شوې تګلاره کې راغلي، د کانګرېس غړي یوازي هغه مهال له حکومتي الوتکو ګټه اخيستلای شي چې سپينه ماڼۍ ورته اجازه ورکړي.

د جنورۍ پر ۱۷مه سپینې ماڼۍ د نېنسي پېلوسي مخه ونيوله چې افغانستان ته په رسمي سفر په پوځي الوتکه کې لاړه شي.

نن به د جنوبي پولې او ځېنو تړل شوو حکومتي ادارو په اړه لوی اعلان کوم: ټرمپ

د امریکا ولسمشر ډونلډ ټرمپ د وینا پر مهال

د امریکا ولسمشر ډونلډ ټرمپ ویلي چې نن [د جنورۍ پر ۱۹مه] به د امریکا د حکومت د جزوي تړل کېدو او د هېواد پر جنوبي پوله د بشري بحران په اړه یو لوی اعلان کوي.

نوموړي پر خپله ټویټر پاڼه ویلي، دا اعلان به د جنورۍ پر ۱۹مه د امریکا پر وخت ماسپښین درې بجې کوي، خو په دغه اړه يې نور معلومات نه دې ورکړي.

د امریکا حکومت له تېرو څلورو اوونیو راهيسې د ولسمشر ټرمپ او ډیموکراټ ګوند ترمنځ د مېکسیکو او امریکا ترمنځ د دېوال جوړولو پر معامله د اختلاف له کبله په جزوي توګه تړل شوی دی چې له کبله يې د مرکزي حکومت اته لکه کارکوونکي له خپلو تنخواګانو بې برخې دي.

ولسمشر ټرمپ د دغه دېوال لپاره له کانګرسه ۵.۷ اربه ډالره غواړي خو د استازو په جرګه کې د ډیموکراټ ګوند استازي يې ورسره نه مني.

مېکسيکو کې د تېلو نلليکې چاودېدو له کبله ۲۰ کسان وژل شوي

په هيدالګو کې د تېلو نلليکې چاودېدو ځای

پراګ - په مېکسیکو کې د تیلو د يوې نلليکې چاودېدو له کبله لږ تر لږه ۲۰ کسان وژل شوي او په لسګونه نور ژوبل شوي دي.

دا پېښه پرون [د جنورۍ پر ۱۸] په هېدالګو ايالت کې رامنځ ته شوه. د دې صوبې ګورنر عمر فاياد وویل چې د مېکسیکو سیټي د شمال خوا ته په ۸۵ کیلومترۍ کې خلکو له نلليکې څخه تېل غلا کول چې چاودنه پکې وشوه.

نوموړي زیاته کړه چې په چاودنه کې لږ تر لږه ۵۴ کسان چې سوځیدلي ول، درمنله يې شوې ده.

په دې چاودنه کې يو شمېر کسان ژوبل شوي ول. ځايي رسنۍ وايي، دغه وخت په سلګونه کسان د پېښې په ځای کې موجود ول چې په ستلونو [بالټيو] کې يې تېل وړل.

ټرمپ او کيم به دويم ځل ملاقات کوي

ټرمپ او کيم په لومړي ځل د ۲۰۱۸م کال په جون کې ملاقات کړی و

پراګ - د امریکا ولسمشر ډونلد ټرمپ او د شمالي کوریا مشر کیم جونګ ان به د فبروري په وروستیو کې په دويم ځل ملاقات کوي. د سپینې ماڼۍ ویاندې سارا سېنډرز د جنورۍ پر ۱۸مه وويل چې د دې ملاقات ځای به وروسته اعلانوي.

سېنډرز دا خبره تر هغه وروسته وکړه چې ولسمشر ټرمپ د شمالي کوريا له جګپوړي مرکچي یونګ چول سره تر یو نیم ساعت پورې کوريايي ټاپووزمه له اېټمي وسلو پاکولو او د سرمشريزې په اړه خبرې وکړې. د شمالي کوريا جګپوړي چارواکي د امريکا د بهرنيو چارو له وزير مايک پامپيو سره هم ملاقات کړی دی.

د امريکا ولسمشر ټرمپ او د شمالي کوریا مشر کيم د تېر کال [۲۰۱۸م] په جون مياشت کې په لومړي ځل په سینګاپور کې غونډه کړې وه.

فېسبوک د روس دولتي وېبپاڼې سلګونه حسابونه تړلي

ټولنیزه رسنۍ فېسبوک.

ټولنیزې رسنۍ فېسبوک د روس د خبرونو له دولتي وېبپاڼې سپوټنیک سره تړاو لرونکې سلګونه پاڼې، ګروپونه او اکاونټونه له فېسبوک او انسټاګرامه لیري کړي دي.

فېسبوک وایي لیري کړل شویو پاڼو او اکاونټونو بې بنیاده خبرونه خپرول.

د فېسبوک د سایبر امنیتي تګلارې مشر نتانیل ګلیچر د جنورۍ پر۱۷مه لیکلي، لیري کړل شویو اکاونټونو او پاڼو غلط معلومات خپرول او د پاڼو او اکاونټونو ۳۶۴ چلوونکي د سپوټنیک مامورین ول.

سپونټیک د روس دولتي خبري وېبپاڼه ده.

د وېبپاڼې ارمینايي څانګې پر فېسبوک لیکلي دي چې د دوی د روسۍ ژبې پاڼه بنده شوې ده ځکه د روسيې خبرونه د لنډ وخت لپاره پر ارمینايي پاڼه خپروي خو ښایي ارمينايي پاڼه یې هم وتړل شي.

دوی پر خپلو کارونکو غږ کړی دی چې د ټیليګرام، ټویټر او نورو ټولینزو له لارې له دوی سره ملګري شي.

د امریکا استازو جرګې پر روسي شرکت د بندیزونو لرې کولو مخنیوي پرېکړه لیک منظور کړی

د امریکا د استازو جرګې یو پرېکړه لیک منظور کړی دی چې موخه یې له روسي کاروباري اولېګ دیرېپاسکا سره پر تړلو شرکتونو د بندیزونو لرې کولو مخه نیول دي.

د استازو جرګې د جنورۍ ۱۷مې اقدام یوازې علامتي دی او تر دې یوه ورځ مخکې په سېنېټ کې ورته اقدام ناکامه شوی.

ولسمشر ډونلډ ټرمپ ښايي پر هغو شرکتونو بندیزونه نن لرې کړي. د ډېموکراټانو اکثریت لرونکې جرګې ۳۶۲ غړو پرون د قرارداد په حق او ۵۳ یې په مخالفت کې رایې وکارولې.

تېره میاشت د امریکا د مالي چارو وزارت ویلي ول چې د دیرېپاسکا پر مهمو کاروبارونو بندیزونه ختموي.

په دې کې د المونییمو یو لوی شرکت روسال او دوه نورې کمپنۍ هم شاملې دي.

امریکا دا بندیزونه تېر کال په اپرېل کې لګولي ول چې له کبله یې د فلزاتو نړیوال بازار تاواني شو او په امریکا او اروپا کې یې کاروبارونه اغېزمن کړل.

روسال د نړۍ پر کچ د المونیمو جوړولو له تر ټولو لویو شرکتونو څخه یو دی.

امریکايي ولسمشر د استازو جرګې د مشرې د افغانستان سفر لغوه کړ

ټرمپ پلوسي ته لیکلي چې خپل سفر دې وځنډوي

امریکايي ولسمشر ډونلډ ټرمپ د حکومت د جزوي بندش په یادولو، د کانګرس د استازو جرګې مشره نینسي پلوسي د افغانستان سفر لغوه کولو ته اړ کړې ده.

ټرمپ د جنورۍ پر ۱۷مه شپې ناوخته په یوه لیک کې پلوسي ته ویلي دي چې د هغې د کانګرس پلاوي د افغانستان سفر لپاره پوځي الوتکه نه ورکوي.

دا اقدام نوموړي پر داسې مهال کړی چې پلوسي او پلاوي یې د سفر تیاری کاوه.

ټاکل شوې وه چې د کانګرس دا پلاوی د بېلجییم برسلز کې دمه وکړي او بیا په افغانستان کې له امریکايي سرتېرو سره وویني.

په خپل لیک کې ټرمپ پلوسي ته ویلي دي چې په داسې حال کې چې د بجټ پر سر د لانجې له کبله حکومت په جزوي توګه بند دی او شاوخوا "اته لاکه امریکايي حکومتي کارکوونکو تنخا نه ده تر لاسه کړې" دی "باوري دی چې هغه به د دې سفر ځنډولو ته تیاره شي."

ټرمپ دا هم ویلي دي چې کله د حکومت چارې بیا پیل شي، نو دی به د "هغې دا اووه ورځنی سفر بیا پلان کړي."

په لیک کې نوموړي پلوسي او د کانګرس نورو غړو ته ویلي چې که وغواړي نو د سفر بندوبست دې خپله وکړي او په مساپر وړونکې الوتکه کې دې ولاړ شي.

پلوسي د نوموړي د دې اقدام په غبرګون کې لا څه نه دي ویلي.

په قبایلو کې د قانوني نظام نه شتون ګڼې ستونزې زېږولې دي: ګل ظفر خان

په قامي اسمبلۍ کې د باجوړ استازي او د واکمن تحریک انصاف غړي ګل ظفر خان د قبایلي اصلاحاتو پر بهیر نیوکې کړې دي او ویلي یې دي چې په هغو سیمو کې اوسمهال هېڅ قانوني نظام نه دی موجود.

دا خبره نوموړي د جنورۍ پر ۱۷مه د اسمبلۍ په غونډه کې پر داسې مهال کړې ده چې د مومندو ځېنې اوسېدونکي او مشران وايي، د قانوني نظام نه شتون له کبله هلته شاوخوا ۱۵۰ مقدمې ځنډېدلې دي.

دې خلکو پرون مشال راډیو ته وویل چې له هغه وخت راهیسې چې د پېښور های کورټ د قبایلو لپاره حکومتي لنډمهاله قانون غیر اییني بللی، د قبایلي سیمو انتظامیې د قضیو د هواري واک نه لري.

پېښور های کورټ تېر کال د اکتوبر پر ۳۱مه په یوه فیصله کې وویل چې په خیبر پښتونخوا د قبایلو تر ورګډېدو وروسته باید هلته د پاکستان قوانین او عدالتي نظام وغځول شي.

عدالت په فیصله کې ویلي ول چې د نومبر تر پای وروسته په هغو سیمو کې نافذ لنډمهاله قانون غیر اییني دی.

د خیبر پښتونخوا حکومت دریځ لري چې تر قبایلو د عدالتي او پولیسو نظام غځولو لپاره وخت ته اړتیا لري.

د دفاع وزیر پروېز خټک هم د قامي اسمبلۍ غړي ګل ظفر خان ته ډاډ ورکړ چې په قبایلو کې د صوبايي اسمبلۍ تر انتخاباتو وروسته به هلته زیاتره قانوني مسلې هوارې شي.

د پښتونخوا اعلا وزیر ډېره اسماعیل خان کې د صنعتي زونونو جوړولو اعلان وکړ

د خیبر پښتونخوا اعلا وزیر په ډېره اسماعیل خان کې د دوو صنعتي زونونو او د کرنیزو څېړنو مرکز پرانیستو اعلان کړی دی.

د پاکستان دولتي راډیو د جنورۍ پر ۱۸مه لیکلي چې محمود خان د جنورۍ پر ۱۷مه، په پېښور کې په یوه غونډه کې چارواکو ته امر وکړ چې د ګومل زام ډیم اړوند د اوبه خور مسلې دې هم هوارې کړي.

دولتي راډیو وايي، وزیراعلا ژمنه وکړه چې په ډېره اسماعیل خان کې د څښلو پاکو اوبو ستونزې حلولو لپاره هم جامع پلان جوړوي.

په سرپل ولایت کې طالبانو ۴۰ کورنۍ د مېنو پرېښودو ته اړ کړي: چارواکي

د افغانستان د شمالي ولایت سرپل چارواکو تور پورې کړی دی چې وسله والو طالبانو د کوهستانات ولسوالۍ شاوخوا ۴۰ کورنۍ خپلو کورونو پرېښودو ته اړ کړې دي.

د والي ویاند ذبیح الله اماني د جنورۍ ۱۷مې پر ماښام مشال راډیو ته وویل، دا کورنۍ اوسمهال د تن له جامو پرته نور هېڅ نه لري.

دی وايي، طالبانو ځکه دا خلک مېنو پرېښودو ته اړ کړل چې د کورنیو غړي یې حکومتي کارکوونکي ول.

اماني وايي، وسله والو دې خلکو ته ویلي چې یا دې له حکومت سره کار پرېږدي او یا دې سیمه.

دی زیاتوي، حکومت بېځایه شوې کورنۍ د ولایت مرکز ته کډه کړي او ورته د مرستو رسولو هڅه کوي.

وسله والو طالبانو د اماني دې ادعاو په اړه لا څه نه دي ویلي.

زرداري وايي د عمران خان حکومت پېنځه کاله نشي پوره کولای

د پاکستان پیپلز ګوند مشر او پخواني ولسمشر اصف علي زرداري دعوه کړې چې ده چې د تحریک انصاف حکومت ښايي خپله پېنځه کلنۍ موده پوره نه کړای شي.

نوموړي د جنورۍ پر ۱۷مه، د سیند په بدین ښار کې ولسي غونډې ته په وینا کې پر وفاقي حکومت نیوکې وکړې او ویې ویل چې په هېواد کې ګراني ورځ تر بلې زیاتېږي.

زرداري زیاته کړه:

(([د تحریک انصاف حکومت] له ولس سره هېڅ تعلق نه لري. دوی له ولسه نه دي راغلي او نه هم ولس ته د ورتګ [او د هغوی د غوښتنو اورېدو] اراده لري. زه نن درته وایم او ټول پاکستان دې یې واورئ چې [وزیراعظم] عمران خان به د واک پېنځه کاله پوره نه کړای شي.))

د پاکستان حکومت د زرداري د تازه څرګندونو په غبرګون څه نه دي ویلي خو په تېرو وختونو کې یې ویلي چې اقتصادي ستونزې له تېرو حکومتونو ورته په میراث کې پاتې دي.

وزیراعظم عمران خان په بیا بیا ویلي چې د هېواد اقتصادي حالت سمولو هڅې کوي او د دې لپاره یې اقدامات کړي دي.

چارواکي وايي په غزني کې پراخه پوځي عملیات پیلوي

په غزني کې د افغان ځواکونو عملیات به په لنډ وخت کې پیل شي

د افغانستان په غزني ولایت چارواکي وايي، په لنډ وخت کې به په دې ولایت کې پراخه پوځي عملیات پیل شي.

د غزني والي وحید الله کلیمزي د جنورۍ پر۱۶مه مشال راډیو ته وویل چې تازه له کابله ستون شوی او هلته ولسمشر اشرف غني په دې برخه کې ژمنه ورسره کړې ده.

هغه زياته کړه چې ولسمشر د امنیت ډاډ ورکړی چې هغه ولسوالي سقوط شوې دي، ځیني لویې لارې چې ناامنه دي او وسله وال طالبان هلته موجود دي په دې اړه به عملیات پيل شي.

کلیمزي دا و نه ویل چې عملیات به کله پیلېږي.

د غزني پکتیکا لویه لار وسله والو طالبانو په لاس کې ده او د غزني-کندهار لویې لارې ته هم هر وخت طالبان ورځي.

د دغه ولایت په ۱۸ولسوالیو کې د اکثرو امنیت ښه نه دی.

د برتانیې وزیراعظمې ټیریزا مې له پارلېمانه د باور رایه واخیسته

ټیریزا مې د نتیجې هرکلی کړی

د بریتانیا د وزيراعظمې ضد په پارلېمان کې د بې باورۍ اقدام ناکامه شوی دی.

تر دې مخکې د جنورۍ پر ۱۵مه د پارلېمان مطلق اکثریت له اروپایي ټولنې د هغې د وتلو پلان رد کړی وو.

د دې له کبله د اپوزيشن کارګرانو یا لېبر ګوند په پارلېمان کې د ټیریزا مې ضد بې باورۍ تحریک داخل کړ.

خو د جنورۍ ۱۶مې پر ماخوستن، د ټیریزا مې په حق کې ۳۲۵ او مخالفت کې يې ۳۰۶ غړو رایې ورکړې او هغه پر خپله دنده پاتې شوه.

نوموړې تر دې وروسته په وینا کې د نتیجې هرکلی وکړ او ژمنه یې وکړه چې له اروپايي ټولنې څخه د برتانیې ایستلو هڅو ته دوام ورکوي.

له قانون سره سم، برتانیا باید د مارچ تر ۲۹مې له اروپايي ټولنې ووځي.

یو شمېر کتونکي فکر کوي چې ښایي مې له ټولنې څخه د وتلو نېټه وځنډوي او یا بیا پر دې موضوع ټولپوښتنه وکړي.

امریکا د ځمکې مدار ته د ایرانۍ سپوږمکۍ استولو هڅه غندلې

امریکا د ایران له لوري د ځمکې مدار ته د سپوږمکۍ لېږدولو هڅه غندلې او خبرداری یې کړی چې واشنګټن له نړیوالو ارزښتونو څخه د ایران د دې بشپړې سرغړونې پلوي نه کوي.

د امریکا د بهرنیو چارو وزیر مایک پامپېو تر هغې څو ساعته وروسته بیان ورکړ چې ایران د جنورۍ پر ۱۵مه وویل، په یوه سپوږمکۍ یا سیټېلایټ سمبال راکټ یې له ځمکې خلا ته د استولو هڅه کړې چې ناکامه شوې.

د ایران دا هڅه او د امریکا سخت غبرګون په سیمه کې د ترینګلتیا زیاتېدو ته اشاره کوي.

واشنګټن غواړي پر تهران د اټومي او توغندیو پروګرامونو پر سر فشار زیات کړي.

د برتانیا پارلېمان د وزیراعظمې پلان رد کړ

ټیریزا مې له اروپايي ټولنې څخه د وتلو په اړه وینا وکړه

له اروپايي ټولنې څخه د وتلو یا برېګزیټ په اړه د وزیراعظمې ټیریزا مې پلان یا طرحه د برتانیې پارلېمان په غوڅ اکثریت رد کړه.

د پارلېمان ۲۰۲ استازو د طرحې په حق او ۴۳۲ یې په مخالفت کې رایې ورکړې.

دا د برتانیې په پارلېماني تاریخ کې ستره ماتې بلل کېږي.

د جنورۍ پر ۱۵مه، تر دې بدلون وروسته د اپوزیشن مشر جېرمي کوربېن غوښتنه کړې ده چې وزیراعظمه مې دې له پارلېمانه یو ځل بیا د باور رایه ترلاسه کړي.

ټاکل شوې نوموړې د جنورۍ پر۱۶مه له پارلېمانه د باور رایه وغواړي.

د ۲۰۱۶ز کال په جون کې په برتانیا کې له اروپایي ټولنې د وتلو په اړه ټولپوښتنه شوې وه چې خلکو په اکثریت د وتلو په حق کې رایې کارولې وې.

د کینیا پر هوټل په برید کې ۱۵ کسان وژل شوي

برید د پلازمېنې نایروبي په هغه سیمه کې شوی چې پکې بهرنیان اوسي او کار کوي

د کینیا چارواکي وايي، په پلازمېنه نایروبي کې پر یوه مجلل (پینځه ستوریز) هوټل د جنورۍ پر ۱۵مه په وسله وال برید کې د وژل شویو شمېر ۱۵ ته رسېدلی.

په وژلو کې ۱۱کینیايان، یو برتانیوی او یو امریکايی شامل دي.

د دې برید ذمه واري په القاعدې پورې ټړلې وسله والې ډلې الشباب منلې.

د کینیا د کورنیو چارو وزیر فرید ماتیانجي ویلي چې اوس د هوټل ودانۍ د پوځیانو په کنټرول کې ده او لسګونه کسان له سیمې ایستل شوي دي.

بریدګرو په هوټل کې ډزې کړي او د چاودنو غږونه اورېدل شوي.

د ۲۰۱۳ز کال په سېپټېمبر کې الشباب ډلې په نایروبي کې پر یوه لوی پلورنځای برید وکړ او تر درو ورځو یې خلک یرغمل کړي ول چې پکې ۶۷ کسان وژل شوي دي.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG