د لاسرسي ځای

پاکستان به راتلونکې اوونۍ د مارچ مېاشتې په لومړۍ نېټه ​په اسلام اباد کې د اقتصادي همکارۍ سازمان "ایکو" د ۱۳مې غونډې کوربه وي.

دا سازمان چې د پاکستان، ایران او ترکیې په نوښت جوړ شوی وو، اوس‎مهال ۱۰ غړي لري.

د پاکستان بهرنیو چارو وزارت په شنبه وویل چې د اقتصادي همکارۍ سازمان زیاتو غړیو په اسلام‎اباد کې راروانې غونډې ته د ورتګ بلنه منلې خو د افغانستان ګډون په اړه‌يې په څه و نه ویل.

د امریکا غږ انګلېسي برخې په یوه راپور کې د پاکستان د وزیر اعظم سلاکار سرتاج عزیز په حواله ویلي چې د افغانستان بهرنیو چارو وزیر صلاح‌ الدین رباني دې غونډې ته ورځي.

عزیز: افغانستان د بهرنیو چارو وزیر صلاح‌الدین رباني دې غونډې ته ورځي.

عزیز: افغانستان د بهرنیو چارو وزیر صلاح‌الدین رباني دې غونډې ته ورځي.

د امریکا غږ د راپور په حواله، سرتاج عزیز ویلي چې د افغانستان د بهرنیو چارو وزارت په‎ دې غونډه کې د صلاح‌الدین رباني ګډون تائید کړی.

امریکا غږ وايي، سرتاج عزیز پرون شنبه په اسلام‎اباد کې خبريالانو ته ویلي چې افغانستان او پاکستان ترورېزم خپل ګډ دښمن ګڼي او له‎ دې سره د مبارزې لپاره‌یې د دوه اړخېزې همکارۍ پر اړتیا توافق کړی دی.

د راپور په حواله، سرتاج عزیز همدا راز ویلي چې د اقتصادي همکارۍ سازمان د غونډې په څنډه کې به له ښاغلي رباني سره د ترورېزم پر ضد د مبارزې په اړه جلا خبرې هم وکړي.

سرتاج عزیز زیاته کړې چې دواړه به له ترورېزم سره د ګډې مبارزې لپاره د یوه نوي مېکانیزم پر جوړولو وغږېږي.

موږ له مکررو هڅو سره ونه‌توانېدو چې په ‎دې اړه د افغانستان د بهرنیو چارو وزارت نظر ترلاسه کړو.

خو یو شمېر پاکستاني رسنیو ویلي چې افغانستان لا په اسلام‎اباد کې په‎ دې غونډه کې د خپلو استازو ګډون نه‎دی تائید کړی.

د اقتصادي همکاریو سازمان په ۱۹۸۵ میلادي کال کې پاکستان، ایران او ترکیې جوړ کړ چې وروسته‌یې افغانستان، تاجکستان ، ازبکستان، قرغزستان، قزاقستان، ترکمنستان او اذربایجان هم غړي شوو.

د دې سازمان د جوړېدو موخه له نړیوال اقتصاد سره د دې هېوادونو د اقتصادي پیوستون پیاوړي کول وو.

په اسلام‎اباد کې د اقتصادي همکاریو سازمان غونډه په ‎داسې حال کې جوړېږي چې د افغانستان او پاکستان تر منځ سیاسي روابط، تر بل هر وخت زیات نازک حالت ته رسېدلي دي.

په پاکستان کې تر یو لړ چاودنو او وسله‎والو حملو وروسته، د پاکستان حکومت پر تورخم او سپین‎بولدک د افغانانو تګ راتګ بند کړ.

د پاکستان وزیر اعظم نواز شریف تېره اوونۍ ترکیه کې د هغه هېواد له صدراعظم سره تر کتنې وروسته، وویل چې اسلام‎اباد په افغانستان کې د سولې ټینګښت غواړي خو ټینګار یې وکړ چې د افغانستان له خاورې د پاکستان پر ضد کار اخیستل کېږي.

خو د افغانستان حکومت دا ادعا رد کړې ده.

کابل ویلي چې هېڅکله‌ یې د ترهګرو ډلو ملاتړ نه ‎دی کړی او د داسې تورونو پورې کول د وضعیت له ښه کېدو سره هېڅ ډول مرسته نه‎ شي کولای.

XS
SM
MD
LG