په شام کې وروستی اوربند چې د روس او امریکا په مرسته رامنځته شوی وو ، په دغه هېواد کې کړکېچونه تر ډېره راکم کړه خو دواړه لوري په پرله پسې ډول یو بل د دغه اوربند په سرغړونه تورنوي.
د شام ولسمشر بشارالاسد په یوې مرکې کې ویلي چې دی به د دې اوربند د عملي کېدو او موثریت لپاره تر خپله وسه هڅه وکړي.
نوموړي ويلي، د هغو کسانو لپاره به چې وسله پر ځمکه ږدي، په بشپړ ډول بښنه په پام کې ونیول شي.
روس وایې په تیرو ۲۴ ساعتونو کې یې په ټول هیواد کې د اوربند د سرغړونې پنځلس پيښې ثبت کړي دي.
د روس د بهرنیو چارو وزیر سرګي لاوروف له ترکیې سره د شام د پولو د بندولو غوښتنه کړې ده، تر څو د ده په خبره ترهګرو ډلو ته د پوځي اکمالاتو لاره وتړل شي.
په عين حال کې فرانس د حکومت مخالفینو تر واک لاندې سیمو کې د شام د رژیم او د روس د بریدونو په اړه اندېښنه ښودلې ده.