د لاسرسي ځای

اشرف غني: افغان ښځو ته به په ځايي شوراګانو کې ۵۰ سلنه ونډه ورکوو


اشرف غني او فدريکا موګېريني

اشرف غني او فدريکا موګېريني

افغان ولسمشر اشرف غني ويلي چې په خپل هېواد افغانستان کې به ښځو ته د نارينوو سره سم يو شان مواقع برابروي. نوموړي نن د اروپايي هېواد بېلجیم په سر ښار برسلز کې د افغانستان په اړه نړیوالې غونډې ته د وينا پر مهال زياته کړه چې ښځو ته به په ځايي شوراګانو کې ۵۰ سلنه ونډه ورکوي. ولسمشر غني له برخه والو غوښتنه وکړه چې د افغان ښځو جوړو شوو توليداتو ته دې په اروپايي بازار کې ځای ورکړي ځکه د نوموړي په خبره خيرات غربت له منځه نشي وړلای خو بازار ته لاسرسی غربت له منځه وړلای شي.

غونډه د اروپايي اتحادیې د بهرنۍ او امنيتي تګلارې مشرې فدریکا موګېریني په خپله پرانيستونکې وينا پېل کړه.

په دې غونډه کې د نړۍ د لږ تر لږه ۷۰ هیوادونو او ۲۰ نړیوالو سازمانونو استازي برخه لري.

د فدریکا موګېریني په وینا، په برسلز کې د افغانستان په اړه دا غونډه یوازې د مالي مرستو راغونډولو لپاره نه ده بلکې له دې هیواد سره به د نړیوالو د سیاسي ملاتړ پر دوام هم ټینګار وشي.

نوموړي زياته کړې چې اروپايي اتحادیه په افغانستان کې سوله او ثبات د ځان په ګټه ګڼي او د برسلز غونډه د دې ژمنتيا د څرګندولو ښه موقع ده.

بلخوا نن د دغه کنفرانس له پیل وړاندې په برسلز کې د ځايي افغانانو لخوا د افغان حکومت په ملاتړ یوه مظاهره هم ترسره وشوه. مظاهره کوونکو د حکومت په ملاتړ او یو شمیر ګاونډيو هېوادو پر ضد شعارونه ورکول.

XS
SM
MD
LG