نن د قبایلي سیمو، خیبر پښتونخوا او افغانستان په ګډون په زیاتره هېوادونو کې کوچنی اختر لمانځل کېږي.
نن سهار د پېښور، کابل ، مزار شریف او قبایلي سیمو په جوماتونو کې د اختر لمونځ وشو او دعاګانې وشوې. د اختر اعلان تېر ماښام په پېښور کې قاسم علي خان جومات د پښتونخوا له بېلا بېلو برخو د شهادتونو تر ترلاسه کېدو وروسته وکړ. هلته د پاکستان د رویت هلال مرکزي کمېټه به نن د شوال د میاشت لیدلو په موخه کېني.
افغان ولسمشر حامد کرزي د کوچني اختر په مناسبت د یو شمېر بندیانو خوشې کولو او د ځینو د سزا کمولو امر کړی دی.
ولسمشر کرزي په خپل فرمان کې ویلي، هغه کسان چې له پینځو کلونو یې زیاته موده په بند کې تېره کړې وي او یا یې د بند یو نیم کال پاتې وي، دې د شرایطو په پام کې له نیولو سره خوشې کړل شي. همداراز، له ۶۴ کلونو زیات عمر لرونکي سړي، او له ۵۴ کلونو زیات عمر لرونکې ښځې چې د خپل پینځه کلن بند څلورمه برخه یې په زندان کې تېره کړې وي، خوشې کول کېږي. د ولسمشر دا فرمان پر ملکي او پوځي دواړه ډول بندیانو عملي کېږي.
په افغانستان کې د امریکا سفیر جېمز کنېنګم د ولسمشر باراک اوباما او امریکايي ولس له خوا افغانانو او مسلمانانو ته د کوچني اختر مبارکي ویلې ده.
بېګا په کابل کې د امریکا په سفارت کې په یوه بیان کې کنېنګم وویل، له افغان ولس سره پر خپلو ژمنو ټینګار کوي: کټ
هلته په کابل کې د ملګرو ملتونو مرستندویه ماموریت یوناما افغانانو ته د اختر د مبارکۍ له ویلو سره د روژې په میاشت کې د ولسي وګړو پر وژنه د سخت خپګان ښودنه کړې ده. یوناما په خپل بېګاني بیان کې هیله ښودلې چې افغانان به د اختر ورځې شپې بې له تاوتریخوالي او په خوشالۍ تېرې کړي.
