امریکايي رسنۍ خبر ورکوي چې سپینه ماڼۍ پر ایران د بیلېسټېک توغندي د ازموینې او په منځني ختیځ کې د نیابتي جګړو پر مخ وړلو په غبرګون د نویو بندیزونو لګولو تیاری کوي.
اسوشي اېټېډ پریس اژانس، رویټرز او د فرانسې خبري اژانس بېګا د ځېنو امریکايي چارواکو له خولې وویل، ښکاري واشنګټن ژر او کېدای شي همدا نن پر لسګونه ایرانیو وګړو، شرکتونو او حکومتي ادارو بندیزونه اعلان کړي.
د دې چارواکو نومونه نه دي ښودل شوي. هلته د ایران بهرنیو چارو وزارت، د بېلېسټېک توغندي د وروستۍ ازموینې په غبرګون د امریکا حکومت له لوري د نوټس یا خبرداري ورکولو پرېکړه پاروونکې بللې ده.
د بهرنیو چارو وزارت ویاند بهرام قسیمي تېر ماښام دولتي خبري اژانس اېرنا ته وویل چې امریکايي دعوې بې بنسټه، تکراري او پاروونکې دي.
هم د پنجشنبې په ورځ په واشنګټن کې خبریالانو ته په وینا کې امریکايي ولسمشر ډونلډ ټرمپ وویل، د ایران توغندي ازموینې د غبرګون په اړه هر څه په پام کې نیسي.
د سپینې ماڼۍ ویاند شان سپایسر هم وویل، د امریکا دا اعلان چې ایران به په نوټس کې ساتي د دې اشاره ورکوي چې د تهران ازموینه به بې له عکس العمله نه پاتې کېږي.
