د لاسرسي ځای

شربت ګله د افغانانو د ((بې وسۍ علامت دی))


افغان ولسمشر شربت ګلې ته هرکلی وايي او زوی یې په غېږ کې نیولی

افغان ولسمشر شربت ګلې ته هرکلی وايي او زوی یې په غېږ کې نیولی

لیکواله: مونا نصیر

سرچینه: دي نېشن ورځپاڼه

له پاکستانه خپرېدونکې د انګرېزۍ ژبې ورځپاڼې دي نېشن د لیکوالې او شنونکې مونا نصیر لیکنه خپره کړې چې پکې راغلي، کله چې په افغانستان کې جنګ تود وو او پاکستان ته د جهاد او افغان کډوالو په اړه کروړونه ډالر ورروان ول نو هغه وخت هېچا نه ویل چې د پاکستان پر خاوره د افغانانو وجود د هغه هېواد اقتصاد او امنیت ته خطرې ولاړوي.

خو له کله چې نړیوال امدادونه بند شوي او د نړیوال سیاست مخ بل پلو اوښتی، نو ورسره د افغان کډوالو په اړه د پاکستان حکومت پالیسۍ بدلې شوې دي.

مونا نصیر لیکي، پاکستانیو چارواکو شربت ګله د جعلي شناختي کارډ (پېژندپاڼې) جوړولو په تور ونیوله چې وروسته ورته یوه پاکستاني عدالت د ۱۵ ورځو بند او د څه باندې یو لاک روپیو جرمانې سزا واوروله.

نوموړې لیکي، په حقیقت کې شربت ګله د افغانانو او په ځانګړي ډول د افغانانو او په ځانګړې توګه د افغان کډوالو د بې وسۍ یو علامت دی.

د لیکوالې په خبره، اوس چې د افغان کډوالو په سر پاکستان ته پیسې نه ورځي نو هغه هېواد افغانان پر خپل اقتصاد یو بوج (بار) او د کورني امنیت لپاره خطر بولي چې د شربت ګلې قضیه یا پېښه یې یو تازه مثال دی.

مونا نصیر پوښتنه کوي، که خبره امنیت ته د خطر وي نو د القاعدې مشر اسامه بن لادن، د وسله والو طالبانو مشر ملا عمر او د همدې ډلې بل مشر ملا منصور درې واړه په ظاهره، په پاکستان کې اوسېدل او بن لادن او ملا منصور د پاکستان دننه ووژل شول – نو بیا ولې پاکستان د هغوی ضد کارروايي ونکړه؟

د لیکوالې په وینا، شربت ګلې له دې پرته چې د ځمکې پر یوه ټوټه یا ټکړه په ارام خپل ژوند تېر کړي، له پاکستانه نور هېڅ نه غوښتل.

په لیکنه کې راغلي، په ۱۹۷۹ز کال کې چې پاکستان ته د افغان کډوالو ورتګ پیل شو نو د پاکستان یو شمېر سیاسي او مذهبي ګوندونو ورسره رابطې جوړې کړې چې مقصد یې خپلې ګټې او د ګوندونو اېجنډې پر مخ بیول او هغوی ته وده ورکول ول. بلخوا د پاکستان حکومت هم غوښتل چې د پښتنو افغان کډوالو له لارې په افغانستان کې خپل نفوذ پراخه کړي.

د مونا نصیر په اند، اوس چې پاکستان د پولو انتظام (بارډر مېنېجمنټ) په نوم افغان کډوال له خپلې خاورې شړي یا هلته د افغانانو پر ورتګ بندیز لګوي نو د دې تر شا امنیت یا اقتصاد نه بلکې د افغانستان، پاکستان او امریکا هغه سیاسي حالات دي چې اسلام اباد غواړي د کډوالو ستونزو ولاړولوله لارې په پرده کې ځان ته د خپلې خوښې ځای بیا ومومي.

تبصرې ښکاره کړئ

XS
SM
MD
LG