په شمالي وزیرستان کې مو روغ کور ونه لید. روف لالا
د پاکستان پوځ پرون «یکشنبه، اتوار» شمالي وزيرستان ته د سېنېټ دفاعي کمېټې غړي بيولي ول او هلته يې ورته د ضرب عضب عملياتو د موثريت په اړه معلومات ورکړل او ځېنې ځايونه يې ورته وښودل. په تللو غړیو کې د پښتونخوا ملي عوامي ګوند سيڼتر عبدالروف چې په روف لالا شهرت لري، هم شامل وو. نوموړی وايي پوځ ورته وويل چې د ټولو وسله والو مرکزونه يې له منځه وړي او د مارچ له مياشتې به د وزيرستان بې کوره کړل شوي کډوال په دريوو مرحلو کې خپلو کورونه ته ستنېدل پیل کړي. له روف لالا سره د مشال راډيو له همکار بشيرګواښ مرکه کړې او په سر کې يې ترې پوښتلي چې په شمالي وزيرستان کې يې څه وليدل؟