تېره ورځ د امريکا د بهرنيوو چارو وزير جان کيري په منځګړتوب د افغانستان ولسمشرۍ د ټاکنو وروسته رامنځته شوي بحران د ختمولو لپاره د دوو نوماندانو (اشرف غني او عبدالله عبدالله) ترمنځ يو هوکړه ليک لاسليک شو. د امريکا د بهرنيوو چارو د وزارت له خوا خپاره شوي دي هوکړه ليک غټ ټکي په دې ډول دي:
۱. ټول اوسني او د نوي ولسمشر د کار تر پيلولو وروسته اصلاحات به د افغانستان د اساسي قانون له مخې کيږي. همداراز د افغانستان د خلکو د جهاد، مقاومت او ديارلس کلن جهموريت لاس ته راوړنې به ملي پروګرام ته د رسيدو لپاره لارښوونکي اصول جوړوي.
۲. دواړه نوماندان به يوه کاري ډله جوړوي چې د رايو د څيړنې روان بهير د پوره کېدو وروسته د راتلونکي ولسمشر د لوړې مراسمو پر نیټې یوې موافقې ته ورسيږي چې کيدای شي د اګست د مياشتې په وروستيوو کې وي. همداراز دواړه نوماندان د جولايي د دولسم تاريخ او د افغانستان د اساسي قانون په رڼا کې د يوې سياسي هوکړه ليک متن پوره کړي.
۳. دواړه نوماندان د هغه سیاسي چوکاټ یا جوړښت پر ژمنو ودریږي چې د ۲۰۱۴ کال د جولايي په دولسمه يې پرې هوکړه کړي وه.
په هغه موافقه ليک کې راغلي وو چې:
- راتلونکی ولسمشر به ژر تر ژره اجرايوي رييس پوسټ رامنځته کوي.
- د وزيراعظم د پوسټ رامنځته کولو لپاره به د نوي ولسمشر تر ټاکنې وروسته تر راتلونکو دوو کلونو پورې لویه جرګه را وغوښتل شي.
- ولسمشر به د اپوزيشن مشر پوسټ رامنځته کوي او بايلونکی نوماند به د دي پوسټ لپاره خپل نوماند کس ورپيژني.
- ولسمشر به په حکومت کې د مهمو چوکيوو لپاره کسان د اپوزيشن د مشر په مشوره ټاکي.
- راتلونکی حکومت به د ټاکنو په نظام کې اصلاحات رامنځته کوي.