د لاسرسي ځای

له کوره تر وتو له مخه باز محمد کاکړ خپل ويده زوی پر مخ ښکل کړی او له وتلو ۴۵ منټه وروسته يې د مرګ خبر راغلی. ارين را ويښ شو او پلار يې د تل لپاره ويده شو.

ارين له پلار سره او پلار يې له ارين سره وعده کړې وه.

د ارين لوظ دا و چې بيا به دروغ نه وايي او پلار يې ژمنه کړې وه چې د بلوچستان های کورټ انتخابات ختم شي نو سېل ته به يې سوات ته بيايي.

خو په کوټه کې پر وکيلانو ځانمرګي بريد د پلار او زوی لوظونه و وژل.

ارين اوه کلن دی او د درېم ټولګي زده کوونکی دی.

ما ورڅخه و پوښتل چې سکول ته څو ورځې کېږي نه يې تللی؟

ځواب و ، يوه هفته،

ولې؟

ويل يې، پلار مې شهيد شو،

چا شهيد کړ؟

په يوه ټکې کې ځواب راکړ“ طالبانو”

خو ولې يې شهيد کړ،

ارين خان

ارين خان

اوه کلن ارين د کارټونونو شوقين دی، څه خبر دی چې د وطن تر هر وګړي خو يې د کارټونونو ټام او جېري ښه دي چې که ورباندې ټرک و خېژوې او که يې تر ټرېن لاندې کړې خو لږ شیبې وروسته بېرته ځان راټول کړي او منډه کړي،دا خو پښتون وطن دی چې د جنګ ښامار يې شيبه شيبه تر خپل ستونې تېروي. دلته د ارين پلار او د هغه ۶۴ ملګرې ددې ښامار يوه بله ګوله يا نووړۍ شو.

ارين معصومه شان ځواب راکړ، ځکه يې و واژه چې زما پلار يو مشهوره وکيل و.

ما ويل د پلار پر مرګ به دې نو ډېر ژړلي وي؟

ويل يې اول ځل مې نه و ژړل خو دوم وار مې وژړل.

د پلار د فاتحې لپاره د ارين کورته سياستوالان ، وزيران او نور خواخوږي ورغلل.

په ورځپاڼه کې يو تصوير چاپ شو چې لاندې ورته ليکلي و،د بلوچستان وزيراعلی د بازمحمد کاکړ فاتحه کوي او په غېږه کې يې د هغه زوی ناست دی.

دا تصوير ارين اوس پخپل جېب کې ګرځوي او د کور نور ماشومان پرې سيزي چې ګورئ زما تصوير په اخبار کې چاپ شوی دی.

د ارين په کور کې ماتم دی اودی مور ويني چې شيبه شيبه ځوريږي ځکه خو يې د پلار د تصوير مخې ته اوس خپل پورټريت اېښی دی چې له موره د پلار تصويرپټ کړي.

ارين کله کوټه ته ننوزي او د مور له ټېلي فونه د پلار نمبر ملاو کړي خو دی ماشوم دی څه خبر دی چې مرګ کله د ژوند ټېلي فون ته ځواب ويلی.

بيا پوښتنه وکړي چې د پلار ټېلي فون مې له چاسره دی.

کله چې په کوټه کې بل څوک نه وي نو ارين د پلار بالښت راوخلي او په غېږه کې يې ټینګ و نيسي.

د ارين او پلار وروستی ملاقات هغه وخت وشو چې ارين ويده و او پلار يې ويښ.

له کوره تر وتو له مخه پلار ويده زوی پر مخ ښکل کړی او له وتلو شاوخوا ۴۵ منټه وروسته يې د مرګ خبر راغلی.

ارين را ويښ شو او پلار يې د تل لپاره ويده شو.

تبصرې ښکاره کړئ

XS
SM
MD
LG