د لاسرسي ځای

پاکستان د افغانستان پر اهل تشیع بریدونه وغندل


په کابل کې پر اهل تشیع تر حملې وروسته یو سړی ژوبله ماشومه وړي

خبریال: ذبیح مومند

اسلام اباد - د پاکستان د بهرنیو چارو وزارت په کابل کې د شیعه ګانو پر زیارت او جومات وروستي ترهګر بریدونه غندلي او له افغان حکومت او د پېښې له قربانیانو سره یې همدردي ښودلې ده.

دا په داسې حال کې ده، چې وسله والو ترهګرو د سه شنبې په ورڅ د افغانستان په مرکز کابل کې د محرم په ورڅ د شیعه ګانو پر یوه زیارت کارتې سخي او چهاریار جومات ډله ییز وسله وال برید وکړ، چې په نتیجه کې یې د رسنیو د راپورنو له مخې لږ تر لږه ۱۶ کسان مړه او تر ۴۰ زیات ټپیان شول.

تر دغې پېښې وروسته د افغانستان په بلخ ولایت کې هم د عاشورا پر ویر کوونکیو د سړک غاړې بم چاودنه وشوه، چې د راپورونو له مخې لږ تر لږه ۱۴ کسان پکې مړه او ۲۶ نور پکې ټپیان شول.

د پاکستان د بهرنیو چارو وزارت په کابل کې دغه ترهګریز بریدونه غندلي او د پېښې د قربانیانو له کورنیو سره يې خواخوږي ښودلې ده.

یوه سړي د بلخ روغتون ته ژوبل ماشوم وړی دی

یوه سړي د بلخ روغتون ته ژوبل ماشوم وړی دی

دغه وزارت د اکتوبر پر ۱۳مه په یوې خپرې کړې خبرپاڼه کې د کابل د ترهګرو بریدونو د غندنې ترڅنګ یو ځل بیا ټینګار کړی چې:

((پاکستان ترهګري چې په هره بڼه او شکل وي، په کلکه غندي.))

په افغانستان کې اکثریت سونيان دي، خو شعیه ګان هم شته چې هر کال په عاشورا کې د ویر غونډې کوي او یو شمېر یې لارو او سړکونو ته هم راوځي.

په کابل کې پر کارتې سخي زیارت او چهاریار جومات د وسله والو بریدونو مسوولیت داعش وسله والې ډلې منلی.

كه څه هم افغانستان د پاکستان، عراق او ځینو نورو هېوادونو په شان د شعیه او سوني ترمنځ د اختلاف او تاوتریخوالي تاریخ نه لري، خو د ځینو په باور په دې وروستیو کې پر شعیه لږکیو برید د افغانانو ترمنځ د مذهبي اختلافاتو د راپارولو په موخه کېږي.

په کابل کې تر دې مخکې د ۲۰۱۱ز کال د عاشورا په مراسمو هم برید شوی وو، چې مسوولیت یې لشکر جنګوي ډلې منلی و، خو دا لومړی ځل دی چې په دې ښار کې د عاشورا په مراسمو کې پر شیعه ګانو د خونړي برید مسوولیت داعش وسله والې ډلې پر غاړه اخیستی دی.

په عین حال کې د پاکستان ترڅنګ د امریکا متحده ایالاتو هم په کابل او بلخ کې پر شیعه ګانو ترهګریز بریدونه غندلي، دا یې شرمناک عمل بللی او دا بریدونه یې په افغانستان کې د مذهبي کړکېچ د راپارولو په موخه بللي دي.

د یادونې وړ ده، چې د افغانستان ولسمشر اشرف غني د کارتې سخي پر زیارت او چهاریار جومات بریدونه بشري جنایت بللی، برید کوونکي د اسلام د دین د پیروانو دښمنان بللي او له خلکو او دیني عالمانو یې غوښتي، چې د جنایتونو پر وړاندې دې ودرېږي.

XS
SM
MD
LG