چار شنبه 6 مې 2015 سیمه ییزوخت 03:19

افغانستان

ننګرهار: دیني عالمانو د سولې د روانې بهیر ملاتړ وکړ

د ننګرهار ديني عالمانو د سولې د روانې بهیر او د افغان ملي امنیتي ځواکونو ملاتړ د يوې غوندې په تر سره کولو سره وکړو.

دغه غونډه چې د سیشنبې په ورځ د ننګرهار د حج او اوقافو رياست له اړخه د جلال اباد ښاروالۍ د غونډو په تالار کې جوړه شوې وه، د دغه ولایت د بېلابېلو ولسواليو دیني عالمان او د جوماتونو ملا امامان وربلل شوي وو.

د ننګرهار د حج او اوقافو رياست د اطلاعاتو او نشراتو مسوول مولوي عتیق الرحمن فضلي له مشال راډيو سره په خبرو کې وويل:

(( موږ انشااالله د سولې په هکله ټولو دیني عالمانو، او د جوماتونو ملا امامانو ته چې اوس دلته راټول شوي، هغوی ته سپارښتنه کوو چې د حکومت او طالبانو ورونو تر منځ چې د سولې کومې هځې رواني دي، د دې ملاتړ وکړي. او عوام د سولې له خير نه خبر کړي. او بل دا چې د خپل ملي امنيتي ځواکونو څخه ملاتړ وکړي. علمای کرام

ټول راټول شوي او په په راروانه جمعه کې به د ټولو ممبرونو نه د سولې په اړه خبرې کيږي.))

غونډې ته رابلل شوي دیني عالمان ژمن وو چې د په خپلو خطبو کې به د سولې او امنيت په اړه خلکو ته پیغامونه ورکوي، د جلال اباد ښار د يوه جامع خطیب مولوي سید مزار هاشمي مشال راډيو سره په خبرو کې ژمنه وکړه چې په خپلو خطبو کې به د سولې او امن پیغام ورکوي.

(( موږ هميشه د اسلام د دین د سيوري لاندې د سولې خبره کړې ده. موږ همیشه مسلمانان ورونه د اتحاد، اتفاق او ورولۍ ته رابللي دي. او له دې وروسته هم دا زموږ ذمه واري ده او دا زموږ مسووليت دی چې موږ به په خپلو مساجدو کې د سولې خبره کوو.))

د روداتو ولسوالۍ مولوي لعل محمد ولس ته د سولې پیغام ورکول د دینی عالمانو فریضه وګڼله.

(( دا د دیني عالمانو ذمه واري ده چې خپلو کشرانو ته د هميشه لپاره ووايي چې سوله کې خیر دی. او الله پاک هم وايي چې والصلح خير، نو سوله کې امنیت دی، قراري او ارامي ده، سوکالي ده او د عزت ژوند دی او الله پاک هم ترې راضي کيږي.))

د يادولو ده چې په قطر هیواد کې چې د افغان دولت او طالبانو تر منځ تيره ورځ د سولې په اړه کومه مقدماتي غونډه تر سره شوه، ورسره سم د افغان ولس سولې امیدونه پيدا شوي دي.


“افغانستان له نړیوالو ترهګرو ډلو سره مخامخ دی”

د افغانستان د ملي امنیت سلاکارحنیف اتمرچې نن (سېشنبه) د مشرانو جرګې استجوابیه غونډې ته بلل شوی وایي چې افغانستان دا مهال له نړېوالو او سیمه يیزو ترهګرو ډلو سره مخ دی.

نوموړي د مشرانو جرګې په عمومي غونډه کې وویل، د ترهګرانو پټن ځایونه چې د افغانستان له پولو اخوا دي تر اوسه په بشپړه توګه له منځه نه دي تللي:

″زموږه مقابله نن ورځ یوازې له یوه کورني دښمن سره نه ده بلکې زموږ جګړه د هېواد په شمال ختیځ او جنوب کې له نړېوالو او سیمه ییزو تروریستي شبکو سره ده، د دغو شبکو هدف یوازې افغانستان نه دی بلکې د دوي هدف په سیمه کې او له هېواده بهر دی.″

 اتمرچې له امریکا سره د امنیتي او دفاعي تړون د نه عملي کېدو او په هېواد کې د امنیتي وضیعت د خرابیدو په اړه مشرانو جرګې غونډې وایي چې امنیتي تړون په تیرو څو میاشتو کې عملی شوی او دوی ترې راضي دي.

تردې مخکې د ملي شورا غړيو ویلي چې له امریکا سره امنیتي او دفاعي تړون وروسته په هېواد کې امنیتي وضعت خراب شوی او باید په دې برخه کې له سره کتنه وشي.


د پکتیکا جهادي او قومي مشرانو د سولې د خبرو هرکلۍ وکړ

د پکتیکا ولایت یو شمېر جهادي او قومي مشرانو په قطر کې د افغان حکومت د سولې شورا او طالبانو د استازو تر منځ د وروستیو غیر رسمي لیدنو کتنو او خبرو اترو هرکلۍ وکړ او غوښتنه يې وکړه، چې افغان دولت دې د سولي د خبرو له پاره داسې کسان وټاکي، چې هغه د جګړې ښکیلو خواوو او افغانانو ته د منلو وړ وي.

دوی زیاتوي، چې د سولې د بهیر د بریالیتوب له پاره باید د حکومت د مقابل لوري ځنې غوښتنې هم ومنل شي.

تېره ورځ د پکتیکا ولایت د نهو ولسوالیو یو شمېر جهادي مشران، دیني عالمان او قومي مخور چې د سولې تر نامه لاندې د ارګون په ولسوالۍ کې په یوه غونډه کې راغونډ شوي وو، د افغان حکومت د سولې شورا او د طالبانو د یو شمېر استازو تر منځ د قطر په پلازمینه دوحه کې د غیر رسمي لیدنو کتنو او خبرو اترو هرکلۍ وکړ او غوښتنه یې وکړه، چې په افغانستان کې د سولې پروسه باید د داسو کسانو له خوا پر مخ بوتلل شي، چې هغوی منځګړي خلک وي او دواړه خواوې ورباندې باور ولري.

دوی د دواړو خواوو د استازو وروستۍ نارسمي خبرې اترې وستایلې او هغه يې د اساسي مذاکراتو د پیل له پاره یو ښه ګام وباله.

د ارګون ولسوالی یو تن قومي او جهادي مشر مولوي حبیب الله جان په دې غونډه کې په قطر کې یادو ناستو او لیدنو کتنو ته هیله مندي وښوده، ده وویل دې لیدنو کتنو ته ولس ډېر خوشاله دی، خو له یو شمېر ملي او نړیوالو بنسټونو يې هم وغوښتل، چې د هغو څرګندونو دې ډډه وکړي، چې د سولې بهیر زیانمنوي:

 ((کله چې د حکومت او وسلولو مخالفینو ترمنځ خبري مهم پړاو ته داخلیږي نو هر ځل د پردیو په اشاره یو شمېر کسان د مدني ټولنو، د ښځو د حقوقو، او د بشر د حقوقو په نوم راپورته کیږي او وايي چې د سولي په خبرو کې باید د تیرو کلونو لاسته راوړني له منځه لاړي نشي چې دا ډول خبري په حقیقت کې د سولې د پروسې د اخلال له پاره کیږي.))

د ځدراڼو د قوم یو تن قومي او جهادي مشر ګل باز بیا وايي، چې دولت او وسلوال مخالفین دې په ګډه دریمګړي خوښ کړي او وروسته دې په فکر سره خبرې پر مخ بوځي.

نوموړی وايي، چې د سولي په خبرو کې دې د مخالفینو غوښتني هم په نظر کې ونیول شي:

((چې دوی له پاره په اول قدم کې مصلح کسان خوښ شي، نو دوی به د حکومت او مخالفینو په منځ کې به سوله راولي، دا امکان نه لري، چې هغه خلک موږ راوغواړو، چې راشه موږ سره کینه او هېڅ شی هم مه غواړه، هغوی خو هم څه اهداف لري، جنګیږي او ځانونه وژني.))

په غونډه کې د پکتیکا د مدني ټولنو د همغږی د دفتر مشر یعقوب خان منظور وویل، چې افغانستان اوس یوې فکري او قلمي جګړې ته اړتیا لري، تر څو د خلکو ذهن جوړ شي او په دې وپوهیږي چې د روانې جګړې ګټه او زیان چا ته رسیږي.

د یادولو وړ ده د افغانستان د سولې عالي شورا هم د سولې د خبرو په اړه د طالبانو وروستۍ نرم دریځ او مثبت نظر د سولې د ټینګښت لپاره ګټور بولي.

د سولې د عالي شورا غړي وايي؛ که څه هم طالبانو د سولې د خبرو د پیلولو لپاره رسماً کوم دریځ نه دی څرګند کړی؛ خو په خبره یې د حکومت او طالبانو تر منځ له وروستیو غیر رسمي تماسونو څخه دا څرګنده شوه چې وسله وال مخالفین هم په مشروط ډول د سولې مذاکراتو ته آماده دي.


په خوست کې نوي میله وسله ډایاګ ته وسپارل شوه

په خوست کې د امنیتي چارواکو له خوا یوه اندازه سپکه او درنه وسله چې د افغان ځواکونو له خوا په بیلابیلو عملیاتو او تلاشیو کې نیول شوې وه، د ډایاګ یا بې وسلې کولو پروګرام ته وسپارل شوه، د خوست امنیتي چارواکي هیله څرګندوي، چې د دې وسلو نیول او ډایاګ ته سپارل به د خوست پر امنیتي حالت مثبت اغیز ولري.

د دوشنبې په ورځ هغه ۹۰ میله سپکه او درنه وسله چې د ملي پولیسو او ملي اردو د منسوبینو له خوا د خوست ولایت په مربوطاتو کې د پوځي عملیاتو او د تلاشۍ د فعالیتونو پر مهال نیول شوې وه، د ډایاګ یا بې وسلې کولو ملي پروګرام ته وسپارل شوه.

خوست امنیه قوماندان مل پاسوال فیض الله غیرت ډایاګ پروګرام ته د وسلو د سپارلو پر مهال مشال راډیو ته وویل، چې په دې وسلو کې کلاشینکوف، زیکو یک، ار پي چې ماشیندار، تفنګچې، راکټ لنچر او نورې وسلې شاملې دي.

ده وویل، چې د یادو وسلو له جملې څخه ۵۵ میله د ملي پولیسو او ۳۴ میله نورې بیا د ملي اردو د منسوبینو له خوا دې برنامې ته وسپارل شوې:

((تاسو ولیدل چې په حدود دې ۹۰میله مختلف النوع وسلې د هغې جملې نه ۵۵ میله پولیسو او متباقي يې ملي اردو په مختلفو ساحو کې د بیلابیلو عملیاتو پر مهال لاسته راوړي دي، چې نن عملاً د ډایاګ پروګرام ته وسپارل شوې، دا کمه وسله نه ده، په دې کې سپکه او درنه وسله شامله ده او د امنیت په راوستلو کې کلک رول لري.))

په خوست کې د ډایاګ د پروګرام مسوول ډګروال شیرداد وايي، چې د پروګرام له پیله ۷۲۱ میله وسله ملي پولیسو، ۳۸۵ میله وسلې ملي اردو او دوه نیم سوه میله وسله ملي امنیت دې برنامې ته سپارلې ده:

((په اول قدم کې پولیسو او ملي اردو د ډایاګ پروګرام سره ډېره مرسته کړې ده، ملي اردو او ملي امنیت هم ګڼې وسلې دې پروګرام ته سپارلي دي او هیله من یو چې ملي امنیت به هم وسلې ټولې کړې وي او هغوی به هم نیول شوې وسلې ډایاګ ته وسپاري.))

د یادونې وړ ده تر اوسه ۱۳۵۶ میله سپکه او درنه وسله چې په خوست کې د میشتو امنیتي ځواکونو له خوا نیول شوې، ډایاګ پروګرام ته سپارل شوې ده، خو بل لوري ته هغه وسلې چې په خوست کې د امریکايي ځواکونو او د دوی د مرستندویه افغان سرتیرو له خوا نیول شوې، تر ډېره له منځه وړل شوې دي.

 


کابل : ځانمرګي برید کې دوه کسان وژل شوي ۱۵ نور ژوبل دي

هغه بس چې نن پرې برید وشو

د کابل د امنیې قومندانۍ چارواکي وايي چې د کابل ښار د دارالامان په سیمه کې په شوې ځانمرګې حملې کې دوه تنه وژل شوي او ۱۵ نور ټپیان شوي دي.

د کابل امنیه قومندان جنرال عبدالرحمان رحیمي رسنیو ته وویل چې برید کوونکي د لویې څارنوالۍ د کارمندانو موټرته د پورته کېدو پلان درلود چې وروسته یې د یاد موټر مخې ته ځان ته چاودنه ورکړه.

ښاغلي رحیمي زیاته کړه چې د یادې پيښې زیات قربانیان میرمنې دي.

وسله والو طالبانو د پيښې مسوولیت اخستی او په دغه پيښه کې د لویې څارنوالۍ ګڼوکارمندانو ته د مرګ ژوبلې اړولو ادعا کړې ده.

په افغانستان کې د پسرلي د راتګ سره سم د وسله والو بریدونه زیات شوي دي. دا په داسې حال کې ده چې د تیرو کلونو په پرتله په افغانستان کې د نړیوالو ځواکونو شمیره کمه شوې او د امنیت چارې پخپله افغان ځواکونه سنبالوي. 

 

 


په خوست کې د رسنیو نړیواله ورځ ولمانځل شوه

خوست کې د رسنیو نړیواله ورځ

 

په خوست کې یو شمېر خبریالان او د رسنیو استازي وايي: په یاد ولایت کې د رسنیو د خبریالانو د کارونو پر وړاندې ځنې ستونزې او ننګونې موجودې دي.

د یکشنبې په ورځ، چې د خوست د ځايي او نړیوالو رسنیو یو شمېر خبریالان او د رسنیو استازي د خوست په لنکن ښوونیز مرکز کې د مئي د دریمې یا د مطبوعاتو د نړیوالې ورځې د لمانځنې په موخه راغونډ شوي ول، د اړوندو ادارو څخه غوښتنه وکړه، چې رسنیو سره په خپلو برخو کې مرستې وکړي.

د غونډې ویناوالو په خپلو خبرو کې په دې ولایت کې د زورواکو او چارواکو فشارونه، نا امنۍ او پر وخت مالوماتو ته د خبریالانو نه لاسرسۍ د رسنیز کار پر وړاندې مهمې ننګونې وبللې:

((زما نوم احمدشاه دی، په خوست کې یو تن خبریال، په خوست کې د خبریالانو پر وړاندې ستونزې شته، د زورواکو له خوا د ستونزو جوړول، ناامنۍ په خپله هم ستره ستونزه ده، مافیايي کړۍ دي، د چارواکیو له خوا خبریالانو ته پر وخت د خبر نه ورکول دي.))

د خوست د لنکن ښوونیز مرکز مشر نصیراحمد روښان مشال راډیو ته وویل، چې د دې ناستې څخه یې موخه داده، چې خبریالان په خپلو کې د یو ازاد بحث له لارې د رسنیو له پاره فرصتونه او ننګونې وارزوي او د راتلونکې له پاره ښې لارې چارې پیدا کړي:

((د خوست لنکن ښوونیر مرکز وپتیله چې د سیمه ییزو رسنیو سره یو ځای د مطبوعاتو نړیواله ورځ ولمانځي، د دې ورځې د لمانځنې څخه هم هدف دادی چې موږ په خوست کې د خبریالانو تر منځ یو ازاد بحث په لاره واچوو، تر څو په افغانستان کې د خبریالی د کار پر وړاندې فرصتونه او ستونزې تر بحث لاندې ونیسي.))

ازاد خبریال رفیع الله زیار وايي، چې حکومتي ادارې او پوځي ارګانونه د خپلو بریاوو د انعکاس له پاره رسنۍ په بیړه ورغواړي، خو د پيښې په وخت کې خبریالانو سره کمک نه کوي.

د خوست د رسنیو یو بل تن کارکوونکی سلطان محمود خیرخوا وايي، که خبریال خپل رسالت په ایماندارۍ ترسره کړي، نو ولس او د ټولنې بیلابیل قشرونه ورباندې باور کوي او رسنۍ د خلکو د اړتیاوو د پوره کولو په یوه مرجع بدلیږي.

د سولې پیغام په نوم د یوې سیمه ییزې راډیو مشر زاهدشاه انګار د خوست پر ځايي اداره نیوکه وکړه، چې رسنیو سره د کمک پر ځای د دوی د کارونو پر وړاندې په لوی لاس ستونزې جوړوي:

((په خوست کې نه یوازې دا چې له رسنیو سره مرسته نه کیږي، بلکې د خوست محلي اداره په لوی لاس غواړي، چې رسنۍ کمزورې کړي، دوی بیلابیلو موسسو او شخصي کمپنیو ته مکتوبونه استولي دي، چې کوم قراردادونه چې دوی يې د رسنیو سره لري، هغه قطع کړي.))

د نظر خاوند عزیزالله ځلاند وايي، چې رسنۍ نه یوازې د نړۍ د حالاتو نه د خلکو په خبراوي کې مهمه ونډه لري، بلکې خلکو ته د ښو او بدو د تشخیص او تفکیک وړتیا هم ورکوي.

دده په خبره رسنۍ په اوس وخت کې د خلکو د شعور د ویښولو یو مکتب دی.په خوست کې دا مهال دوه سیمه ییز تلویزیونونه، نهه سیمه ییزې راډیوګانې او ګڼې چاپي رسنۍ خپرونې لري.

یاده دې وي، د مئي دریمه یا د رسنیو نړیواله ورځ په لومړي ځل په ۱۹۹۱ زیږدیز کال کې د یونسکو د عمومي کنفرانس له لارې رسمي شوه او په ۱۹۹۳ زیږدیز کال کې د ملګرو ملتونو د عمومي مجمع له خوا په تصویب ورسیده او له هغه ورځې راپدیخوا هر کال د نړۍ په بیلابیلو هېوادونو کې د رسنیو نړیواله ورځ لمانځل کیږي.

 

 

 


کابل : د فرخندې په قضیه کې لوړ پوړي چارواکي محکمې ته غوښتل شوي

د فرخندې جنازه مېرمنو پورته کړې

په کابل کې د یوې محکمې قاضي ویلي چې د فرخندې د وژلو د قضیې د څيړلو په تړاو دې باید څو امنیتي چارواکي هم د یکشنبې په ورځ عدالت ته حاضر شي او خپل دلایل دې وړاندې کړي.

د قران د سپکاوي په پلمه د بېګنا وژلې شوې فرخندې په وژلو کې د لاس درلودلو نولسو تورنو کسانو قضیه په محکمه کې ده او نن د یکشنبې په ورځ یې هم غونډه روانه وه. 

قاضي صفي الله مجددي په دې اړه مشال راډیو ته داسې وویل : 

(( د کابل امنیه قوماندان ، د امنیې قوماندانۍ د جنايي جرمونو د څیړنې رئیس، د کابل امنیې قوماندانۍ د مخابرې مدیر، د کابل ولایت امنیتي مرستیال، د کورنیو چارو وزارت د جنايي جرمونو د څیړنې عمومي رئيس، د دویمې حوضې او کابل د امنیې قومندانۍ د مخابرو نوکریوال د یکشنبې په ورځ محکمې ته غوښتل شوي دي. )) 

بلخوا د فرخندې د وژلو قضیې ته د حقیقت موندنې د ګمارل شوي کمیشن غړې فوزیه کوفي په دغه موقع وویل چې د دې پیښې ډیر اصلي عاملین لا هم نه دي نیول شوي.

فرخنده ، د مارچ په نولسمه په کابل کې یوشمیر قهرجنو کسانو په دې تور چې مذهب ته یې سپکاوی کړی  وژلې وه ، خو ورسته څیړنو هغه بی ګناه ثابته کړه.


ملک عمر خان وزیر: پاکستان به د وزیرستان له کډوالو بخښنه غواړي

د شمالي وزیرستان بې کوره کړل شوي خلک

پراګ: په داسې حال کې چې د شمالي وزيرستان د بې کوره کړل شوو خلکود ستنېدولړۍ دوام لري په افغانستان کې ميشت وزيرستاني کډوال وايې، له دوی سره لا تر اوسه پاکستانيو چارواکو رابطه نه ده کړې.

په دې اړه عبدالحي کاکړپه خوست کې د مېشتو دې بې کوره کړل شوو وزیرستانیو وګړو د څلويښت کسيزي کميټۍ له مشر ملک عمر خان وزير سره مرکه کړېده.

ملک عمر خان وزير وايي دا وخت په افغانستان کې دوه نيم لکه وزيرستاني کډوال ژوند کوي.

له ده څخه د مرکې په سر کې پوښتل شوي چې آيا دستنيدو په اړه مو د پاکستان له چارواکو يا د هغه ځای له قبايلي مشرانو سره څه رابطه شوې ده او که نه.‎؟ 

د ملک عمر خان وزیر مرکه دلته واورئ
د ملک عمر خان وزیر مرکه دلته واورئi
|| 0:00:00
...    
🔇
X

 


ننګرهار: د ولسواليو په کچه د کريکټ سیالۍ پای ته ورسېدې

په ننګرهار کې د ۲۲ ولسواليو د کريکټ د ټيمونو تر منځ چې دوه اوونۍ وړاندې د کريکټ سيالۍ پیل شوې وې، پرون د جمعې په ورځ يې فاينل (پایلوبه ) د کوچيانو او ګردي غوث د ټيمونو تر مڼخ وشوه چې د کوچيانو ټيم په دې وتوانېدو چې د ګردي غوث ټيم ته ماتې ورکړي.

د ننګرهار د ولسواليو تر منځ د کريکټ دغه ټورنمنټ چې پيځلس ورځې وړاندې د جلال اباد په سراج العمارت بڼ د کريکټ په لوبغالي کې پیل شوی و، د می په لومړۍ نېټه پای ته ورسيدو. دغه پایلوبه چې د ګردي غوث او کوچيانو ټيمونو تر منځ تر سره شوه.

د ګردي غوث ټيم د کوچيانو ټيم ته په شلو اورونو کې ۱۲۵ مڼډې هدف وټاکه چې د کوچيانو ټيم د څلورو لوبغاړو په سوزېدو سره وتوانېدو چې په نولسم اوور کې ټاکلي هدف ته ځان ورسوي او د سيالۍ جام د خپل ټيم په ګټه تمام کړي.

د افغانستان د کريکټ بورډ د سپين غر زون مسوول بختيار ساحل د ټورنمنټ په پای کې مشال راډيو سره په خبرو کې وويل، د ولسواليو په کچه د سياليو له جوړېدو يې موخه دا وه چې د کريکټ په برخه کې ځوان استعدادونه د خلکو په وړاندې راولي:

(( د دې سياليو نه هدف همدا و چې هغه لوبغاړي چې ښه استعدادونه لري، هغوی ته زمينه برابره کړو، د هغوی استعدادونه وګورو، څو په راتلونکي کې د کريکټ لپاره ښه چاسونه په لاس ورکړو چې هغوی موږ سره په ولایتي سياليو کې، په انټرکلب سياليو کې او همدا رنګه د ښوونځيو په ليول سياليو کې، د زون په کچه په سياليو او بلاخره په ملي سياليو کې له موږ سره ګډون وکړي، موږ د هغوی ملاتړ وکړو او د هغوی په روزنه کې برخه واخلو.))

د افغانستان د کورني کريکټ مشر نعيم جار عبدالرحيمزي مشال راډيو سره په خبرو کې وويل چې دوی به د افغانستان په نورو ولایتونو کې هم د ولسواليو تر منځ د کريکټ سيالۍ جوړوي څو په دې وتوانېږي چې د کريکټ په برخه کې استعدادونه وروزي او په تدریجي ډول يې تر ملي لوبډلې ورسوي:

(( یوازې دا لوبې نه دي، موږ د کلبونو لوبې هم لرو، او موږ ته وینا شوې چې د ښوونځيو تر منځ هم سيالۍ جوړې کړو او دا سلسله همداسې دوام پیدا کوي. دا کړۍ داسې جوړوو، تر څو وکولای شي چې ولایتي سياليوته، بيا د زون په کچه سياليو او بيا په همدې امتداد راوخېژي الف لوبډلې ته او تر ملي لوبډلې ورسېږي.))

د کريکټ دغه ټورنمنټ ته په سلګونه تنه د کريکټ مینه وال هم ورغلي وو او د لوبو ننداره يې کوله. په ننګرهار کې د وړتیا په نوم د سپورتي ټولنې يو تن مسوول اکرام الله اکرام مشال راډيو سره په خبرو کې وویل، د ولسواليو تر منځ د کريکټ سيالۍ د کورني کرکت په پياوړتيا کې مهم رول لري:

(( دا د سپین غر زون د کريکټ لپاره يوه مهمه لاسته راوړنه بلل کيږي. موږ دلته په ننګرهار کې د ۲۰۰۹ کال د ولسواليو تر منځ د کريکټ شاهدان وو، خو دا چې د ولسواليو تر منځ د کريکټ دا سيالۍ پيل شوي او نن يې پایلوبه ده، دا واقعاً د وياړ ځای دی چې د کورني کريکټ په وده کې دا يو مهم رول

لري.))

د کريکټ بورډ د سپین غر زون مسوولين وايي چې په نيږدي راتلونکي کې به د زون په کچه د هغو ټيمونو تر منځ سيالۍ هم تر سره شي چې د ولسواليو په سيالۍ کې سر ته راغلي دي.


په خوست کې د نشه يي توکو د کاروبار د ډېریدو انديښنه

په خوست کې د نشه يي توکو پر ضد ادارې چارواکي وايي، که چیرې د نشه يي توکو د کاروبار پر وړاندې مسوولې کشفي او امنیتي ادارې همغږي نه شي، نو ښايي په دې ولایت کې د نشه يي توکو کاروبار زیات شي.

بل لوري ته د خوست امنیتي چارواکي ډاډ ورکوي، چې هیچاته به د نشه يي توکو د کاروبار اجازه ورنکړي او سرغړونکي به د قانون منګولو ته وسپاري.

په خوست کې د مخدره توکو پر ضد ادارې چارواکي انديښنه څرګندوي، چې، که مسوولې ادارې د نشه يي توکو د مخنیوي له پاره په خپلو کې همغږي او همکاري ډېره نه کړي، نو له یوې خوا به د نشه يي توکو اخیستل او خرڅول ډېر شي او بل لوري ته به په یاد ولایت کې د نشه يي توکو د کارونکو ګراف هم لوړ شي.

د شنبې په ورځ د خوست د مخدره توکو پر ضد ادارې مشر میرناګل تڼیوال په دې اړه مشال راډیو ته وویل، چې که د نشه يي توکو د مخنیوي ادارې په خپلو کې یو تر بله همکاري پراخه نه کړي، نو د نشه یانو د ډېریدو او د کاروبار د زیاتیدو انديښنه موجوده ده:

((نو که چیرې همغږیتوب په بشپړه مانا موجود نه وي، نو موږ دا انديښنه لرو، چې استعمال يې زیاتیږي، خرید و فروش يې زیاتیږي او د معتادینو ګراف ممکن زیات شي، دا انديښنه زموږ سره موجوده ده، نو موږ د اړوندو ارګانونو څخه د هماهنګي د ډیرولو غوښتنه کوو.))

میرناګل تڼیوال وړاندې وویل، سره له دې چې په ټولو ولسوالیو کې کشفي او امنیتي ادارې موجودې دي، خو بیا هم په کلیو کې نشه يي توکي خرڅیږي، چې دوی یې باید مخه ونیسي:

((په ټولو ولسوالیو کې کشفي ارګانونه وجود لري او هلته نشه يي مواد خرڅیږي، نو د ملي اردو، ملي پولیسو، ملي امنیت، سرحدي پولیسو، د ګمرکاتو پولیسو، د لویو لارو پولیسو د دوی دغه دنده چې د هغه کوچنیو قاچاقبرانو چې نشه يي مواد خرڅوي، د دې په مخنیوي کې باید کلکه مبارزه وکړي.))

په خوست کې د نشه يي توکو پر ضد ادارې مشر مني، چې په دې ولایت کې د مخدره توکو قاچاق، کارونه او تولید موجود دی.

نوموړی وايي، چې د نشه يي توکو پر ضد عمل یوه ملي دنده ده، چې د ټولنې ټولو وګړو پورې اړه لري:

((مشکل يې دادی، چې د نشه يي موادو قاچاق موجود دی، استعمال يې موجود دی، تولید يې موجود دی، نو د دې په مخنیوي کې له دې کبله چې دا یوه ملي مبارزه ده، هر څوک وظیفه لري، په ځانګړي ډول هغه ادارې چې په قانون کې ورته وظیفه سپارل شوې ده، واقعاً دا یوه لویه ستونزه ده او د دې ستونزې په هواري کې باید دوی خپل مسوولیت سرته ورسوي.))

بلخوا خوست امنیه قوماندان مل پاسوال فیض الله غیرت ډاډ ورکوي، چې په یاد ولایت کې امنیتي ادارې د نشه يي توکو د هر ډول کاروبار پر خلاف جدي اقداماتو ته ژمن دي.

ده د نشه يي توکو د کاروبار د مخنیوي له پاره د ولس څخه وغوښتل، چې په دې اړه امنیتي ادارو سره مرسته وکړي:

((زموږه بیدار پولیس کوښښ کوي، چې د نشه يي موادو پلورونکي او قاچاقبران نیولي دي او نور به هم ونیسي، د قانون منګولو ته به يې وسپاري، هېچاته به اجازه ورنکړي، چې د نشه يي توکو کاروبار وکړي، د خلکو نه مې هیله داده چې د خپلو خلکو سره همکاري وکړي، تر څو پولیس وتوانیږي، چې خپل قانوني اجراات ترسره کړي.))

د یادونې وړ ده په دې وروستیو کې د خوست ولایت په یو شمیر سیمو کې د امنیتي او کشفي ادارو له خوا په اویا وو بیلابیلو قضیو کې د یوه اندازه نشه يي توکو د نیولو تر څنګ ۷۱ مظنونین هم نیول شوي ول.


په خوست کې کلتوري هڅې علمي بڼه خپلوي

د خوست لیکوال، شاعران او فرهنګیان وايي، چې د پخوا په پرتله په دې ولایت کې ادبي او کلتوري هڅې پراخې شوې او اغېزمنتوب يې ډېر شوی دی.

دوی وايي، چې اوسمهال خوستیو فرهنګیانو دا اړتیا درک کړې ده، چې په پښتو ژبه د شعر او شاعری تر څنګ باید د پښتو ژبې علمي برخه هم د ژباړو، نویو تالیفاتو، څیړنو او لیکنو له لارې بډایه شي.

خوستي فرهنګیان وايي، چې د پخوا په پرتله اوسمهال په خوست کې علمي او کلتوري هڅې منظمې شوي او فرهنګیان، د هنر، ادب، شعر او شاعری تر څنګ د دې لرغونې ژبې علمي بډاینې ته هم متوجه شوې دي.

یادې څرګندونې د جمعې په ورځ یو شمېر خوستيو فرهنګیانو، چې په یوه ادبي ناسته کې راغونډ شوي ول مشال راډیو سره په خبرو کې وکړې.

شاعر او کره کتونکي فریدالله قربان وویل، چې پخوا په دې ولایت کې پر ادبي کارونو دا نیوکه کیده، چې دلته دا هڅې نمایشي دي او علمي بنیاد نه لري، خو په وروستیو کالونو کې په خوست کې د پښتو ژبې ساینسي، ټولنیزو، سیاسي او نورو برخو ته ډېرې پاملرنې دا نظر بالکل بدل کړی دی:

((پخوا دا ګیله وه چې خوست میشتي یوازې په خوله نارې وهي، یانې نمایشي کارونه کوي، خو دومره ګټور کار يې نه دی کړئ، خو زه وایم چې اوس دا ستونزه بیخي حل شوې ده، اوس په ادبي او کلتوري برخه کې لوی، لوی کارونه شوي او لا هم کیږي، په خوست کې درې، څلور داسې مطبعې دي، چې تقریباً روزانه یو کتاب چاپوي، همدارنګه تر پنځو ډېرې مجلې خپریږي، چې په چاپ کې يې هېڅ ځنډ او خنډ نه دی پيښ شوی.))

مدني فعال او شاعر ساده حیدرخېل وايي، چې په خوست کې د کلتوري هڅو په لړ کې د کتابلیکنې، رسنیو، مجلو، هنر او نورو برخو ته ډېر کارونه شوي دي.

بل لوري ته د شیخ زاید پوهنتون استاد نورالله ښاد لیونخېل د خوست د کلتور او فرهنګ په دودولو کې د علمي او اکاډمیکو مرکزونو په تېره د پوهنتونونو رول ډېر اغیزمن بولي.

د پوهنتون یو تن محصل او شاعر ساجد بهار وايي، چې خوستیو فرهنګیانو د تېرو کالونو د فرهنګي هڅو او کوښښونو دا زده کړل، چې د پښتو ژبې له پاره د شاعري او ادبي هڅو وراخوا دا ژبه ژباړې، تحقیق، نویو تالیفاتو او نورو بنیادي علمي فعالیتونو ته هم اړتیا لري او په دې برخه کې اوسنۍ هڅې د پام وړ دي.

لیکوال او ژورنالست محمدغفور مهیدي په خوست کې د کلتوري هڅو د انسجام او راغونډولو له پاره د مرکزیت او محوریت نه شتون همدارنګه د فرهنګیانو اقتصادي او مادي ستونزې مهمې ننګونې ګڼي:

((دا یوه اساسي ننګونه ده، چې دلته د فکري تمرکز او کلتوري چارو د سازماندهۍ له پاره یوه مشترکه منبع نه ده ایجاد شوې، تر څو دا فعالیتونه را غونډ کړي او بل لوري ته د فرهنګیانو او شاعرانو مادي او اقتصادي ستونزې دي، دې له پاره د دولت ملاتړ، د سوداګرو ملاتړ او د نورو ټولنیزو کړیو ملاتړ نه دی خپل شوی.))

د یادونې وړ ده، په خوست کې خواوشا اویا د مدني ټولنې بیلابیل بنسټونه او موسسې شته، خو کتونکی په دې کې د ګوتو په شمار بنسټونو او موسساتو فعالیتونه اغېزمن بولي او زیاتوي، چې ډیری دا ډول نهادونه د مادي هدفونو له پاره جوړ شوي ول، چې اوس هغه د لنډ مهالو او کوچنیو پروژو بازار هم نه لري.


د خوست په بابرک تاڼه کې ۲۵ وسلوال وژل شوي

د خوست ولایت چارواکي وايي، چې تیره شپه وسلوالو د تریزیو او عليشیرو ولسوالۍ د بابرک تاڼې په امنیتي پوستو او د افغان ځواکونو په مرکز ډله ییز برید کړی، چې د افغان ځواکونو په ځوابي برید کې ۲۵ وسلوال وژل شوي او تر شلو ډېر وسلوال ټپیان شوي دي.

د خوست د ولایت مقام مطبوعاتي دفتر مسوول مبارز محمد ځدراڼ مشال راډیو ته وویل، چې یاد برید چې د دونیم سوه وسلوالو له خوا د بابرک تاڼې په سیمه کې پر افغان پوله ساتونکو پولیسو ترسره شو، د سهار تر شپږو بجو يې دوام وکړ.

ده زیاته کړه، چې د وژل شویو وسلوالو څلور جسدونه هم د افغان ځواکونو لاسته لویدلي دي.

مبارز ځدراڼ دا هم وویل، چې په دې برید کې دوه تنه افغان سرتیري هم وژل شوي او پنځه نور ټپیان شوي دي:

((بېګاه شپه خواوشا دوه بجې دوه نیم سوه وسله والو مخالفينو چې په سپکو او درنو وسلو سمبال وو، د خوست ولايت د عليشېرو او ترېزيو ولسوالۍ اړوند په ببرک تاڼې او د سرحدي پوليسو په قرارګاه باندې ډله ییز بريد وکړ، چې د سهار تر شپږو بجو پورې يې دوام وکړ،د امنيتي او کشفي ځواکونو د راپور په اساس پدغه څو ساعته سخته جګړه کې چې د امنيتي ځواکونو له سخت مقاومت سره مخامخ شول ،وسله والو مخالفينو ته درنه مرګ ژوبله واوښته،په دې برید کې پنځه ويشت وسله وال مخالفين وژل شوي او ۲۱ نور ټپیان شوي دي، چې د څلورو وژل شويو جسدونه سرحدي پوليسو ته ورپاتې دي.))

تر اوسه پر بابرک تاڼې د بیګاني وسلوالو برید په اړه کومې وسلوالې ډلې رسنیو ته څه نه دي ویلي.


په خوست کې د مجاهدینو د بري ورځ ولمانځل شوه

په خوست کې یو شمېر مجاهدین، دیني عالمان او قومي مشران وايي، چې د افغانستان خلک باید د روسانو سره تر څوارلس کلن وسلوال جهاد وروسته، چې سور لښکر يې مات کړ او یو اسلامي حکومت یې رامنځته کړ، د هېواد د پرمختګ او بیارغونې له پاره خپلو مجاهدو او هلو ځلو ته دوام ورکړي.

دوی یادې څرګندونې د سېشنبې په ورځ په خوست کې په دوو بیلابیلو هغو غونډو کې وکړې، چې د مجاهدینو د بریالیتوب د ۲۳ مې کالیزې په مناسبت جوړې شوې وې.

یادې غونډې د خوست په ملي لوبغالي او د قومونو د پیوستون شورا په انګړه کې جوړې شوې وې.

په ملي لوبغالي کې د خوست یو تن دیني عالم مولوي محمدداود وقفي مشال راډيو ته وویل، چې خلک باید دا ځل د افغانستان د پرمختګ او شته فساد پر وړاندې جهاد وکړي:

((دا چې نن ورځ په افغانستان کې د مقدس جهاد د کامیابۍ ورځ لمانځل کیږي، له دې وروسته باید ټول مجاهدین او دیني علماء او ټول افغانان د هېواد د پرمختګ دپاره جهاد وکړي، د بیارغونې له پاره جهاد وکړي، ټول باید راپورته شو، لکه پرون مو چې د روسانو د تیري پر وړاندې وسلوال جهاد اعلان کړی وو، باید نن د اداري فساد په مقابل کې جهاد اعلان کړو.))

د خوست ولایتي شورا غړي الحاج مجیب الرحمن سلیم زوی وویل، چې په افغانستان کې اوسنۍ نظام او د روسانو په مقابل کې څوارلس کلن جهاد د افغانستان د خلکو د سترو مجاهدو او قربانیو پایله ده، نو دلته باید یوه پاکه او د ښې حکومتوالۍ نمونه اداره جوړه شي.

د جهاد د دورې یو تن معیوب مولوي لیونګل حبیبي وویل، چې د مجاهدینو له بریالیتوب وروسته بیا تر ننه معلولینو، معیوبینو او د جهاد د لارې قربانیانو کورنیو ته د دوی هغه قانوني حقوق نه دي ورکړل شوي.

د قومونو د پیوستون شورا په انګړه کې د جوړې شوې غونډې یو تن ګډونوال د خوست د ولایتي شورا پخواني مشر سیدکریم خان خاکسار وویل، چې دوی د وسلوالو مخالفینو څخه د سولې د بهیر سره د یو ځای کیدو غوښتنه وکړه:

((زموږ دیني عالمانو، قومي مشرانو او مجاهدینو د دولت پر وسوالو مخالفینو باندې غږ وکړ، چې نور د سولې له پروسې سره یو ځای شي، زموږ د ملي یووالي حکومت دوی ته د سولې اعلان کړی دی، دوی باید نور جنګ پریږدي، د افغانانو سره په یوه ټغر کیني، د افغانانو سره ګډ ژوند وکړي، په دې هېواد کې بدبختیو او مشکلاتو باید د پای ټکی کېږدي.))

د یادونې وړ ده درویشت کاله وړاندې د افغانستان د مجاهدینو د څوارلس کلن وسلوال جهاد وروسته په افغانستان کې د ډاکټر نجیب الله په مشری روس پلوي حکومت سقوط وکړ او د ۱۳۷۱ کال د ثور په اتمه مجاهدینو ته واک وسپارل شو، خو د مجاهدینو په بریالیتوب سره هم یو ملي حکومت جوړ نشو، د جهادي تنظیمونو تر منځ کورنۍ جګړې پیل شوې او په دې جګړو کې تر ۶۵ زره ډیر افغانان ووژل شول.


'پاکستان مېشتي افغان کډوال هم سیم کارډونه اخیستلای شي'

پاکستاني چارواکي وايي، اوس رجسترډ افغان کډوال کولی شي موبايل سيم کارډونه تر لاسه کړي. په دې وروستيوو کې د پاکستان حکومت د پېژندلیک «بایيو مېټريک، چې د یو تن کمپیوټري پېژندګلو کېږي) بغير د سيم کارډونو ورکولو لړۍ بنده کړي وه او دا کار يې د ترهګرۍ مخنيوی لپاره ضروري ګڼلی و.له همدې وجه افغان کډوالو ته سيم کارډونه نه ورکول کېدل. 

خو د پاکستان ټيلي - کميونيکيشن ادارې وياند، خرم علي مهران نن «سېشنبه» مشال راډيو ته وويل: «چې څنګه د پاکستانیانو لپاره لازم ده، د باییومېټریک تصدیق وروسته سیم کارډ اخلي، نو دغه شان په ملک کې مېشت افغان کډوال چې د پي او ار کارډ لري، د باییو مېټریک تصدیق وروسته سیم کارډ اخیستلای شي. تر دې دمه مو نژدې ۳۵زره سیم کارډونه افغان کډوالو ته جاري کړي دي.

افغان کډوالو تر دې مخکې څو واره له پاکستاني حکومته د دې ستونزې د حل غوښتنه کړي وه.


د خوست روڼ اندي د هېواد حالاتو ته اندېښمن دي

د خوست روڼ اندي، د مدني ټولنو او ټولنیزو سازمانونو غړي د افغانستان روانو امنیتي، سیاسي او اقتصادي حالاتو ته په انديښنه کې دي او وايي، چې د ملي یووالي حکومت مشران باید د داخلي اختلافونو پر ځای ملي ګټو ته پام وکړي او د خلکو هیلو او غوښتنو ته ځواب ووايي.

دوی د افغانستان په ستونزو کې د سیمې هېوادونه او یو شمیر نړیوال قوتونه ښکیل بولي او په دې هېواد کې د سولې ټېنګول هغه مهال ممکن ګڼي، چې یاد هېوادونه په صادقانه ډول د افغانستان د مسلې په هواري کې مرسته وکړي.

مدني فعال فضل جان جهش مشال راډیو ته د روانو حالاتو څخه د یو شمیر راټوکیدلو ستونزو خبره کوي:

((ولس ته باید دا ډاډ ورکړل شي، چې دولت موجود دی، د خلکو عامې اړتیاوې باید پوره شي، تر څو له دې بن بست حالته موږ راووځو، که دا حالت دوام کوي، نو د خلکو په زړونو کې ویره شته، انديښنه ده، لوږه ده، ورځ تر بلې بیکاري زیاتیږي، زموږ هیله د ملي وحدت د حکومت له دواړو مشرانو هیله داده، چې له دې شخصي اختلافونو تېر شي، ملي ګټو ته پام وکړي او د خلکو غوښتنو ته پر وخت ځواب ووايي.))

د ولسواکو قوتونو د همکارۍ شورا مشر سخي جان سرحدي د افغانستان په مسله کې بهرني فکټورنه مهم بولي:

((ګاونډیو هېوادونو ډېر مشکل ایجاد کړي او له دې سترګې نه شي پټیدای، مثلاً ایران او پاکستان دي، امریکا کولای شي، چې د افغانستان د مسلې د حل لپاره پر پاکستان د اقتصادي فشار لاره خپله کړي، چین هم اوس افغانستان ته رانږدې شوی دي، چین هم د امریکا په ګډون ګاونډیو هېوادونو ته ویلای شي، چې د افغانستان په سوله کې همکارۍ وکړي، که زموږ مسلې حل کیږي، نو بهر نه به حلیږي او بهر پاکستان، ایران، چین او امریکا ده.))

سیاسي او مدني فعال محمدولیشاه عمرزی وايي، چې د ملي یووالي حکومت مشرانو هغه ژمنې ترسره نه کړې، چې د ټاکنیزو کمپاینونو پر مهال يې ولس ته کولې:

((ولس غوښتل چې د نوي حکومت په راتګ سره سوکاله شي، خو د ملي یووالي حکومت لکه څرنګه چې لازمه ده رسیده ګي يې ونه کړای شوه، په دې اړه د خلکو سره ډیرې انديښنې شته، ځکه څه چې دوی ویل، ويې نه کړای شول، ځکه دوی په شخصي اختلافونو لګیا خلک دي، نه په شایسته سالارۍ او نورو مسلو باندې.))

د ملي احساس مجلې مسوول مدیر سپین روان نورزی وايي، ولس د افغان حکومت نه په اوسني وخت کې د ژوندانه د نورو اسانتیاوو پر ځای یوازې د حکومت د ښه سیسټم او امن د تامینولو هیله لري:

((اوس نه خلک نه ډوډۍغواړي او نه چای، دوی یوازې او یوازې دا غواړي چې نظام او حکومت باید منظم سیسټم ولري او خلک يې په سیوري کې د امن ژوند وکړي.))

د خوست روڼ اندي او مدني فعالان داسې مهال د افغانستان موجوده حالاتو په اړه خپله انديښنه په ډاګه کوي، چې له یوې خوا امنیتي ګواښونه او د وسلوالو بریدونه ډیر شوي او بل لوري ته د ملي یووالي حکومت د مشرانو تر منځ د اختلافونو په وجه تر اوسه هم ډیری سیمه ییزې ادارې د سرپرستانو له خوا

اداره کیږي او هغوی د خلکو غوښتنو ته رسیده ګي نه شي کولای، په اوسني وخت کې په خلکو کې بې کاري هم د ستونزو په مهمو لاملونو کې ګڼل کیږي.


'افغان ملي ځواکونه د خپل هېواد دفاع ته چمتو دی'

افغان حکومت وسله والو مخالفینو ته خبرداری ورکړی چې د هېواد وسله وال ځواکونه د هرډول ګواښ د مقابلې توان لري.

د افغان حکومت رسمي خبري ویبپاڼې پرون د یو بیان په خپرولو سره ویلي چې افغان ځواکونه د خلکو، او د هېواد د ارزښتونو دفاع ته چمتو دي.

په بیان کې خلکو ته ډاډ ورکړل شوی چې افغان امنیتي ځواکونه به د دوی د امنیت ساتنه وکړي. بیان له دیني عالمانو، مدني ټولنو او له عامو افغانانو غوښتي دي چې د افغان ځواکونو ترڅنګ دې ودرېږي او د ملي وحدت ساتنه دې وکړي.

د افغان حکومت له خوا دا بیان په داسې حال کې خپرېږي چې څو ورځي مخکي وسله والو طالبانو د خپلو سپرلنیو عملیاتو د پیل خبر ورکړی و.


روزګان : قوماندان ګلاب خان ووژل شو

مشال راډیو

افغان چارواکي وايي بيګا د جنوبي ولايت روزګان د امنيې سرپرست قوماندان جنرال ګلاب خان وژل شوی دی. د روزګان د والي يو وياند نن وويل چې ګلاب خان سره د هغه د يو ميلمه په ترينکوټ کې د پوليسو له قوماندانۍ بهر ووژل شو.

ګلاب خان تر دې مخکې د روزګان په امنيې قوماندانۍ کې د جنايي پېښو د تحقيقاتو د څانګې مشر وو.

نوموړی تر هغې وروسته سرپرست قوماندان وټاکل شو چې د ياد ولايت د پوليسو قوماندان تېره مياشت په يو ځانمرګي بريد کې ووژل شو. تر اوسه پورې د دې حملې زمه واري چا نه ده اخيستي.

د يو بل خبر ترمخه د افغانستان د بادغیس ولايت امنيه قوماندان جنرال جمعه عديل بيګا مشال ريډيو ته وويل چې د تېرو څلورو ورځو په عملياتو کې يې ۲۳ وسله وال وژلي دي چې بهرنيان هم پکې شامل دي. د هغه په خبره د ولايت په مختلفو سيمو کې شوو دي عملياتو پر مهال نهه پوليس هم وژل شوي دي.

په افغانستان کې په داسې حال کې د وسله والو لخوا پر حکومتي چارواکو او دفترونو بریدونه مخ په زیاتیدو دي چې د نړیوالو ځواکونو شمیر کم شوی او د امنیت چارې د افغان سرتیرو لخوا پرمخ وړل کیږي. افغان شنونکي انګیري چې د پسرلي په راتګ سره په هیواد کې یو وارې بیا د وسله والو طالبانو او نورو وسله والو ډلو بریدونه زیات شوي دي. 

افغان حکومت د طالبانو ترڅنګ د اسلامي دولت وسله والې ډلې ( داعش ) سره هم لاس او ګریوان دی. د ننګرهار په جلال اباد کې په روانه میاشت کې د ترسره شوې خونړۍ ځانمرګې حملې پړه یادې ډلې قبوله کړې وه. خو ځیني راپورونه وايي د داعش پورې تړلو ځینو نورو کسانو بیا وروسته د مسولیت له قبولو انکار کړی و. 


خوست : سوله اعلان شوې ولسوالۍ د پرمختیايي کارونو شاهدانې دي

خوست کې سوله نومول شو ولسوالیو کې پرمختیايي کارونه پرمخ روان دي

په خوست کې د سولې په نوم د نومول شویو ولسوالیو چارواکي وايي، چې په اړوندو سیمو کې يې د خلکو په ژوند کې مثبت پرمختګونه رامنځته شويدي. بل لوري ته د چارو کتونکي وړاندیز کوي، چې یو شمیر نورې هغه ولسوالۍ هم باید د سولې د سیمو په نوم ونومول شي، چې هلته نسبي امن موجود دی، دوی دا کار د قانون د واکمنۍ د غځونې او د امن په ټینګولو کې ګټور بولي.

د خوست د هغو ولسوالیو د خلکو په ژوند کې مثبت بدلون راغلی، چې سیمې يې د سولې د ولسوالیو په نوم نومول شوی دي.

خوست کې د یوې غونډې ګډونوال
خوست کې د یوې غونډې ګډونوال

د یادو ولسوالیو ولسوالان وايي، چې په دې سره نه یوازې د دریو ولسوالیو په امن کې تر پخوا ښه والی راغلی، بلکې د خلکو او حکومت تر منځ اړیکې هم ټینګې شوې او ترسره شوې پروژې د خلکو د اقتصادي او ټولنیز ژوندانه په ښه توب کې ګټورې تمامې شوې دي.

د یکشنبې په ورځ د اسماعیل خیلو او مندوزیو ولسوال محمدیونس ځدراڼ مشال راډیو ته وویل، چې د دوی په ولسوالۍ کې تر هغه وروسته چې د سولې په نوم ونومول شوه، یو شمېر ګټورې پروژې چې د خلکو پر ژوند يې مثبت اغېز کړی پلي شوي دي:

((د خوست ولایت د اسماعیل خېلو او مندوزیو ولسوالۍ په دې ولایت کې د سولې په نوم نومول شوې ده، موږ ته يې په ولسوالۍ کې د دریو لکو ډالرو معادل پروژې عملي کړي دي، دویم داچې د ثبات برنامه په هغو ولسوالیو کې تطبیقیږي، چې هغه د سولې ولسوالۍ دي، نو موږ د هغو ټولو برنامو څخه مستفید شوي یو، چې د سولې په ولسوالیو کې تطبیقیږي.))

د ګربزو ولسوال محمداکبر ځدراڼ وايي، چې د سولې په نوم د ولسوالیو د نومولو یو ګټه داوه، چې د خلکو او حکومت تر منځ يې اړیکې نږدې کړې او په دې توګه پر سیمه ییزې حکومتوالۍ ولسي باور ډېر شوی دی:

((د جاپان په مرسته د سولې ولسوالۍ د نومونې په انعام کې موږ ته د دریو لکو ډالرو یوه پروژه راکړل شوې ده، د دې برنامو په واسطه په ولسوالیو کې د امن فضا رامنځته شوې ده، ځايي خلک په عادي ډول خپلو ستونزو د حل له پاره ولسوالۍ ته راځي او مامورین بیا په عادي ډول خپلو کلیو او کورنو ته ځي.))

په خوست کې د سمون انجمن مشر یوسف انتظار وايي، چې که د سولې په نوم د هغه شمېر ولسوالیو چې نسبي امن په کې دی، د نومونو بهیر دوام پیدا کړي، نو دا به لیرې پرتو سیمو ته د قانون د واکمنۍ په غځونه کې هم ګټور تمام شي:

((که چیرې هغه ولسوالۍ چې نسبي سوله او امن په کې شته، د سولې په نوم یادې شي، په دې سره به له یوې خوا ټولنیز پرمختګ او د خلکو په اقتصاد کې ښه والۍ راشي، بل لوري ته به لیرې پرتو ولسوالیو ته د قانون واکمني وغځیږي، چې په دې سره به پخوانۍ د حکومت او ولس بې باورۍ ختمې شي او خلک به د حکومت ملاتړ ته راودانګي.))

د یادونې وړ ده، په خوست کې ځاځي میدان، ګربز همدارنګه اسماعیل خېل او مندوزي هغه ولسوالۍ دی، چې په وروستیو کالونو کې د سولې په نوم نومول شوې او په هغه کې یو شمېر اساسي پروژې هم تطبیق شوي دي، خو کتونکي دا هر څه ډېر کم بولي او وايي، چې د سولې ولسوالیو سره باید هر اړخیزه مرسته وشي، تر څو د ناامنو سیمو خلک د سولې مزایاوې او د محلي ادارو سره د اړیکو د پاللو عملي نتیجې له نږدې وګوري.


ننګرهار: د وینې آن لاین بانک پر لیکه شو

جلال اباد کې د وینې بانک پرانیستل شو

په ننګرهار کې په لومړي ځل د وينې انټرنيټي بانک پرانيستل شو چې د افغانستان په ګوټ ګوټ کې به د هغو کسانو لپاره اسانتیا پيدا کړي چې وینې ته اړ دي.

د وینې د ورکړې دا انټر نيټي بانک په ننګرهار کې د ژوند خیریه ټولنې په نوښت د اتوار په ورځ د اطلاعات او فرهنګ رياست د غونډو په تالار کې د يوه معلوماتي پروګرام په ورکولو کې سره پرانستل شو. 

یو تن رضاکار د وینې د ورکولو پرمهال
یو تن رضاکار د وینې د ورکولو پرمهال


دا چې له دغه انټرنيټي يا آن لاین بانک نه به د وینې ضروتمندان څنګه ګټه اخلي، په دې اړه د ژوند خیريه ټولنې يو تن فعال غړي اکرام الله اکرام مشال راډيو سره په خبرو کې وويل:

 
(( دا آن لاین بانک به لایتناهي ډونران ( د وینې د ورکړې رضارکاران) ولري، د استعمال طریقه يې داسې ده چې په هر ولایت کې چې د چا وینې ته اړتيا پيدا کيږي، زموږ ویب پاڼې( www.zhwand.af ) ته به مراجعه کوي.

د مثال په توګه دوی او منفي (-O) وينې ته اړتیا لري، دوی په سرچ یا لټون کې او منفي ورکوي او د خپل ولایت نوم لیکي. موږ چې په دې ویب سايټ کې په همغه ولايت کې د اوو منفي ډونران لرو، دوی ته یې ښکاره کوي، هلته زموږ د رضاکارو د ټيلیفون شميرې دي، دوی هغوی سره اړيکې نيسي او هغه ورته راځي، او وینه ورکوي.)) 
 
د ننګرهار د عامې روغتیا ريس ډاکټر نحیب الله کاموال چې د وینې د آن لاین بانک پرانستونکي غونډه کې يې ګډون کړی و، مشال راډيو سره په خبرو کې وویل چې د دغه بانک په پرانستو سره به د هيواد په کچه د وینې اړتیا تر ډيره حده پوره شي:


(( موږ اکثره وخت داسې واقعاتو سره مخ کيږو چې هغه وینه کمیافته وي، او همدا رنګه د تلیسیميا ناروغانو لپاره که تازه وینه ورسېږي، نو دا هم ډيره ګټوره وي، نو د دغې ډيټابیس په فعالیدو سره به زموږ ډير شمير داسې ناروغان چې هغوی تازه وینې ته ضرورت لري، ستونزه به یې د دې ډيټابیس په فعاليدو سره هواره شي.)) 
 
د وینې د بانک د پرانیستې غونډې ته د تليسیميا يو شمېر هغه ناروغان هم راغلي وو چې د ژوند خيريه ټولنې په هڅو ورته وخت په وخت وینه برابره  شوې وه.

په تیلیسیمیا اخته ماشومان
په تیلیسیمیا اخته ماشومان

د ننګرهار د هنرمندانو د اتحاديې مشر استاد کمين ګل چې درې سره بچيان يې  په  تلیسيميا اخته دي، او هرو پينځلسو ورځو کې ورته یاده ټولنه وینه برابروي، مشال راډيو سره په خبرو کې وويل: 


(( زما درې ماشومان د تليسيما په ناروغۍ باندې اخته دي، د دغې ټولنې نه مننه کوو چې هر وخت موږ تقاضا کړې، موږ ته يې خلک حاضر کړي او دې ماشومانو ته يې وینه ورکړې ده.)) 
 
د ننګرهار ولايت مطبوعاتي مسوول احمد ضیا عبدالزي هم خپل نوم د وينې د رضا کارو په لست کې وليکه او له مخې سره يې خپله وینه عطیه کړه. نوموړي ډاډ ورکړ چې ولایتي اداره به د ژوند خيريه ټولنې په هره برخه کې ملاتړ کوي: 


(( زما د وینې ګروپ مثبت ای دی او ما خپله وینه دغه پروګرام ته اهدا کړله او زه باور لرم چې زما وینه به هغه چا ته ورکول کيږي چې هغوی ورته اړتیا لري او د هغوی ژوند پرې بچ کيدلی شي.)) 
 
د ژوند خیريه ټولنې مسوولين وايي چې دوی د تيرو دريو مياشتو په دوران کې چې د وینې د ورکړې کمپاین يې د فیسبوک په پاڼه پيل کړی و، تر اوسه يې ۸۵۰۰۰ سي سي وينه له خپلو رضاکارو څخه د وینې ضرورتمندانو ته راټوله کړې او له دې نه علاوه يې د بې وزلو لاسنيوی هم کړی او په راتلونکي کې به خپل فعالیتونه د خیر په نورو کارونو ته هم وغځوي. 


ياده دې وي چې ژوند خيريه ټولنې سره په ټولو خیریه کارونو کې په ننګرهار کې میشتې بېلابېلې خيريه ټولنې چې د همغړۍ په نوم سره په يوه مرکز راټولې شوي، همکارې دي. 
 


د غزني د والي پر دفتر بريدونه شوي

نن (جمعه) سهار طالب وسله والو د ښار له سوېلې اړخه د غزني د والي پر دفتر، د هغه د اوسېدو پر ځای او ځينو نورو دولتي ودانيو راکټي بريدونه کړي دي، خو د غزني چارواکي وايي، بلا وه برکت نه وو.

د غزني د چارواکيو په خبره، راتوغول شوي راکټونه د والي له دفتر او د هغه د اوسېدو له ځايه يوه او بله خوا لګېدلي دي او بل چا ته يې هم چندان ځاني زيان نه دی اړولی.

د دغه ولايت مرستيال والي محمد علي احمدي وايي، فکر کوي چې طالبانو د عزم په نامه د خپلو نويو عملياتو پيل په همدې توګه وکړ.

دی وايي، د طالبانو له داسې بريدونو څخه يې سترګه نه سوځي.

"هغوی د عزم په نامه خپل پسرلي عمليات پيل کړي دي او هڅه يې کوله چې نن د دغو عملياتو په پيل کې خپل زور وښيي. دوی نن سهار د ښار له سوېلي اړخه څلور راکټونه راوويشتل، يو راکټ د ولايت مقام او د والي د دفتر په خوا کې، په ښاروالۍ کې لګېدلی دی. يو بيا لږ ها خوا له موزيم سره لګېدلی او بل يې د ښځو چارو له رياست سره راپرېوتی دی، خو چاته يې مرګ ژوبله نه ده اړولې."

احمدي وايي، يو بل راکټ هم راويشتل شوی، خو چې په کوم ځای کې به لګېدلی وي، په اړه يې دقيق مالومات نه لري.

په دې سربېره، نن د غزني په خوګياڼو، شبهاز دوکانونو، مقر، ده يک او د اندړو په ځينو کې سيمو کې هم د سرتېرو او طالب وسله والو تر منځ د نښتو راپورونه ورکول شوي دي.

ذبيح الله مجاهد چې ځان د طالبانو وياند بولي، وايي، په دغو بريدونو کې يې سرتېرو ته مرګ ژوبله اړولې، خو چارواکي يې ادعا بې اساسه بولي.

 

 

مهم موضوعات