ترکستان اپریدی وايي چې اصلي نوم یې همدا ترکستان دی او دا چې قمبر خیل اپریدی دی نو ځکه یې تخلص ځان له اپریدی غوره کړی دی.
نوموړی د خیبر ایجنسۍ د باړې تحصیل په برقمبر خیل کې زیږیدلی دی . ددوی کورنۍ دسیمې منوره کورنۍ ګڼل کیږي او دخلکو مشري هم ورته ورپغاړه ده.
ترکستان تر دولسمه پورې سبک ویلی ، پرایمري یې په باړه ، مډل او هايي سکول یې په عالم ګودر او اېف اې یې په پرایویټ ډول د پېښور نه ویلې ده.
ترکستان چې کله ماشوم و نو د موسیقۍ د اوریدو سره یې ډیره مینه وه او د پېښور رېډیو سټیشن نه خپریدونکو سندرو به ترې زړه والوزولو . دی وايي د باسکټ بال لوبه یې هم ډیره خوښېدله .
ترکستان چې کله اتم جومات کې و نو دده یو ملګري اکرام الله به خپل لیکلي شعرونه ده ته اورول ، همداو چې دده شوق هم پیداشو چې سترګې دغزل په رنجو تورې کړي .
دی وايي د خاطر اپریدي شاعري یې ډیره خوښیدله او د هغې مینې نتیجه وه چې ده هم د اولس په ژبه په اسانه او خوږه ژبه کې شاعري پیل کړه .
د نوموړي د شعر کتاب تراوسه چاپ شوی نه دی ، خو وايي چې د څلورو کتابونو برابره شاعري یې کړې ده ، دی زیاتره د غزل په بڼه کې شاعري کوي.
د ترکستان اپریدي شاعري ددې دور تکړه هنرمندانو ویلې ده چې ورکې غزاله جاوید ، نازیه اقبال ، عروج مومند ، مسرت مومند ، حشمت سحر ، سرفراز ، اشرف ګل زار او شوکت محمود د یادولو وړ دي .
اولس ته د ترکستان اپریدي د شاعرۍ په رسولو کې سندرغاړو هم ډیر کار کړی خو ده پخپله هم په مشاعرو کې برخه اخیستې او د باړې ادبي جرګې غړی دی . همدارنګه کال په کال یې د رحمان بابا په مزار هم حاضري ورکړې ده او دهغه د کلیزې جشن کې یې خپل شعرونه خلکو ته اورولي دي.
ترکستان اپریدی دامهال د خیبر ایجنسۍ په پولیټکل ایډمینسټرۍ کې یو سرکاري عهده باندې کار کوي .