د لاسرسي ځای

تازه خبر

خبرونه

امریکايي ولسمشر د بودیجې په اړه د کانګرس له غړو سره ویني

د امریکا ولسمشر ډونلډ ټرمپ وايي، د جنورۍ پر شپږمه د کانګرس له مشرانو سره یو ځل بیا ویني چې د فېډرالي حکومت د بندېدو پر سر روانه لانجه هواره کړای شي.

نوموړي د جنورۍ پر پېنځمه پر ټوېټر ولیکل چې د کانګریس مشران د مکسیکو او امریکا ترمنځ د دېوال د جوړولو په اړه د ده غوښتنې ته په ځواب ویلو کې ناکامه شول، او د بجټ پر سر د اختلاف په هواري کې ډېر پرمختګ نه دی شوی. د دغه اختلاف له وجې د امریکا ځینې حکومتي ادارې بندې دې.

ولسمشر ټرمپ لیکلي له څو لسیزو وروسته باید بالاخره به د هېواد پر جنوبي پوله د خلکو امریکا ته په ناقانونه توګه د اوښتو ستونزه د تل لپاره حل شي.

هغه امریکا ته د مهاجرو د اوښتو د مخنیوي لپاره له مکسیکو سره په پوله د دېوال جوړولو لپاره له کانګرسه شاوخوا پینځه اربه ډالر غواړي چې هغه یې ورسره نه مني.

وسله والو په کندهار کې یو دیني عالم وژلی دی

چارواکي وايي، د جنورۍ پر شپرمه وسله والو په کندهار کې یو دیني عالم وژلی دی.

وسله والو په کندهار کې د قاري محمود الحسن هاشمي په نوم يو ديني عالم وواژه.

د کندهار د والي ویاند عزيز احمد عزيزي مشال راډيو ته وويل، حمله کوونکي پر موټرسايکل سپاره ول او په خاد کوڅه کې یې پر قاري محمود الحسن هاشمي ډزې وکړې.

قاري هاشمي په لويو حکومتي غونډو کې د قران کريم تلاوتونه کول او د کندهار د استيناف محکمې کارکوونکی وو.

د حملې ذمه واري چا نه ده منلې.

په بدخشان کې د زرو د کان نړېدو په پېښه کې ۳۰ کسان وژل شوي

د افغانستان په بدخشان ولايت کې د زرو د يوه کان د سرنګ یا ټنل نړېدو په پېښه کې لږ تر لږه ۳۰ کسان وژل شوي دي.

د بدخشان د پوليسو يوه وياند غربي رسنيو ته ويلي چې د جنورۍ شپږمې نېټې په پېښه کې شاوخوا ٢٠ تنه ټپیان هم دي.

چارواکي وايي، پېښه په کوهستان ولسوالۍ کې شوې ده.

د کوهستان ولسوال محمد رستم د فرانسې خبري اژانس ته ويلي چې په سيمه کې خلکو له دغه سرنګه د زرو ټولولو لپاره کار اخيست.

د والي وياند نېک محمد نظري وايي، کليوال له لسيزو راهيسې دغه کاروبار کوي چې حکومت ورباندې کنټرول نه لري.

چارواکي زیاتوي، د پېښې په وخت کې لږ تر لږه ٥٠ کسان په هغه ځاى کې ول او د ګېرو کسانو ایستلو لپاره یې ژغورونکي وراستولي.

ټرمپ له افغانستانه د پوځيانو د ايستلو بهير جاج اخلي: مايک پنس

مايک پنس

د امريکا مرستيال ولسمشر مايک پنس وايي، ولسمشر ډونلډ ټرمپ له افغانستانه د امريکايي پوځيانو د ايستلو بهير جاج اخلي.

مايک پنس دا خبره له هغو راپورونو وروسته کړې چې پکې ويل شوي ول چې ولسمشر ټرمپ دفاع وزارت ته امر کړی چې له افغانستانه د ۷۰۰۰ سرتيرو د ايستلو لپاره تياری ونيسي. دا وخت په افغانستان کې ۱۴۰۰۰ امريکايي سرتيري موجود دي.

له مرستيال ولسمشر مايک پنس سره فاکس نيوز مرکه کړې چې د جنورۍ پر درېيمه ناوخته خپره شوې. دی وايي ولسمشر د دې بهير جاج اخلي.

تر دې يوه ورځ مخکې ولسمشر ټرمپ د سیمې پر هېوادونو په تېره بيا پر روسیې، پاکستان او هند غږ کړی و چې په افغانستان کې دې د ترهګرۍ پر وړاندې په جګړه کې زیات رول ولوبوي.

کندهار: سپين بولدک کې اووه پوله ساتونکي سرتيري وژل شوي

سپين بولدک کې پوله ساته ځواکونه (۲۰۱۷م)

د افغانستان کندهار ولايت چارواکو نن [جنوري پنځمه] ويلي چې د وسلوالو په بريد کې اووه پوله ساتونکي سرتيري وژل شوي دي.

د کندهار ولايت والي وياند وايي چې په سپين بولدک کې په شوي بريد کې څلور سرتيري ژوبل شوي هم دي.

وياند عزيز احمد عزيزي زياته کړې چې تر دې يوه ورځ وړاندې د افغان ځواکونو په عملياتو کې ۱۶ وسلوال وژل شوي او ۱۱ نور ژوبل شوي ول.

د امریکا د ملي امنیت سلاکار اسراییل او ترکیې ته ځي

د امریکا د ملي امنیت سلاکار جان بولټون.

د امریکا د ملي امنیت سلاکار جان بولټن وايي د اسرایيلو او ترکيې سفرونه به کوي او هلته به له شام څخه د امریکايي ځواکونو د ایستل کېدو موضوع تر څنګ پر دې خبرې کوي چې واشنګټن او ملګري هېوادونه دې څنګه په سیمه کې د ایران د وارنکارو فعالیتونه مخه نیولی شي.

د جنورۍ پر درېیمه پر ټویټر پاڼه په پیغام کې بولټن وویل چې د هغو لارو چارو په اړه به هم خبرې کېږي چې څنګه په سیمه کې د اسلامي دولت وسله والو د بیا سر راپورته کېدو مخنیوی کېدای شي.

بولټن وايي، ترکيې ته د سفر پر مهال به ورسره د امریکا د ګډو ځواکونو مشر جنرال جوزف ډنفورډ هم وي.

د امریکا ولسمشر ډونلډ ټرمپ د ډېسېمبر پر ۱۹مه په هغه اعلان سره د امریکا د پارلیمان غړي او پوځي مشران حېران کړل چې وې ویل له شامه به ۲۰۰۰ امریکايي عسکر باسي.

اسرايیلو په دې اړه اندېښنې څرګندې کړي او وايي چې له شامه د امریکايي ځواکونو په وتلو سره به ایران وکولی شي چې هلته خپل اثر ولري.

کابل کې د اور لګېدو پېښه کې درې کسان مړه او ۲۷ ژوبل

په کابل کې د اورلګېدو د پېښې ځای

افغان چارواکى وايي، د جنوري پر دريمه د شپې پر مهال په کابل کې د اورلګېدو په پېښه کې درې کسان مړه او ٢٧ نور ټپيان شوي دي.

اور د تېلو په يوه پمپ کې ولګېد چې وروسته يوې دنګې ودانۍ ته خور شو.

د روغتيا وزارت وياند وحيد مايار ايسوشېټيډ پرېس خبري اژانس ته ويلي چې د شپږو ټپي شويو ښځو روغتيايي وضعيت د اندېښنې وړ دى.

د پېښې يوه عيني شاهد سيف الله اژانس ته ويلي، دغه اور نيمه شپه د کابل په ختيځ کې مکروريانو ته نږدې ولګېد. ايسوشېټيډ پريس ته پوليس چارواکو ويلي چې د دې پېښې په اړه څېړنه کوي.

بلخوا د جنوري پر څلورمه د ننګرهار په مرکز جلال اباد کې په دوو مارکېټونو کې اور ولګېد چې مالي زيان يې اړولی خو د ځاني زيان په اړه يې لا تر اوسه چارواکو څه نه دې ويلي. د اور لګېدلو لامل نه دی په ډاګه شوی خو د جلال اباد ښاروال ويلي چې اور يې وژلی دی.

د پښتونخوا کابینې راتلونکې غونډه په خیبر کې کېږي

ټاکل شوې چې د خیبر پښتونخوا د حکومتي کابینې راتلونکې غونډه په قبایلي خیبر ضلع کې وشي.

دا پرېکړه د جنورۍ د دویمې پر ماښام د اعلا وزیر محمود خان په مشرۍ د صوبايي کابینې په غونډه کې وشوه.

تر غونډې وروسته د اطلاعاتو وزیر شوکت یوسفزي مشال راډیو ته وویل، د دې اقدام موخه دا ده چې د قبایلو ولس پوه شي چې اوس په پښتونخوا ورګډ شوي او حکومت یې پرمختیا ته ځانګړی پام کوي.

دا به د ۲۰۱۸ز کال د مې په پای کې په خیبر پښتونخوا د قبایلو تر ورګډولو وروسته په هغو سیمو کې د کابینې لومړۍ غونډه وي.

خیبر له پېښور سره نښتې ولسوالي یا ضلع ده.

پیټرېک شناهن د امریکا دفاع وزارت سرپرست په توګه کار پیل کړ

پیټرېک شناهن د جنورۍ پر دویمه د امریکا د دفاع وزارت د سرپرست په توګه رسماً کار پیل کړ.

نوموړي د پېنټاګان مشري تر هغې وروسته سمباله کړې چې د دفاع پخواني وزیر جېمز میټېس د ۲۰۱۸ز کال د ډېسېمبر پر ۲۰مه استعفا ورکړه.

میټېس ویلي ول چې پر ځېنو موضوعاتو له ولسمشر ډونلډ ټرمپ سره همنظره نه دی ځکه دنده پرېږدي.

ټرمپ چې د افغانستان د جګړې په اړه یې پر میټېس نیوکې کړې دي، نه ده روښانه کړې چې شناهن به د دفاع وزیر په توګه ونوموي او که نه بل چا ته به دنده وسپاري.

۶۸ کلن میټېس مخکې ویلي ول چې د فبرورۍ په پای کې به دنده پرېږدي. نوموړي په خپل استعفالیک کې پر ولسمشر انتقاد وکړ. تر دې وروسته ټرمپ پر نوموړي نیوکې وکړې نو میټېس وویل، تر وخت مخکې د دفاع وزارت څوکۍ پرېږدي.

ټرمپ وايي له شامه یې د سرتېرو ایستلو نېټه لا نه ده اعلان کړې

یوه امریکايي پوځي قافله د شام له منبیجه د ځواکونو مرکز لوري ته روانه ده

امریکايي ولسمشر ډونلډ ټرمپ وايي، له شامه یې د سرتېرو ایستلو نېټه لا نه ده اعلان کړې.

نوموړي د جنورۍ پر دویمه د کابینې غونډې پر مهال په خبرو کې وویل، تر یوه ځانګړي وخت وروسته به له شامه امریکايي سرتېري وباسي خو ټینګار یې وکړ چې غواړي د اسلامي دولت (داعش) ډلې ضد جنګېدونکي کورد جنګیالي وژغوري.

امریکا د کورد جنګیالیو ملاتړې ده.

د ۲۰۱۸ز کال په ډېسېمبر کې ټرمپ د خپلو لوړپوړو امنیتي سلاکارانو، د کانګرس غړو او د امریکا د متحدانو د مشورې برعکس له شامه د شاوخوا ۲۰۰۰ سرتېرو د ایستلو پلان اعلان کړ.

خو نوموړي د خبریالانو په موجودګۍ کې وویل چې کله یې هم له شامه د سرتېرو ایستلو په اړه د هغه څلور میاشتني مهالوېش خبره نه ده کړې چې رسنیو یې په اړه خبر ورکړی.

نینسي پلوسي د کانګرس د استازو جرګې مشري اخلي

د امریکا د کانګرس په استازو جرګه کې د ډېموکراتانو مشره نینسي پلوسي په یوه غونډه کې

ټاکل شوې چې د امریکا د کانګرس په استازو جرګه کې د ډېموکراتانو مشره نینسي پلوسي د دې جرګې د ۱۱۶مې کاري دورې مشري په غاړه واخلي.

پلوسي له ۲۰۰۷ز کال څخه هم د څلورو کلونو لپار د استازو د جرګې مشره وه.

نوموړې د جنورۍ پر درېیمه د دې جرګې لومړۍ غونډې پر مهال یې مشري سمبالوي.

د ۲۰۱۸ز په نومبر کې د کانګرس لپاره په منځمهاله انتخاباتو کې د ډېموکراتانو بري دې ته زمینه برابره کړه چې هغو په ۲۳۵ غړو د دې جرګې اکثریت چې مخکې له رېپبلېکنانو سره وو، تر لاسه کړي.

د استازو جرګه ټول ۴۳۵ غړي لري.

۷۸ کلنه پلوسي د ولسمشر ټرمپ له سختو منتقدینو ده او اکثره ډېموکراتانو هم ویلي چې له روسیې سره د هغه د اړیکو، د هغه د سوداګرۍ د معاملو، خیریه ټولنو او نورو کارونو په اړه به جدي څېړنې وکړي.

رېپبلېکنان بیا د کانګرس په سېنېټ کې چې ۱۰۰ غړي لري، د ۵۳ غړو په لرلو اکثریت لري.

د روسیې په نړېدلې ودانۍ کې د وژلو شمېر ۲۶ ته رسېدلی

چارواکي وايي اوس هم د ځېنو ورکو کسانو په لټه کې دي

په روسیه کې په نړېدلې ودانۍ کې د وژلو شمېر ۲۶ ته رسېدلی.

د هېواد د بیړنیو چارو وزارت د جنورۍ درېیمې پر ماښام ویلي، له پېښې څه د پاسه ۴۸ ساعته (دوه ورځې) تېرې شوي، خو دوی لا هم د ژغورنې هڅو ته دوام ورکړی.

وزارت وايي، تر اوسه د پېنځو ماشومانو په ګډون د ۱۵ کسانو په لټه دي.

د ډېسېمبر پر ۳۱مه، د اورال له غرونو سره نېږدې په مګنېتاګورسک ښار کې په یوه ۱۰ پوړیزه ودانې کې چاودنه وشوه چې چې د بیړنیو چارو وزارت په وینا، ۴۸ کورونه یا اپارتمانونه یې زیانمن کړل.

روسي چارواکي وايي، داسې ښکاري چې چاودنه د ګیس وه.

چارواکو له دې زیات څه نه دي ویلي او د لامل په اړه یې پلټنو ته دوام ورکړی.

روس کې د ودانۍ ړنګېدو له کبله ۱۹کسان وژل شوي

په روس کې ویجاړه شوې ودانۍ

د روس د ماګنیتوګورسک سيمې په اورلاس ښار کې د یوې لوړپوړيزې ودانۍ د ړنګېدو په نتیجه کې تر اوسه د ۱۹کسانو مړینه تایید شوې ده.

دا پیښه د دوشنبې په ورځ د نوي کال ۲۰۱۹م په شپه د یوې چاودنې په نتیجه کې رامنځ ته شوه. د روس د بیړنیو حالاتو وزارت د جنورۍ پر دویمه ویلي چې تر دې ودانۍ د لاندې شویو کسانو د را ایستلو هڅې دوام لري. تر اوسه ۲۵ تنه نور لادرکه دي.

روسي چارواکي وایي، په مړيو کې دوه ماشومان هم شامل دي. د دوو ماشومانو په ګډون شپږ تنه نور له ملبې څخه ژوندي را ایستل شوي دي او روغتون ته انتقال شوي دي.

پلټونکي وایي، داسې ښکاري چې دا پېښه د قدرتي ګېس د چاودنې له کبله شوې ده. د روس تحقیقاتي ادارې ویلي چې د پېښې پر نورو لاملونو هم پلټنې کوي خو داسې نښې یې نه‌ دې موندلي چې وښیي په ودانۍ کې دې چاودېدونکي مواد ځای پر ځای شوي وي.

جرمني کې یوه موټر چلوونکي پنځه کسان ټپيان کړي

په برلین کې د کرسمس بازار له بریده وروسته

په جرمني کې د نوي کال د خوشاليو پر مهال یو سړي خپل ګاډی پر لارویانو خېژولی او پینځه کسان يې ټپیان کړي دي.

د وېسټفیلیا سیمې د کورنیو چارو وزیر هربرټ رییول ویلي د دغه سړي له ارادې نه څرګنده وه چې بهرملکیان وژني.

دغه ۵۰ کلن سړي چې اوس نیول شوی په بوټروپ او ایسن ښارونو کې په څلورو ځایونو کې داسې خلک په نښه کړي چې بهر ملکیان ښکارېدل.

په ژوبل شویو کې د شام او افغانستان وګړي هم شامل دي.

چارواکیو دا یو هدفي برید بللی.

په ترکمنستان کې د الکولي مشروباتو پلورل محدود کېږي

د ترکمنستان اشقابات ښار.

په ترکمنستان کې يو نوى قانون عملي شوی چې له مخې يې د شراب په ګډون د ټولو الکوحلي مشروباتو خرڅول محدود کېږي.

د دغه قانون پر اساس له د جنورۍ لومړۍ نېټه راهيسې په رېلګاډو، الوتکو، کښتيو او ورزشي مرکزونو کې الکوحل منع شوي دي.

د دې قانون له مخې د ملي رخصتيو پر مهال د الکوحل مشروباتو پلورل منع شوي دي.

د ترکمنستان ولسمشر قربان قلي بيردي محمدوف د خپل هېواد وګړي هڅولي چې ورزش او جسماني فعاليت ته مخه کړي.

محمدوف ويلي چې خپل هېواد به تر ٢٠٢٥م کال پورې له تمباکو پاک اعلان کړي.

د ترکمنستان د وګړو شمېر ۵،۶ میليونه ته رسېږي چې اکثريت يې مسلمانان دي.

د کرم تنګي ډېم په هېڅ صورت نه منو: کبل خېل مشران

د کورم تنګي ډېم ساحه

د شمالي وزیرستان د شوې تحصیل د کبل خیلو قبیلې او انتظامیې تر منځ د کرم تنګي ډېم د دویمې مرحلې په اړه جرګه ناکامه شوې ده.

د کبل خيلو مشرانو ویلي چې د بند یا ډېم له کبله به د سيمې درې لکه خلک بېکوره شي او حکومت د خلکو د تاوانونو پوره کولو څه ډول باور نه دی ورکړی نو دوی يې ځکه مخالفت کوي.

په دې اړه د جنورۍ پر دویمه د کبل خیلو ځېنو مشرانو مشال راډیو ته وویل انتظامي چارواکي وايي چې د کرم تنګي ډېم پر لومړۍ مرحله کار روان دی او په دویمه مرحله کې په شوه کې د بند تړلو لپاره له ځايي مشرانو سره سلا مشوره کوي.

د دې لپاره د امریکا مرستندویه ادارې یو اېس اېډ واپډا ته د اته میلیونه ډالره مالي مرستې ورکړي دي خو د ځايي خلکو د اختلاف له کبله دا منصوبه لا سر ته نه ده رسېدلې.

د چین ولسمشر: تايوان او چين به يو کېږي

د چين ولسمشر، شي جين پينګ

د چین ولسمشر شي جین پینګ ویلي د چین او تاییوان د یو کېدو ضد قوتونو خلاف به ټول مهم ګامونه پورته کوي.

د جنورۍ پر دویمه په یو بیان کې نوموړي ویلي هغه هېڅ شک نه لري چې اخر کار به چین او تاییوان یو شي او باید دواړې خواوې د دغه مرام ترلاسه کولو لپاره کار وکړي.

د جنورۍ پر لومړۍ نېټه د تاییوان ولسمشرې چین ته ویلي و چې د خپل منځي معاملو د هواري لپاره دې یوازې سوله يیزه لاره غوره کړي. نوموړې زیاته کړې وه چې د تایيوان په معاملو کې د چین مداخلت اوسمهال د دغه هېواد تر ټولو لوی چېلنج دی.

چین د تايیوان په کورنیو چارو کې د مداخلت تورونه ردوي. چین تایيوان په رسمي توګه نه مني او د دواړو ترمنځ د سولې څه ډول لوظنامه هم لا نه ده لاسلیک شوې.

د کوهاټ مشران: حکومت دې سيمه کې د تیلو او ګیس له لټونه لاس واخلي

د کوهاټ ډویژن نقشه.

د خېبر پښتونخوا د کوهاټ ډويژن مشرانو او د صوبايي اسمبلۍ غړیو د هغه کمپنیو پر ضد احتجاجي مظاهره کړې چې په سیمه کې د تیلو او ګیس لټون کوي.

د جنورۍ پر لومړۍ نېټه د کرک ضلعې په نشپه سیمه کې دې احتجاجي مظاهرې ته د وینا پر وخت ځايي مشرانو وویل چې د پاکستان مرکزي حکومت د ګيس او تيلو په مد کې هره ورځ يو ارب روپۍ ګټي خو د سیمې خلک د ژوند له بنيادي اسانتیاوو بې برخې دي.

دوی ادعا وکړه چې صوبايي حکومت د رايلټي يا امتيازي حق په مد کې د سیمې اووه اربه او ۸۶ کروړه روپۍ ایساري کړي دي.

د تیل او ګیس د کمپنۍ او جي ډي سي اېل یو چارواکي مشال راډیو ته د نوم نه ښودلو په شرط ويلي چې د کوهاټ ډویژن ضلعو ته د رایلټي په مد کې د پنګو ورکول د صوبايي حکومت ذمه واري ده.

صوبايي حکومت لا په دې اړه څه نه دې ویلي.

سپریم کورټ قبایلي سیمو لپاره د عدالتي نظام فیصله محفوظه ساتلې

د قبایلي سیمو نقشه.

د پاکستان سپریم کورټ قبایلي ضلعو ته د عدالتي نظام غځولو په اړه د خېبر پښتونخوا د حکومت پر درخواست خپله فیصله محفوظه ساتلې ده.

د جنورۍ پر لومړۍ نېټه له مشال راډیو سره په خبرو کې د اطلاعاتو صوبايي وزیر شوکت یوسفزي وویل سپریم کورټ ته يې خواست کړی و چې قبایلي ضلعو کې دې د عدالتي نظام جوړولو لپاره اته میاشتې وخت ورکړي.

دا له هغه وروسته ده چې د تیر ۲۰۱۸م کال د مې پر ۳۰مه نېټه د پاکستان په ايين کې تر ۲۵م ترميم وروسته فاټا په خېبر پښتونخوا صوبه ورګډه کړل شوه او له دې سيمو د فرنټيېر کرايمز رېګولېشن (اېف سي ار) په نامه څه باندې يوه پېړۍ زوړ قانون ختم کړل شو او پر ځای يې د فاټا انټېرم ګورننس رېګولېشن په نامه د حکومتدارۍ يو عبوري قانون نافذ کړل شو.

پېښور های کورټ په قبایلي سیمو کې دغه عبوري قانون غېر ایيني ګرځولی دی.

شوکت يوسفزی وايي صوبايي حکومت د نور هېواد په شان عدالتي نظام تر غځولو وړاندې په دغه لاره کې ځينې ستونزې هوارول غواړي.

۲۰۱۹م کال به د افغانستان لپاره یو ښه کال وي: سکاټ ميلر

په افغانستان کې د ناټو ځواکونو عمومي قوماندان جنرال سکاټ ميلر.

په افغانستان کې د ناټو ځواکونو عمومي قوماندان ویلي، ۲۰۱۹ م کال به د افغانستان لپاره یو په زړه پورې کال وي.

جنرال سکاټ ميلر د جنورۍ په لومړۍ نېټه کابل ته نېږدې په یوه پوځي اډه کې هغو مواردو ته اشاره کړې چې دا مهال د افغانستان د سولې په اړه روان دي.

نوموړي وویل، "په څو پلازمېنو کې پر پالیسیو غور کېږي، د سولې خبرو لپاره هڅې روانې دي، د سیمې لوبغاړي پر سولې ټینګار کوي، طالبان او افغان حکومت د سولې په اړه خبرې کوي."

په همدې حال کې د ناټو ویاند په کابل کې له نورو امریکایي پوځيانو سره د نوي کال د لمانځلو پرمهال د افغانستان سولې ته هيله‌ مندي وښوده او ویې ویل چې په ۲۰۱۹م کال کې د افغان سولې لپاره یو ښه فرصت برابر شوی دی چې په‌ دغه هېواد کې ۴۰ کلنه جګړه پای ته ورسېږي.

د افغانستان د سولې لپاره د امریکا ځانګړي استازي زلمي خلیلزاد تېره میاشت د طالبانو له استازو سره په ابوظبۍ کې ولیدل او ټاکل شوې ده چې په روانه جنورۍ میاشت کې د طالبانو استازي د سعودي عرب په جده ښار کې په یوه ورته غونډه کې برخه واخلي.

پاکستان هند ته د ۵۳۷ هندي بنديانو لیسټ سپارلی

د پاکستان د ملتان مرکزي زندان

پاکستان هند ته د ۵۳۷ هغو هندي بنديانو لیسټ سپارلی چې په بېلابېلو وختونو کې پاکستاني ځواکونو نيولي دي.

د پاکستان سرکاري راډيو د يو خبر تر مخه په دوی کې ۸۳ کب نيوونکي او ۵۴ عام وګړي دي.

دا ليسټ د پاکستان او هند تر منځ په ۲۰۰۸م کال کې د لاسليک شوي يو تړون تر مخې سپارل شوی دی. تمه ده چې هند به هم همدغسې کوي او اسلام اباد ته به د هغو پاکستانيانو نومونه سپاري چې په هند کې بنديان دي.

نن به نړۍ کې ۳۹۵۰۰۰ ماشومان وزېږي: ملګري ملتونه

روسيه کې نوي زوکړي ماشومان

د ماشومانو لپاره د ملګرو ملتونو ادراې یونېسېف اټکل کړی چې نن د ۲۰۱۹م کال په لومړۍ ورځ به په ټوله نړۍ کې ۳۹۵۰۰۰ ماشومان وزېږي.

دې ادارې پرون ماښام په يوه خبرپاڼه کې وويل چې تر ټولو زيات ماشومان به په هند کې زېږي چې شمېر يې ۶۹۹۴۴ دی. د خبرپاڼې تر مخه به په پاکستان کې ۱۵۱۱۲ او په افغانستان کې به ۳۲۲۷ ماشومان نړۍ ته راشي.

سعودي حکومت د نشيي موادو د قاچاق په جرم له پاکستاني وګړي سر پرې کړ

د سعودي عرب بېرغ

د سعودي عرب کورنيوو چارو وزارت په يوه خبرپاڼه کې نن [جنوري لومړۍ نېټه] وويل چې د نوي کال ۲۰۱۹م په لومړۍ ورځ يې له هغه پاکستاني وګړي سر پرې کړی چې د نشه يي موادو د قاچاق په جرم زنداني وو.

د جرمني خبري اژانس ډي پي اې د دې خبرپاڼې په حواله ويلي چې دغه سړی نظار احمد نومېده. په سعودي کې د مرګ سزا په پانسۍ سره نه بلکې په تورې سره د سر په پرې کولو عملي کېږي. دې اژانس زياته کړې چې سعودي عرب تېر کال له ۱۲۵ کسانو د سزا په توګه سرونه پرې کړي وو.

نوښار: پوليسو د نهه کلنې جينۍ په وژنه تورن کس نيولی

لاهور کې د ماشومانو د ځورونې ضد مظاهره

د خېبر پښتونخوا پوليسو په نوښار کې تېره اوونۍ د يوې نهه کلنې جينۍ د وژنې په تور يو کس نیولی دی.

د مردان پوليسو مرستيال مشر محمد علي خان نن [جنورۍ لومړۍ نېټه] خبريالانو ته وويل چې نيول شوی کس ۲۱ کلن دی او پر هغه دا تور هم دی چې دغه ماشومه يې تر وژلو مخکې د جنسي تېري ښکار کړې.

د دې جينۍ مړی د ډېسېمبر پر ۲۷مه د نوښار په نوي کلي کې په يوه هديره کې موندل شوی و.

په همدې حال کې د نوښار پوليسو مرستيال مشر منصور امان پر ټويټر پاڼه ليکلي چې دوی ۲۰ کسان په بېلابېلو جرمونو کې د تړاو په تور نيولي دي.

که حکومت مرسته وکړي، کوکنار نه کرو: افغان کروندګر

د ننګرهار نقشه.

د افغانستان د کرنې، اوبو لګولو او مالدارۍ وزیر په ننګرهار کې د کوکنار د کښت د مخنيوي په موخه پروژې پرانیستې.

په دې اړه د ډېسېمبر پر ۳۱مه د ننګرهار په شاهي ماڼۍ کې غونډه وشوه چې پکې لوړ پوړو حکومتي چارواکو او د بېلا بېلو ولسوالیو کروندګرو برخه لرله.

په غونډه کې کروندګرو وویل چې که حکومت ورسره مرستې وکړي نو کوکنار به نه کري.

په غونډه کې موجود د کرنې، اوبو لګولو او مالدارۍ وزیر نصیر احمد دراني ژمنه وکړه چې د کوکنارو نه کرلو په بدل کې به د کرنې په برخه کې نوې پروژې پرانیزي.

ننګرهار د افغانستان یو له هغه ولایتونو څخه دی چې کوکنار پکې کرل کېږي.

په هغه ولایت کې تېر کال په څه باندې ۱۸زره هیکټاره ځمکه کوکنار کرل شوي و.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG