چار شنبه 2 سپ 2015 سیمه ییزوخت 05:16

افغانستان

''د ډیورنډ کرښې دواړو غاړو ولس ترهګرۍ ځپلی''

د افغانستان ولسمشر محمد اشرف غني

د افغانستان ولسمشر محمداشرف غني، نن په سېشنبه په ارګ کې تر غرمې مخکې د خېبر پښتونخوا او کوټې له یو شمېر فرهنګي او سیاسي شخصیتونو سره وکتل.

ولسمشر غني په پښتو ادب کې د خوشال بابا ادبي پنځونې او اثار بېساري وبلل او همدارنګه یې ځوان لیکوالان او څېړونکي د ګټورو اثارو لیکلو ته وهڅول.

ولسمشر د ځوانو لیکوالو او کدرونو د شهرت او معرفت لپاره د فرهنګي اړیکو پیاوړتیا او د فرهنګي کنفرانسونو جوړول ګټور وبلل، د سرحدونو او قبایلو چارو وزیر ته یې لارښوونه وکړه، چې د ډیورنډ کرښې دواړو غاړو لیکوالو تر منځ د اړیکو او تماسونو زمینه زیاته کړي.

ولسمشر غني وویل، د کرښې دواړو غاړو ته پروت ولس یو تن او وجود دی او د وینې شراکت لري د ناامني او ترهګري قرباني دی. نوموړي زیاته کړه، چې په دې برخه کې په نړیواله، سیمه ییزه او د دواړو هېوادونو د حکومتونو په کچه جدي او هر اړخېز اقدامات پکار دي.

د هېواد ولسمشر څرګنده کړه (زموږ اساسي غوښتنه د کرښې دواړو غاړو ته د پرتو ولسونو د ژوند ژغورل دي او په همدې موخه مو سیمه ییزه او نړیواله اجماع رامنځته کړي او په دې برخه کې زموږ پالیسي او دریځ منطقي او روښانه دی.

ولسمشر وویل، اساسي غوښتنه مو سوله ده، هر افغان پایداره او باعزته سوله غواړي. د همدې لپاره مو د عمل لاره غوره کړې ده، خو که بیا هم زموږ اولادونه وژل کېږي، بیا نو د خبرو او مذاکراتو لاره تړل کېږي. )

ولسمشر غني وویل،”موږ د اسیا څلور لارې او یوه عظیمه اقتصادي سیمه یو. د ورېښمو او نورې لارې د همدې لپاره له دې ځایه تېرې شوې وې. “

 

 نوموړي زیاته کړه، په اساسي توګه مو چین، اسیایي او اروپایي هېوادونو ته قناعت ورکړی او ټولې نړۍ راسره منلې چې هر اړخېز اقتصادي بحث دې پیل شي.

 

د عوامي نېشنل پارټي مرکز ي سکرټر ښاغلي اورنګزیب کاسي او د باچاخان فاونډېشن مشر ښاغلي ډاکټر خادم حسین د مېلمنو په استازولۍ د خبرو پرمهال له ولسمشره سره د لیدنې ځانګړې مننه وکړه.

په دغه لیدنه کې، چې په ارګ کې ترسره شوه، د سرحدونو او قبایلو چارو وزیر محمدګلاب منګل، د کار، ټولنیزو چارو، شهیدانو او معلولینو وزارت وزیرې ډاکټر نسرین اوریاخېل، په سیاسي چارو کې د ولسمشرځانګړي استازي محمد اکرم خپلواک، د جمهو رئیس فرهنګي سلاکار استاد اسدالله غضنفر، د ملي شورا یو شمېر غړو، لیکوالو او څېړونکو هم شتون درلود.


امريکا ولې د حقاني شبکې ډېر ځپل غواړي؟

جلال الدين حقاني د خپل زوی نصيرالدين حقاني سره

د پاکستاني وزيراعظم د امنيتي چارو سلاکار سرتاج عزیز پرون اسلام اباد کې يو خبري کنفرنس کې وويل چې دوی په بېلابېلو عملياتو کې حقاني وسله واله ډله ځپلې ده. نوموړي تر هغې وروسته دا خبره کړې چې درې ورځې مخکې د امريکا د ملي امنيت سلاکارې سوزن راييس پاکستانه ته تللې وه او د رپورټونو ترمخه يې له پاکستاني چارواکو غوښتي چې د حقاني شبکې خلاف دي کوټلي عمليات وکړي.

د طالبانو او حقاني ډلې ترمنځ توپير کول غلط کار دی ځکه چې حقاني شبکه هم د طالبانو د تحريک برخه ده

حقاني شبکه د افغان طالبانو برخه ده خو افغان چارواکي وايي چې تر ډېره په خپلواک ډول خپل ترهګريز فعاليتونه کوي. د امريکا د بهرنيوو اړيکو د څيړنې مرکز يا Council on Foreign Relations د پاکستان د برخې کارپوه ډاکټر ډينيل مارکي وايي امريکا د طالبانو د کويټې او پيښور شوراګانو په پرتله پر حقاني شبکې له څو وجو پام زيات کړی.

ډاکټر مارکي زياتوي: ((امريکا او امريکايي پوځ له کلونو راهيسې کوشش کوي چې طالبان او حقاني ډله سره بېلې کړي ځکه چې که څه هم حقاني ډله د نورو طالبانو سره ډېره نيزدي تړلې ده، بيا هم تر طالبانو ډېره خونړۍ ده. دوی په شمالي وزيرستان کې له خپلو پټنځايونو د بريدونو کولو ډېره وړتيا لري او افغانستان کې د شوو ډېرو حملو تر شا يې لاس دی. بلخوا طالبانو سره افغان حکومت مذاکرات کوي نو امريکا غواړي چې دا پر مخ ولاړ شي. خو د يادو وسله والو ترمنځ توپير کول غلط کار دی ځکه چې حقاني شبکه هم د طالبانو د تحريک برخه ده.))

د اسلام اباد هغه کور چې د رپورټونو تر مخه پکې نصيرالدين حقاني اوسيدلود اسلام اباد هغه کور چې د رپورټونو تر مخه پکې نصيرالدين حقاني اوسيدلو
x
د اسلام اباد هغه کور چې د رپورټونو تر مخه پکې نصيرالدين حقاني اوسيدلو
د اسلام اباد هغه کور چې د رپورټونو تر مخه پکې نصيرالدين حقاني اوسيدلو

 ياده دي وي چې امريکا افغانستان کې د ترهګرو بريدونو او القاعده وسله والې ډلې سره د اړيکو له املهټوله حقاني شبکه يا نيټ ورک، بنياد ايښودونکی یې او ددوی څوارلس قوماندانان د ترهرګو په لیسټ کې اچولي چې سفري او مالي بنديزونه پري لګول شوي. د امريکا د بهرنيوو چارو وزارت په دي ليسټ کې لاندې کسان شامل دي.

جلال الدين حقاني: د حقاني شبکې بنياد ايښودونکی او پخوانی جهادي قوماندان

سراج الدين حقاني: دی د حقاني شبکې بنسټ ايښودونکي جلال الدين حقاني زوی او اوس مهال د يادې ډلې مشر دی چې امريکا يې پر سر پنځه ميليونه ډالر انعام اعلان کړی دی.

نصيرالدين حقاني: د جلال الدين حقاني بل زوی دی چې د يادې ډلې د مالي چارو مسول وو. هغه په ۲۰۱۳ کال کې اسلام اباد کې په ډزو ووژل شو.

خليل الرحمن حقاني: د جلال الدين حقاني ورور دی. هغه د مالي او نظامي چارو مسول دی.

بدرالدين حقاني: د جلال الدين حقاني بل زوی وو چې په ۲۰۱۲ کال کې په امريکايي ډرون بريد کې ووژل شو.

عبدالعزيز حقاني: د خپل ورور بدرالدين حقاني پر ځای ټاکل شوی قوماندان دی.

فضل ربي: له عرب هيوادونو د پيسو د پيدا کولو مسول دی.

احمدجان وزير: هغه د القاعده سره د اړيکو او د طالبانو په کويټه شورا کې د حقاني ډلې استازی دی.

ملا سنګين ځدراڼملا سنګين ځدراڼ
x
ملا سنګين ځدراڼ
ملا سنګين ځدراڼ

ملا سنګين ځدراڼ: د پکتيکا ولايت لپاره د طالبانو والي او مهم قوماندان وو چې په ۲۰۱۳ کال کې د امريکايانو په ډرون بريد کې ووژل شو.

حاجي ملي خان: د حقاني ډلې دا مهم قوماندان په ۲۰۱۱ کال کې امريکايي ځواکونو په خوست کې ونيو.

بخت ګل: د حقاني شبکې د عامه اړيکو يو مسول دی چې وسله والو قوماندانانو ته د پيسو د ويشلو دنده هم لري.

قاري ذاکر: ذاکر د حقاني ډلې د ځانمرګو بريدکوونو د روزنې او افغانستان ته د ليږلو چارې پر غاړه لري.

سعيدالله جان: د افغانستان په شمال کې د بريدونو کولو قوماندان دی.

یحيا حقاني: د حقاني ډلې لوژستيکي مسول دی.

محمد عمر ځدراڼ: ځدراڼ طالبانو سره د ترهګرو بريدونو د هم آهنګۍ مسول دی.

خوست کې د حقاني شبکې نيول شوي مشکوک وسله والخوست کې د حقاني شبکې نيول شوي مشکوک وسله وال
x
خوست کې د حقاني شبکې نيول شوي مشکوک وسله وال
خوست کې د حقاني شبکې نيول شوي مشکوک وسله وال

ځيني امريکايي سينيټرانو په دي وروستيوو کې پاکستان ته ورکړل کېدونکو د ترهګرۍ په وړاندې جګړې لپاره د اتحادي مرستندويه پيسو (Coalition Support Fund) په ميليونونو ډالرو نيوکې کړي او وايي که پاکستان ترهګر بې له کوم توپېره نه ځپي نو امريکا دي دا پيسې نه ورکوي.

د پاکستان د دفاعي چارو کارپوه حسن عسکري وايي اسلام اباد به د دغسي مشروطه پیسو لپاره خپلې ستراتيژيکي ګټې پرينږدي. ((اتحادي مرستندويه پيسې هسې هم د دې کال تر آخره پورې کميږي. بل د پاکستان لومړيتوب [د حقاني ډله نه بلکې] د شمالي وزيرستان کنټرولول دي.))


ننګرهار: ګڼ شمير وسله وال د سولې له بهير سره يو ځای شول

د ننګرهار د سولې ولایتي کميټې سره ۵۳ تنه د دولت وسله وال مخالفين یو ځای شول. چارواکي وايي چې دغو وسله والو به د شینوارو په بیلابیلو ولسواليو کې د دولت ضد فعالیتونه تر سره کول.

د غه وسله وال چې ځانونه يې د اسلامي امارت جنګیالیان وبلل، د سسیشنبې په ورځ د ننګرهار د سولې ولایتي کميټې ته د خپلو سپکو او درنو وسلو سره راغلل او د سولې له بهير سره يو ځای شول.

د ننګرهار د سولې ولایتي کميټې مشر ملک نذیر وايي چې د دغه ولایت د ملي امنیت او سولې شورا په ګډې همکارۍ ياد وسله وال د سولې له بهیر سره يو ځای شول.

(( نن ۵۳ کسان چې له خپلو وسلو سره چې البته لس ميله په کې راکټ وو، د ملي امنیت له لارې سولې پروګرام ته وسپارل شول. دوی د شنیوارو په غني خيلو، اچين، نازیانو، سپین غر او مومندرې ولسواليو کې يې د دولت ضد فعالیتونه لرل.))

د ننګرهار والي سليم خان کندوزي په دې موقع د دولت په ټولو وسله والو مخالفینو غږ وکړ چې د ورور وژنې لاس واخلي او د سولې له بهير سره يو ځای شي.

(( د ټولو خپلو نظامي مشرانو نه مننه کوم چې په دغه ساحه کې يې دوی ته زمینه برابره کړې ده. غوښتنه مې له ټولو وسله والو مخالفینو نه دا ده چې نور له وروژنې او خپل وطن له ورانولو لاس واخلي او راشي له موږ سره د سولې په پروسه کې شامل شي.))

د قاري یاسین په نوم يو تن چې د ننګرهار د اچين ولسوالۍ سره تعلق لري او د دولت د وسله والو مخالفینو د شل کسیز ګروپ مشري يې په غاړه لرله، مشال راډيو سره په خبرو کې وويل چې له دې وروسته به د وطن جوړیدو ته مټې ورانغاړي.

(( له تيرو پينځو کلونو راهيسې موږ په دغو ساحو کې فعالیت کولو، خو زیات فعالیت مو د بټي کوټ او مومندرې په ولسوالۍ کې و. د ننګرهار له ملي امنیت سره زموږ رابطې وشوې او خپلې وسلې مو راوړې او خپلو مشرانو ته مو مخې ته کيښودې. اوس به انشاالله چې له خپلې خاورې کلکه دفاع کوو.))

د ننګرهار د سولې شورا چارواکي وايي د سولې بهير سره يو ځای شويو وسله والو مشرانو ته تر شپږو میاشتو پورې ۱۳۰۰۰ افغانۍ او د ګروپ غړو ته يې د میاشتې ۸۰۰۰ افغانۍ ورکول کيږي.

دوی وايي چې د تيرو دريو کلونو راهيسې د ننګرهار د سولې له ولایتي کميټې سره تر دې دمه ۷۳۷ کسان يو ځاي شوي، چې ګڼ شمير يې په يو شمير دولتي ادارو کې د اجير په توګه ګمارل شوي، ځینو ته يې حرفوي کارونه ښودل شوي او په خپل روزګار شوي دي.


خوست: څلور کسان د جنايي جرمونو په تور نیول شوي

د خوست امنیتي چارواکي وايي، چې د یاد ولایت په بیلابیلو سیمو کې يې څلور کسان د جنايي جرمونو په تور نیولي او دا مهال د کشفي او عدلي ادارو له خوا تر پوښتنو ګرویږنو لاندې دي.

بلخوا د دې قضیو زیانمن کسان د امنیتي منسوبینو پر وخت فعالیتونه ستايي او زیاتوي، کله چې دوی د خپلو قضیو په اړه پولیسو ته اطلاعوې ورکړې، نو پولیس سمدلاسه لاس په کار شول او دوی ته يې خپل وسایط او مالونه له غلو او تښتونکو بیرته ترلاسه کړل.

نن د دوشنبې پر ورځ خوست امنیه قوماندان مل پاسوال فیض الله غیرت د پولیسو له خوا د نیول شویو کسانو په اړه مشال راډیو ته وویل، چې یاد کسان يې د موټر د تښتولو، جېب وهنې او د چرسو د قاچاقو په تور په دریو بیلابیلو قضیو کې نیولي، چې قضیې يې تر څېړنې لاندې دي.

خوست امنیه قوماندان وویل، چې پولیسو له تورنو کسانو یو عراده هینو موټر، درې لکه پاکستانۍ کلدارې، او یوه اندازه چرس نیولي دي:

((دا دوه کسان چې تاسو وینئ، زموږ د یو هېوادوال څخه یو عراده غټ هینو موټر د وسلې په زور نیولی او بیولی وو، کله چې پولیسو ته اطلاع ورسیده یاد موټر په یو کور کې پیدا شو، چې په دې قضیه کې د کور مالک هم په لاس لرلو تورن شوی، همدا شان یو بل کس چې د سبزي په منډيي کې يې زموږ د یو بل خوست میشتي څخه پیسې غلا کړې وې، باالفعل نیولی دی.))

جنرال فیض الله غیرت وړاندې وویل، چې پولیسو یو کس د یو اندازه چرسو د قاچاقو په تور هم لاس په لاس نیولی او اوسمهال يې قضیه په عدلي ادارو کې تر څیړنې لاندې ده.

د تښتول شوي هینو موټر ډریور د ده څخه د وسلوالو غلو له خوا په زوره د موټر د بیولو کیسه داسې کوي:

((محمدعاشق نومیږم د خوست ولایت اوسیدونکی یم، ما د خاني خوړ لوري ته خښتې بار کړې وې، کله چې د ګلزار اکا څخه تېر شوم، هلته سور کنډو دی، کله چې هغه ځای ته موټر وخیږاوه، دوی دوه کسه مسلح همالته وو، تر څنګ يې سپین سراچه موټر هم وو، نه پوهیږم هغه کې به څو کسان وي، دوی ما ته ودریدل او راته يې وویل، چې خښتې خالي کړه او نور د موټر کوز شه، نور يې له ما موټر کوز لوري ته بوت او زه په پښو راغلم.))

د یادونې وړ ده په دې وروستیو کې یو شمېر خوست میشتو په پرله پسې توګه رسنیو ته شکایت کاوه، چې د خوست ښار شمال لوري ته د ګلزار اکا په سیمه کې وسله والې غلاوې کیږي او په دې سیمه کې نا امني زیاته شوې ده، خو د خوست امنیتي چارواکي وايي، چې په یاده سیمه کې يې د کشفي ادارو منسوبین توظیف کړي او تر ډېره په کې د جنايي پيښو مخه نیول شوې ده.


په غزني، پکتیا او پکتیکا ولایتونو کې ۱۸وسله وال وژل شوي

په پکتیا کې د ملي اردو چارواکې وايي، چې له تیرې شپې راهیسې د یادو ځواکونو په عملیاتو او د درنو وسلوالو په ډزو کې په غزني، پکتیا او پکتیکا ولایتونو ۱۸ وسله وال وژل شوي او ګڼ نور ټپیان شوي دي.

چارواکي وايي، چې د پکتیکا ولایت د برمل ولسوالۍ د منګړیتي په سیمه کې د وسلوالو طالبانو د دوو ډلو تر منځ هم جګړه شوې او په هغه کې هم د دواړو لورو نه څلور تنه وژل شوي دي.

نن د دوشنبې پر ورځ د تندر ځواکونو د رسنیز دفتر څخه مشال راډیو ته په استول شوې خبرپاڼه کې راغلي، چې د ملي اردو ځواکونو د غزني د مرکز اړوند د شهباز په سیمه کې چاڼیز عملیات کړي، چې په کې لس وسله وال وژل شوي او اوه نور ټپیان شوي دي.

چارواکي زیاتوي، چې یادو ځواکونو د غزني د مقر ولسوالۍ دلال خان خېلو په سیمه کې د وسلوالو هدفونه د درنو وسلو تر برید لاندې راوستي، چې په هغه کې هم شپږ وسلوال وژل شوي او پنځه نور ټپیان شوي دي.

په دې بریدونو کې د وسله والو یوه اندازه وسلې او وسایط هم له منځه تللي دي.

د دوی په وینا چې د ملي اردو د سرتیرو له خوا د غزني د ده یک ولسوالۍ د نظر په خان سیمه کې یو مشکوک وسله وال هم نیول شوی دی.

خبرپاڼه کې راغلي، چې د ملي اردو سرتیرو د پکتیا ولایت د سیدکرم ولسوالۍ د عثمانخېلو په مربوطاتو کې هم عملیات کړي، چې په کې دوه وسلوال وژل شوي دي.

بل لوري ته د ملي اردو چارواکي د پکتیکا ولایت د برمل ولسوالۍ په مربوطاتو کې د د دوو وسلوالو ډلو تر منځ د خپل منځې جګړې خبر ورکوي.

په خبرپاڼه کې د دې خپلمنځې جګړې په باب راغلي، چې د پکتیکا ولایت د برمل ولسوالۍ د منګړیتي په سیمه کې د دواړو لورو له منځه څلور وسله وال وژل شوي دي.

په خبرپاڼه کې د دې جګړې د دوام یا ختم په اړه وضاحت نه دی راغلی.

تر اوسه کومې وسلوالې ډلې هم دوی ته د اوښتو تلفاتو په باب رسنیو ته څرګندونې نه دي کړي.


د افغان جرمن دوستۍ سلمه کلیزه ولمانځل شوه

د افغانستان ولسمشر محمد اشرف غني د جرمني له لومړي وزیرې انګېلا میرکل سره د د ګډ خبري کنفرانس مهال. 5 ډیسېمبر ۲۰۱۴م کال

د افغانستان او جرمني د دوستۍ سلمه کلیزه د جرمني د بهرنیو چارو د وزیر په ګډون پرون دوشنبه په کابل کې په ارګ «صدارتي محل» کې ولمانځل شوه.

ولسمشر محمد اشرف غني په دې مناسبت په خپله وینا کې وویل چې د افغانستان او جرمني سل کلنې اړیکي د دوو ملتونو د دوستۍ او همکارۍ یوه ډېره ښه نمونه ده.

ښاغلي غني وویل په تېرو څوارلسو کلونو کې د افغانستان او جرمني د دوستۍ کلک بنسټ کېښودل شو چې په تېر دسمبر میاشت کې جرمني ته د ده د سفر په ترڅ کې د جرمني لومړي وزیرې انګېلا مېرکل د هغې پر دوام ټینګار وکړ.

د ۱۹۱۵ کال په سپټمبر میاشت کې د لومړۍ نړیوالې جګړې په پیل کې د جرمني یوه پلاوي کابل ته سفر وکړ چې امیرحبیب الله خان ته د محور دولتونو په ډله کې د افغانستان د ګډون بلنه ورکړي.

که څه هم د هغه وخت افغان امیر دا بلنه ونه منله خو د دې پلاوي سفر د افغانستان او جرمني ترمینځ دوستۍ ته لاره پرانیسته.


''ملا عمر د ۲۰۱۳م کال په ۲۳م اپرېل مړ شوی و''

طالبانو نن دوشنبه منلې چې پخوانی مشر ملا عمر یې په ۲۰۱۳ کال کې مړ شوی و. دوی دا خبره تر دوو کلونو پټه ساتلې وه. د افغانستان استخباراتو ادارې هم هغه مهال د ملاعمر د مړینې ادعا کړې وه.

 

افغان طالبانو د روان کال تر جولايي میاشتې د ملاعمر په نامه بیانونه خپرول، چې په ۲۰۰۱ کال په افغانستان کې یې د واکمنۍ له ختمیدو راهیسې چا نه و لیدلی.

 

طالبانو اوس په لومړي ځل د ملاعمر د مړینې نېټه اعلان کړه، دوی وايي هغه د ۲۰۱۳ م کال د اپرېل په ۲۳ مه نېټه مړ شوی و.

 

د ملاعمر د مړینې په اړه دغه معلومات د طالبانو د نوي مشر ملا اختر منصور په خپره شوې ژوندلیک کې نغښتي دي.

 

د معلوماتو ترمخې د طالبانو د رهبري شورا اکثروغړو او مذهبي عالمانو هغه مهال پرېکړه کړې وه چې د ملا عمر د مړینې خبر باید تر محدودو کسانو وساتل شي.

 

د بیان ترمخه د ملاعمر د مړینې خبر پټولو وجه د ناټو سازمان لخوا هغه اعلان و چې د ۲۰۱۴ م کال تر پایه به په افغانستان کې خپل جنګي ماموریت »مشن« ختموي.


افغان چارواکي د موسی کلا د نیولو ادعا کوي

د ارشیف انځور

افغان چارواکي وايي چې د هلمند موسی کلا ولسوالي یې تیره شپه بیرته له وسله والو طالبانو څخه نیولې ده.
 
په هلمند کې د ۲۱۵ میوند قول اردو مطبوعاتي مسول محمد رسول ځاځي نن مشال راډیو ته وویل چې یاده ولسوالي یې د هلمند او کندهار د ګډو امنیتي سرتیرو په همکاري له وسله والو طالبانو څخه پاکه کړې ده.
 
ښاغلي ځاځي زیاته کړه چې د موسی کلا ولسوالۍ د بیرته نیولو پرمهال شاوخوا ۳۰ وسله وال طالبان وژل شوي او تر ۹۰ زیات ټپیان شوي دي.
 
د تیري چهارشنبې په شپه په موسی کلا ولسوالۍ کې مېشت افغان سرتیري ددې ولسوالۍ له ځینو سیمو ووتل چې وروسته د وسله والو طالبانو لاسته ولویده.
 
وسله والو طالبانو تر دا مهاله د افغان ځواکونو له خوا د موسی کلا ولسوالۍ د بیرته نیولو په اړه څه نه دي ویلي.
 


ننګرهار: د وسله والو پر ضد بریمن عملیات ترسره شول

جنرال محمد زمان وزیري


د ننګرهار چارواکي وايي د تيرې یوې میاشتې راهيسې چې د ننګرهار په حصارک، خوګياڼو او شیرزادو ولسواليو کې افغان ګډو امنيتي ځواکونو له لوري د دولت ضد وسله والو خلاف چاڼيز عمليات پیل شوي وو، پای ته ورسیدل.

امنيتي ځواکونه وايي چې په دغه عملياتو کې يې تر یو نيم سل تنو پورې وسله وال وژلي او تر سلو زیات يې ټپيان کړي دي.

دغه چاڼيز عمليات چې د اوسپنيز مثلث په نوم کابو يوه میاشت وړاندې د ننګرهار په خوګياڼو، شیرزادو او حصارک ولسواليو کې پيل شوي وو، د یکشنبې په ورځ پای ته ورسیدل.

دننګرهار امنیتي چارواکي وايي چې په یادو عملياتو کې يې تر دوه نیم سوو تنو زیاتو وسله والو ته مرګ ژوبله اړولې ده.

د افغانستان په ختيځ کې د ۲۰۱ سیلاب قول اردو قوماندان جنرال محمد زمان وزيري په خوګياڼو واسوالۍ کې خبريالانو ته وويل:

« موږ وتوانیدو چې د دښمن ټول تهدیدات مات کړو، ټولې ساحې د مخالفينو له وجود نه تصفیه کړو، په دې عملیاتو کې ۱۵۰ تنه مخالفين مړه دي، ۱۱۲ تنه يې ټپیان دي، د دوي درې ميله داشکې، درې ميله هاوان او يو ميل زیکویک يې تخريب شوي. له دوی نه مو ۷۰ نفره ژوندي ونيول چې هغه مو امنیتي ځواکونو ته سپارلي دي چې په دې کې سرګروپان، قوماندانان او ماين جوړونکي شامل دي.»

ننګرهار کې امنیتي غونډه
ننګرهار کې امنیتي غونډه

نوموړی زیاتوي چې په دغه عملیاتو کې له امنیتي ځواکونو څخه دیارلس تنه وژل شوي او درې تنه په کې ټپیان شوي دي.

د ننګرهار امنیه قومندان جنرال فضل احمد شیرزاد وویل،چې ددې عملياتو په دروان کې يې په حصارک ولسوالۍ کې دیارلس امنيتي پوستې ځای په ځای کړي او د محلي پوليسو په تشکیل کې يې زیاتوالی راوستی دی.

« د دغو عملياتو په ترڅ کې موږ د خپلو ملي پوليسو لپاره په خاص ډول په حصارک ولسوالۍ کې ۱۳ امنیتي پوستې جوړې کړې، چې د هغو لپاره مو ښه استقامات برابر کړل او په هغو پولیسو سربيره مو ۳۰ تنه محلي پولیس نور جذب کړل چې تعليم او تربیه يې هم شروع شوه.»

جنرال شیرزاد زیاتوي چې دوی په پام کې لري،چې د یو شمېر نورو ولسوالیو لپاره هم محلي پولیس اضافه کړي او په خبره يې چې د داعش وسله والې ډلې د ځپلو توان لري.

ننګرهار کې امنیتي غونډه
ننګرهار کې امنیتي غونډه

هغه سرتيري،چې د جګړې په لومړۍ کرښه کې جنګيدلي پر ټولو هیوادوالو غږ وکړ،چې دوی سره د وطن په ساتنه کې مرسته وکړي يو تن يې مشال راډيو سره په خبرو کې وويل:

« د وطن خدمت په هر افغان فرض دی، دا ځکه چې هر ملک ودان دی، خو زموږ او ستاسو ملک وران دی. که شخصي دي او که نظامي دي، باید موږ ټول د خپل ملک خدمت وکړو، لکه د خپلې مور غوندې د خپلې خاورې خدمت وکړو، او چيرته چې دښمن وي، ورته شکست ورکړو.»

بلخوا د وسله والو طالبانو ویاند ذبیح الله مجاهد مشال راډيو ته په راستول شوي بریښنالیک کې ویلي،چې په یادو عملياتو کې يې ۹۲ تنو دولتي ځواکونو ته مرګ ژوبله اړولې، ۱۳ټانکونه او ۹ رینجر ګاډي يې ویجاړ کړي، خو امنيتي ځواکونه د وسله والو طالبانو ادعا نه مني.

 


د خوست علمي او فرهنګي پرمختیاوې او لاسته راوړنې

د خوست لیکوال، شاعران او فرهنګیان وايي، چې په یاد ولایت کې د کلتوري فعالیتونو په پایله کې له پوهنې او ادب سره د خلکو او په ځانګړي ډول د ځوانانو مینه او لیوالتیا ډېره شوې ده.

دوی زیاتوي، چې پخوا علمي او کلتوري فعالیتونه ډېر محدود ول او فرهنیګانو به یوازې شعر او شاعری ته پاملرنه کوله، خو اوسمهال ځوانانو نورو علمي او څېړنیزو مسلو ته هم پاملرنه ډېره کړې او په دې برخه کې هم د پام وړ پرمختګونه شوي دي.

د خوست شیخ زاید پوهنتون استاد نورالله ښاد لیونخېل په دې وروستیو کې د خوستیو ځوانانو په منځ کې د مطالعې د کلتور د پراخیدو خبره کوي او زیاتوي، چې اوسمهال نه یوازې د علمي موسساتو محصلان او زده کوونکي بیروني مطاله کوي، بلکې کلیوالي ځوانانو هم کتاب لوستنې ته مخه کړې ده.

د خوست په مرکز او ځنو اطرافي سیمو کې دا مهال روڼ اندي کسان ډېر کله په کلتوري او هنري برنامو کې راغونډیږي او دې برخې ته په ځانګړي ډول د ځوان کهول لیوالتیا ډېره ده.

شاعر او لیکوال زاهدشاه انګار ددې بهیر په اړه داسې وايي:

((یو وخت په خوست کې ادبي ناستې ټکنۍ وې، بیا کله چې نهه کاله وړاندې د ځوان شاعرانو اونیزه مشاعره پیل شوه او تر اوسه په پرلپسې توګه په هره اونۍ کې غونډې جوړوي، د هغې په تعقیب دادی په دې وروستیو کې خوست ادبي بهیر هم خپلې اونیزې غونډې پیل کړې، همدارنګه نورو ټولنو هم دا ډول فعالیتونه پیل کړي، چې ډېر زیات اغېز يې کړی دی.))

ځوان شاعر ساجد بهار وايي، چې پخوا فرهنګیانو یوازې د فرهنګ د شعر برخې ته پام وو، خو اوسمهال ځوان فرهنګیان په پښتو ژبه کې د نثر په اړیتا هم پوۍ شوي او په دې برخه کې هم ښې لاسته راوړنې لري.

ده د فرهنګیانو د تشویق او هڅونې د ځنو نورو برنامو یادونه هم وکړه.

د تړون اونیزې مسوول مدیر سپین روان نورزی ادبي غونډې او هنري بنډارونه د ځوانانو د افکارو په تنویر او روښانولو کې مهم بولي.

دی وايي، چې په دې دستورو کې د ګډون کوونکو ځوانانو کاري قابلیتونه او پوهه ډېره شوې او اوسمهال په بیلابیلو رسنیزو او کلتوري مرکزونو او حکومتي ادارو کې د کار جوګه شوي دي:

((په خوست کې د ادبي او کلتوري ټولنو غونډو په ځانګړي ډول ځوان قشر تنویر کړ، دوی يې مطالعې ته وهڅول، دوی يې په ادبي ډګر کې لا فعال کړل، د بیلګې په توګه دوی يې په رسنیو کې د کار کولو جوګه کړل، لیکوالان یې ترې جوړ کړل، ژباړې يې وکړلې، په مطبوعاتو کې يې خپلې وړتیاوې وښودلې.))

کره کتونکی فریدالله قربان وايي، چې اوسمهال په پښتو ژبه د نویو علمي کتابونو په ځانګړي ډول د نورو ژبو څخه پښتو ته د ژباړې له پاره د پام وړ کارونه شوي، چې له دا ډول اثارو اوس عملاً په علمي موسساتو او د پوهنتونونو په تدریسي برخه کې ګټه پورته کیږي.

د یادونې وړ ده خوست کې دا مهال د شیخ زاید پوهنتون په ګډون پنځه د لوړو زده کړو موسسې، ګڼ مسلکې انستیتونه، تر اویاوو مدني بنسټونه او یو شمېر علمي او کلتوري ټولنې فعالیت لري، خو یو شمېر کتونکي وايي که چیرې دا ټول بنسټونه په ژمنتیا خپل فعالیتونه پر مخ بوځي، یاد ولایت کې به په علمي او فرهنګي برخو کې لاسته راوړنې او پرمخیتاوې نورې هم ډېرې شي.


ترکمنستان د افغانستان د سولې پروسه کې کومک کوي

د ترکمنستان ولسمشر

د ترکمنستان ولسمشر وایې هیواد یې چمتو دی چې په افغانستان کې د سولې د ټينګښت لپاره له دغه هیواد سره همکارۍ ته دوام ورکړي. 

د

ترکمنستان ولسمشر قربان قلي بردي محمدوف نن په کابل کې له ولسمشر اشرف غني سره په ګډه خبري غونډه کې وویل

، چې هیواد یې په افغانستان کې د ثبات په ټينګښت کې په ځانګړې توګه د ملګرو ملتونو پر رول ټینګار کوي.

په همدې غونډه کې افغان ولسمشر محمد اشرف غني ترکمنستان په سیمه کې د افغانستان یو ښه ملګری و باله.

« موږ ترکمنستان یو هر اړخیزه ملګری، یو نیک ګاونډي او په اقتصادي او ټولنیزو چارو کې یو ښه شریک او په سیمه کې د امنیت او ثبات د ټینګښت لپاره یو ښه هکار ګڼو.»

د افغانستان او ترکمنستان حکومتونو دغه راز په پنځو برخو کې د همکاریو تړونونه لاسلیک کړل.

قربان قلي بردی محمدوف له تیرو نږدې لسو کلونو راهیسې د ترکمنستان ولسمشر دی او دا یې افغانستان ته لومړنی رسمي سفر دی.


د افغانستان په یو شمېر ولایتونو کې ۱۵ وسله والو ته مرګ ژوبله اوښتې

په پکتیا کې د ملي اردو چارواکي وايي، چې په تېرو څلریشتو ساعتونو کې د سویل ختیز زون په څلورو ولایتونو، خوست، غزني، لوګر او میدان وردکو کې ۱۵ وسلوالو ته مرګ ژوبله اوښتې ده.

نن سهار مشال راډیو ته د ملي اردو د تندر ځواکونو څخه په رالیږل شوې خبرپاڼه کې راغلي، چې بیګاه شپه د خوست د باک ولسوالۍ په ماڼه کلي کې یو شمېر ماین جوړونکي د ماین پر جوړولو لګیا وو، چې یو ماین د شارطۍ له کبله چاودنه کړې او په کې څلور ماین جوړونکي ځای پر ځای وژل شوي او دوه نور ټپیان شوي دي.

خبرپاڼه کې زیاته شوې، چې د غزني د قره باغ ولسوالۍ اړوند د پیروکي په غونډیو کې پر وسله والو د ملي اردو د سرتیرو له خوا د درونو وسلو ډزې شوي او په کې درې وسلوال وژل شوي او دوه نور ژوبل شوي دي.

د دې ترڅنګ د لوګر د محمد اغې ولسوالۍ د الوزیو او د میدان وردکو ولایت د سیداباد ولسوالۍ په مربوطاتو کې هم د څلورو وسلوالو د ټپي کیدو خبر ورکړل شوی دی.

تر اوسه د دولت وسلوالو ډلو دوی ته د اوښتې مرګ ژوبلې په اړه رسنیو ته څه نه دي ویلي.


“چین له پاکستانه د سولې لپاره د صادقانه کار غوښتنه کړي”

د چين سفير او حنيف اتمر

افغان چارواکي وايي چې چين ورته ويلي دي چې د سيمې د امنيت لپاره به پر پاکستان خپل اغېز کاروي.

د افغانستان د ملي امنيتشورا له خوا ننۍ خپره شوې خبرپاڼه کې ويل شوي چې دا خبرې کابل کې د چين سفير دنګ شیجونګد افغان ولسمشر د امنيت سلاکار او د يادې شورا مشر حنيف اتمر سره په يو ملاقات کې کړي دي.

په خبرپاڼه کې ويل شوي چې په کابل کې دنګ شی جون او حنیف اتمر په روانو امنيتي او سياسي حالاتو خبرې وکړي. د خبرپاڼې تر مخه د چین سفیر همداراز زیاته کړي چې هېواد یې د افغانستان د امنیتي او دفاعي ځواکونو سره د تجهیزاتو او وسایلو د مرستې پر ژمنې ولاړ دی او په دې هېواد کې د سولې او ثبات د ټینګښت لپاره د افغان دولت له تګلارو او نوښتونو ملاتړ کوي.
د افغان ولسمشر د ملي امنیت سلاکار محمد حنیف اتمر، له افغان دولت سره په بېلابېلو برخو کې د چین له همکاریو د مننې تر څنګ و ویل چې: ((د چین د ولسي جمهوریت له خپل سیمه ییز نفوذ څخه په ګټه اخېستنې یو شمېر ګاونډي هېوادونه په افغانستان کې د سولې او ثبات د ټینګښت له هلو ځلو ملاتړ ته هڅولای شي.))
تر اوسه پورې پاکستان په دې اړه څه نه دي ويلي.

افغان ولسمشر د چينايي ولسمشر سرهافغان ولسمشر د چينايي ولسمشر سره
x
افغان ولسمشر د چينايي ولسمشر سره
افغان ولسمشر د چينايي ولسمشر سره

د افغانستان د ملي امنيت شورا په خبرپاڼه کې همداراز زياته شوې چې حنیف اتمر د چين سفير ته وويل چې هيواد يې ټولو ګاونډیو هېوادونو سره د ښو او پر دوه اړخیز درناوي ولاړو اړیکو غوښتونکی دی. اتمر زياته کړې چې له ګاونډیو هېوادونو هم ورته تمه لري.

د يادونې وړ ده چې چين دي وروستيوو کې پاکستان سره د اقتصادي لارې د يوې پروژې په کولو سره د ۴۶ بيليونو ډالرو سرمايه کاري کوي. په دي وروستيوو کې يې د افغان طالبانو او افغان حکومت ترمنځ په چين کې مذاکرات جوړ کړي وو. افغان چارواکي تمه لري چې چين به پر پاکستان خپل اغېز استعمال کړي تر څو طالبان د اسلام اباد په وينا له جګړې لاس واخلي.

پاکستان بيا وايي چې پر طالبانو ډېر زيات اغېز نه لري خو دومره اړيکې ورسره لري چې کولی شي مذاکراتو ته يې کښينوي.


د موسی کلا د بېرته نيولو لپاره تازه دمه پوځيان استول شوي

د افغانستان دفاع وزارت وايي چې تازه دمه پوځيان یې د هلمند ولايت په موسی کلا ولسوالۍ کې په عملیاتو بوخت دي او ژر به له دې ولسوالۍ د مخالفينو لاسونه لنډ کړي.

د دغه وازرت يوه وياند دولت وزيري نن د مشال ريډيو افغان څانګې سره خبرو کې د طالبانو له خوا د يادې ولسوالۍ تاييد نه کړل خو وي ويل: ((زمونږځواکونه په سيمه کې دي او د هغو پوځيانو سره مرستې ته ورغلي چې لا وار دمخه طالبانو سره په جګړه بوخت دي. هوايي ځواکونه هم هلته دي. عملیات روان دي انشاالله سیمه له مخالفینو پاکه کیږي.))

همدي حال کې په ولسي جرګه کې د هلمند د خلکو استازو نن وويل چې موسی کلا ولسوالي د طالبانو لاس ته ورغلي او پکار ده چې حکومت يې د بېرته نيولو لپاره بيړني ګامونه واخلي.

د موسی کلا په شان جګړه به افغانستان کې په تېرو پنځلسو کلونو کې يو ځای کې هم نه وي شوي

په دې جرګه کې د هلمند د خلکو استازي او د کورني امنیت د کمیسیون مرستیال عبدالحی آخندزاده وویل چې افغان پوځیانو له سختې جګړې وروسته شاتګ کړی دی.

هغه نن د مشال ريډيو افغان څانګې ته وويل: ((داسې جنګ به په ټول افغانستان کې په دا پنځلس کلونو کې نه وي شوی لکه څنګه چې دا څو ورځې په موسی کلا کې روان دی. پولیسو او ملي اردو ته هم ډېر زيان اوښتی دی. ډېر جنګ یې وکړ خو [له مرکزه] ورسره مرسته ونه شوه، هوايي مرسته ورته ونه رسېده. نو اړ شول چې موسی کلا ولسوالي یې متاسفانه پرېښوده. دا ډېره مهمه ولسوالي ده.))

ښاغلی اخندزاده وايي چې په سلګونه وسله وال طالبان د موسی کلا په جګړه کې ښکېل دی او مشري یې د پاکستان استخباراتي اداره آيي ايس آيي کوي. پاکستان په دې اړه تر اوسه څه نه دي ويلي.

اخوا د هلمند د ولایتي شورا رییس کریم اتل وايي چې په دې جګړه کې ګڼ افغان پوځيان وژل شوي او زخميان شوي دي. خو افغان چارواکي وايي د دوی پوځيانو ته اوښتی زيان ډېر نه دی.

موسی کلا د هلمند د پنځو شمالي ولسوالیو په مرکز کې پرته لویه ولسوالي ده چې د برتانوي پوځیانو له وتلو وروسته پکې نا امنۍ ډېره شوې ده.

پوځي کارپوهان بیا د اکثرو سیمو د سقوط لامل په جګړو کې د ډېرو افغان پوځیانو ښکیلتیا او د احتیاطي سرتیرو نه موجودیت په ډاګه کوي.

د پوځي چارو افغان کارپوه جنرال عتیق الله امرخیل آزادي راډیو ته ويلي دي چې افغان پوځ سم نه اداره کیږي او د بیړنیو حالاتو لپاره مخکې له مخکې چمتوالی نه لري.

 


ايران افغان کډوال شام ته د جګړې لپاره لېږي

د سپاه پاسداران يو قوماندان قاسم سليماني د يو افغان کډوال سره چې وروسته په شام کې ووژل شو

فرانس پریس خبري اژانس په يو رپورټ کې ويلي چې ايران پر خپله خاوره مېشت افغان کډوال شام يا سوريه ته ليږي چې هغوی هلته د بشارالاسد د ځواکونو په ليکوکې د مخالفه وسله والوډلو پر خلاف جګړه وکړي.

اژانس زياتوي د ايران سپاه پاسداران انقلاب اسلامي زياتره وخت هزاره توکمه شيعه افغان کډوال شام ته استوي.

اژانس د يوه پنځه ديرش کلن هزاره توکمه حيدر له ميرمني جهان تاب رحيمي سره خبري کړي دي. هغې ورته ويلي چې خاوند يې يوه مياشت مخکې ورته ټيليفون کړي وو او ورته ويلي يې وو چې شام له ځي او کیدای شي بيا بيرته رانشي.

دا زياتوي له حيدر سره د ۷۰۰ ډالرو او د ايران د استوګني د رسمي اجازت نامې ورکولو ژمنه شوې وه خو ددې په خبره دې هغه ته خواست وکړ چې مه ځه او ځان د څو پيسو لپاره مه وژنه.

خو د رپورټ تر مخه څو ورځې وروسته حيدر شام ته ولاړ او بيا څه وخت پس ايراني چارواکو دده کورنۍ ته د هغه د مرګ خبر ورکړ.

مشهد کې د هغو څلورو افغان کډوالو جنازې چې په شام کې وژل شوي ديمشهد کې د هغو څلورو افغان کډوالو جنازې چې په شام کې وژل شوي دي
x
مشهد کې د هغو څلورو افغان کډوالو جنازې چې په شام کې وژل شوي دي
مشهد کې د هغو څلورو افغان کډوالو جنازې چې په شام کې وژل شوي دي

د شيعه مليشو د چارو پوه فلپ سمت فرانس پريس خبري اژانس ته ويلي چې دا وخت د يو اټکل له مخې په شام کې د ۲۰۰۰ او ۳۵۰۰ په منځ کې افغانان په جګړه بوخت دي.

دده په وينا ايراني چارواکي د افغان کډوالو استحصال کوي، ځيني مجبوروي چې شام ته د جګړې لپاره ولاړ شي او ځينو ته د استوګنې د اجازت نامو او معاش ورکولو تمه ورکوي.

خبري اژانس زياتوي په کابل کې د ايران سفارت دا تورونه ردوي چې ګواکې افغان کډوال شام ته ليږي چې هلته د بشارالاسد د ځواکونو په ليکوکې د هغه د مخالفه وسله والو پر ضد جګړه وکړي.

خو د اژانس په وينا تيرکال د اسدمخالفه جګړه مارو يوه داسي وېډيو خپره کړې وه چې پکې په وينو لړلی يو افغان وايې، دی په ايران کې په ناقانونه توګه اوسېدلو او چارواکو ورته وويل چېيا خود شپږ سوه ډالر په بدل کې شام له د جګړې لپاره ولاړ شي که نه نو له هېواده وتلو لپاره دې تيار شي. 

البته فرانس پريس خبري اژانس وايي و نه توانېدل چې ددغي وېډیو کره والی تاييد کړي.


“په کاپیسا کې سلګونه وسله وال فعالیت لري”

په کاپيسا کې یو شمېر چارواکي وايي؛ یوازې په تګاب او اله ساي ولسوالیو کې لږترلږه ۱۰۰۰ وسله وال د حکومتي ځواکونو پر ضد  کاروایانې کوي.

د کاپيسا د ولایتي شورا مشر محمد حسین سنجاني پرون (سه شنبه) مشال راډیو ته وویل:

((زموږ د معلوماتو پر اساس، په تګاب او اله ساي ولسوالیو کې به ښايي تر ۱۰۰۰ زیات وسله وال طالبان فعالیت کوي چې تر ۱۵۰ تنو پورې ښايي بهرنيان وي او نور یې د سیمې خلک دي.))

ښاغلي سنجاني زیاته کړه چې په سیمه کې بې کاري او سیاسي بې ثباتي د امنیت د خرابوالي اساسي عوامل دي.

د کاپيسا والي مشال راډيو ته وویل چې ستونزې شته او د حل لپاره یې هڅې کوي.


پاکستان کې د افغان کډوالو د اوسېدو موده دوه کاله نوره زياته شوه

پاکستان کې افغان کډوال

افغان چارواکي وايي چې له پاکستان سره په دوه اړخیزه ناسته کې د افغان کډوالو په اړهتفاهم لیک نهایي شوی دی چې له مخې يې پاکستان تر دوو کلونو پورې افغان کډوال په خپله خاروه کې اوسيدو ته پريږدي.

دغه خبرې د افغانستان د کډوالو او بېرته راستنېدونکو چارو وزير، سيد حسین عالمي بلخي پرون د ملګرو ملتونو د کډوالو ادارې (UNHCR) په هغه غونډه کې کړي چې په ارګ کې وشوه.

د افغان ولسشمر محمد اشرف غني له دفتره په خپره شوې خبرپاڼه کې دا هم راغلي چې ولسمشر دغه راز وویل چې د کډوالو د راستنېدو حالت د وړاندوینې وړ نه دی نو ځکه باید ټول وزارتونه په دې اړه د بیړنیو حالاتو لپاره لازم چمتوالی ولري.

سيد حسین عالمي بلخيسيد حسین عالمي بلخي
x
سيد حسین عالمي بلخي
سيد حسین عالمي بلخي

خبرپاڼه زياتوي چې په دې غونډه کې عالمي بلخي وویل چې د پاکستان او ایران له هېوادونو سره دوه ځلې دوه اړخیزې او درې اړخیزې ناستې ترسره شوي دي.

د کډوالو چارو وزير زياته کړې چې ايران او پاکستان له افغان چارواکو غوښتې چې په خپله خوښه د افغان کډوالو د ستنېدو په اړه ورته تګلاره او پلان ورکړي چې د بلخي په خبره کار پرې روان دی.

په خبرپاڼه کې راغلي چې د کډوالو لپاره ستراتیژیک پلان په دریو برخو، تحلیل او ارزیابۍ، د کډوالو چارو په مدیریت او د ظرفیت د لوړولو په تدبیرونو مشتمل دی.

ولسمشر غني د دغه ستراتیژیک پلان په جوړولو کې د کډوالو چارو د وزارتد هڅو ستاینه کړي او ټینګار یې کړی چې د پلان هدفونه باید پر واقعيتونو ولاړ وي.

د خبرپاڼې تر مخه په دې ناسته کې همدا راز د دغه وزارت د ستراتیژیک پلانپه اړه هر اړ خیز بحث وشو او په پای کې پریکړه وشوه چې د وزیرانو شورا به د پلان عملي کول تر غور او څېړنې لاندې ونیسي.

 


په کابل کې د دفاع وزیرانو غونډه جوړيږي

ټاکل شوې چې د تيرو ۱۴ کلونو وروسته د لومړي ځل لپاره په کابل کې د سیمې د هېوادونو د دفاع وزیرانو یوه غونډه جوړه شي.

د افغانستان د بهرنیو چارو مرستيال وزير حکمت خلیل کرزي دا موضوع په وروستیوکې په افغانستان کې د ملګروملتونو د ځانګړي استازې له مرستیال تادامیچي یاماموتو سره د لیدو پرمهال څرګنده کړه.

که څه هم د بهرنیو چارو وزارت په دې اړه د معلوماتو ورکولو ډډه وکړه خو د افغانستان د دفاع وزارت مرستیال ویاند جنرال دولت وزیري ازادي راډيو ته وویل چې دا غونډه له ترهګرۍ سره د ګډې مبارزې لپاره د سیمې د همکارۍ د جلبولو لپاره ډيره مهمه ده:

((په افغانستان کې دغه د دفاع وزیرانو ناسته ډیره د اهمیت وړ ده ځکه افغانستان له تروریزم سره جګړه کې په لومړي خط کې دی. نو سيمه او آن ټوله نړۍ باید په دغه جګړه کې برخه واخلي او له افغانستان سره مرسته وکړي.))

بلخوا د بهرنیو چارو مرستیال وزير دا غونډه په افغانستان او شاوخوا هيوادونو کې د سولې او ثبات د ټینګښت لپاره مهمه بللې ده.

حکمت خلیل کرزي په افغانستان کې د ملګروملتونو د ځانګړي استازې له مرستیال سره د لیدو پرمهال ويلي چې ترهګري نه یواځې افغانستان ته زیان رسوي بلکې سیمه یې هم له ګواښ سره مخ کړې ده.

له دې مخکې افغان ولسمشر اشرف غني هم له ترهګرۍ سره د مبارزې په برخه کې د سیمې پر همکارۍ ټینګار کړی و.

خو يو شمېر شنونکي بیا وایي، سیمه او په ځانګړي توګه افغانستان د هغو وسله والو له لوري ګواښل کیږي چې مرکزونه یې په پاکستان کې دي.

شنونکي محب الله شریف ازادي راډيوته وویل، افغانستان باید د سیمې له هيوادونو سره یوځای پر پاکستان فشار راولي څو د ترهګرۍ له ملاتړه لاس واخلي.

((د پاکستان یا هر هغه هيواد پرضد چې په افغانستان کې د تخریب مسوولیت لري او د هغوی پرضد شواهد موجود وي. د هغوی پر وړاندې له سیمې سره ډیپلوماټیکې اړیکې په کار دي څو پر پاکستان فشار راولي چې داسې ورانکاره اعمال پریږدي.))

نوموړی دغه راز وایي، تر هر څه مخکې لازمه ده چې افغان حکومت یو واحد ملي دریځ د هغو ګواښونو پر وړاندې رامنځ ته کړي چې د ګاونډیو له لوري ور پيښ دي.

د چارو شنونکي همدا راز ټینګارکوي چې د ترهګرۍ پر وړاندې سیمه ییزې هڅې باید په وقفه یې شکل نه بلکې د یو میکانیزم او ځانګړې ستراتیژۍ له لارې پرمخ ولاړې شي څو د سیمې د ثبات لپاره مثبتې نتیجې ولري.

 


هرات: د اورلګېدنې په پیښه کې ۱۱ کسان وژل شوي دي

د افغانستان په هرات ولایت کې د اوبلن ګاز یو شرکت ته څېرمه په یوې اورلګېدنه کې ۱۱ کسان وژل شوي او شپږنورټپیان شوي دي.

د دغه ولایت ویاند احسان الله حیات نن ازادي راډیو ته وويل چې دغه پېښې ۴۲ میلیونه افغانۍ زیان هم اړولی دی.

د مهدي ګل په نامه يو عيني شاهد بيا وايي چې د ګازو په شرکت کې تر چاودنې او اورلګېدنې وروسته نږدې ټانکرونو هم اور واخيست چې په نتيجه کې يې ۱۰نور ژوبل شول.

دغه اورلیګېدنه تېره شپه ۱۲ بجې د دهنه کمرکلاغ په سیمه کې رامنځته شوې ده.

چارواکو د دغې اورلګېدنې لامل د شرکت د مسوولانو بې احتیاطي ښودلې ده.


کندز: د جندالله ډلې سيمه ييز کومندان وژل شوی دی

د افغانستان په کندز ولايت کې د جندالله په نوم د يوې وسله والې ډلې یو سیمه ییز قوماندان د بې پيلوټه الوتکې په بريد کې وژل شوی دی.

د کندز د والي ویاند پرون (دوشنبه) ازادي راډیو ته وویل چې د وسله والو دا کومندان قاري غلام حضرت نومیږي چې په سیمه کې په ابو حذیفه هم مشهور و.

د رویټرز خبري اژانس په حواله، جندالله د سني وسله والو ډله ده چې په ۲۰۱۳ مکال کې یې په پاکستان کې د خپل فعالیت اعلان وکړ.

د کندز په چهاردره کې د بې پيلوټه الوتکې په دې بريد کې پرون مازدیګر د جندالله درې نور قوماندان قاري دین محمد، قاري ستار او قاري جمعه هم وژل شوي دي.

د کندز د والي ویاند عبدالودود واحدي ازادي راډیو ته وویل:

((دا عملیات پرون مازدیګر د چهاردره ولسوالۍ د پل رحمت بای په سیمه کې شوي چې په کندز کې د جندالله عمومي کومندان غلام حضرت پکې ووژل شو. درېبهرني وسله وال چې د ازبکستان تابعيت لري، هم په دې عملیاتو کې وژل شوي دي. دوی داعش ته د بیعت کولو لپاره راغلي وو چې د بې پيلوټه الوتکو په مرسته وویشتل شول.))

نوموړي زياته کړه،د جندالله په څېر وسله والو ډلو له تیر یوه کال راهیسې په کندز کې فعالیتونه پيل کړي چې په وروستیو کې یې نفوذ زیاتو سیمو ته پراخ شوی دی.

په کندز کې د دې ډلو د غړو دقیق شمېر نه دی څرګند خو د والي ویاند وايي چې دا ډلې تر ډیره حده په امام صاحب، دشت ارچي، چهاردره او ګورتیپه ولسوالیو کې فعالې دي.

((موږ ته د رسیدلو رپوټونو پر اساس؛ په کندز کې د ازبکستان اسلامي تحریک، د جندالله ډله، القاعده او وسله وال طالبان فعالیت لري.))

نوموړی زياتوي چې په دې ولایت کې د اسلامي دولت يا داعش په نوم د وسله والې ډلې د فعالیت د څرنګوالي په اړه زیات جزیات نه لري.

جندالله ډلې تر اوسه په کندز کې د دوی د سیمه ییز مشر د وژل کېدو په اړه څه نه دي ویلي.

مهم موضوعات