د ننګرهار ولایت چارواکي وايي، د (شاهین ۲۵) په نوم پوځي عملیاتو کې په دې ولایت تر ۱۵۰ زیات د داعش ډلې وسله وال وژل شوي او ټپیان شوي.
د ننګرهار د والي ویاند عطاالله خوګیاڼي د شنبې په ورځ په دې اړه مشال راډیو ته وویل چې دا عملیات په بریالیتوب روان دي چې په نتیجه کې يې د داعش څو قومندانان وژل شوي او څو موټرې يې نیول شوي دي.
خوګیاڼي زیاته کړه چې د شاهین ۲۵ په پوځي عملیاتو کې له افغان ځواکونو سره د نړیوال ایتلاف هوايي ځواک ملاتړ کوي.
د ننګرهار چارواکو په وینا دا عملیات لس ورځې مخکې د ننګرهار د کوټ او هسکې مېنې په ولسوالیو کې د داعش وسله والو پر ضد پیل شوي دي.
