د لاسرسي ځای

'که سفري اسناد نه لرئ پر تورخم نه شی تېرېدلی'


پر ډیورنډ کرښه له تورخم دروازې هره ورځ نژدې شل زره کسان چې ډېری یې پښتانه افغانان ته تګ راتګ کوي

پر ډیورنډ کرښه له تورخم دروازې هره ورځ نژدې شل زره کسان چې ډېری یې پښتانه افغانان ته تګ راتګ کوي

د خېبرپولیټیکل چارواکي وايي، د جون له لومړۍ نېټې به پر تورخم دروازه د افغانستان هېڅ یو وګړی د سفري اسنادو پرته پاکستان ته نه شي ورننوتلی.

له مشال راډيو سره په خبرو کې د پولیټیکلۍ انتظامیې چارواکو وویل چې دوه ورځې وړاندې ورته افغان سرحدي چارواکو خواست کړی وو چې تر روژې میاشتې دې دغه نېټه وغځوي خو تر اوسه ورته د اسلام آباد له لوري لا څه نه دي ویل شوي، او دغه امر به برقرار وي.

بېګا ماښام اېف سي ځواک په تورخم کې پر لاوډ سپیکرو اعلانونه وکړل چې د مې په یودېرشمه نېټه د پاکستاني چارواکو له خوا ورکړې شوې آخري موده ختمه شوې ده او اوس به یوازې هغو افغان وګړو له په تورخم دروزاه د تګ راتګ اجازه ورکوي چې پاسپورټ او ویزا ورسره وي.

د تورخم پولیټیکل چارواکي وایي چې له نن سهاره (شورو ورځ)کسټم، امیګرېشن او نورې سرکاری ادارې او تجارتي مرکزونه خلاص دي.

خو قانوني سفري اسناد نه لرونکي ځینې په لسګونه کسان د ډیورنډ کرښې هغې غاړې ته ایسار دي او پاکستان ته نه شي ننوتلی.

پر دې ټول صورتحال لا هم افغان چارواکو څه نه دي ویلي.

یاده دې وي د مې په لسمه(۱۰) نېټه د پاکستان او افغان امنیتي ځواکونو ترمنځه په تورخم کې د ډیورنډ کرښې دې غاړې ته د خاردار تار لګولو په سر د راپورته شوې لانجې له امله پینځه ورځې د تورخم لاره تړل شوې وه او او دواړو خواوو ته په زرګونه خلک یسار ول او ناورغه خلک یې له ستونزو سره مخامخ کړي ول.

د مې په څوارلسمه نېټه (۱۴) په اسلام آباد کې د افغان سفیر عمر زاخېلوال د پاکستان پوځ له مشر راحیل شریف سره لیدو وروسته د تورخم دروازه بیرته پرانستل شوه.

چارواکي وایي چې په تورخم دروازه د ورځې خوا او شا شل زره کسان تګ راتګ کوي او په میلیونونه روپیو تجارت پرې کېږي، خو له تېرې څه مودې راهیسې په تورخم کې له خلکو سره د سختۍ کولو له وجې دغه تګ راتګ کم شوی دی، او هم ورسره دوه اړخیزه سوداګري اغېزمنه شوې ده.

XS
SM
MD
LG