یو انتظامي چارواکي مشال ریډیو ته وویل اندېښنه دا ده چې ځيني نور مزدوران به هم په کان کې بند پاې وي چې د راويستلو لپاره يې کار روان دی. دغه پېښه د هفتې ماښام شاوخوا شپږ بجې په ډولې سیمه کې هغه وخت وشوله کله چې پر مزدورانو د سکرو کان راوښويد.
د چارواکو په خبره د سکرو په دې کان کې خوا او شا ديرش مزدوران وو چې لس کسان په زخمي حالت کې راويستل شوي اوس تر درملنې لاندې دي.
چارواکي وايي د پنځو مزدوران حالت ښه نه وو او هغوی یې له لومړۍ درملنې وروسته کوهاټ ته ليږلي دي. په مړو او ژوبلو کې زیات مزدوران د سوات د شانګلې سیمې دي او د چارواکو په وينا يې د سکرو راويستلو يوې شخصي کمپنۍ سره کار کاوه.
ډولي سیمه د کوزې اورکزو برخه ده. دلته د سکرو ګڼ کانونه موجود دي چې په سلګونو مزدوران پکې کار کوي. دلته پخوا هم ورته پېښې شوي او مزدورانو پکې ژوند له لاسه ورکړی دی. د ۲۰۱۵ کال په لومړۍ مياشت کې د دوو کانونو د راغورځېدو له وجې نهه مزدوران وژل شوي وو.
همداراز په ۲۰۱۴ کال کې د يو کان پريوتلو له وجې درې کسان مړه او دوه زخميان شوي وو.
