د لاسرسي ځای

د پاکستان پوځ مشر د ترهګرۍ پر ضد د ځوانانو ملاتړ غوښتنه کړې


پراګ - د پاکستان پوځ مشر وايي، ځوانان دې ترهګرو ته په ماتې ورکولو کې مهم رول ولوبوي.

د اتوار پر ورځ د چترال په شندور کې د پولو لوبې مېلې ته په وینا کې جنرال راحیل شریف وویل، په هېواد کې د تلپاتې سولې تر ټینګښته به ضرب عضب عملیات روان وي.

د ده په خبره، په دې لړ کې البته د ولس او ځوانانو ملاتړ اړتیا ده.

د پاکستان پوځ مشر وویل، په شندور کې د پولو تاریخي مېلې کول وسله والو ته پیغام ورکوي چې هېواد یې بې له وېرې، ترهې خپل دودونه او روایات پالي.

کالاشۍ ښځې د مېلې پر مهال

کالاشۍ ښځې د مېلې پر مهال

جنرال شریف دا څرګندونې پر داسې وخت کړې دي چې په وروستیو درو ورځو کې وسله والو د چترال په کالاش سیمه کې درې شپانه وژلي دي او د هغوی په زرګونه څاروي یې له ځانه سره وړي دي.

د چترال ضلعي انتظامیې ځېنو منتخبو مشرانو مشال راډیو ته ویلي ول چې دا وسله وال د افغانستان له لوري وراوښتي ول.

افغانستان د دې وسله والو هلته د ورتګ په اړه څه نه دي ویلي.

په چترال کې یوه سیمه ده چې کالاش نومېږي. د کالاش په کلیو کې اوسېدونکو ته کالاشیان یا کېلاشیان ویل کېږي چې ډېر پخواني دودونه پالي او په مذهبي ډول هم په نادره یا نایابه لږکیو کې شمارل کېږي.

XS
SM
MD
LG