دا پېښه د خیبر پښتونخوا د چارسدې په شبقدر سیمه کې موجود د فرنټئیر کانسټیبلري پر روزنیز مرکز د سهار د شپږو بجو په شاوخوا کې رامنځ ته شوې ده چې د لومړنیو رپوټونو له مخې څه باندې ۸۰ تنه په کې وژل شوي او په لسګونه نور ژوبل دي.
چارواکي وايي چې له دې دوو چادونو څخه یو ځانمرګی برید وو خو د دویم په اړه لا څه نه دي ویل شوي .
له پېښې وروسته د فرنټئیر کانسټیبلري کمانډنټ اکبر هوتي له رسنیو سره په خبرو کې ویل چې دا برید په داسې وخت کې شوی چې د تېرې پنجشنبې په ورځ ټول ۸۱۸ عسکرو خپله روزنه پای ته رسولې وه او خپلو کورونو ته د تلو په تکل کې وو.
د یادونې وړ ده چې د القاعده شبکې مشر اسامه بن لادن د مئ پر دویمه نېټه د خیبر پښتونخوا د ایبټ اباد په ښار کې د امریکا د ځانګړو عسکرو په عملیاتو کې وژل شوی وو.
د اسامه بن لادن تر وژل کېدو وروسته دا لومړی ځل دی چې د ترهګرۍ دومره لوی برید تر سره شوو .
