د لاسرسي ځای

تازه خبر

پاکستان: د ترهګرۍ خلاف پر مبارزې مو نیوکه نه شي کېدای


 په قبایلي سیمه کې یو پاکستانی عسکر
په قبایلي سیمه کې یو پاکستانی عسکر

د پاکستان د خارجه چارو دفتر وایي چې د ترهګرۍ خلاف د دوی پر هڅو ګوته نشې پورته کېدای.

د زیارت په ورځ د پاکستان د خارجه چارو د دفتر ویاند نفیس زکریا د اونیزې خبرې غونډې پرمهال وویل چې د دواړو ملکونو ترمېنځه د ترهګرۍ مخنیوي لپاره کوششونه روان دي او پاکستان او امریکا دواړه د اوږدې مودې ملګري دي.

خبریالانو ته نوموړي وړاندې وویل چې پاکستان ته د خپل سفر پر مهال امریکايي سناتور جان مککین د ضرب عضب پر عملیاتو اطمینان ښکاره کړی و.

« د داسي غونډو مثبتې نتیجې مخې ته نشې راتلی او بل تاسو د زلمي خلیل زاد خبره وکړه چې هغه د پاکستان خلاف منفي بیان ورکړی، دا تجویز یې هم ورکړی چې پر پاکستان دې امداد ودرول شي نو تاسو ته به زه صرف دا ووایم چې د هغه تجربه او قابلیت ټولو ته معلوم دی او د هغه خبرې باید څومره جدي وګڼل شي؟ »

یاده دې وي چې دوه ورځې مخکې د امریکې د کانګرېس په یوه غونډه کې په پاکستان تنقید شوی و او ویلي شوي وو چې که پاکستان اوس هم د وسله والو تنظیمونو د حمایت پالیسي نه پرېږدي نو په پاکستان دې امداد بند کړای شي.

خو د پاکستان د خارجه چارو دفتر ویاند زیاته کړه چې د ترهګرۍ خلاف په جنګ کې پاکستان څومره نقصان وچت کړی دومره بل یو ملک هم نه دی لیدلی.

په وارسا کې د ناټو کانفرانس په موقع د افغانستان ولسمشر لخوا د پاکستان پر ضد د ورکړل شوي بیان په اړه د خارجه چارو دفتر ویاند زیاته کړه چې داسي بیانونه په بنیادي توګه غېر مددګاره وي. نړیوالې ورورلۍ د ترهګرۍ خلاف د پاکستان د کوششونو ستاینه کړې ده. اوس پکار ده چې پاکستان او افغانستان خپلمنځي کومک ته وده ورکړي چې نه صرف افغانستان بلکه ټوله سیمه کې امن پر ځای شي.

« موږ د افغانستان چارواکو ته بیا بیا مشوره ورکړې چې د داسي بیانونو ورکولو څخه دې ډډه وکړي. پاکستان د ترهګرۍ خلاف مهم شروع کړی او د پاکستان کوششونه نړیوالې ورورولۍ تسلیم کړي هم دي. »

د سیمه يیزو چارو کارو پوه طاهر خان وایي چې د پېنټاګان له بیانه جوتیږي چې امریکا د ترهګرۍ خلاف همکاري غواړي.

« امریکا به هېڅ کله دا ونه غواړي چې پاکستان دې خپه شي او دا هم نه غواړي چې د پاکستان او افغانستان ترمېنځه دې تعلقات خراب شي ځکه چې افغانستان کې د امریکې پوځیان موجود دي او دا یې اعلان کړی چې ۸۴۰۰ پوځیان به د کال ۲۰۱۷ پورې پاتي وي نو دوی به نه غواړي چې پاکستان سره خپل تعلقات خراب کړې او نه به غواړي چې یو وارې بیا د پاکستان او افغانستان ترمېنځ اوبه خړې شي ځکه چې امریکا دا وایي چې د درې واړو ملکونو همکاري او اعتماد د وسله والو ډلو خلاف ضروري دی»

پاکستان په وار وار ویلي چې دوی په افغانستان کې امن غواړي او خپل کوششونه به په دې لړ کې جاري ساتي.

XS
SM
MD
LG