ټاکل شوې ده چې په سوریه کې سبا ته د اوربند موافقه عملي شي.
ولسمشر باراک اوباما د پنجشنبې پر ورځ له خپلو امنیتي سلاکارانو سره له کتنې وروسته وویل نړۍ به وویني چې روسیه او متحدان يې د اوربند موافقې ته درناوی کوي او کنه.
نوموړي وویل دا اوربند د روسيي او د شام د رژیم ازمیښت دی څو په ډاګه شي چې ایا ماسکو او دمشق د دغې پینځه کلنې کورنۍ جګړې د سوله يیز حل غوښتونکي دي او که څنګه.
اوباما زياته کړه، په شام کې به په ځینو سیمو کې جګړه دوام وکړي ځکه چې داعش او د القاعده سره تړلې النصره وسله والې ډلې د اوربند په موافقه کې شاملې نه دي.
