کردي ځواکونو د اسلامي دولت ډله د عراق په شمالي ښار سنجر کې پر شا تمبولې ده.
د راپورونو له مخې په دې ښار کې پرون«ګل ورځ» د چاودنو او درنو نښتو اوازونه اورېدل شوي.
د عراقي کردانو مشر مسعود بارزاني په سنجر ښار او نژدې سیمو کې له اسلامي دولت ډلې سره د کردي پېشمرګه ځواکونو په جګړه کې د یوې ستراتیژیکې بریا ادعا وکړه او ویې ویل:
(شکر د خدای موږ د ټولو لارو ولکه ټینګه کړه او د سنجر غرونو محاصره مو ماته کړه. موږ نن د خدای شکر پرځای کوو چې ټوله سیمه مو ازاده کړه. د سنجر ښار ازادي زموږ په پلان کې نه وه، خو موږ د دې ښار یوه لویه برخه ونیوله)
په تېره اګست میاشت کې د اسلامي دولت ډلې د حملو پرمهال د یزیدي مذهبي اقلیت زرګونه پیروکار له سنجر ښاره تښتېدلي ول.