د ترکیې ولسمشر رجب طیب اردوغان وایي، هغه وسله والو، چې ترکیه یې ملاتړ کوي د شام جرابلس ښارګوټی له داعش څخه نیولی دی.
اردوغان پرون په انقره کې د امریکا له مرستیال ولسمشر جوبایډن سره تر خبرو وروسته وویل، جرابلس ښار څو ساعته وروسته تر هغه سقوط وکړ چې د ترکیې ټانکونه او ځانګړي ځواکونه د امریکا په ملاتړ له سرحده پورې وتل.
پر دې مهال بايډن وویل، څه چې ترکیې کړې دي، دوی یې ملاتړ کوي او امريکايي الوتکې به هم د ترکانو ساتنه کوي.
(( زه غواړم له شک پرته دا روښانه کړم چې امريکا له خپلې متحدې ترکیې سره ولاړه ده. موږ د ترکیې د خلکو ملاتړ کوواو زموږ ملاتړ مطلق دی او هغه به کمزوری نشي.))
بایډن زیاته کړه چې د ترکیې سرحدونه باید د ترکانو له لورې کنټرول شي.
ترکیه وایي، د دې عملیاتو هدف چې د شام د ازاد پوځ په ملاتړ ترسره شو، د داعش او شاميکردانو په مشرۍ د ایتلاف مخنیوی و، چې دغو دواړو ډلو غوښتل د جرابلس ښار لور ته رامخته شي.
