د امریکا دفاع وزارت وایي، ایتلافي ځواکونو په شام کې د اسلامي دولت وسله والې ډلې یو مشر وژلی دی.
د دفاع وزارت ویاند پیټر کوک د جمعې په ورځ وویل، وایل عبدالحسن سلمان الفیاض چې په ډاکټر وایل مشهور و، د سپټمبر پر اوومه نېټه الرقه ښار ته نژدې په بمبارۍ کې وژل شوی دی.
داسې باور کېده چې ډاکټر وایل د داعش د اطلاعاتو نومول شوی وزیر و. پیټر کوک وایي، ډاکټر وایل د داعش یو جګپوړی غړی و، چې د وسله والو ویډیوګانې به یې تیارولې او هغوی ته به یې تبلیغ کاوه.