د ایټمي مسلو په اړه د امریکايي ولسمشر ډونلډ ترمپ سلاکار کرسټوپر فورډ ویلي ، امریکا د اوس لپاره د نړۍ له ځواکمنو هیوادونو سره د ایران ایټمي تړون ته احترام لري.
دا خبره نوموړي د سېشنبې په ورځ په واشنګټن کې یو کنفرانس ته د وینا پر مهال کړې ده.
هغه ویلي چې د امریکا اوسنی حکومت پر دې سربېره د ایران دا تړون مني چې ولسمشر ډونلډ ټرمپ په وار وار نیوکې ورباندې کړې دي.
خو کرسټوپر فورډ زیاته کړې چې د امریکا اوسنی حکومت د ایراني هغه په ګډون د ټولو هغو ایټمي تړونونو جاج اخلي چې د تېرې حکومتي دورې پر مهال شوي وو.
نوموړي دا هم ویلي چې امریکا د روس له خوا د ایټمي وسلو وړلو صلاحیت لرونکي کروز توغندي نصبولو ته د غبرګون جاج هم اخلي.
