جمعه 6 مار 2015 سیمه ییزوخت 01:09

افغانستان

'د افغان ډیپلوماټانو نیولو په اړه د پاکستان سپیناوی نه منو'

د افغانستان بهرنیو چارو وزارت ویاند شکیب مستغني

د افغانستان بهرنیو چارو وزارت وايي؛ د پاکستان په خیبر پښتونخوا صوبه کې د پولیسو له خوا د څلور افغان ډیپلوماټانو د توقیف «حراست کې ساتل» په اړه دوی ته ورکړل شوی سپیناوی، د قناعت او منلو وړ نه دی.

د راپورونو له مخې د زیارت په ورځ د خېبر پښتونخوا پولیسو په پېښور کې د افغانستان جنرال قونسلګرۍ څلور ډیپلوماتان ونیول او د څو ساعتونو لپاره یې په زندان کې وساتل.

د دغه وزارت ویاند شکیب مستغني د دوشنبې په ورځ ازادۍ راډیو ته وویل چې دوی په کابل کې د دغه هیواد له سفیره غوښتي چې په دې برخه کې هر اړخیزه څېړنه وکړي.

مستغني وايي چې د څېړنو نتیجه به هرومرو له دوی سره شریکوي:

"هغه سپیناوی چې دمخه په دې اړه وړاندې شوی؛ په هېڅ ډول د قناعت او منلو نه دی؛ تېره ورځ چې د بهرنیو چارو وزارت سیاسي مرستیال په دې اړه د پاکستان له سفیر سره لیدنه وکړه؛ د افغان حکومت سخته خواشیني او احتجاج یې هغه ته ورسولو او له هغه یې وغوښتل چې په دې اړه دې هر اړخیزه څېړنه وشي او د پایلو په اړه دې افغان لوری خبر وساتي."

د افغانستان بهرنیو چارو وزارت د معلوماتو له مخې دوه تنه افغان ډیپلوماټان د پنجشنبې په ورځ د پاکستان د خیبر پښتونخوا صوبه کېد پولیسو له خوا نیول شوي چې بیا ورسته کله چې دوه تنه نورو همکارانو یې د پرېښودو هڅې کولې؛ دوی هم ونیول شول.

د افغان بهرنیو چارو وزارت یو بیان وايي، په کابل کې د پاکستان سفیر سید ابرارحسین پرون «اتوار» د بهرنیو چارو وزارت ته وغوښتل شو چې پکې د دې وزارت سیاسي مرستیال حکمت خلیل کرزي د پاکستان سفیر ته وویل، د پولیسو چلند یې له ډيپلوماتیکو اصولو ښکاره سرغړونه ده.

بیان د ښاغلي خلیل کرزي له قوله زیاتوي، د افغانستان او پاکستان ترمینځ اړیکي او همکاري اوس یوه نوي پړاو ته رسېدلي او په دې کارونو سره باید زیانمنې نشي.

د حقوقي چارو کارپوه او د کابل پوهنتون استاد نصرالله ستانکزی وايي چې د پاکستاني پولیسو دغه عمل د نړیوالو حقوقو او ښه ګاونډیتوب له اصولو سره په مخالفت کې دی:

"اساسي خبره دا ده چې د نړۍوالو حقوقو له نظره او د ویانا کنوانسیون له نظره؛ ډیپلوماټ حتا که په بل هېواد کې جرم هم وکړي؛ جنايي خوندیتوب لري، لټه یې نه کېږي، ازادي یې نه اغېزمنه کېږي، د پاکستان پولیس یا بل هر چارواکی؛ که د څو شېبو لپاره یې هم ډېپلوماټان ونیسي؛ دا د نړیوالو حقوقو او ښه ګاوندیتوب خلاف عمل دی."

د یادونې ده چې د پاکستان په خیبر پښتونخوا کې د افغان ډیپلوماټانه نیونه په دغه هیواد کې د افغان کډالو د ورستیو نیونو او ځورونو په دوام تر سره کېږي چې ډېر ځله افغان چارواکو له دې امله اندېښنه ښکاره کړې ده.


ننګرهار: ولسي پولیس به زر په کار پیل وکړي

فایل فوټو

په ننګرهار کې د ولسي پوليسو د فعالولو دوه ورځنی سيمينار د اتوار په ورځ پيل شو.په دې سيمينار کې به په داسې يوه طرحې کار وشي چې له امله يې د پوليسو او ولس تر منځ فاصلې راکمې شي.

دغه سيمينار د جلال اباد ښار په يوه مقامي هوټل کې پرانستل شو چې په يو شمير دولتي چارواکو سربيره په کې قومي مشرانو او د مدني ټولنو يو شمېر فعالانو ګډون کړی و.

د افغانستان د کورنيو چارو وزارت کې د ولسي پوليسو د ارزونې مدير سمونوال محمد خليل اورياخیل د سيمينار پرانستونکي وینا کې وويل، د ولسي پوليسو جوړيدل به د ولس او پوليسو تر منځ فاصلې راکمې کړي.


(( ولسي پوليس د ملي پوليسو نه بيل نه دي، بلکې د ملي پوليسو یو جز دی. دغه ولسي پوليس د ملي پوليسو او ولسونو تر منځ د يوه پل حیثیت لري. پوليس به د خپلو خلکوله نظریاتو نه برخمن شي او د خپلو خلکو د نظریاتو نه په استفادې سره د جرم د مخنيوي او د مجرمینو په نيولو کې خپله ونډه تر سره کړي.))

د ننګرهار د امینه قوماندانۍ اداري مرستيال قاري اميرخان لیوال وايي چې د ولسي پوليسو په فعالیدو سره به پوليس په دې وتوانيږي، چې د ډېرو جرمونو مخه ونيسي:


((  دا نننی سيمينار د دې لپاره دی چې په اینده کې به ولس دومره حاکم وي، چې پولیس به له غوږ نه نيسي چې راځه دلته یو، غير قانوني کار شوی، د دې مخنيوی وکړه.))

د ننګرهار ولايتي شورا غړی ذبیح الله زمري وويل، په کار ده چې د نمایشي سيمینارونو په ځای عملي کار ته ملا وتړل شي.

((  له پچیرواګام ولسوالۍ نه نيولې، تر دور بابا، تر نازیانو پورې او تر حصارک پورې د پولیسو ژوند له مرګ سره مخامخ دی، بیا هم د وطن نه دفاع کوي، په ځای د دې چې هغوی تقدير شي،  مجازات کيږي. قانون باید عام اوسي، پاليسي باید عامه اوسي، پلان د خلکو د ښيګنو لپاره واوسي، د شخصي اهدافو او ګټو لپاره نه اوسي.))

د کورنيو چارو وزارت چارواکي وايي چې د افغانستان په اتو ولایتونو کې ولسي پوليس  فعال شوي او په کار يې پيل کړی دی.

د ننګرهار د پوليسو چارواکي وايي چې ډير ژر به د امنیه قوماندانۍ په چوکاټ کې د ولسي پوليسو مدیريت پرانستل شي، چې په بیلابيلو حوزو کې به شپږ څانګې ولري.

دوی وايي چې د ولسي پوليسو په جوړيدو سره به د ولس ډیرو ستونزو ته پولیس لاسرسي پيدا کړي او د جرمونو په کموالي کې به مثبت اغيز ولري.

 

 


اشرف غني : ایران ته نه ځم ، د خپلو خلکو ترڅنګ ودرېږم

افغان ولسمشر محمد اشرف غني

د افغانستان و لسمشر محمد اشرف غني په  هیواد کې د وروستیو اورښتونو په نتیجه کې د اوښتو تلفاتو له کبله ایران ته خپل رسمي سفر وځنډاوه. 

ولسمشر پرون ناوخته ملت ته په یوه ځانګړې وینا کې وویل چې د افغانستان خلک له یوه حساس پړاو څخه تېریږي او په داسي حالت کې به خپل خلک یوازي پرېنږدې :

(( په دې حساس وخت کې زه غواړم د خپلو خلکو تر څنګ اوسم . له همدې کبله مې پرېکړه وکړه چې ایران ته خپل سفر وځنډوم . د ایران د ولسمشر له بلنې څخه مننه کوم او حتما به هغه هیواد ته سفر وکړم او اوس نشم کولی خپل کور او هیواد وال یوازي پریږدم.)) 

د وروستیو اورښتونو له کبله د افغانستان په ۱۹ ولایتونو کې تر ۲۸۰ ډیر کسان مړه شوي ، تر ۱۴۰ ډیر ټپیان دي او په سلګونو کورونه ، باغونه او کروندې ویجاړي شوي دي. تر ټولو زیات زیانونه دپنجشیر ولایت لیدلي دي.

له همدې کبله پدغه هیواد کې درې ورځي ملي ماتم هم  اعلان شوی دی.

دا په داسې حال کې ده چې د سالنګ لویه لار وروسته له څو ورځو بندیدو پرون ( خالي ) بیرته د ټرافیکو پرمخ پرانیستل شوه.

په سیمه کې د مشال راډیو خبریال وایي، چې له پرون ماښام راهیسې د خلکو تګ را تګ پردغه لار پیل شویدي.

د سالنګ لویه لار تیره اونۍ د وروستیو برفکوچونو له امله د ترافیکو پرمخ تړل شوی وه.اوس مهال موټرونه اجازه ورکول کیږي څو په پوره ډاډ سره د سالنګ پر لار تګ راتګ وکړي.

د سالنګ د لارې د خلاصیدو خبره په داسې حال کې کیږي، چېد بغلان د طبیعې پیښو پر وړاندې د مبارزې ریاست مسولین وايي، چې تیره شپه د برفکوچونو له امله د دغه ولایت د خنجان ولسوالۍ په باجګاه درې کې یو تن مړی شوی او څلور تنه نور ټپیان شویدي.

د نورستان سرپرست والي بیا مشال راډيو ته ویلي، له ولسوالیو سره د مرکز پارون مواصلاتي لارې هم د واورې ښویدو له امله تړل شوي دي.


افغان حکومت : هلمند کې د ۴۰۰ یرغمل شویو کورنیو د خوشې کولو هڅې روانې دي

د افغانستان د مارجه ولسوالۍ د کور مخې ته ناست یو ماشوم

د افغانستان د هلمند ولایت د مارجې ولسوال احمد شفیع سوله مل وايي افغان ځواکونه د وسله والو طالبانو د ولکې نه د یرغمل شویو ولسي کسانو د راخوشې کولو په موخه ډېر په احتیاط عملیات کوي.

نوموړي د خالي په ورځ مشال راډیو ته وویل، کله چې څو ورځې وړاندې په یاده سیمه کې حکومتي ځواکونو عملیات پیل کړل او پر وسله والو یې ګېره تنګه کړه نو هغوی ولسي کسان د سپر په توګه له ځانه سره یرغمال ونیول. نوموړي زیاته کړه :  

(( دوی دا ځلې هم له همدې تکتیک نه استفاده وکړه او خلک یې یرغمل کړل. زموږ هڅه داده چې په سیمه کې د وسله والو طالبانو لخوا یرغمل شویو کورنیو ته د سر او مال زیان ونه رسیږي نو ځواکونه مو ډېر په احتیاط سره عملیات پرمخ وړي. )) 

سوله مل وايي که عملیات د ځنډ سره هم مخ کیږي خو دوی به د کامل احتیاط نه کار اخلي، ځکه چې د ولسي خلکو د ژوند حفاظت دوی ته ډېر اهمیت لري.

 دافغانستان د هلمند ولایت په مارجه او څو نورو ولسوالیو کې له تېرو څو ورځو راهیسې د ( ذوالفقار ) په نامه عملیات پیل شوي دي او یو ځايي قومي مشر عبدالسلام وايي څلور سوه کورنۍ د وسله والو سره یرغمل دي :

(( دغه کورنۍ د طالبانو تر تاثیر لاندې دي. دوی ته د باندې تللو اجازه نه ورکول کیږي. طالبانو په دغه سیمه کې سنګرونه نیولي دی. څو ورځې کیږي چې دغلته په دوام داره توګه جنګ روان دی. )) 

دغه قومي مشر دا هم وايي چې وسله والو ځای په ځای ماینونه فرش کړي او د ولسي خلکو ژوند یې د ګواښ سره مخ کړی دی. 

تر اوسه طالبانو د عملیاتو او یا هم د خلکو د یرغمل نیونې په اړه مشال راډیو ته څه نه دي ویلي. د جنګ له کبله د تلفاتو کره شمېره هم معلومه نه ده. 

 


"د غلو مشهور مشر" رييس خداداد په دار شو

رييس خداداد

په بېلابېلو جرمونو تورن، رييس خداداد په دار وځړول شو.

د افغان حکومت يو چارواکي د نوم نه ښودو په شرط د مشال ريډيو افغان څانګې ته نن وويل چې د انسان تښتونې، غلا او نورو جرمونو لپاره تورن سيدالله چې په رییس خدایداد مشهور وو، يې نن غرمه اعدام کړی دی. نوموړی په پل چرخي زندان کې په دار شوی دی.

د افغانستان جاسوسي ادارې يا ملي امنيت(NDS)څه موده وړاندې رییس خدایداد په کابل کې په اوږدو او ځانګړو عملياتو کې ونيو. دوی دی يو ډير خطرناک او تر ټولو لوی مجرم وباله.

رييس د خلکو په تښتولو، غلاوو او وژنو تورن وو چې څه موده وړاندې په ځانګړو عملياتو کې ونيول شو

د جنورۍ په مياشت کې د کابل يو عدالت رییس خدایداد ته په هيواد او بهر کې په بېلابېلو جرمونو کې د لاس لرلو له امله د مرګ سزا اورول شوي وه. دي عدالت د نوموړي څلورو نورو ملګرو ته د قيد سزا اورولي وه. په دوی کې يو ته شل کاله او نورو دريوو ته اوه اوه کالونو بند سزا ورکړل شوي وه.

د افغان چارواکو په خبره رييس خداداد په مختلفو پاسپورټونو ځينو هيوادونو ته سفرونه کول او د افغانستان دننه يې بېلابېلو ولايتونو ته د تګ په وخت بدل بدل نومونه استعمالول. د ملي امنيت د معلوماتو تر مخه نوموړی په پاکستان، تاجکستان او دوبۍ کې هم په بدلو نومونو هستوګنه کړي.

لنډه موده مخکې داسې رپورټونه خپاره شول چې رييس خداداد د ملي امنيت له زندانه تښتيدلی خو بيا يې يادې ادارې يوه ويډيو خپره کړي چې پکې نوموړي په بنديخانه کې د موجوديت او د امنيتي ځواکونو د ښه سلوک خبره وکړه.

 


افغانستان: واورې ښویېدو او سېلاونو ۲۳۰ تنه وژلي

د پنجشېر په پنځو ولسوالیو کې واورې ښویېدو په یو شمېر کليو کې په لسګونه وګړي او کورونه لاندې کړي دي.

په دې سیمو کې واورې تل ورېږي؛ خو سږنی واورې ساری نه لري او هېڅکله يې هم دومره مالي او خاني تاوان نه وو اړولی.د طبیعي پېښو ضد نظم ادارې ویلي چې تر دامهاله ۲۳۳ تنه وژل شوي دي.

د دې ادارې مرستیال محمد اسلم سیاس آزادۍ راډیو ته وویل چې دا تلفات د تېرو څو اونیو د پرله پسې واورو د ورښت او واورې ښویېدو نتیجه ده:

"درنو واورو او د بارانونو ورښت، د هېواد په ډېری ولایتونو کې تلفات اوړلي دي؛ پتېره په پنجشېر ولایت کې یې۱۶۵ کسان وژلي او یو شمېر کورونه هم ویجاړ شوي دي."

 سیاس زیاته کړه چې په پنجشېر او نورو ولایتونو کې له ناورین ځپلو کورنیو سره د مرستې هڅې روانې دي، او تر سل میلیونه افغانۍ بېلابېلو ولایتونو ته استول شوي دي.

د خنج ولسوالۍ اوسېدونکي محمدعلم او عبدالهادي وايي چې د درنو واورو ورښت لسګونه کورونه تر واورو لاندې کړي دي او د دوی په وینا، د دې پېښو انساني تلفات ښايي اصلا تر دې زیات وي:

د پنجشېر مرستیال والي عدالخبیر بخشي وايي چې د دې ولایت په پنځو ولسوالیو کې انساني تلفات اوښتي دي. ښاغلي بخشي آزادۍ راډیو ته وویل چې ګومان کېږي لسګونه نور کسان به ښايي تر واورو لاندې شوي وي:

"ترټولو زیات تلفات په پنځو ولسوالیو او مرکز کې وو. په پریان ولسوالۍ کې د تلفاتو شمېر له اتیا تر نوي کسانو ته رسېږي. د حصه اول او درې ولسوالۍ هم په همدې توګه."

په همدې حال کې په پنجشېر کې د دې طبیعي مصیبت د یوشمېر قربانیانو د ډله ییزې جنازې مراسم پرون ترسره شول.

پر پنجشېر سربېره د هېواد په نورو سیمو کې هم د واورو ښویېدو خلکو ته ځاني او مالي تلفات اړولي دي. د چارواکو په وینا یوازې په بدخشان ولایت کې ۲۴ تنه وژل شوي دي.

له سالنګونو، د پروان او بغلان له نورو سیمو او همداراز له بامیان ولایته هم د تلفاتو راپورونه رارسېدلي دي.

د سالنګ لاره اوس مهال بنده ده او په دې لویه لاره کې دومره ډېره واوره پرته ده چې د چارواکو په وینا پاکول یې ښايي لږترلږه یوه اونۍ وخت ونیسي.

عموما د کال په دې موسم کې د واورو په ورښت کې کموالی راځي خو سږکال د ژمي په وروستیو ورځو کې د هېواد د شمال او شمال ختیځ په سیمو کې درنې واورې وورېدلې.


د کریکټ نړۍوال جام کې د افغانستان لومړی بری

په دغه لوبه کې لومړی سکاټ لېنډ لوبډلې بیټنګ وکړ او په ۵۰ اورونو کې افغانستان ته د ۲۱۱ منډو هدف وټاکلی.

افغان ملي لوبډلې په خپل وار کې د ټولو نهه لوبغاړو په سوځېدو سره په پنځوستم اور کې خپل هدف پوره کړ او لوبه یې وګټله.

له لوبې وروسته د افغانستان کریکټ ملي لوبډلې کپټان محمد نبي عیسی خېل خبریالانوته وویل چې دا بریا د کریکټ په نړیوال جام سیالیو کې د افغان لوبغاړو هڅونې لامل کېږي.

 (دا لومړی ځل دی چې موږ په نړیوال جام سیالیو کې بری مومو، له دې څخه مو خوند واخیست. هیله لرو چې د کریکټ نړیوال جام سیالیو کې ښه وځلیږو او نورې بریاوې هم ولرو.)

د افغانستان بله لوبه د راتلونکې اونۍ په چارشنبه له اسټرالیا سره کېدونکې ده.

د افغانستان ولسمشر محمد اشرف غني، اجرایوي ریس عبدالله عبدالله او پخواني ولسمشر حامد کرزي افغان لوبډلې ته پر خپله لومړنۍ بریا مبارکي ویلې ده. بلخوا د افغانستان په لربر کې د کریکټ مېنوال د نړۍوال جام سیالیو کې د خپل هېواد په بري جشنونه کوي.

د خوست او میدان وردګو ولایتونو په خپرو شویو خبرپاڼو کې د کریکټ په نړیوال جام کې افغانانو ته د ملي لوبډلې د بریا مبارکي ویلې ده.

دا لوبه د نیوزي لېنډ په دانیډن ښار کې وشوه.

افغانستان دنړیوال جام په الف ګروپ کې دي او تر اوسه یې دوه لوبې بایللي او یوه یې ګټلې ده.

د کرکټ نړیوال جام لوبې د فبروري په څوارلسمه په اسټرالیا او نیوزي لېنډ کې پیل شوې.


د افغانستان کرکټ ډله له بشپړې ولولې سره سکاټلېنډ ته مخامخېږي

د افغانستان کرکټ بورډ چارواکو هيله ښودلې چې د افغانستان کرکټ ملي ټيم به خپله درېيمه لوبه، چې له سکاټلېنډ سره ده، وګټي. دا لوبه سبا پنجشنبه په نيوزي لېنډ کې کېږي.

د افغانستان کرکټ ملي ټيم تر دې مخکې د بنګله دېش او سري لنکا له ټيمونو سره کړې دواړه لوبې وبایللې.

د افغانستان کرکټ بورډ مطبوعاتي مسئول فريد هوتک له مشال راډيو سره په خبرو کې ويلي، له دې سره چې افغان کرکټ ټيم د راتلونکو لوبو لپاره په بشپړه توګه تياری لري، له سکاټلېنډ سره د دې لوبې د ګټلو لپاره یې د ولولې او مورال لوړول ډېر مهم کار دی. 

 

د افغانستان د کرکټ ټيم له سکاټلېنډ سره د سبانۍ لوبې وروسته، د مارچ په څلورمه د اسټراليا له ټيم سره، د مارچ په اوومه د نیوزي لېنډ له ټیم سره او د مارچ په ديارلسمه د انګلينډ له ټيم سره لوبېږي.


افغان ولسمشر له پاکستاني وزیراعظم سره ټېلیفون کړی

له وزیراعظم کوره جاري شوې خبر پاڼه په وینا، دواړه مشران پر دوه اړخیز معاملو او پر افغان ټرانزټ ټریډ غږېدلې دي.

پر دېموقع وزیراعظم نواز شریف ورته ویلي چې دواړو ملکونو ترمینځه دوه اړخیز تعلقات ورځ تر بلې مضبوطېږي.

وزیراعظم نواز شریف سره په خبرو کې د افغانستان اولسمشر پدې خبرې د اطمینان ښکاره کړو چې دواړو ملکونو ترمینځه تعلقات مخ په وړاندې روان دي او هر ورځ تیریدو سره د دواړو ملکونو اولسونو او ادارو ترمینځه رابطې هم مضبوطیږي.

له وزیراعظم نواز شریف سره په خبرو کې ولسمشر اشرف غني، تېره اونۍ افغانستان ته د پاکستان پوځ مشر جنرل راحیل شریف د ورلیږلو مننه کړې او ویلې چې له دې سره به دوه اړخیز تعلقات مضبوطیدو کې مرسته ترلاسه شي.

د ذکر ده پر دې مهال دواړو مشرانو ویلي چې ترهګري د دواړو ملکونو مشترکه دښمنه ده او د دې خلاف یې د جنګ کولو د عزم څرګندونه هم وکړه.

د پاکستان او افغانستان ترمینځ تعلقاتو په اړه د خبریال طاهر خان وایي، د دواړو ملکونو ترمینځ د اوسنيو تعلقاتو سطح ځکه د اطمینان وړ ده چې دواړو ملکونو ترمینځه د اعتماد بحالي شویده او دواړه داسي ګامونه اوچتوي چې د یو بل نه مطمین ښکاري.

د ده په وینا دواړه ملکونه غواړي چې په کومو خبرو اتفاق شوي دې چې په هغې کې پرمختګ وشي او په دې کې د سولې عمل د ټولو مهمه غوښتنه ده.

دې وایي، «د افغانستان چې د پاکستان نه کومه مهمه غوښتنه ده نو هغه دا چې سوله کې دې ورسره همکاري اوکړې شي نو داسي ښکاري چې پاکستان اوس داسي ګامونه اخیستې دي چې هغې ترې مطمین ښکاري، ډاکټر عبدالله چې د افغانستان ریس دې نو د هغه دا خبره کړیده چې یو څو ورځو کې طالبانو سره خبرې شروع شي او هغه تیره ورځ کابینې ته وینا کې وویل چې هاغه د پاکستان شکریه ادا کوي چې د پوځ مشر یې کابل ته رالیږلې وو نو زما خیال دې چې دا د اعتماد بحالي ده»

مشال راډیو سره خبرو کې ده زیاته کړه چې تجارت په اړه افغانستان ته اوس هم څه ګیلې دي ، کله چې د تیر کال په نومبر میاشته کې د افغانستان ولسمشر د پاکستان دوره کړې وه نو د څلویښتو نه زیاتې فیصلې شوې وې نو زما پخیال وزیراعظم نواز شریف سره په ټیلي فون دا خبره شوې وي ځکه چې اوس هم افغان تاجرانو ته مشکلات شته،،

بلخوا د افغانستان لپاره د پاکستان پخوانې سفیر وایي رستم شاه مومند چې د دواړو ملکونو اړیکې به اله ښه کیږي چې کله په افغانستان کې جنګ بند شي.

«بنیادي خبره دا ده چې په افغانستان کې جنګ بند شي او دې لپاره کار وکړې شي. د حکومتونو ترمینځه اړیکې ښې کیدل ښه خبره ده خو خبره به هله هواریږي چې حالات په ځاې شي او له هغې پس له پولو پوځونه واپس شي او اقتصاد او د خلکو خیر ښېګړې ته پام ورکړل شي نو دا به زیاته غوره وي. دورې پخپل ځای ښه دي خو تر د دې مخکې دا سوچ و فکر پکار دې چې افغانستان کې به دا جنګ په کوم ډول بندېږي»

یاده دې وي پدې ورستیو کې دواړو ملکونو د اعلی چارواکو ترمینځه رابطې سیوا شویدې او د خبریال طاهر خان په وینا چې دا اوس د دواړو ملکونو ضرورت دې چې د یو بل اندیښنو ته توجو ورکړې او د یو بل غوښتنې ومني.


خوست: ورزش دوه زره کسان له نشو راګرځولي

په خوست کې د نشه يي توکو پر ضد ادارې چارواکي وايي، چې په دې ولایت کې
دوه زره هغه کسان چې پخوا په نشه يي توکو روږدي ول، په دې وروستیو کې د
سپورټ له لارې د نشو راګرځیدلي او د ټولنې روغ او سالم خلک ورڅخه جوړ شوي
دي.
د دوشنبې په ورځ په خوست کې د مخدره توکو پر ضد ادارې مشر میرناګل تڼیوال د پولیسو او عوامو ورزشکارانو په یو ګډ پروګرام کې چې د ورزش د پرمختیايي  سازمان له خوا جوړ شوی وو، مشال راډيو ته وویل، چې دوی په دې هڅه کې دي، تر څو د ورزش له لارې په نشو د روږدیدلو مخه ونیسي:


((سپورټ او ورزش د نشه يي توکو په کنټرول کې مهم نقش لوبوي، د المپیک د ځايي ادارې د رپوټ له مخې دوه زره کسانو د سپورټ له لارې د نشو نه راګرځیدلي دي، دا ډېره مهمه وسیله او لاره ده، تر څو موږ وتوانیږو د دې وسیلې په مرسته روږدي له نشو راورځوو.))


د دې پروګرام ګډونوال خوست امنیه قوماندان مل پاسوال فیض الله غیرت ورزش د پولیسو او عوامو تر منځ د اړیکو د ټینګولو یوه ښه لاره وبلله او زیاته يې کړه، چې دا ډول ارتباطات د سولې او امنیت په ټینګولو کې هم ګټور تمامیږي:


((ورزشکار د جرایمو په مخنیوي او د معتادینو په راګرځولو کې ډېر مهم رول لوبوي، موږ په دې نظر یو هر څومره چې د پولیسو او د خلکو تر منځ ارتباطات ډېر شي، همدومره د سولې او امنیت په راوستلو کې ډېر ګټور تمامیږي.))


په سویل ختیز زون کې د ورزش د پرمختیايي سازمان مشر یونس اهنګر وویل، چې
د دې پروګرامونو په پیلیدلو سره د پولیسو او عوامو تر منځ په اړیکو کې ډېروالی راغلی او ډېر کله عوامو د ځنو امنیتي او جنايي پیښو په اړه له وړاندې پولیسو ته مالومات ورکړي، چې په دې توګه د پولیسو له خوا د جرم د ترسره کېدو مخه نیول شوې ده.


قومي مشر حاجي جمال تڼی هم وايي، چې په دې وروستیو کې د عوامو او پولیسو تر منځ په اړیکو کې نږدې والۍ راغلی، خو که چیرې په خپله پولیس ورزش ته مخه کړي، حوصله او ټولنیز ارتباطات يې ښه شي، نو دا ډول اړیکې به نورې هم
ټینګې او اغېزمنې وګرځي:


((د پولیسو او عوامو تر منځ د پخوا په پرتله هغه شته اړیکې اتیا سلنه ښې شوې دي، خو که پولیس ورزش ته مخه کړي نو د دوی په لیکو کې به له هر اړخه ډېر  اصلاح او سمون منځته راشي.))


یاده دې وي، چې د پخوانۍ شمیرې له مخې په خوست کې تر ۳۷ زره ډېر کسان چې ډېری يې ځوانان وو په نشه يي توکو روږدي ول، چې له دې جملي په دې وروستیو کې اته زره کسان د درملنې او ورزش له لارې د نشو راګرځیدلي، خو یو شمېر کتونکي دا شمېره او د معتادینو د درملنې شته برنامې نیمګړي ښيي او وايي،چې ځايي ادره باید په دې اړه لا نور ځواکمن او اغېزمن ګامونه واخلي


کرکټ : سریلنکا افغانستان ته او هندوستان جنوبي افریقا ته ماتې ورکړه

فایل فوټو

د کرکټ د پنځوس اووريز نړیوال کپ په مقابلو کې سريلنکا افغانستان ته ماتې ورکړه. نن د نيوزیلينډ په يونيورسټي اوول کې يو ميچ کې سريلنکا د افغانستان ۲۳۳ سکور د ۶ لوبغاړو په اوټ کېدو په نهه څلويښتم اوور کې پوره کړ. جي وردنی د سلو رنځونو د کولو له وجې د لوبې غوره لوبغاړی ونومول شو. 


د اسټريليا په ميلبورن کې د نړيوال کپ په يو بل روان ميچ کې هندوستان جنوبي افريقه ته په ۱۳۰ منډو شکست ورکړ.

لومړی هندوستان بيټينګ وکړ او د اوو لوبغاړو په اوټ کېدو يې ۳۰۷ سکور وکړ. د جنوبي افريقه ټول لوبغاړي په څلويښتم اوور کې په ۱۷۱ سکور اوټ شول. د هند شيکر دوان ۱۳۷ منډې جوړې او د لوبې غوره لوبغاړی شو. 

یاده دې وي چې پاکستان تر اوسه په روان نړیوال کپ کې دوه لوبې ترسره کړي او دواړه یې بایللې دي. پاکستان هم خپلې دوې لومړنۍ لوبې بایللې دي. 

دا ځل د کرکټ د ورلډکپ لوبې په اسټریلیا او نیوزي لینډ کې ترسره کیږي چې ورکې د نړۍ څوارلس لوبډلې په میدان کې دي. 

 

 


افغان کارپوهان وايي سولې ته هڅې ګړندۍ شوي

افغان سایکل زغلونکي د سولې په ورځ ( انځور : ستمبر ۲۱، کال ۲۰۱۴ )


په خوست کې یو شمېر کارپوهان او قومي مخور وايي، داسې ښکاري چې د افغانستان او سیمې د ستونزو د هوارۍ لپاره د سیمې او نړۍ د هېوادونو تر منځ همکاري ډېره شوې ده.

په افغانستان کې د ځینو هېوادونو له خوا د سولې د هلو ځلو د نښو، نښانو په دوام، کارپوهان دا مني چې په دغه هېواد کې د سولې د راوستلو لپاره په سیمه ييزو اړیکو کې د پام وړ بدلون رامنځته شوی دی.

په خوست کې یو ځايي کارپوه یوسف انتظار مشال راډیو ته وویل، چې اوسمهال د سیمې او نړۍ په کچه د افغانستان د سولې په اړه په نظرونو کې بدلون راغلی او دا لیوالیتا حتی د افغانستان په ګاونډیو هېوادونو کې هم پیدا شوې، چې باید په دې هېواد کې سوله ټینګه شي.

((په اوسنیو شرایطو او حالاتو کې د سولې په اړه په سیمه ییزه او نړیواله کچه بدلون رامنځته شوی دی، او د سیمې هېوادونو په ځانګړي ډول په همسایه هېوادونو کې دا لیوالتیا پیدا شوې ده، چې څه ډول په سیمه او ځانګړي ډول افغانستان کې امنیت رامنځته کړو.))

دغه څرګندونې وروسته له هغې کېږي، چې په افغانستان کې د ملي یووالي د حکومت له جوړېدلو وروسته د پاکستان سر لښکرجنرال راحیل شریف په دې وروستیو کې افغانستان ته پرله پسې سفرونه وکړل. 

راحیل شریف د افغان چارواکو سره په خبرو کې تروریزم د دواړو هېوادونو ګډ دښمن یاد کړ او په وړاندې یې پر ګډه مبارزه ټینګار وکړ.

تر دې وړاندې چین هم  د افغان حکومت او وسله والو مخالفینو ترمنځ د سولې د
خبرو لپاره د منځګړیتوب چمتوالی ښودلی او سعودي عربستان هم د افغانستان د
سولې د خبرو له پاره د ممکنه مرستو ژمنه کړې ده.

د راپورونو له مخې د افغان دولت له وسله والو مخالفانو سره به د سولې خبرې ډېر ژر په کابل، اسلام اباد، پکینګ یا دوبۍ کې پیل شي.

لیکوال، شاعر او خبریال  زاهدشاه انګار وايي، که د حکومت مخالف لوری نظام سره سولې ته حاضریږي، باید دوی له پاره ډېر امتیازات په پام کې ونیول شي، خو مدني
ټولنه، بیان ازادي، رسنیو ازادي او د ښځو حقوقو رعایت او ساتنه، چې د ېرو دیارلسو کالونو په مهمو لاسته راوړنو کې راځي،باید د کومې سیاسي معاملې قرباني نه شي:

(( اول خو دا د سولې مذاکرات باید د افغانانو نه پټ نه وي، دویم دا چې مقابل لوری هم افغانان دي، دوی که چیرې د تفاهم او مذاکراتو له لارې د حکومت سره یو ځای کیږي، نو افغان حکومت باید ورته وزارتخانې، ولایتونه، سفارتونه او معینیتونه په پام کې ورته ونیسي، دا د مدني ټولنې، بیان ازادي، د ښځو حقوق او د رسنیو ازادي څومره چې اوسه پورې شته، دا باید وساتل شي او د دې سولې قرباني نه شي.))

د افغانستان د جمهور رییس اشرف غني ویاند اجمل عبید عابدي مشال راډیو سره په خبرو کې ویلي، چې د افغانستان د سولې عملیه د افغانانو په مشرۍ پرمخ ځي او جمهور رییس غواړي چې دا عملیه شفافه وي او له عامو خلکو څخه پټه نه وي.

قومي مشر سخي جان سرحدي وايي، چې تر دې وروسته باید ټول افغانان په ګډه
خپل هېواد له اوسنیو بربادیو وژغوري، تېرو پسې ونه ګرځي او خپل هېواد په
لوی لاس نورو لاسته ورنکړي.

مدني فعال شاه جهان عزیزي وايي، چې افغان حکومت باید د سولې په پروسه کې
د ګاونډیو هېوادونو ژمنو سره په احتیاط عمل وکړي، ځکه د دوی په خبرو او عمل کې تل تنقاض موجود وي.ده زیاته کړه، که د هر هېواد په منځګړتوب افغانستان ته سوله راځي، د افغانانو په ګټه تمامیږي.

د امریکایي چارواکو او طالبانو ترمنځ خبرې تر اوسه په رسمي ډول نه دي تایید وي، خو د سولې دا خبرې په داسې حال کې مطرح کیږي چې د ملګرو ملتونو سازمان په خپل کلني راپور کې وښودله، چې په ۲۰۱۴ زیږدیز کال کې د افغانستان په شخړو کې د ملکیانو مرګ ژوبله په سلو کې شل زیاته شوې ده.


امريکا له افغانستانه د ځواکونو د ويستلو د وخت په اړه بيا غور کوي

د امريکا د دفاع وزير

د افغانستان ولسمشر اشرف غني د امريکا د دفاع وزير، ايشتن کارټر سره تر ملاقات وروسته نن کابل کې خبريالانو ته وويل چې که څه هم په دي وروستيوو کې يې د امريکا سره اړيکې پراخې شوي، لا هم د ترهګرو خطر موجود دي نو بايد دواړه هيوادونه لا نوره ډېره همکاري ولري.

نوموړي زياته کړه چې په بریالیتوب سره يې له نړیوالو ځواکونو څخه افغان ځواکونو ته د امنیتي مسوولیتونو د لېږد بهیر بشپړ کړی دی او امریکایي ځواکونه اوس جګړه يیز ماموریت نه لري.

اشرف غني زياته کړه:((د امريکا سره زموږ د نویو همکاریو پړاو پیل شوی دی چې د دغو همکاریو اساسي هدف د افغانستان د امنیتي ځواکونو، روزنه او پیاوړتیا ده. موږ له نویو خطرونو سره هم مخامخ یو او ترهګري د یوې پدیدې په توګه موږ او امريکا ګواښي، دې پدیدې سره مبارزه لنډ مهالې، منځمالې او اوږد مهالې همکارۍ ته اړتیا لري.))

موږ له نویو خطرونو سره هم مخامخ یو او ترهګري د یوې پدیدې په توګه موږ او امريکا ګواښي، دې پدیدې سره مبارزه لنډ مهالې، منځمالې او اوږد مهالې همکارۍ ته اړتیا لري.

د افغان ولسمشر له دفتره په ننۍ خپره شوې خبرپاڼه کې د امريکا د دفاع وزير، ايشټن کارټر له خولې ليکلي شوي:((دا باید په څرګند ډول ووایم چې د امریکا او د ايتلافي ځواکونو د نوي ماموریت پیل د دې څرګندوی دی چې له افغانستان سره د دوامدارو همکاریو لپاره د امریکا ژمنې په خپل قوت پاتې دي.))

ياده دي وي چې تر دې مخکې امریکا ویلي وو چې د ۲۰۱۶ کې په پای کې به ټول پوځيان له افغانستانه وباسي خو هغه مهال د امريکايي ولسمشر بارک اوباما دغه پلان له غبرګونونو سره مخ شو او ډیرو امریکایي جنرالانو وویل چې په دې پلان باید له سره غور وشي.

خو د امريکا د دفاع وزير نن په کابل کې وویل چې ولسمشر يې کولی شي د ځواکونو د ويستلو مهال ويش بيا ورزاوي. هغه زياته کړه چې افغانستان کې به د پاتې کیدونکو امریکایي ځواکونو د شمیر او د پاتې کیدو د وخت په اړه راتلونکې میاشت بارک اوباما او اشرف غني په واشنګټن کې خبرې وکړي.

 


پکتيا: د دوو قبيلو په نښته کې ګڼ خلک ژوبل شوي دي

د پکتيا په ځاځي اريوب ولسوالۍ کې د دوو قبيلو ترمنځ د ځمکې پرسر شخړه کې ګڼ کسان ټپيان شوي او جګړه لا هم دوام لري.

د پکتيا والي وياند روح الله سمون نن مشال ريډيو ته وويل چې د ځاځي اريوب ولسوالۍ روکيانو د هاشمخېلو سيمې د ملافتح کلا او حمزه خېلو ترمنځ د ځمکې پر سر چې د هديرې لپاره يې ځانګړې کړې وه، شخړه رامنځته شوې.

دی زياتوي: (( زموږ د معلوماتو ترمخه ۱۱ تنه ټپيان شوي چې ۲ د يو او ۹ د بل لوري څخه دي. موږ د حالاتو د ښه کولو لپاره له ولسه غوښتنه کړي چې د دواړوو خواوو ترمنځ د سولې کوشش وکړي.))

د ځاځي اريوب ولسوالۍ د روغتون يو ډاکټر چې نه غواړي نوم يې څرګند شي، بيا مشال ريډيو ته د ټليفون پر ليکه وويل چې تر دې مهاله دوی ته ۱۴ ټپيان وروړل شوي، چې اته يې ګردېز ته لېږلي او شپږ نور هلته تر درملنې لاندې دي.

د چارواکو په خبره د څلورو زخميانو حالت د اندېښنې وړ دی.

د سيمې څخه عيني شاهدانو وويل چې په دې پېښه کې تر اوسه پورې ځينې کورونه سوځېدلي او ښايي د ژوبلو شمېره تر دې هم زياته شي ځکه چې جنګ لا هم روان دی.

له ځاځي اريوب ولسوالۍ څخه يو تن د ټليفون پر کرښه مشال ريډيو ته وويل چې د ځاځيو د نورو قبيلو او څمکنيو اوسېدونکي، قومي مخور او ديني عالمان د ولسوالۍ د تعمېر مخې ته راغونډ شوي او د جګړې د ودرولو لپاره غواړي سيمې ته لاړ شي. 


خوست: د وزیرستان کډوال د مرستو له کموالي شکایت کوي

د وزیرستان کډوال د مرستو په انتظار ولاړ دي

په خوست کې د میشتو وزیرستانیو کډوالو د دریو سترو قومونو وزیرو، داوړو او محسودو مشران وايي، چې دوی سره په خوراکي توکیو کې یوازې د اوړو، غوړیو او دالو مرسته بسنه نه کوي، بلکې کډوالو سره دې د بورې، چای، وریژو، مۍ، لوبیا او نورو  توکيو مرستې هم وشي.

دوی، چې د پنجشنبې په ورځ مشال راډیو سره خبرې کولې د کډوالو پر اداره نیوکه وکړه، چې د ګلان کېمپ پرته په نورو سیمو کې په منظمه توګه مرستې نه ویشل کیږي، حال دا چې د کډوالو ډیره برخه د کېمپ څخه د باندې د خوست په نورو سیمو او ولسوالیو کې استوګنه لري.

د وزیرستانيو کډوالو مشران دوی له پاره د روغتیا او ښوونې روزنې په برخه کې هم د پاملرنې د ډېریدو غوښتونکي دي:

 ((زه مفتي فضل الرحمن د شمالي وزیرستان سره تعلق لرم، موږ دا وایو کله چې موږ افغانستان ته راغلو، د افغانستان خلکو زموږه سره ډېره ښه مرسته وکړه، خو یوه خبره داده چې زموږ تعداد د هرې ورځې په تیریدو سره ډیریږي، ځکه خلک د غرونو څخه راکوزیږي، موږ په نړیواله ټولنه غږ کوو، چې زموږ سره د شوي امداد په اندازه کې دې زیاتوالۍ راشي، د صحت به برخه کې دې هم موږ ته توجه وشي، بل طرفته زموږ د ماشومانو د تعلیم مسئله ده، چې اهمه ده او بال وبچ مو خرابیږي، غوښتنه مو داده چې د تعلیم په لحاظ دې موږ ته اسانتیاوې ډېرې شي.))

ملک مزالدین حسن خېل هم وايي،چې کډوالو له پاره دې د خوراکي توکیو په مرسته کې ډیروالی راشي:

((د ټولو متاثرینو د ساړه او د ګرمۍ غم دې وخوړل شي، دویم د کېمپ څخه د باندې متاثرینو ته دې میاشت په میاشت مرستې ورسول شی، دریم دا چې په شته مرسته چې اوړه او غوړي دي، په دې بسنه نه کیږي، دې سره په څنګ کې دې وریژې، مۍ، بوره او نور د کور ضرورتونو ته توجه وشي.))

ډاکټر حیات خان محسود وايي، که څه هم په خوست کې د کډوالو له پاره ګرځنده روغتیايي ټیمونه ګومارل شوي او په ولایتي روغتون کې دوی ته دوا درمل په وړیا ډول ورکول کیږي، خو دا هر څه بسنه نه کوي، دوی د کډوالو د زده کړو برخې ته هم د ډېرې پاملرنې غوښتنه کوي:

((هسپټالونه جوړ شوي دي، په کېمپ کې هم شته او دلته په ملکي شفاخانه کې زموږ وړیا درملنه کیږي، موږ يې شکریه ادا کوو، خو پکار داده، چې د دواییو اندازه او د ډاکټرانو تعداد دې زیات شي، د روزنې په باره کې ښه ګامونه پورته شوي دي، په کېمپ کې هلکانو او نجونو ته کلاسونه خلاص شوي دي، خو په دې اړه دې پاملرنه نوره هم ډېره شي.))

بلخوا په خوست کې د مهاجرینو د ادارې سرپرست حاجي حسن محمد وايي، چې د هرې ورځې په تیریدو سره کډوالو ته په ټولنیزو خدمتونو کې ښه والۍ راځي او دوی د کډوالو د ستونزو د تشخیص او حلولو له پاره د کډوالو له منځه مشران ټاکلي، چې یاد مشران په دوامداره توګه دوی سره په اړیکه کې دي:


ننګرهار: انګېزه شینوارې خاورو ته وسپارل شوه

د انګېزې شینوارې د جنازې لمونځ

د ننګرهار ولایتي شورا وکیله چې د تيرې سېشنبې پر ورځ په جلال اباد کې په يوه بمي چاودنه کې سخته ټپي شوې وه، د دوشنبې په شپه ناوخته په کابل کې د سردار محمد داود خان په روغتون کې د سختو ټپونو له امله په حق ورسيده چې نن دوشنبه دوه بجې يې په جلال اباد کې کې جنازه ادا شوه.

د وکيلې انګېزې شینوارې د جنازې لمونځ د ننګرهار سرپرست والي مولوي عطاالله لودین ادا کړ. نوموړي د جنازې په مراسمو کې له افغان چارواکو ګيله وکړه چې ولې یې ارواښاده انګېزه شینوارې بهر ته د درملنې لپاره وانه ستوله. نوموړي وويل: 

((د انګېزې د شهادت او وژنې انګيزه او علت د هغې صداقت، د هغې ایمانداي، د هغې جرات او له وطن او خپلو خلکو سره محبت او د هغې هغه ارادې وې چې د دې مملکت او د خلکو ښېګړې د امن او ثبات لپاره يې لرلې. زموږ د مشرانو نه چې په کابل کې حضور لري. زه ترې جلا ګیله من یم، چې زموږ د دې بي بي لپاره، چې هلته بستر وه ښه شرایط برابر نکړل))

 

انګېزه شینوارې
انګېزه شینوارې


د ننګرهار ولایتي شورا وکيل ذبیح الله زمري چې له انګېزې شینوارې د مواظبت په خاطر په کابل کې د سردار محمد داود خان په روغتون کې و، له ولسمشر او اجراییه ریسه ګيله وکړه چې د دوی د بیا بیا غوښتنو سره سره يې هم ارواښاده انګيزه شینوارې د علاج لپاره بهر هېواد ته ونه لیږله. نوموړي وويل: 

((زه په ډيره خواشیني سره وایم،چې له ولسمشر سره سره ډاکټر عبدالله زموږ په حق کې دوه ګونۍ چلند کړی دی، زما غږ پر ټولو مشرقیوالو دا دی،چې زموږ د یوې خور زموږ د یوې ناورغې ټپي خور، چې د ولسونو په درد دوا کېده، د هغې په درملنه کې یې هلې ځلې نه دي کړې، موږ یې نه بخښو)) 

 
‎د ننګرهار د ښځو چارو مشرې انیسې عمراني په انګيزه شینواري بمي چاودنه يوه غير انساني او غیر افغاني عمل وګاڼه 

«دا واقعا زموږ د وروڼو او خویندو لپاره ډېره غم انګېزه واقعه وه، چې غیرې انساني او غیرې اسلامي واقعه وه، چې تر دې دمه په ننګرهار کې پر یوه ښځه باندې مخامخ حمله نه وه شوې، داسې واقعه موږ په کلکو ټکو غندو او که دوی په داسې واقعو سره د ښځو روحیه ظعیفه کوي، زه فکر کوم له داسې واقعو سره د ښځو روحیه نه کمزورې کیږي لا به هم پیاوړې شي))


د يادولو ده چې د انګيزه شینواري د فېبرورۍ پر لسمه نېټه په جلال اباد ښار کې په داسې حال کې په يوه بمي چاودنه کې سخته ټپې شوې وه چې د نوموړې په موټر پورې مقناطسي بم نښلول شوی و چې د چاودنې له امله يې د هغې ډرېور وژل شوي او د انګېزې په شمول په کې پنځه تنه ژوبل شوي هم وو.


ننګرهار: نهه لکه ماشومانو ته د پولیو ضد څاڅکي ورکول کیږي

د ننګرهار سرپرست والي عطا الله لودین یو ماشوم ته د پولیو ضد څاڅکي ورکوي

جلال اباد:- په ننګرهار کې د پوليو د مخنيوي په غرض ماشومانو ته د واکسینو د څاڅکو ورکولو درې ورځنی کمپاين پیل شو. په دغه کمپاين کې به په ختيځو ولایتونو کې تر نهه لکه پورې هغو ماشومانو ته واکسين تطبیقيږي چې عمرونه يې تر پينځو کلونو کم وي.

د پوليو په ضد د واکسينو درې ورځينې کمپاین د اتوار په ورځ پيل شو ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍. د کمپاين پرانسته د ننګرهار سرپرست والي مولوي عطاالله لودين يوه ماشوم ته د دوه څاڅکو واکسينو په ورکولو سره وکړه. نوموړي په ولسونو غږ وکړ چې خپلو ماشومانو ته د واکسينو څاڅکې ورکړي او خپل اولادونه له معیوبيت څخه وژغوري. نوموړي وويل:


(( زما له خپلو ټولو ولسونو نه غوښتنه داده چې د خپلو اولادونو د کامل صحت لپاره په دغه پروګرام کې چې هر قسم کيږي، ځانونه شامل کړي او د خپلو اوږو پيټي ځان ته زیات نه کړي. زما د ټولو علمای کرامو نه  هم دا غوښتنه  ده چې د ممبر له لارې  دې د واکسينو اهميت خلکو ته بيان کړي، د مسلحو مخالفينو نه غوښتنه دا ده چې که تاسو په دې مملکت کې د حکومت کولو اراده لرئ، نو مه د خلکو پول ورانوئ، مه يې سرک ورانوئ او مه يې ماشوم معیوب پریږدئ.))

د ننګرها رد عامې روغتیا رئيس ډاکټر نجيب الله کاموال وايي چې په دغه کمپاين کې به تر نهه لکو پورې ماشومانو ته د واکسينو څاڅګي تطبیق شي.


(( په دغه کمپاين کې به په دغه حوزه کې په حدود د نهه لکه او شپږدیرش زره ماشومان د شپږ زرو تنو رضاکارانو لخوا ويکسین کيږي او د دريو ورځو لپاره به دوام کوي. پروګرام زموږ د ټولو ولسواليو لپاره دی، يوه ستونزه چې په غني خیلو کې رامنځته شوې، هلته موږ د کمپاین په شکل فعلاٌ واکسين نه شو، تطبیقولی، چې دیرش زره ماشومان به د ويکسینو له تطبیق نه پاتې کيږي. خو انشاالله موږ مطمین يو چې د والي صیب په همکارۍ به دا ستونزه په لنډ وخت کې حل شي.))

یاده دې وي چې په ۲۰۱۵ م کال کې د افغانستان په ختيځو ولایتونو کې د پوليو کومه نوې پيښه نه رامنځته شوې، خو په ۲۰۱۴ کال کې شپږ پيښې موجودې وې چې درې يې په ننګرهار، دوه يې په لغمان او يوه هغه يې په کونړ ولایت کې تثیبت شوې وه.
 


خوست: يو انسان تښتونکی نيول شوی

د انسان تښتونې په تور نيول شوی سړی

په خوست کې امینتي چارواکي وايي چې يو تښتول شوی ماشوم يې راخوشی کړی او د هغه تښتوونکی يې نيولی دی.

نن ماسپخين د خوست امنیه قوماندان فیض الله غیرت مشال راډيو ته وویل چې د دانش په نوم دا دري کلن ماشوم د خوست ښار د غرړومبي د سیمې اوسیدونکی دی.

فیض الله غیرت زياته کړه نيول شوی کس او راخوشي کړل شوی ماشوم خبريالانو ته وښود او وي ويل: ((نيول شوي کس په خپلو جرمونو هم اعتراف کړی دی. باید ووایم چې دی دوه کاله مخکې هم د ماین ښخوونې په جرم نیول شوی وو. دی بندي وو او یوه نیمه میاشت کیږي چې له بندیخانې خلاص شوی وو.))

x

د ماشوم پلار د افغان امنیتي ځواکونو ستاینه وکړه چې د ده د زوی په ژغورلو کې يې بیړني اقدام وکړ. هغه د افغانستان له قضايي ادارو يا عدلیې وغوښتل چې د خطرناکو مجرمینو په خلاصولو کې دې پام کوي.

نوموړي وويل: ((له امنيتي ځواکونو خوشاله يم خو له قاضاينو مې ګیله ده چې دا ډول مجرمین باید خلاص نه کړي. که ځانمرګي دي او که نور مجرمین دا بیدار پولیس غیږه ورکوي. داسې دې څوک نه وايي چې افغان ځواکونه به مقاومت ونه کړي یا به د دې هېواد ساتنه ونکړي.))

د خوست امنیه قوماندانفیض الله غيرت په دي وروستيوو کې د دي ولايت په بيلابېلو سيمو کې د ځينې ماينونو د موندلو او له منځه وړلو خبر هم ورکړ.

 


افغانستان: ایراني ځواکونو پنځه فغان کارګران وژلي

یو ایراني سرتیری د قاچاق وړونکو د تګ څارنه کوي

د افغانستان د فراه ولایت امنیتي چارواکي وایي، چې ایراني ځواکونو پنځه تنه افغان کارګران وژلي، پنځه یې ټپیان کړي او لس نور یې له ځانه سره بیولي دي.

د فراه د امنیې قومندانۍ سرپرست دل جان خاکریزي  مشال راډیو ته وویل، چې د وژلو شویو افغان کارګرانو یو جسد دوی ته په لاس ورغلی او نور یې ایراني ځواکونو انتقال کړي دي.

د فراه چارواکي وایي، چې دې افغانانو د ایران او افغانستان په سرحدي سیمه کې کار اوبار درلود.

د فراه د امنیې قومندانۍ سرپرست زیاته کړه، چې د امنیتي مسولینو څخه جوړ یو پلاوی سیمې ته ورغلی او په دې اړه به څیړنه وکړي.

د فراه د لاش جوین ولسوال صمدیار بیا مشال راډیو ته ویلي، چې په دې افغانانو کې لس تنه قاچاق وړونکي هم وو.

د افغانستان او ایران په سرحدي سیمه کې د افغانانو وژل نوې خبره نه ده، بلکې له دې وړاندې هم ایراني عسکرو بې ګنا افغانان وژلي او افغان حکومت یې په وړاندې جدي غبرګون نه دی ښودلی.


خوستوال: ولسي جرګې ته دې وړ نوماند وزیران بیا معرفي شي

د خوست یو شمېر مدني فعالان، د ټولنیزو سازمانونو او قومي شوراګانو غړي او مشران د افغان ولسمشر اشرف غني او د حکومت د اجرائیه رئیس عبدالله عبدالله څخه غوښتنه کوي هغه شمېر نوماند وزیران، چې وړتیا او مسلکي پوهه لري او هېوادنیو ګټو ته هم ژمن دي، خو ولسي جرګې په بیلابیلو لاملونو رد او د اعتماد رایه نه ده ورکړې، د بارو رایې د ترلاسه کولو له پاره دې بیا ځل ولسي جرګې ته معرفي کړي.

دوی چې د چارشنبې پر ورځ په خوست کې د مدني ټولنو په یوه غونډه کې راټول شوي ول، ویل چې د ولسي جرګې یو شمېر استازیو نوماند وزیرانو ته په رایه اچونه کې د قومي، ژبني، سمتي او ګوندي تعصبونو نه کار اخیستی او د دې ترڅنګ يې مادي او شخصي امتیازونه هم په پام کې نیولي دي.

لیکوال او ژورنالېست زاهدشاه انګار مشال راډیو ته داسې وویل:

«ولسمشر او اجرائیه رئیس دې ځکه یو ځل بیا اهل نوماند وزیران ولسي جرګې ته معرفي کړي، چې وکیلانو هلته د شخصي ګټو پر بنیاد، د سیاسي ګټو پربنیاد، د سمتي ګټو پر بنیاد او ځینو نورو شخصي غوښتنو پر بنیاد باندې دوی رد کړي دي، نو فلهذا زموږ غوښتنه داده، چې دوی دې یو ځل بیا ورمعرفي شي، تر څو د باور رایې ترلاسه کړي»

مدني فعال سپین روان نورزی وايي، چې ولسي جرګه باید تصمیمونه ملي ګټو ته په پام سره ونیسي له هغې پرته به ولس په راتلونکې کې پر دوی د خپلو استازیو په توګه باور ونکړي.

د غونډې ګډونوال نورشاه نوراني وویل، چې دفاع وزارت ته نوماند وزیر سترجنرال شیرمحمد کریمي نه یوازې د ولسمشر بلکې د ټول خوستي ولس نوماند دی، نوموړی وړ او د هر ډول فساد څخه پاک افسر دی، نو که چیرې دی دفاع وزیر شي، هغه کولای شي افغان ملي پوځ غښتلی او پر پښو ودروي.

مدني فعال پاچا خوستی وايي، چې د ولسي جرګې څخه هغو نوماند وزیرانو د باور رایې ترلاسه کړې، چې قوي پارلماني ټیمونه يې درلودل، ده په ولسي جرګه له دې کبله نیوکه وکړه، چې حتا دوی نه دي توانیدلي ترڅو د حکومت پرچارو سم نظارت وکړي، ځکه یو شمېر وکیلان په خپلو شخصي مسائیلو بوخت دي:

«ولسي جرګې خپله هغه دنده چې د څار ده، هغه يې هم په ښه ډول نه ده اجراء کړې، بلکې یوازې او یوازې يې خپلې شخصي ګټې په پام کې نیولي دي»

د یادونې وړ ده، ولسي جرګې څه موده مخکې د ملي یووالي د حکومت د نوماندوزیرانو څخه یوازې اتو تنو او د ملي امنیت عمومي رئیس ته د باور رایه ورکړه، خو د ملي دفاع وزارت ته د نوماند شیرمحمد کریمي په ګډون يې تر نیمايي زیات کاندید وزیرانو ته د باور رایه ورنکړه.

افغان ولسمشر اشرف غني د ولسي جرګې څخه اتو نوماندوزیرانو ته د باور رایې د ورکولو له امله ستاینه او قدرداني کړې وه.

مهم موضوعات