اسلام اباد: د پاکستان په قامي اسمبلۍ کې د قبايلي سيمو استازو د چارشنبې په ورځ د یو قرارداد له لارې غوښتنه وکړه چې قبایلي سیمې دي په خیبر پښتونخوا ګډې کړل شي.
د دې سیاسي مشرانو په وینا ، د دې وړاندې شوي قرارداد بل هدف دا هم وو چې له قبایلي سیمو ټاکل شوو د پارلمان غړو ته دي د خپلو سیمو لپاره په قانون جوړونه کې برخه ورکړل شي.
په پارلمان کې د خيبر ايجنسۍ یو استازي شاه جی ګل اپريدي مشال راډیو ته وویل چې د قبایلي سیموټول ټاکل شوي استازي پر دې سره سلا دي چې د قبايلي سيمو په آئيني حثيت کې دي بدلون راوستل شي.
شاه جی ګل اپريدي وویل ، له قبایلي سیمو د پارليمان غړي به هڅه کوي چې د راتلونکې مياشتې له ۲۶مې نيټې کيدونکې د قامی اسمبلي غونډه کې د قرارداد دا مسوده د بحث لپاره وړاندې کړي.
د قبایلي سیمو په آییني حثیت کې د بدلون لپاره د قرارداد دا مسوده په پارلمان کې د کرمي ايجنسۍ غړي ساجد حسين توري وړاندې کړې وه.
