د لاسرسي ځای

د ممتاز قادري ملاتړو د رسنيو پر دفترونو بريدونه کړي


تر دې مخکې لاهور، اسلام اباد او پېښور کې هم ورته مظاهرې شوي وي

تر دې مخکې لاهور، اسلام اباد او پېښور کې هم ورته مظاهرې شوي وي

قهرجنو مظاهره چيانو د پاکستان د پنجاب صوبې د پخواني ګورنر سلمان تاثير د وژونکي ممتاز قادري د پانسۍ په ضد پرون د سند په حيدراباد او کراچۍ کې مظاهرې او د ځينو رسنيو پر دفترونو بريدونه کړي دي.

د سند صوبې په حيدر اباد او کراچۍ کې دا مظاهرې تر هغه وروسته شوي چې د پاکستان حکومت له مطبوعاتو غوښتي وو چې د ممتاز قادري د پانسۍ مسله دې ډېره نه څېړي.

د حيدر اباد يو خبريال فیاض اعوان مشال ريډيو ته پرون د جمعې په ورځ وويل چې مظاهره چيانو پرون په پريس کلب کې د دفترونو چوکۍ ماتې کړي او ځايي خبريالان يې ووهل.

هغه زياته کړه: ((کله چې مظاهره چيان راننوتل نو شل خبريالان دلته په پريس کلب کې موجود وو. دري خبريالان زخمي شول او د پريس کلب دننه ډير شيان مات شول. دوی ويل چې مطبوعات ولې د ممتاز قادرۍ د پانسۍ خلاف راولاړ شوو کسانو ته پوښښ نه ورکوي.))

د پاکستان حکومت د تيرې دوشنبې په ورځ په اډياله جېل کې ددې هېواد د پنجاب صوبې د پخواني ګورنر يا والي سلمان تاثير وژونکى ممتاز قادري په دار وځړاوه.

د پاکستان د ځينو مذهبي ګوندونو غړيو د جمعې په ورځ په کراچۍ او حيدراباد سربېره ددې هېواد په بېلابېلو سيمو کې مظاهرې وکړې او ممتاز قادري ته يې د پانسي سزا ورکولو له امله پر حکومت نيوکه وکړه.

د کراچۍ پريس کلب عمومي سيکريتري، ای، ايچ اخونزاده مشال ريډيو ته پرون وويل چې مظاهره چيانو نمايش څلور لارې سره نيزدې د "اج"په نامه د يوه شخصي تلويزيون پر دفتر بريد وکړ. نوموړي وويل چې وروسته پوليسو د ياد پريس کلب امنيت ټينګ کړ.

په عين حال کې د کراچۍ ښار د پوليسو يوه چارواکيو ارشاد سومرو ايکسپريس ټريبيون ورځپاڼې ته ويلي، چې قهرجنو مظاهره چيانو په دې ښار کې پر يوه رسنيز دفتر د بريد پر مهال ځينو موټرو ته هم زيان رسولى دى.

له بلې خوا د پاکستان وزير اعظم نواز شريف د مظآهرې پر مهال د رسنيو پر دفترونو او موټرو بريدونو په کلکه غندلي او اړوندو ادارو ته يې د تحقيقاتو امر کړى دى.

د نوموړي له دفتره په يوه خپور شوي بيان کې راغلي: "حکومت د بيان پر ازادۍ يقين لري او دا ډول بريدونه د غندلو وړ دي."

ممتاز قادري، چې دسلمان تاثير د دولتي ساتونکيو په ډلو کې شامل و، د ٢٠١١ م کال د جنورۍ په څلورمه نېټه هغه وخت د اسلام اباد په کوهسار مارکېټ کې پر سلمان تاثير ناتاره ډزې وکړې او هغه يې وواژه، چې نوموړى له يوه ريسټورانټه د راوتلو په حال کې و.

د يادونې وړ ده، چې په اسلام اباد کې د ترهګرۍ ضد عدالت په ٢٠١١م کال کې ممتاز قادري ته د مرګ سزا اورولې وه.

XS
SM
MD
LG