د پاکستان د کورنیو چارو وزیر چوهدري نثار علي خان ویلي د محرم پر مهال یې د هېواد په حساسو برخو کې د امنیت ټینګولو او فرقه ایزو شخړو د مخنیوي لپاره د ۱۶۰۰۰ نه زیات امنیتي ځواکونه ځای پر ځای کړي دي.
چوهدري نثار د چارشنبې پر ورځ په اسلام آباد کې رسنیو ته وویل چې دې لړ کې به شاوخوا ۱۰۰۰۰ پوځیان او ۶۳۰۰ ملیشه ځواکونه د امنیت په ټینګولو کې برخه واخلي.
د پنجشنبې پر ورځ په پاکستان کې د محرم اولنۍ ورځ ده. په دې هېواد کې اکثره د محرم په میاشت کې فرقه ايزې شخړې رامنځته کېږي.
په پاکستان کې نژدې شل فیصده(۲۰٪) شییعه ګان ژوند کوي او په تېره یوه لسیزه کې د فرقه ايزو شخړو په نتیجه کې په زرګونو کسان وژل شوي دي.
