د افغانستان ولسمشر لومړی مرستیال جنرال عبدالرشید دوستم هغه اوازې ناسمې بللې دي چې ګنې د ملي وحدت له حکومت ګوښه شوی دی.
ښاغلي دوستم نن (چارشنبه) د ځوانانو یوې غونډې ته وویل، که څه ځينې نیوکې لري، خو له حکومته د لېرې کیدو راپورونه یې رد کړه.
جنرال دوستم زیاته کړه:
"ځينې خلک وایي چې جنرال دوستم له حکومته ګوښه شوی او یا یې واټن نیولې. زه به څنګه ګوښه کېږم او څنګه به ليرې کېږم. دولت زموږ دی، موږ یې زحمت ګاللی او ما یې په جوړولو کې اساسي رول لوبولی دی."
وړاندې د جنبش اسلامي ویاند بشیراحمد تینج ازادي راډیو ته ویلي ول چې ښاغلی دوستم د ملي وحدت حکومت له مشرانو ځکه خوابدی دی چې د هغه په باور حکومتي مشرانو هغو کسانو ته چې دا نظام یې رامنځ ته کړی، پاملرنه نه کوي.