افغان ولسمشر محمد اشرف غني د امريکا د نېشنل پبلیک راډیو فوټوخبريال او د هغه د ژباړن وژنه په سختو ټکو غندلې ده.
له ارګه نن دوشنبه په خپره شوې خبرپانه کې ویل شوي چې پر ولسي وګړو بریدونه د ټولو اسلامي ارزښتونو او نړیوالو قوانینو سرغړونه ده او په هېڅ صورت سپیناوی نه شي کېدلای.
ولسمشر غني همدارنګه ټينګار کړی چې د افغانستان اساسي قانون په چوکاټ کې به د قانون حاکمیت، اسلامي او ډموکراتیکو ارزښتونو د خوندیتوب لپاره ټولې هڅې وکړي.
ډېويډ ګيلکي چې ايوارډ ګټلى عکاس او ويډيو ايډيټر و، له خپل ژباړن ذبيح الله تمنا سره پرون یکشنبه هغه مهال ووژل شو، چې د هلمند ولايت مارجې ولسوالۍ ته نږدې د ملي اردو پر هغې قطعې چې دوى ورسره سفر کاوه، حمله وشوه.
له ٢٠٠١م کال راهيسې په افغانستان کې شپږويشت خبريالان وژل شوي دي.