خالد پښتون د کوهاټ د شاعرانو په منځ کې یو ممتاز مقام لري، دایې قلمي نوم دی خو اصلي نوم یې ( خالد مقصود ) دی. نوموړي په ۱۹۶۶م کال د اپریل په ۲۴ نېټه د کوهاټ په ( ځنګل خیل ) کې نړۍ ته سترګې غړولي دي .
ده پرایمري او مډل سکول په خپل کلي ځنګل خيل کې لوستي ، او د هايي سکول لپاره یې بیا په ګورنمنټ هايي سکول نمبر دو ، کوهآت کې داخله واخیسته.
د لسم جومات د پاس کولو نه پس یې په ګورنمنټ ډګري کالج کوهاټ کې داخله واخیسته او ایف ای یې هلته نه وکړه. د څوارلسم جومات لپاره یې هم هلته داخله واخیسته خو د ځینو وجوهاتو له کبله ترې بي اې نیمګړې پاتې شوه.
خالد پښتون وايي، د وړوکوالي نه یې د شعر او شاعرۍ سره شوق و ، مطالعه یې خوښیدله ، لوبې به یې نه کولې او نه یې خوښیدلې. دی لا ډیر وړوکی و چې ریډیو به یې اوریده ، د پېښور ريډیو یې ترکلونو کلونو اوریدلې ده. همدارنګه یې د وحدت پښتو او مشرق اردو اخبارونه هم ډیر په مینه کتل. د مطالعې شوق یې تراوسه نه دی ختم شوی.
خالد پښتون چاپ شوي اثار نه لري ، خو په ګڼو اخبارونو کې ددوی شاعري خپره شوې ده ، او په مشاعرو کې دده د خولې نه اوریدلي شعرونه هم خلکو ته یاددي.
نوموړی اوس په کوهاټ کې اوسي او دده په وینا خپل شخصي کاروبار کوي ، پیسې د هغې لارې او کیسې د شاعرۍ دلارې ګټي.
د خالد پښتون د شعر یوه بېلګه
د وهم په تیارو کې او د شک په نیمه لاره
احساس راته اوس کیږي چې یم ورک په نیمه لاره
دا څرنګه طلب دی او دا څرنګه لټون ؟
ولاړ یمه حیرانه ( اوترک ) په نیمه لاره
نظر مې لیونی لیونی ګوري هر طرف ته
ورک شوی لکه مور نه وي هلک په نیمه لاره
خلوص د پښتنو مې د کابل سینې ته وړلو
لوټ شوی یم یارانو د بولدک په نیمه لاره
داچا جوړې یادکړی یم پښتونه ، نه پوهیږم
خوړلی مې نن بیا چې دی تیندک په نیمه لاره