د لاسرسي ځای

تازه خبر

ډرون برید د حقاني شبکې لس تنه وسله وال ووژل



د پاکستان په قبایلي سیمه شمالي وزیرستان کې امنيتي چارواکي وايي د مشکوکو بې پيلوټه امريکايي الوتکو په یوه تازه بريد کې لږ تر لږه لس تنه وسله وال وژل شوي.

چارواکي وايي دا حمله د چهارشنبې په ورځ سهار مهال د شمالي وزیرستان له مرکز میرام شاه نه شاوخوا۱۶ کلومټره لرې شوې.

په سیمه کې یوه امنيتي چارواکي د خپل نوم اوغږ نه خپرولو په شرط وویل دغو الوتکو د میرام شاه جنوب لورته ۱۶ کلومترۍ کې په سپلګه نومي سیمه کې پر یوه کور دوه توغندي وتوغول، چې له امله د کور یوه برخه هم ونړیده.


نوموړی وايي، د استخباراتي چارواکو له لوري تر لاسه شوي معلومات ښيي، چې په وژل شويو کې زیاتره د حقاني شبکې وسله وال اورپکي وو.

بلخوا له سیمې یوې باخبره سرچینو مشال راډيو ته وویل، چې په نښه شوی کور د حقاني شبکې د اورپکو يو جنګي مرکز و، چې ډیری مهال به ګڼ شمير وسله وال یاغیان پکې اوسیدل خو په خبره يې دا لا نه ده جوته، چې د بريد پر مهال دغلته څومره وسله وال دیره وو.

شمالي وزیرستان د پاکستان هغه قبایلي سیمه ده، چې د لويدیځو هیوادونو او رسنیو د راپورونو له مخې د القاعده، حقاني شبکې او پاکستاني طالبانو په ګډون بیلابيلې وسله والې ډلې پکې جنګي مرکزونه لري.

د افغانستان دولت په کراتو داسې شواهد وړاندې کړي، چې دغه ډلې له دې ځایه په افغانستان کې دننه پر افغان او نړيوالو ځواکونو د بریدونو پلانونه طرحه کوي.

ددې ترڅنګ ډیر ځله په افغانستان کې دننه نیول شویو ځانمرګیو بریدګرو اقرار کړی، چې په شمالي وزیرستان کې روزل شوی.

د بې پيلوټه امريکايي الوتکو دا بريد، چې په روان میلادي کال کې څلورم هغه دی ی په داسې حال کې شوی، چې د وروستیو راپورونو له مخې د پاکستان پوځ په مشروط ډول له امريکا سره د ځنډیدلیو اړيکو بیرته رغولو او بحالولو ته غاړه ايښې.

د پاکستان او امريکا ترمنځ اړيکې وروسته ترهغې وځنډيدې، چې د ناټو پوځي هلیکوپترو دتیر میلادي کال د نومبرپر ۲۶ مه نېټه د مومندو په قبائلي سیمه کې د پاکستاني پوځ پر یوه سرحدي پوسته برید وکړ او۲۴ پوځيان يې ووژل.

له دې پيښې وروسته اسلام اباد په افغانستان کې د دیره ناټو ځواکونو د اکمالاتي کاروانونو پرمخ لار وتړله، چې لا هم تړلې ده،خو وروستي راپورونه وايي، چې دواړه لوري ددې لارې دبیرته خلاصولو پرسر یوې پټې موافقې ته سره نژدې شوي.
XS
SM
MD
LG