د ایران ولسمشر حسن روحاني وايي، هیواد یې تیار دی چې د شام د کورنۍ جګړې د پای ته رسولو پر لارو چارو له امریکا او سعودي عربستان سره وږغېږي.
ولسمشر حسن روحاني دا څرګندونې د سېشنبې په ورځ په تهران کې یوې خبري غونډې ته د وینا پر مهال وکړې.
نوموړي وویل ، که یې چېري نتیجه د شام لپاره یو خوندي، ارام او جمهوري راتلونکی وي نو ایران له سیمه ییزو هیوادونو او نړیوالو سره خبرو اترو ته کښېني.
خو د ولسمشر حسن روحاني په وینا، ایران به تر هغه وخته د ولسمشر بشارالاسد پر راتلونکي بحث ونه کړي تر څو چې په شام کې امن نه وي پر ځای شوی.
ده وویل ، زموږ لومړی هدف دا دی چې د وینې بهېده ودروو، امنیت ټینګ کړو او خلکو ته زمینه برابره کړو چې خپلو کورونو ته ستانه شي او له هغه وروسته به د راتلونکي په اړه خبرې کوو.