د افغانستان بهرنیو چارو وزیر وايي هغه هېوادونو چې له ترهګرۍ څخه د بهرني سیاست لپاره کار اخلي، باید پوه شي چې دا کار د دوی لپاره خطرناک دی.
صلاح الدین رباني په سېشنبه په مسکو کې له خپل روسي سیال سرګې لاوروف سره په ګډه خبري غونډه کې ټینګار وکړ چې د سیمې هېوادونو او نړیوالو له همکارۍ پرته له ترهګرۍ سره مبارزه ناممکنه ده:
"اړتیا ده هغه هېوادونه چې ترهګري ساتي، ترهګري روزي او له ترهګرۍ څخه د بهرني سیاست لپاره کار اخلي، باید مخه یې ونیول شي."
د افغانستان بهرنیو چارو وزیر صلاح الدین رباني د یکشنبې په ورځ له روس سره د دوه اړخیزه همکاریو د پراختیا او د ترهګرۍ ضد ګډې همکارۍ په هدف هغه هېواد ته سفر وکړ.