د لاسرسي ځای

تازه خبر

خبرونه

په شام کې د ټولپوښتنې چین ملاتړ کړی

چین وايي دوی د شام د ولسمشر بشارالاسد له خوا په هیواد کې د تشدد د پای ته رسولو لپاره د ټول پوښتنې د پلان ملاتړ کوي.

دا خبره د چین د بهرنیو چارو مرستیال وزیر ژهايي نن له هغه وروسته وکړه چې په دمشق کې یې له ولسمشر بشارالاسد سره لیده کاته وکړل.

د چین د بهرنیو چارو مرستیال وزیر ژهايي یون وویل.

دی وايي ( چین د تشدد د پای ته رسولو غوښتنه کوي. چین د شام له ټولو ګوندونو غوښتنه کوي چې پر یوه ځای خبرو ته سره کښېني ، چې یوه پراخ پلان ته د رسېدلو لپاره خبرې وشي ).

بشارالاسد د چارشنبې په ورځ د نوي قانون لپاره د فرورۍ پر شپږویشتمه د ټول پوښتنې او له هغه وروسته د داسې انتخباتو اعلان وکړ چې ډېر ګوندونه به په کې برخه اخلي. خو په دې هیواد کې اپوزېشن دا پلان شرمناک بللی دی او وايي چې حکومت به درغلي وکړي.

په عین حال کې د بشري حقونو کارکونکي وايي چې امنیتي ځواکونو نن پر هغو کسانو ډزې وکړې چې په دمشق کې د احتجاج په ترڅ کې د وژل شوو په جنازه کې راغونډ شوي وو. دوی وايي په دې کې لږ تر لږه یو تن وژل شوی دی.

د نننۍ ورځې ټول خبرونه وګورئ

نن د سایکل نړیواله ورځ لمانځل کېږي

انځور له ارشیفه

نن د جون پر درېمه د ملګرو ملتونو تر سیوري لاندې د سایکل نړیواله ورځ لمانځل کېږي.

د ورځې لمانځلو مرام دا حقیقت منل دی چې سایکل یوه ارزانه سورلۍ ده چې له تېرو دوو پیړیو راهیسې خلک کاروي، او د تګ راتګ او یو بل سره د اړیکو ټینګو ساتلو لپاره ګټه ترې پورته کوي.

د سایکل سورلي ساده ده او د چاپیریال لپاره هم ښه ګڼل کېږي.

دا ورځ اوس د ښه جسماني او ذهني صحت له تصور سره تړلې ده او د شکرې رنځورانو لپاره ګټه لري.

ملګرې ملتونه د دې ورځې په لمانځلو سره په نړۍ کې پر هېوادونو غږ کوي چې د پرمختیایي ستراتیجۍ د جوړولو پر مهال په مقامي، سیمه ایزه او بین المللي کچه، د بایسیکل له وړتیا سترګې پټې نه کړي.

نېب دې د شهباز شریف د نیولو ډډه وکړي: لاهور های کورټ

شهباز شریف د خپلو کارکنانو په منځ کې

لاهور های کورټ د احتساب قامي اداری (نېب) ته امر کړی، چې تر ۱۷مه جونه دې د مسلم لیګ (ن) د مشر شهباز شریف د نیولو څخه ډده وکړي.

عدالت نن [د جون پر درېمه] تر ګرفتارۍ وړاندې ضمانت په اړه د شهباز شریف د خواست اورېدنه وکړه او نوموړی يې د پنځه لکو روپو په ضمانتي مچلکه خوشې کړ.

له عدالتي فېصلې وروسته د مسلم ليګ ن يو مخکښ احسن اقبال يو وارې بيا پر حکومت د انتقامي سياست کولو تورونه په پورې کولو سره په لاهور کې رسنيو ته وويل حکومت نیب د اپوزيشن ګوندونو نه انتقام اخيستو لپاره کاروي.

د احسن اقبال د تورونو په جواب کې د حکمران ګوند پاکستان تحريک انصاف پارليماني استازي صداقت علي عباسي مشال راډيو ته وويل نیب يوه خودمختاره اداره ده او د حکومت نه بلکه په خپله خوښه کار کوي.

د احتساب قامي اداره غواړي چې شهباز شریف له امدنه د زیاتو اثاثو په مقدمه کې ګرفتار کړي او د نهې پر ورځ یې په لاهور کې د هغه پر کور چاپه هم وهلې وه.

نیب د شهباز شریف پرضد د درغلۍ د یو شمیر قضیو پلټنې کوي خو نوموړی د درغلۍ تورونه ردوي او څلور میاشتې يې د یادې ادارې په حراست کې هم تېرې کړې دي.

په هرات کې یو شمېر ډاکترانو خپلې دندې پرېښي

ارشیف

د افغانستان په هرات ولایت کې په کورونا وایرس د اخته کسانو د درملنې د روغتون ۱۳ ډاکترانو د کاري ساعتونو د زیاتېدو او په روغتون کې د امکاناتو د کموالي له کبله استعفی وکړه.

مسعود میرزايي چې ده هم استعفی کړې د جون پر دویمه ناوخته مشال راډیو ته وویل، دوی په کورونا وایرس اخته کسانو ته کافي امکانات نه لري او په روغتون کې د مړینو شمېر هم زیات دی.

هغه زیاته کړه: "زموږ د استفعی یو دلیل د امکاناتو کموالی دی، په دې معنی چې د ناروغانو پایوازان د خپلو ناروغانو د مړینې پوښتنه له موږ کوي، هېڅ امکانات نه‌ شته، هره شپه له اته تر ۱۰ پورې ناروغان مري، خو روغتیا ریاست یوازې د دوو ناروغانو مړینه اعلانوي."

دغو ډاکترانو ویلي، چې له درېیو میاشتو معاشونه هم نه ‌دی ورکړل شوي.

خو په هرات کې د کورونا وایرس په وړاندې د مبارزې مسؤل زمری حَصین مشال راډیو ته وویل، دوی د دغه روغتون د ستونزو د حل هڅه کوي.

حصین دا نه مني چې په کورونا وایرس د اخته کسانو د درملنې روغتون دې امکانات ونه لري.

په هرات کې په کورونا وایرس د اخته کسانو شمېر تر ۲۹۰۰ اوښتی او ۵۸ کسان په دې ویروس تر اوسه په دغه ولایت کې مړه شوي دي.

امریکا یو ایرانی ساینسدان له بري کېدو پس له هېواده وشړلو

ایرانی ساینسپوه سیروس اصغري

ایراني چارواکي وايي، ساینسپوه سیروس اصغري له یې له امريکا وتلی او خپل هېواد ته ورروان شوی دی.

دوی دا نه مني، چې د اصغري خوشې کېدل دې د واشنګټن او تهران ترمنځ د بندیانو د تبادلې د موافقې یوه برخه وي.

اصغري چې د ایران د شریف صنعتي پوهنتون ښوونکی دی، په امریکا کې نیول شوی و.

هغه په ۲۰۱۶م کال کې د امریکا د اوهایو ایالت د پوهنتون له یوې تحقیقاتي پروژې د تجارتي رازونو د پټولو په هڅو تورن کړل شوی و.

۵۹ کلن اصغري، تورونه رد کړي، د ۲۰۱۹م کال په نومبر میاشت کې له تورونو سپین اعلان شو.

د ایران د بهرنیو چارو وزارت ویاند عباس موسي ویلي، ټاکل شوې چې اصغري نن (د جون درېمه) ایران ته ورسېږي.

امریکا د تېر (۲۰۱۹م) کال په ډيسمبر میاشت کې د یوه چینايي الاصله امریکايي څېړونکي ژیاو وانګ په بدل کې د مسعود سلیماني په نوم یو ایرانی ساینسپوه تبادله کړی و.

د امریکا په یو شمېر ښارونو کې ګرځبدېز لګېدلی

انځور له ارشیفه

په امريکا کې له نيويارکه نيولې بيا تر لاس اېنجلسه په لسګونو ښارونو کې ګرځبدیز لګېدلی.

دا اقدام له هغه وروسته پورته کړل شوی چې په هغه هېواد کې د پوليس لخوا د يوه تورپوستي له وژل کېدو وروسته پرون د جون پر دوهمه په اوومه ورځ هم په بېلا بېلو ايالتونو کې لسګونه زره کسانو مظاهرې وکړې خو په ځېنو سيمو کې د شپې مهال تشدد او لوټل هم وشول.

اخوا ولسمشر ډونلډ ټرمپ د ايالتونو پر ګورنرانو فشار زيات کړی چې د حالاتو کنټرولولو لپاره ملي ساتندويان وروغواړي.

ټرمپ له دې وړاندې ويلي ول چې که ګورنران پرېکنده ګام وانخلي نو دی به له پوځي عملياتو کار واخلي. نوموړي ويلي ول چې د بلوو او شوکو بندولو لپاره به ټولې پوځي او سرکاري سرچینې وکاروي.

په دغه هېواد کې وروستۍ بلوې او مظاهرې له هغه وروسته پيل شوي چې د مې پر ۲۵مه د مینيسوټا ریاست په مینیاپولیس ښار کې جارج فلویډ نومی یو بې وسلې تورپوستی تن د پولیس لخوا د نیولو پر مهال ووژل شو.

د فلویډ په وژنه تورن پولیس افسر نیول شوی دی.

کابل: جومات کې چاودنې دیني عالم مولوي نیازی وواژه

مولوي محمد ایاز نیازی

د افغانستان د سرښار کابل په وزیر اکبر خان جومات کې بمي چاودنې د دغه جومات خطیب مولوي محمد ایاز نیازي وژلی دی.

د کورنیو چارو وزارت وايي چې پېښه تېر ماښام شاوخوا اووه نيمي بجې هلته له مخکې پټ کړل شوي بم له چاودېدو رامنځ ته شوه.

د وزارت وياند طارق ارين وايي چې په چاودنه کې د مولوي نيازي په ګډون دوه کسان وژل شوي او دوه نور ژوبل شوي دي.

د افغان ولسمشر دفتر پرون ناوخته په يوه اعلاميه کې ويلي چې پر جوماتونو، تکایاوو، روغتونونو، ولسي وګړو او عامو ودانيو ترهګر بریدونو کول بشري ضد جنایت دی.

وسله والو طالبانو په دغه چاودنه کې لاس لرل رد کړي او تر اوسه کومې بلې وسله والې ډلې هم د دغه بريد مسوليت نه دی منلی.

د ایران پارلماني غړی یې وايي د نومبر مظاهرو ۲۳۰ تنه وژلي

د ایران د پارلمان د ملي امنیت او بهرنیو چارو د کمېټې مشر مجتبی ذالنور

د ایران پارلمان یو مهم غړي څرګنده کړې چې د نومبر په میاشت کې په دې هېواد کې د حکومت ضد مظاهرو پر مهال ۲۳۰ کسان وژل شوي دي.

دا خبر د ایرنا دولتي خبري اژانس ورکړی دی. دا لومړنی ځل دی چې د ایران د پارلمان یو غړی د تېرو اعتراضونو پر مهال د مرګ‌ژوبلې شمېرې وړاندې کوي.

د تېر کال د نومبر په میاشت کې په ایران کې د تېلو د بیو لوړېدل د حکومت پر ضد د پراخو اعتراضونو سبب شول.

په ایران کې کې د ۱۹۷۹ میلادي کال د اسلامي انقلاب راهیسې، د تېر کال د نومبر څلور ورځني اعتراضونه تر ټولو پراخ او له تاوریخوالي سره مل ګڼل کېږي.

د ایرنا خبري اژانس د راپور په حواله د ایران د پارلمان د ملي امنیت او بهرنیو چارو د کمېټې مشر مجتبی ذالنور ویلي، په دې اعتراضونو کې ۲۳۰ کسان وژل شوي چې په پنځو کې یو یې د امنیتي ځواکونو غړی و.

د نوموړي په وینا په وژل شویو کې له څلورو یو تن له لارویانو و چې اعتراضونو کې یې لاس نه‌درلود او یو شمېر یې له نږدې واټن څخه په سر او سینې په مردکیو لګېدلي وو.

ذالنور ادعا کړې چې امنیتي ځواکونو له اعتراض کوونکو څخه ډیر واټن درلود او دا کسان د امنیتي ځواکونو په ډزو نه‌دي لګېدلي.

نوموړی وايي، یو زیات شمېر کسان پر داسې مردکیو لګېدلي چې په ایران کې یې کارول معمول نه‌دي.

په دې اعتراضونو کې تر ۲،۰۰۰ زیات کسان ټپیان شوي هم وو.

د بخښنې نړیوال سازمان د دې اعتراضونو پر مهال د وژل شویو شمېر ۳۰۴ تنه بللی دی او هغوی چې له مسئلې خبر دي وايي، د ۱۲ ماشومانو په شمول په دې اعتراضونو کې ۴۰۰ کسان وژل شوي دي.

امریکا بیا د وژل شویو کسانو شمېر زر تنه بللی دی.

کندوز کې چاودنې ۷ کارګران وژلي او ۶ ټپیان دي

د کندز نقشه

افغان چارواکي وايي، په کندوز ولايت کې د سړک غاړې بم چاودنه کې اوه ولسي وګړي وژل شوي او شپږ نور ټپيان دي.

دا چاودنه په داسې حال کې شوې چې تېره اوونۍ د حکومت او طالبانو له خوا د اوربند تر اعلان وروسته په دې هېواد کې تاوتريخوالي کې کم شوی دی. د جون پر لومړۍ نېټه د کندوز په خان اباد ولسوالی کې يو ټرک چې پکې کارګران سپاره ول د چاودنې ښکار شو.

هيڅ يوې ډلې د بريد پړه نه ده منلې خو د کندوز ولايت وياند عصمت الله مرادي وايي چې شک يې پر طالبانو دی.

نوموړي وويل چې طالبانو د امنيتي ځواکونو په نښه کولو لپاره د سړک غاړې بم ښخ کړی خو دغسې بمونه تل ولسي وګړي وژني.

ولسوال حيات الله اميري وايي چې په ټپيانو کې د دوو حالت نازک دی.

سپریم کورټ له سیند خکومته د خبریال ډینیل پرل ټول ریکارډ غوښتی

امريکايي خبريال ډېنيېل پرل

پاکستان سپريم کورټ د سيند حکومت ته حکم کړی چې د وژل شوي امريکايي خبريال ډېنيل پرل په مقدمه کې دې ټول ريکارډ وړاندې کړي.

سيند حکومت د سيند های کورټ د اپرېل پر دوهمه ورکړې هغه فيصله په سپريم کورټ کې چېلنج کړې چې له مخې يې د ډېنېل پرل په وژنه کې ککړ د عمر سعيد شيخ د عمري بند سزا په اوه کاله بند اړولې وه او درې نور کسان يې خوشي کړي ول.

په پنځو ججانو مشتمل د سپريم کورټ ججانو د جون پر لومړۍ نېټه د اورېدنې پر مهال د سيند حکومت وکيل ته وويل، دوی چې کومې قانوني نکتې راپورته کړي او کوم دستاويزونه يې وړاندې کړي هغه نيمګړي دي. عدالت حکم ورکړ چې د جون ۱۵مې په اورېدنه کې دې پوره رېکارډ وړاندې کړل شي.

د وال سټريټ جورنال خبريال ډېنېل پرل په په ۲۰۰۲ ز کال کې په کراچۍ کې د تښتونې وروسته وژل شوي وو. پوليسو په دې تور له القاعده سره تړاو لرونکی عمر سعيد شيخ او درې نور کسان نيولي ول. وروسته د کراچۍ ترهګرۍ يو عدالت تورن کسان په مجرم ګرځولو سره سزا کړل.

امریکا کې مظاهره کوونکو ته د ډونالد ټرمپ خبرداری

د امریکا ولسمشر ډونالد ټرمپ

د امریکا ولسمشر ډونالد ټرمپ پیتلې که د دغه هېواد د ریاستونو ګورنران پرېکنده ګام وانخلي نو نسلي ناارامي به په پوځي ځواک ختمه کړي.

نوموړی وايي د بلوو او شوکو بندولو لپاره به ټولې پوځي او سرکاري سرچینې وکاروي.

ولسمشر ټرمپ د جون پر لومړۍ نېټه وویل، که د ریاستونو ګورنران یې سپارښتنې ونه مني نو د نېشنل ګارډ دومره ځواکونه به وګوماري چې تولې لارې کوڅې به ولکه کړي.

نوموړي د مې پر ۳۱مه له تشدده ډکو بلوو غندنه کړې ده.

د امریکا ولسشمر د خانه جنګۍ د وخت یو قانون ترمخه په انتهايي حالاتو کې په هېواد کې دننه هم پوځ ځای پر ځای کولای شي چې زیاتره یې له قدرتي افتونو سره د مبارزې پر مهال کارول شوي دي.

په دغه هېواد کې دا وروستۍ بلوې هله ولګېدې چې د مینيسوټا ریاست په مینیاپولیس ښار کې جارج فلویډ نومې یو بې وسلې تورپوستی تن د پولیس لخوا د نیولو پر مهال ووژل شو.

د فلویډ په وژنه تورن پولیس افسر نیول شوی دی.

غني له پامپیو سره پر افغان سوله غږېدلي

د افغانستان ولسمشر محمد اشرف غني او د امریکا د بهرنیو چارو وزیر مایک پومپیو. انځور له ارشیفه

افغان ولسمشر اشرف غني د امریکا د بهرنیو چارو له وزیر مایک پامپیو سره د ویډیو کنفرانس له لارې د افغانستان سولې بهیر په اړه خبرې کړي.

پامپیو ویلي چې د امریکا اساسي هدف د اوږد مهاله ستراتیژيکو اړیکو د دوام په چوکاټ کې یوموټی، خپلواکه، جمهوري او باثباته افغانستان دی او دې هدف ته د رسېدو لپاره به له افغان حکومت سره یو ځای کار وکړي.

له بلې خوا د افغانستان د سولې لپاره د امریکا ځانګړي استازي زلمي خلیلزاد د جون پر لومړی د انترنیت له لارې خبریالانو ته وویل چې د افغانستان سولې په برخه کې پرمختګ شوی او هیله یې وښوده چې د تاوتریخوالي کچه به ټېټه پاتې شي چې دا راز بین الافغاني خبرې پيل شي.

نوموړي زیاته کړې چې د وړوکي اختر د اوربند وروسته په افغانستان کې د تشدد کچه نسبتاً کمه شوې ده.

سعودي سرکار ۹۰ زره جوماتونه بیرته پرانیستل

سعودي عربستان کې یو جومات

په سعودي عربستان کې له مکې مکرمې پرته د نورو ښارونو زرګونه جوماتونه چې د کرونا ویروس د مخنیوي د اقداماتو په ترڅ کې بند شوي و نن د لومړي ځل لپاره بیا پرانیستل شول، خو لمونځ کوونکو ته ویل شوي دي چې د دې وبا د مخنیوي پر لارښوونو به ټینګ عمل کوي.

د سعودي حکومت شاوخوا ۹۰ زره جوماتونه وروسته له دې چې د هغو پر غالیو، د اوداسه پر ځایونو او الماریو یې عفوني ضد مواد وپاشل پرانیستل.

د سعودي د اسلامي چارو وزارت وايي د 'SMS' له لارې په میلیونونو پیغامونو کې یې خلکو ته د لمانځه د دوه متره فاصلې د ساتنې، د ماسک د جبري اغوستو او په لاس او غېږو د روغبړ نه‌کولو په ګډون د نویو لارښوونو خبر ورکړی دی.

د نویو ګامونو له مخې د جوماتونو دروازې له لمانځه ۱۵ دقیقې مخکې پرانیستل کېږي او د لمانځه له خلاصېدو ۱۰ دقیقې وروسته بندېږي.

د مکې مکرمې جوماتونه لاهم د وګړو پر مخ بند دي، خو په بیت‌المقدس کې د الاقصی جومات چې له مکې او مدینې وروسته د مسلمانانو درېم سپېڅلی مکان ګڼل کېږي هم پرانیستل شوی دی.

د سولې هڅو کې د افغانانو ترڅنګ یو: جرمن سفیر

په افغانستان کې د جرمني سفیر پیټر پروګل

په افغانستان کې د جرمني سفیر پیټر پروګل وایي چې هېواد به‌ یې له ترهګرۍ سره د مبارزې او د سولې په هڅو کې د افغانانو ترڅنګ ولاړ وي.

هغه دا خبره د جرمني سفارت ته نږدې د مې ۳۱مه د خونړي برید د درېم تلین په مناسبت کړې.

پروګل په یکشنبه په خپل ټویټر لیکلي چې په سفارت کې یې دننه د دې برید د قربانیانو یادغونډه جوړه کړې وه.

درې کاله وړاندې د کابل په یوه ډیپلوماټیکه ساحه کې د جرمني سفارت ته نږدې موټر بم چاودنه وشوه چې په‌کې له ۱۵۰ زیات کسان مړه او تر ۴۰۰ نور ډېر کسان ټپیان شول.

په وژل شویو کې د جرمني سفارت یوه ډیپلوماټه او یو افغان ساتونکی او په ټپیانو کې د جرمني او جاپان د سفارتونو یو شمېر کارکوونکي شامل و.

په دغه لوی برید کې ۹۰ فیصده مرګ‌ژوبله ملکیانو ته اوښتې وه.

دغه برید د جرمني د سفارت د ودانۍ زیاته برخه ورانه کړې وه او له امله‌یې جرمني په کابل کې خپل قونسلي خدمات بند کړل. افغان چارواکو دا برید د حقاني شبکې کار بللی و.

امریکا کې د یوه تور پوستي د وژنې په غبرګون احتجاجونه دوام لري

امریکا کې اعتراضونه

امريکا کې د پوليس د حراست پر مهال د يوه تورپوستې بې وسلې کس د وژنې په اړه د نسلي انصاف غوښتو په خاطر په ټول هېواد کې روان احتجاجونو د مې پر ۳۱مه نېټه هم دوام وکړ. وژنه د ميناسوټا رياست په ميناپولس ښار کې شوې وه.

مظاهرې د امريکا په ۷۵ ښارونو کې شوې او ځینو ریاستونو پر ولسي ناامنيو د قابو مندلو لپاره د نېشنل ګارډ په نوم ځانګړي ځواک ځای پر ځای کړی. په سلګونو مظاهرچيان نيول شوي هم دي.

سي اېن اېن ټيليويژن ويلي، د لاس اېنجلس، شګاګو او ډيترياټ په ګډون د امريکا په ۴۰ ښارونو کې کرفيو لګول شوې ده. د مې پر ۲۵ مه د ۳۶ کلن جورج فلويډ تر وژل کېدو وروسته د هېواد په کچه خلکو د غوسې اظهار پیل کړ.

د ميناسوټا رياست چارواکي وايي، پوليس افسر ډيريک شاون د جورج فلويډ په وژنه تورن ګرځول شوی او په پېښه کې ښکېل افسران يې له دندو ګوښه کړي دي.

د سوات سوداګرو او هوټل مالکانو د کاروبار خلاصېدو غوښتنه وکړه

د سوات ماهوډنډ یوه سېلانۍ سیمه ده

د مې پر ۳۱ مه نېټه په مېنګوره کې په يوې بېړنۍ غونډه کې دوی وويل، د کورونا وايرس له کبله د اعلان شوي ټولبند له وجې دوی له لوی مالي زيان سره مخامخ دي.

د هوټل اېسوسي اېشن مشر زاهد خان وويل، د يوې اندازې له مخې په سوات کې له سېلګرۍ سره تړلي کاروبارونو ته تراوسه پورې يوه نېم ارب روپۍ تاوان رسېدلی دی. په غونډه کې د کالام هوټل اېسوسي اېشن مشر عبدالودو ، د ملاکنډ تجارو اتحاديې مشر عبدارحيم او د واکمن ګوند تحريک انصاف د اسمبلۍ غړي ميا شرافت علي هم ګډون وکړ.

د پاکستان حکومت د کورونا وايرس د خپرېدو د مخنيوي لپاره ټولبند اعلان کړی وو چې وروسته بيا پکې تر وړوکي اختر له مخه لږ څه نرمي وکړه خو د تجارو اتحاديې د ټولبند په بشپړتوګه د ختمولو غوښتنه کوي.

کابل: د خورشید ټلوېزیون پر موټر چاودنه کې ۲ تنه وژل شوي

د خورشید ټلویزیون په کارکونو برید

د افغانستان کورنیو چارو وزارت وایي، د مې پر ۳۰مه، د خورشید ټلوېزیون د کارکوونکو پر موټر چاودنې دوه تنه وژلي او څلور نور یې ټپیان کړي دي.

د دغه وزارت د ویاند مرستیاله مروه امیني وایي، قربانیان ټول د همدې ټلوېزیون کارکوونکي دي چې په هایس ډوله موټر کې کورونو ته روان وو.

چاونه مازدیګر مهال د کابل ښار د کلوله پشتې څلور لارې ته نږدې د مقناطیسي ماین له کبله شوې ده.

طالبانو په دغې پېښه کې لاس لرل رد کړي او تر اوسه د دغې چاودنې مسولیت کومې ډلې په غاړه نه‌ دی اخیستی.

تېر کال هم د کابل ښار تایمني سیمه کې د دغه ټلوېزیون د کارکوونکو پر یوه موټر د چسپکي ماین چاودنه کې د یوه لاروي په شمول دوه تنه وژل شوي او ۳ تنه ټپيان شوي وو.

د افغانستان د خبریالانو د خوندیتوب کمېټې او نورو ادارو د خورشید تلویزون په کارکونکیو شوی برید غندلی دی.

د نړۍ یو شمېر لویو ښارونو ټولبند ختمېږي

په جون میاشت کې سینګاپور ښار هم د تجارت لپاره پرانېستل کېږي.

د نړۍ په یو شمېر لویو ښارونو کې د کورونا له وجې لګول شوي بندیزونه په ورو ورو د نرمېدو په حال کې دي.

سېنګاپور، ټوکیو، نیویارک او واشنګټن هغه ښارونه دي چې په جون میاشتې کې به یو وارې بیا پرانېستل شي. همدا راز د نړۍ د یو شمېر نورو ښارونو د ټولبند حالت د ختمولو هڅې هم روانې دي.

دا په داسې حال کې ده چې په نړۍ کې د کورونا وایرس څخه د بیمارو شویو کسانو شمېر ۶۰ لکو نه اوښتی دی. همدا رنګه نږدې ۳۷۰ زره کسان کورونا وژلي خو له ۲۵ لکو نه زیات ترې بیرته جوړ شوي هم دي.

په امریکا کې د یو تن د وژل کېدو خلاف مظاهرې شوې دي‌

په امریکا کې مظاهرې

په امریکا کې د یو تور پوستي تن د وژل کېدو خلاف مظاهرې د لا پراخېدو په حال کې دي.

د جارج فلویډ په نوم دغه تن تېره اوونۍ په مینیا پولیس ښار کې د یو سپین پوستي پولیس افسر لخوا د تشدد پر مهال وژل شوی و.

له پرونه راهېسې د امریکا په اکثرو ایالتونو کې خلکو د پولیسو د دې اقدام پرضد مظاهرې پیل کړې دي.

د مې پر۳۰مه د امریکا د ملي ګارډ سرتېري له سهاره راهېسې په واشنګټن ډي سي ښار کې ولاړ دي.

هلته یو شمېر پارېدلو مظاهره کوونکو د سپینې ماڼۍ د باندې د ولسمشر ډونلډ ټرمپ پرضد شعارونه ورکړي.

که څه هم په زیاتو سیمو کې مظاهرې سوله ییزې دي، خو په یو شمېر سیمو کې بیا د تشدد او اړي ګړي راپورونه هم ورکړل شوي دي.

د اړي ګړي راپورونه له میناپولیس، میني سوټا، مشیګن، اټلانټا، جارجیا، رچمنډ، ورجینیا او اوهایو ښارونو څخه رارسېدلې دي.

چین د هانګ کانګ خپلواکي تر پښو لاندې کړې: ټرمپ

د امریکا ولسمشر ډونالډ ټرمپ

د امریکا ولسمشر ډونلډ ټرمپ پر چین تور لګولی چې د هانګ کانګ خپلواکي تر پښو لاندې کوي.

په داسې حال کې چې د دغو دواړو طاقتونو ترمنځ ترینګلتیا زیاته شوې، دا د بیجنګ خلاف د واشنګټن د غبرګونونو د لړۍ نوې کړې ده.

ټرمپ د مې پر ۲۹مه په سپینې ماڼۍ کې وویل، خپلې انتظامیې ته یې امر کړی چې د هانک کانګ ځانګړی تجارتي امتیاز دې ختم کړي.

د نوموړي په وینا، د چین لخوا وضع شوي نوي امنیتي قانون پس د هانک کانګ خپلواک حیثیت نه دی پاتې.

چین د مې ۲۹مه په هانګ کانګ د امنیت د نوي ملي قانون قانون منظوري ورکړه چې امریکا یې پرضد ده.

خو د چین وزیر اعظم لي ـ کیق ـ یانګ تېره ورځ ویلي وو چې دا قانون سازي به د هانګ کانګ استحکام او هوساینه زیاته کړي.

تورخم لار د سوداګرۍ او محدود تګ راتګ لپاره پرانستل شوه

د تورخم دروازه

د تورخم دروازه په پاکستان کې د بند پاتې افغان مسافرو او په افغانستان کې د پاکستاني بندپاتې وګړو د تګ راتګ پر مخ پرانیستل شوه.

د ننګرهار د چارواکو په خبره، تورخم دروازه به یوازې نن[د مې پر ۳مه] لپاره پرانستې وي او په افغان مسافرو یې غږ کړی چې له دې فرصته دې استفاده وکړي.

د ننګرهار د چارواکو په خبره، راستنیدونکو مسافر ته یې بشپړ روغتیایي تدابیر نیولي.

پاکستان د کورونا وایرس د مخنیوي لپاره د تورخم او چمن لارې د مارچ له ۱۶مې راهېسې بندې کړي خو په منځ منځ کې یې په خال خال ورځو کې خلکو ته د تګ راتګ اجازه ورکړې ده.

پاکستان د مې له ۱۶مې راهېسې د تورخم لاره د ۲۴ ساعته تجارت لپاره یو وارې بیا پرانېستې ده.

د کوټې په هزاره ټاون کې یو تن وژل شوی

هزاره ټاون، انځور له راشیفه

د کوټې هزاره ټاون کې د نامعلومو کسانو په تشدد یو کس وژل شوی او دوه نور ژوبل شوي دي.

ژوبل تنان دا مهال د کوټې په سیول روغتونو کې تر درملنې لاندې دي، خو روغتیايي‌ حالت یې ښه نه دی.

د بلوچستان د پولیسو مرستیال مشر عبدالرزاق چیمه د مې پر ۳۰مه مشال راډیو ته وویل چې دا پېښه تېر ماسختن شوې ده.

چیمه وايي، په دې پېښه کې یو ۲۳ کلن ځوان وژل شوی او هغوی ۱۱ کسان د شک په بنیاد نیولي دي.

هغه وايي، د پېښې پلټنې روانې دي، خو تر دې مهاله د پېښې اصلي علت نه دی معلوم.

راپورونه وايي، د مې پر ۲۹مه چې پولیس د پېښې ځای ته ورسېدل او زخمیان یې له تشدد کونکیو ژغورل نو ځینو نامعلومو کسانو پر هغوی هم برید وکړ چې په نتیجه کې یې ډي اېس پي ایاز حیدر او اېس اېچ او عزت الله هم ژوبل شول.

طالبانو په لوګر کې د افغان ځواکونو شپږ سرتېري له بنده ازاد کړي

د مې پر ۲۹مه طالبانو د لوګر په ولایت کې د افغان ځواکونو شپږ سرتېري چې هغوی سره بندیان وو، له زندانه خوشي کړي دي.

د مې پر ۳۰مه په لوګر کې د ملي اردو د لواء ویاند تورن احمد شکیل تسل مشال راډیو ته وویل، خوشي شوي سرتېري یادې لواء پورې اړوند وو، چې تېره شپه طالبانو خوشي کړي دي.

ده زیاته کړه، خوشي شوې طالبان دا مهال د لوګر په ملي امنیت ریاست کې دي.

نوموړي ونه ویل، چې طالبانو یاد کسان په کوم ځای کې خوشي کړي او دې سرتېرو څومره موده له طالبانو سره په بند کې تېره کړې ده.

احمد شکیل تسل همدارنګه وویل، تېره اونۍ د څرخ په ولسوالۍ کې د ملي اردو درې سرتېري چې طالبانو سره بندیان ول، د هغوی له زندانه تښتیدلي ول.

د افغانستان او استرالیا کرکټ ملي لوبډلې ټېسټ لوبه کوي

افغان ملي لوبډله

ټاکل شوې چې د افغانستان د کرکټ ملي لوبډله به د روان کال په نومبر میاشت کې د استرالیا د ملي لوبډلې پر وړاندې ټېسټ لوبه ترسره کړي.

د افغانستان کرکټ بورډ په یوې خبرپاڼې کې ویلي چې دا ټېسټ لوبه به د اسټرالیا په کوربه توب د نومبر پر۲۱مه نېټه پیل او د همدې میاشتې تر ۲۵مې نېټې پورې به دوام وکړي.

د افغانستان د کرکټ بورډ اجراییه رییس لطف الله ستانکزي هیله ښودلې چې تر هغې به د کورونا ناروغۍ خطر کم شي او دا لوبه به ترسره شي.

د ستانکزي په وینا دا ټېسټ لوبه به د افغانستان د کرکټ ټیم لپاره یوه ښه تجربه وي.

افغانستان تر اوسه په ټېسټ سیالیو کې له بنګله دېش، ایرلنډ، هند او ویسټ انډيز سره مخ شوی دی چې له لومړیو دوه لوبډلو یې بریا خپله کړې، خو له وروستیو دوو یې بیا ماتې منلې ده.

"د خېبر پښتونخوا تعلیمي ادارې دې ژر تر ژره پرانېستل شي"

په پېښور کې د يو ښوونځي زده کوونکې

د خیبر پښتونخوا د شخصي سکولونو مالکانو پر حکومت غږ کړی چې تعلیمي ادارې دې ژر تر ژره پرانېزي.

د مې پر ۲۸مه پېښور پریس کلب کې د خبري غونډې پر مهال د شخصي سکولو د ټولنې مشر نظر حسین وویل، د تعلیمي ادارو د بندېدو له وجې د زده کونکو وخت ضایع کېږي، استادان بې روزګاره کېږي او د سکولونو مالکان له مالي زیان سره مخامخېږي.

نوموړي وویل، که حکومت یې غوښتنه و نه منله نو په پراخو احتجاجونو به لاس پورې کړي.

خو بل لور ته، د خیبر پښتونخوا د تعلیم محکمې چارواکي وايي، د کورونا وایرس د خپرېدو مخنیوي لپاره د تېر مارچ له ۱۳مې نېټې راهیسې اړ شوي چې د سرکاري سکولونو تر څنګ شخصي سکولونه هم وتړي.

د پاکستان وفاقي حکومت ویلي د جولای تر ۱۵مې به سکولونه بند وي.

کورونا وبا نړۍ له قحطۍ سره مخامخولای شي: ګوتېرش

د ملګرو ملتونو مشر، انتونيو ګوتېرش

د ملګرو ملتونو مشر انتونیو ګوتېرشد مې پر ۲۸مه وویل، کورونا وایرس نړۍ د قحطۍ سره مخ کولای شي او په دې اړه د نړیوالو مرستو اړتیا ده.

نوموړي د مې پر ۲۸مه یوې لوړ پوړې غونډې ته په وینا کې وویل، کورونا وایرس نړۍ، د لوږې او بې روزګارۍ له وجې، له بې سارې تباهۍ او کړاوونو سره مخامخولای شي.

ګوتېرش د دغه صورتحال د مخنیوي لپاره د سم لاسي نړیوالو هڅو غوښتنه کړې ده.

کورونا وایرس چې د تېرکال په اخره کې یې له چینه سر راپورته کړ، د جانز هاپکېنز پوهنتون د تازه معلوماتو له مخې، تر اوسه یې په ټوله نړۍ کې ۵۹ لکه زیات کسان وهلي او درې نیم لکه زیات یې وژلي او ۲۴ لکه ترې پاخه شوي دي.

نور پورته کړئ

ځانګړې پاڼې

له موږ سره اړیکي

XS
SM
MD
LG